2019,ᒥ ᓄᓇᕗᒻᒥ ᒪᒥᐊᕐᓂᐅᓚᐅᕐᐳᖅ

2019,ᒥᓄᓇᕗᒻᒥ ᒪᒥᐊᓐᓂᖃᓚᐅᕐᑐᑦ, ᐱᖓᓱᐃᓕᖓᔪᓂᒃ ᒪᒥᐊᒍᑕᐅᒋᐊᓕᑐᖄᓗᓐᓂᒃ ᐅᒡᒍᐊᕐᓂᒃᑯᑦ ᐊᒻᒪ ᐊᕐᓱᕈᕐᑎᑕᐅᓂᕕᓂᖏᓐᓄᑦ ᐃᓄᐃᑦ ᒐᕙᒪᑐᖃᒃᑯᓐᓄᑦ ᐊᕐᓱᕈᕐᓯᒪᓂᖏᓐᓄᑦ. ᔭᓄᐊᕆ, ᑲᓇᑕᒥ ᐃᓄᓕᕆᔨᑐᖃᒃᑯᑦ ᒥᓂᔅᑕᖓ ᑲᓚᐃ ᐱᓂᑦ ᐊᕐᕕᐊᓄᐊᓚᐅᕐᑐᖅ ᒪᒥᐊᒋᐊᕐᑐᕐᓱᓂ ᐊᕼᐃᐊᕐᒥᐅᓄᑦ, ᐃᓄᓐᓄᑦ ᓄᓇᒥᐅᑕᐅᑎᓪᓗᒋᑦ ᓅᑕᐅᓂᕕᓂᖏᓐᓄᑦ ᒐᕙᒪᒃᑯᓐᓄᑦ ᕿᒪᐃᓪᓗᑎᒃ ᓄᓇᒥᓂ ᐊᖑᓇᓱᐊᕐᕕᒥᓂᓪᓗ I Ennadai Lake,ᒥ 1940,ᖏᓐᓂ ᐊᒻᒪ 50,ᖏᓐᓂ.

ᑲᓇᑕᐅᑉ ᐊᖓᔪᖅᑳᖓᓐ ᔭᔅᑕᓐ ᑐᕉᑐ ᐃᖃᓗᓐᓄᐊᓚᐅᕐᑐᖅ ᒪᕐᔨᒥ ᒪᒥᐊᒍᔾᔨᒋᐊᕐᑐᕐᓯᒪᓪᓗᓂ ᒐᕙᒪᑐᖃᒃᑯᓐᓂ ᑲᒪᑦᓯᐊᕐᓯᒪᖏᓐᓂᖏᓐᓄᑦ ᐳᕙᓪᓗᓐᓇᕐᑎᓪᓗᒍ ᐊᕐᕌᒍᑦ 1940,ᓂᑦ 1960,ᓄᑦ, ᐃᓄᐃᑦ ᐊᐅᓪᓚᕐᑎᑕᐅᖃᑦᑕᓚᐅᕐᓯᒪᒻᒪᑕ ᐳᕙᓪᓗᒋᐊᕐᑐᕐᑎᓪᓗᒋᑦ, ᐃᓚᖏᑦ ᐊᒥᓱᑦ ᐅᑎᓚᐅᕐᓯᒪᓇᑎᒃ ᓄᓇᒥᓄᑦ.

ᐆᒍᓯᑎᒥ, ᐃᖃᓗᓐᓂ, ᑭᐅᕆᓕᓐ ᐱᓂᑦ ᒪᒥᐊᓐᓂᖃᓚᐅᕐᑐᖅ ᕿᑭᕐᑕᓂ ᐃᓄᓐᓄᑦ ᑭᒡᒐᕐᑐᕐᓱᓂ ᒐᕙᒪᑐᖃᒃᑯᓐᓂᒃ ᐱᔾᔪᑎᖃᕐᓱᓂ ᒐᕙᒪᐃᑦ ᐊᐅᓚᑦᓯᒍᓯᑐᖃᖏᑦ ᐊᑐᓕᕐᑎᑕᐅᓕᕐᓯᒪᓂᖏᓐᓄᑦ 1950,ᓂᑦ 1975,ᒧᑦ, ᐊᒻᒪ ᐱᖃᓯᐅᑎᓪᓗᒋᑦ ᕿᒻᒥᓂᒃ ᑐᖁᕋᐃᓂᕕᓂᖅ ᐊᒻᒪ ᐃᓚᒌᓂᒃ ᐊᕕᑦᑐᐃᖃᑦᑕᕐᓯᒪᓂᕐᒧᑦ.

ᑕᒪᐃᑎᒍᑦ, ᐃᓕᑕᕐᓯᓂᖃᓚᐅᕐᑐᖅ ᒐᕙᒪᐃᑦ ᐱᓕᕆᔾᔪᓯᑐᖃᖏ ᐊᐅᓚᑦᓯᒍᓯᐅᑎᓪᓗᒋᑦ “ᐃᒃᐱᒋᔭᐅᑦᓯᐊᕐᓯᒪᖏᓐᓇᑦᓯ, ᑐᓐᖓᓱᑦᑎᑕᐅᓇᓯ, ᐊᒻᒪ ᐃᒃᐱᒋᔭᐅᑦᓯᐊᕋᓯ ᑕᐃᒪᐃᑕᐅᒋᐊᖃᕐᑎᓪᓗᓯ,” ᐅᖃᓚᐅᕐᑐᖅ ᐱᓂᑦ ᒪᕐᔨᒥ.

ᑲᓇᑕᐅᑉ ᒐᕙᒪᒃᑯᖏᑦ ᐅᑭᐅᕐᑕᕐᑐᒧᐊᑲᑕᓚᐅᕐᑐᑦ ᐱᔾᔪᑎᖃᕐᓱᑎᒃ ᑮᓇᔭᕐᑖᕐᑎᑦᑎᒥᕐᒧᑦ ᐊᒻᒪ ᒪᓕᒐᓕᕆᓂᕐᒧᑦ ᐱᔾᔪᑎᖃᕐᑐᑐᓂᒃ ᑐᓴᕐᑎᑦᓯᒋᐊᕐᑐᕐᓱᑎᒃ, ᑭᓯᐊᓂ ᓂᕈᐊᕐᑕᐅᕋᑖᕐᓯᒪᔪᑦ ᓄᑖᓄᑦ ᓂᐅ ᑎᒥᑯᕌᑎᒃᑯᓐᓄᑦ ᑭᒡᒐᕐᑐᕐᑎ ᒧᒥᓛᖅ ᖃᖅᑲᖅ ᓂᕈᐊᕐᑕᐅᓚᐅᕐᒪᑦ ᓄᓇᕗᒻᒥᐅᓄᑦ ᑭᒡᒐᕐᑐᕐᑎᕆᔭᐅᓂᐊᓕᕐᑎᓪᓗᒋ ᐋᑐᕗᐊᒥ. ᑭᒡᒐᕐᑐᕐᑎᐅᓂᐊᕐᑐᖅ NDP,ᑯᑎᒍᑦ ᐅᑭᐅᕐᑕᕐᑐᒥᐅᑕᓕᕆᓂᕐᒧᑦ, ᑲᓇᑕᒥ ᐅᑭᐅᕐᑕᕐᑐᒥ ᐱᕙᓪᓕᐊᔪᓕᕆᓂᕐᒧᑦ ᓂᐱᐅᓗᓂ ᐊᒻᒪ ᑐᓪᓕᕆᔭᐅᓗᓂ ᓄᓇᒥᐅᑕᓕᕆᓂᕐᒧᑦ ᐱᔪᑎᓕᓐᓄᑦ.

ᖃᖓᑕᔫᑦ Canadian North ᐊᒻᒪ First Air ᑲᑎᑕᐅᓚᐅᕐᒪᑕ ᐊᐅᓚᑦᓯᖃᑎᒌᓐᓂᐊᓕᕐᑎᓪᓗᒋᑦ, ᐃᒫᒃ ᐃᑲᔪᕆᐊᕈᑕᐅᒐᔭᕐᑎᓪᓗᒋ ᐃᑭᒪᕙᑦᑐᓄᑦ ᐃᓂᒃᓴᖃᓂᕐᓴᐅᓂᕐᒧᑦ, ᖃᖓᒃᑯᓪᓗ ᐃᖏᕐᕋᖃᑦᑕᕋᔭᕐᓂᖏᓐᓄᑦ ᐊᒻᒪ ᐋᖅᑭᒋᐊᕐᓗᒋᑦ ᐅᖃᓕᒫᒐᒃᓴᑦ ᖃᖓᑕᔫᒥ, ᒪᓕᓪᓗᒍ ᓄᑖᖅ ᐊᐅᓚᑕᐅᓂᖏᓐᓄᑦ ᐊᖓᔪᖅᑳᖅ ᐊᒻᒪ ᐅᖃᕐᑎ, ᑯᕆ ᐊᕗᕆ.

2019,ᒥ ᐊᕐᕌᒍᒋᔭᐅᓚᐅᕐᒪᑦ ᓯᓚᕐᔪᐊᒥ ᐊᕐᕌᒍᒋᔭᐅᑎᑕᐅᓪᓗᓂ ᓄᓇᖃᖅᑳᕐᓯᒪᔪᑦ ᐅᖃᐅᓯᖓᓄᑦ ᓴᖅᑭᑕᐅᓪᓗᓂ ᔪᓇᐃᑕᑦ ᓴᐃᓴᓐᒥ, ᐊᒻᒪ ᐃᓄᑦᑎᑐᑦ ᐅᖃᐅᓯᖃᓂᕐᒧᑦ ᐱᔪᓐᓇᐅᑏᑦ ᓱᓕ ᐅᖃᐅᓯᐅᖏᓐᓇᕐᑐᑦ ᐃᓱᒫᓗᒍᑎᒋᔭᐅᓪᓗᑎᒃ, ᓱᓕ ᐊᒥᒐᕐᓴᒻᒪᕆᒻᒪᑕ ᐃᓄᑦᑎᑐᑦ ᐅᖃᓕᒪᒍᓐᓇᕐᓗᑎᒃ ᐃᓕᓴᐃᔨᓂᒃ ᐊᒻᒪ ᐃᑲᔪᑕᐅᔾᔪᑎᑎᒍᑦ ᐊᑐᐃᓐᓇᐅᒐᑎᒃ ᐃᓄᑦᑎᑐᑦ.

ᐱᔾᔪᑎᒋᑎᓪᓗᒍ ᐱᔭᓪᓕᐊᔪᓕᕆᓂᖅ, ᑖᑯᐊ Agnico Eagle ᐅᔭᕋᓐᓂᐊᕐᑎᖏᑦ ᒪᑐᐃᕐᓯᓚᐅᕐᒪᑕ ᐊᒪᕈᒃᑯᓐᓂᒃ, ᓴᑕᓚᐃᒃᑰᕐᑐᓂᒥᑭ ᒎᓗᓕᕆᓂᕐᒧᑦ ᖃᒪᓂᑦᑐᐊᑉ ᓴᓂᐊᓂ. TMAC Resources Inc.,ᑯᑦᐊᑲᐅᖏᓕᐅᑎᖃᑲᑕᓚᐅᕐᑐᑦ ᐊᑲᐅᓈᕐᓱᑎᓪᓗ ᐃᓚᖓᒍᑦ: ᑲᒻᐸᓂᐅᔪᖅ ᐅᖃᖅᓯᒪᔪᑦ ᐊᖏᔫᖏᑦᑐᒥᒃ ᑮᓇᐅᔭᓕᕐᓯᒪᒐᒥᒃ ᒪᕐ ᕈᓐᓂ ᐊᕌᒍᓐᓂ ᒎᓗᓐᓂᐊᕐᑎᓪᓗᒋᑦ, ᑭᓯᐊᓂ ᑭᖑᓂᐊᒍᑦ ᑐᓴᕐᑎᑦᓯᓕᓚᐅᕐᒥᔪᑦ ᐊᑐᕈᓐᓇᔾᔮᖏᓐᓂᕋᕐᓱᒋᑦ ᑐᕌᕐᑕᒥᓂᒃ ᑮᓇᐅᔭᓕᐅᕐᓂᒃᑯᑦ 2019,ᒥ.

ᓄᓇᕗᒻᒥ ᐃᒪᓕᕆᓂᕐᒧᑦ ᑲᑎᒪᔨᑦ ᑭᖑᓪᓕᕐᐹᕐᓯᐅᑎᓂᒃ ᑐᓵᑎᑦᑕᐅᓂᐊ ᐅᔭᕋᓐᓂᐊᕐᕕᐅᑉ Baffinland Iron ᐅᔭᕋᓐᓂᐊᕐᑎᖏᑦ ᓄᖅᑲᖅᑎᑦᓯᑳᓪᓚᓚᐅᕐᒪᑕ ᑲᑎᒪᓂᕐᒥᒃ ᓄᕕᐱᕆᒥ, ᐱᔾᔪᑎᖃᕐᓱᑎᒃ ᐃᓄᐃᑦ ᑲᑐᔾᔨᖃᑎᒌᖏᑕ ᐃᓱᒫᓗᒍᑎᒋᔭᖏᓐᓂᒃ. ᑭᐅᔾᔪᑎᒋᓪᓗᒍ, ᑖᒃᑯᐊ Baffinland ᓄᖅᑲᕐᑎᑦᓯᓯᒪᓕᕐᒪᑕ 600ᓂᒃ ᑳᓐᑐᕌᕐᑐᓂᒃ ᐃᖅᑲᓇᐃᔭᕐᑎᖏᓐᓂᒃ ᐸᕐᓇᐃᒋᐊᓕᓐᓂᒃ ᐊᖏᓪᓕᑎᑦᓯᒋᐊᕐᓂᕐᒧᑦ ᐅᔭᕋᓐᓂᐊᕐᕕᒻᒥ ᐅᔭᕋᓐᓂᐊᕐᕕᒻᒥ, Mary River,ᒥ.

ᐅᑯᐊ ᑕᕝᕙ ᓄᓇᑦᓯᐊᒃᑯᑦ ᑐᓴᒐᒃᓴᐅᓂᕐᐸᐅᖃᑕᐅᓚᐅᕐᑐᑦ ᐃᖅᑲᐅᒪᓇᓗᐊᖑᐊᕐᑐᑦ ᓄᓇᕗᒻᒥ ᑐᓴᒐᒃᓴᓂᑦ 2019:ᒥ:

ᐊᒃᓴᕐᓃᑦ ᐸᓖᓯᒃᑯᑦ ᐊᓪᓚᕕᖓᑕ ᖁᓛᓂ ᐃᖃᓗᓐᓂ, ᓄᓇᓄᑦ, ᐱᐊᔪᐊᓐᓂ ᔭᓄᐊᕆ 16,ᒥ. (ᐊᔾᔨᓕᐊᖓ ᐱᓪ ᕗᐃᓕᐊᒻ)

ᔭᓄᐊᕆ 

• ᔪᓇᐃᑎᑦ ᓇᐃᓴᓐ (United Nations) ᐊᕐᕌᒍᖓᓂ 2019,ᒥᒃ ᑕᐃᓯᓚᐅᕐᑐᑦ ᓯᓚᕐᔪᐊᒥ ᓄᓇᖃᖅᑳᕐᓯᒪᔪᓄᑦ ᐊᕐᕌᒍᒋᔭᐅᑎᓪᓗᒍ, ᐱᔾᔪᑎᒋᓪᓗᒋᑦ ᐊᓯᐅᔨᔭᐅᑦᑕᐃᓕᑎᑦᓯᓂᖅ, ᓴᖅᑭᒋᐊᕐᑎᑦᓯᒋᐊᖃᓂᖅ ᐊᒻᒪ ᑲᔪᖏᕐᓱᐃᒋᐊᖃᓂᖅ ᓯᓚᕐᔪᐊᒥ ᓇᓚᐅᒃᓵᕐᑕᐅᓯᒪᓂᖏᑎᒍᑦ ᐅᓄᕐᓂᓕᓐᓂ 7,000,ᓂᒃ ᓄᓇᖃᖅᑳᕐᓯᒪᔪᑦ ᐅᖃᐅᓯᖏᓐᓂᒃ – 2,680,ᖑᔪᑦ ᑖᒃᑯᓇᖓᑦ ᐅᖃᐅᓯᕐᒥᓂᒃ ᐊᓯᐅᔨᑐᐃᓐᓇᕆᐊᓖᑦ.
• ᐊᖓᔪᖅᑳᒻᒪᕆᒃ ᐊᒫᓐᑕ ᔫᓐᔅ ᓯᕗᓪᓕᕐᐹᓯᐊᖑᓪᓗᓂ ᐊᕐᓇᐅᓪᓗᓂ ᓄᓇᕗᒻᒥ ᐸᓖᓯᒃᑯᓐᓄᑦ ᖁᑦᓯᓐᓂᕐᐹᓄᖑᖃᑕᐅᔪᒧᑦ ᐸᓖᓯᐅᒥᓂᕐᒧᑦ ᐃᓕᔭᐅᓚᐅᕐᑐᖅ ᔭᓄᐊᕆ 21,ᒥ. ᔫᓐᔅ 8,ᕆᔭᐅᓕᕐᑐᖅ ᐅᑭᐅᕐᑕᕐᑐᒥ ᐊᖓᔪᖅᑲᐅᒋᐊᖅ ᓄᓇᓄᒻᒥ ᐸᓖᓯᓄᑦ, ᐊᒻᒪ ᑕᐃᔭᐅᓂᖃᕐᓱᑎᒃ “(V” Division) ᐱᓕᕆᕕᖓ.
• ᔭᓄᐊᕆ 22,ᒥ, ᐃᓄᓕᕆᔨᑐᖃᒃᑯᑦ ᒥᓂᔅᓴᑕᖓ ᑭᐅᕈᓪ ᐱᓂ ᐊᕐᕕᐊᒧᐊᓚᐅᕐᑐᖅ ᒪᒥᐊᒋᐊᕐᑐᕐᓱᓂ 21,ᓄᑦ ᓅᑦᑕᐅᔪᕕᓂᕐᒧᑦ ᐊᕼᐃᐊᕐᒥᐅᕕᓂᕐᓄᑦ, ᐃᓚᒌᓄᑦ ᐊᒻᒪ ᓄᓇᓕᓐᓄᑦ. “ᒪᒥᐊᑉᐳᒍᑦ” ᐅᖃᓚᐅᕐᑐᖅ ᐱᓂᑦ. ᑲᑎᓐᖓᔪᑦ $5 ᒥᓕᐊᓂᒃ ᑐᓂᔭᐅᓪᓗᑎᒃ ᐊᑐᕗᐊᒥᑦ 2018,ᒥ.
• ᖃᒪᓂᑦᑐᐊᑉ ᒪᐃᔭᖓ ᓵᓐ ᐊᑦᑐᖓᓛ ᐊᓄᓪᓚᑦᓯᕕᒻᒧᐊᕐᑕᐅᓚᐅᕐᒪᑦ 12,ᓄᑦ ᑕᖅᑭᓄᑦ ᖁᓄᔪᕐᓂᐊᕐᓯᒪᓂᕐᒧᑦ ᑎᓯᐱᕆᒥ. ᐊᑦᑐᖓᓛ ᓄᖅᑲᕈᒪᓚᐅᖏᑦᑑᒐᓗᐊᖅ ᐃᓂᒥᓂᑦ ᑭᓯᐊᓂ ᓂᕈᐊᕐᓂᒃᑯᑦ ᐲᕐᑕᐅᓚᐅᕐᑐᖅ ᑲᑎᒪᔨᑦ ᑲᑎᒪᑎᓪᓗᒋᑦ ᐅᒃᑐᐱᕆ 28,ᒥ ᓄᓇᓕᓐᓂ.

ᕕᕗᐊᕆ

• ᓄᓇᕗᒻᒥ ᐱᖓᓱᒋᓕᕐᑕᖓᓂᒃ ᐳᕙᓪᓗᓐᓂᕐᒧᑦ ᖃᐅᔨᓴᕐᐸᓪᓕᐊᓕᓚᐅᕐᑐᑦ ᐱᒋᐊᕐᓱᑎᒃ ᑭᓐᖓᕐᓂ ᕕᕗᐊᕆ 12,ᒥ, ᐸᕐᓇᒃᓯᒪᓪᓗᑎᒃ ᖃᐅᔨᓴᕆᐊᖅ ᐃᓄᓕᒫᖏᓐᓂᒃ 1,500,ᓂᒃ ᐳᕙᒥᒍᑦ ᐊᑲᐅᖏᓕᐅᕈᑎᖃᒪᖔᑕ. ᓱᓕ ᐳᕙᓪᓗᓐᓂᖅ 50,ᕕᓪᓗᒍ ᐅᓄᕐᓂᕐᓴᐅᒻᒪᑕ ᓄᓇᕗᒻᒥ ᑲᓇᑕᐅᑉ ᐊᓯᓕᒫᖏᑕ ᓴᓂᐊᓂ. ᖃᓄᐃᖏᑦᓯᐊᕋᓱᐊᕐᓂᓕᕆᔨᒃᑯᑦ ᐅᖃᓚᐅᕐᖏᑦᑐᑦ ᖃᑦᓯᓂᒃ ᐳᕙᓪᓗᑦᑐᓂᒃ ᖃᐅᔨᓯᒪᓕᕐᒪᖔᕐᒥᒃ ᑭᓐᖓᕐᓂ. ᑭᓯᐊᓂ ᖃᐅᔨᓴᕐᓂᒃᑯᑦ 80 ᐳᕐᓯᓐᓗᐊᖏᓐᓂᒃ ᖃᐅᔨᓴᕐᓯᒪᔪᑦ, ᐅᕐᓯᒪᔪᑦ ᑐᓴᕈᑎᑎᒍᑦ.
• ᓄᓇᕗᒻᒥ ᐃᓕᓴᓕᓵᕐᑐᓄᑦ ᐃᓕᓐᓂᐊᕈᑎᒃᓴᐃᑦ ᓵᓚᒃᓴᕈᑕᐅᓚᐅᕐᐳᑦ ᓯᕗᓪᓕᕐᐸᐅᓪᓗᑎᒃ ᐅᑭᐅᕐᑕᕐᑐᒥᐅᓄᑦ, ᐊᑭᑲᓪᓗᐊᕐᑐᑦ 1 ᒥᓕᐊᓐ. ᐱᕈᕐᕕᒃ: ᐱᕈᕕᒃ ᐃᓕᓴᓕᓵᕐᑐᓄᑦ ᐃᓕᓴᐅᑎᒃᓴᓕᐅᕐᓯᒪᒻᒪᑕ ᓯᕗᓪᓕᕐᐹᒥ ᒥᒃᑎᒪᑕᓕᒻᒥ ᐊᑐᕐᓱᑎᒃ ᑐᓐᖓᕕᖃᓂᒃᑯᑦ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐊᒻᒪ ᐊᓯᖏᓐᓂᒃ.
• ᓄᓇᕗᑦ ᒐᕙᒪᖏᑦ ᐊᖏᓪᓕᒋᐊᕐᑎᑦᓯᓚᐅᕐᑐᑦ ᐃᑲᔪᕈᑎᒃᓴᓂᒃ ᐋᓐᓂᐊᕐᓂᕐᒧᑦ ᐃᖏᕐᕋᒋᐊᖃᓂᕐᒧᑦ ᐱᔾᔪᑎᖏᓪᓗᒍ ᐊᖓᔪᖅᑳᖑᔪᑦ ᕿᑐᕐᖓᒥᓂᒃ ᒪᓕᒍᓐᓇᕐᓯᖁᓪᓗᒋᑦ ᐊᐅᓪᓚᕆᐊᖃᕐᑎᓪᓗᒋᑦ ᕿᑐᕐᖓᖏᑦ ᐱᐊᕋᒥᓂᓪᓗ. ᐋᖅᑭᒋᐊᕐᓯᒪᓕᕐᑐᓂᒃ ᒪᓕᒐᖃᓕᕐᑐᑦ ᒪᓕᑦᑎᖃᕈᓐᓇᕐᓯᖁᓪᓗᒋᑦ ᑕᒪᕐᒥᒃᕿᑐᕐᖓᒃᓴᓖᑦ ᐊᐅᓪᓚᕆᐊᖃᕈᑎᒃ ᓄᓇᒥᓂᑦ ᐃᕐᓂᔭᕐᑐᕐᓗᑎᒃ.
• ᒐᕙᒪᑐᖃᒃᑯᑦ ᑮᓇᐅᔭᓕᐅᓚᐅᕐᑐᑦ $1.6-ᒥᓕᐊᓂᒃ ᐃᑲᔪᕈᑎᒃᓴᓂᒃ ᖃᐅᔨᓴᕐᓂᕐᒧᑦ ᓄᓇᕗᑦ ᑭᕙᓪᓕᖓᓂ ᑕᐅᕗᖓ ᒫᓂᑑᐸᒧᑦ ᐆᖅᒪᖅᑯᑎᓕᖁᕈᒪᓂᕐᒥᒃ ᐊᒻᒪ ᐱᑐᒍᑎᒃᓴᓂᒃ ᐱᓕᕆᓂᕐᒧᑦ.

ᒪᕐᔨ

• ᐃᓐᖏᐅᓯᓕᐅᕐᑎ ᑎᑎᕋᕐᑎᐅᓪᓗᓂ ᓵᓕ ᐸᓂᒍᓂᐊᖅ, ᐊᕐᕌᒍᖃᓕᕐᓱᓂ 72,ᓂ, ᑐᖁᓚᐅᕐᒪᑦ ᒪᕐᔨ 6,ᒥ ᐊᑯᓂᐊᓗᒃ ᖃᓂᒪᓚᐅᕐᓱᓂ. ᖃᑕᐃᑦᑑᓪᓗᓂ ᐃᓄᑦᑎᑐᑦ ᐅᖏᐅᓯᓕᐅᕐᐸᓚᐅᕐᑐᖅ ᐅᑭᐅᕐᑕᕐᑑᑉ ᒥᒃᓵᓄᑦ ᖁᕕᐊᓱᒋᑎᓂᒃ, ᓇᓪᓕᓂᕐᒥᒃ ᐃᓚᒥᓄᑦ ᐊᒻᒪ ᓇᓪᓕᒋᔭᒥᓄᑦ, ᐊᒻᒪ ᓄᓇᕗᒻᒥᐅᓄᑦ ᕿᒪᐃᓚᐅᕐᑐᖅ ᐃᓐᖏᐅᓯᓂᒃ ᐊᒻᒪ ᐃᖅᑲᐅᒪᓇᑦᓯᐊᕐᑐᓂᒃ.
• “ᐅᓪᓗᒥ ᒫᓃᑉᐳᖓ ᐅᖃᕆᐊᕐᑐᕐᓯᒪᓗᖓ ᒪᒥᐊᒋᐊᖅ,” ᑲᓇᑕᐅᑉ ᐅᖓᔪᖅᑳᖓ ᔭᔅᑕᓐ ᑐᕉᑐ ᐅᖃᓚᐅᕐᑐᖅ ᒪᕐᔨ 8,ᒍᑎᓪᓗᒍ ᓵᖏᓐᓂ 100 ᓴᓂᐊᓂ ᐃᓄᐃᑦ ᑲᑎᓐᖓᓪᓗᑎᒃ ᐃᖃᓗᓐᓂ ᓯᓂᑦᑕᕐᕕᐊᓂ, ᐱᔾᔪᑎᖃᕐᓱᓂ ᑲᓇᑕᐅᑉ ᒐᕙᒪᒃᑯᖏᑕ ᐊᐅᓚᑦᓯᓯᐊᓚᐅᖏᓐᓂᖏᓐᓂᒃ ᐃᓄᓐᓂᒃ ᐳᕙᓪᓗᓐᓇᕐᑎᓪᓗᒍ ᐊᑯᓐᓂᖏᓐᓂ 1940 ᐊᒻᒪ 1960 ᐊᕐᕌᒍᐃᑦ.
• ᓄᓇᕗᑦ ᐸᓖᓯᖏᑦ ᕿᓂᕐᓂᕐᒥᒃ ᓄᖅᑲᕐᑎᑦᓯᓚᐅᕐᑐᑦ ᐊᓯᐅᓚᐅᕐᑎᓪᓗᒍ ᐋᒻᐳᕐ ᕈᐃ ᐃᖃᓗᒻᒥᐅᖅ ᐅᖃᕐᓱᑎᓪᓗ ᐃᒫᒃ “ᖃᐅᔨᒪᓕᕐᓱᒍ ᖃᓄᖅ ᐊᑯᓂᐅᑎᒋᔪᖅ ᐊᓯᐅᓯᒪᓕᕐᓂᖓ ᐋᒻᐳᕐ ᐃᓅᒍᓐᓇᕐᐃᕐᑐᒃᓴᐅᒻᒪᑦ.” ᑖᓐᓇ ᐃᓱᒪᓕᐅᕈᑕᑕᐅᓚᐅᕐᑐᖅ ᐃᖃᓗᓐᓂ ᐸᓕᓯᓄᑦ ᐊᒻᒪ ᐃᑲᔪᕐᑎᓄᑦ ᕿᓂᕐᓂᒧᑦ, ᐊᒻᒪ ᕿᓂᕆᐊᓪᓚᓚᐅᕐᓱᑎᒃ ᓄᓇᒥ ᐊᖅᑯᒻᒧᑦ Road to Nowhere, ᕈᐃ ᑭᖑᓪᓕᕐᐹᒥ ᑖᒃᓯᒃᑯᑦ ᕿᒪᑦᑕᐅᓚᐅᕐᓯᒪᒻᒪᑦ ᑕᒃᓯᕐᑎᒧᑦ ᒪᕐᕉᒃ ᐱᓇᓱᐊᕐᕈᓰᒃ ᐊᓂᒍᕐᓯᒪᓕᕐᑎᓪᓗᒋᒃ.
• ᓴᐃᒻᒪᕐᑎ ᓂᕕᖓᓯᒪᑎᑕᐅᒪᐅᕐᑐᖅ ᓄᓇᕗᑦ ᒪᓕᒐᓕᐅᕐᕕᐊᑕ ᓯᓚᑖᓂ ᐃᖃᓗᓐᓂᒃ ᐅᑭᐱᔭᖃᕐᓱᑎᒃ ᑐᖁᓚᐅᕐᑐᒥᒃ ᔪ ᐃᓄᒥᒃ, ᑭᒡᒐᕐᑐᕐᑎᐅᓪᓗᓂ ᒪᓕᒐᓕᐅᕐᑎᒃᑯᑎᒍᑦ ᑐᓄᓂᕐᒥᒃ ᐊᒻᒪ ᐅᖃᕐᑎᐅᓚᐅᕐᑐᖅ ᓄᓇᕗᒻᒥ ᒪᓕᒐᓕᐅᕐᑎᓄᑦ. ᐊᑯᓂᐅᖏᑦᑐᖅ ᖃᓂᒪᓚᐅᕐᓱᓂ, ᐃᓄᒃ, ᐊᕐᕌᒍᖃᕐᓱᓂ 61,ᓂᒃ ᑐᖁᓚᓚᐅᕐᑐᒻ, ᒪᕐᔨ 29,ᒥ ᐋᑐᕗᐊᑉ ᐋᓐᓂᐊᕕᐊᓂ.

ᕇᑦ ᑕᑯᒥᓇᑦᓯᐊᓚᐅᕐᑐᖅ, ᓴᓂᐊᓂ ᑲᑕᓖᓐ ᒥᐊᕆᑦ ᐊᒻᒪ ᑖᒻ ᐸᐅᕈ ᓯᐱᓯᒃᑯᓐᓂᑦ ᐊᐱᕐᓯᕐᑕᐅᑎᓪᓗᒋᑦ ᐃᓄᒃᓱᒃ ᐃᓕᓐᓂᐊᕐᕕᐊᓗᐊᓂ ᐃᖃᓗᓐᓂ ᑎᓴᒻᒥᐅᑎᓪᓗᒍ, ᐊᐃᕆᓕ 25, ᑐᓪᓕᕆᓕᕐᑕᖓᓂ ᓄᓇᕗᒻᒥ ᑐᓴᕐᓂᔮᕐᓂᖃᕐᑎᓪᓗᒋᑦ ᐱᓇᓱᐊᕈᓯᓕᒫᒥ. (ᐊᔾᔨᓕᐊᖓ ᑉᑐᕆᓴ ᓚᐃᑦᕗᑦ)

ᐊᐃᕆᓕ

• ᓄᓇᕗᒻᒥ ᓯᕗᓕᕐᑎ ᔫ ᓴᕕᑲᑖᖅ ᐅᖃᐅᓯᖃᓚᐅᕐᑐᖅ ᐊᕐᕌᒍᒋᓕᕐᑕᑦᑎᓐᓂ ᐱᒻᒪᕆᐅᓯᒪᔪᓂᒃ ᐅᖃᓱᓂᓗ ᐃᒫᒃ, “ᖃᐅᔨᒪᓕᕐᑐᒍᑦ ᑲᔪᓯᑦᓯᐊᕐᓯᒪᓂᑦᑎᓐᓂᒃ, ᐱᕈᕐᐸᓪᓕᐊᓯᒪᓂᑦᑎᓐᓂᒃ ᐊᒻᒪ ᓄᖅᑲᐅᔾᔨᒍᓐᓇᖏᓐᓂᑦᑎᓐᓂᒃ ᐱᓕᕆᐊᕆᓇᓱᐊᕐᑕᑦᑎᓐᓂᒃ, ᐊᒻᒪ ᐃᓕᓯᒪᒍᑎᒋᓪᓗᒋᑦ ᐊᒥᓱᓂᒃ ᑕᐃᒪᖓᓂᒃ 1999,ᒥ. ᑕᐃᑦᓱᒪᓂᕐᒥᒃ ᑲᔪᓯᑦᓯᐊᕐᓯᒪᔪᒻᒪᕆᐅᔪᒍᑦ. ᐱᕈᖅᐸᓪᓕᐊᕗᒍᑦ – ᐱᔪᓐᓇᕐᓂᑦᑎᒍᑦ, ᐃᓕᓐᓂᐊᕐᐸᓪᓕᐊᓯᒪᓂᑦᑎᓐᓂᑦ, ᐊᒻᒪ ᐱᓕᕆᖃᑎᖃᓂᒃᑯᑦ ᐱᓇᓱᖃᑎᑦᑎᓐᓂᒃ ᐊᒻᒪ ᐊᓯᖏᓐᓂᒃ.”
• ᓄᓇᕗᒻᒥᐅᑦ ᒫᓐᓇ ᓂᐅᕕᕈᓐᓇᕐᓯᔪᑦ ᓱᐳᕐᑐᕐᓗᓐᓂᒃ ᓱᕐᕋᓇᕐᑐᓂᒃ ᓱᕋᐃᖏᓪᓗᑎᒃ ᒪᓕᒐᕐᓂᒃ ᓂᐅᕐᕈᑎᓕᓐᓂᑦ. ᑎᒥᐅᔪᑦ ᖃᐅᔨᓴᕐᑏᑦ ᑕᐃᔭᐅᓪᓗᑎᒃ Agmedica Bioscience Inc. of Chatham, ᐋᓐᑎᐊᕆᐅᒥ, ᐊᐅᓪᓚᕐᑎᑦᓯᖃᑦᑕᕐᓂᒃᑯᑦ ᓱᕐᕋᓇᕐᑐᓂᒃ ᐅᑭᐅᕐᑕᕐᑐᒧᑦ, ᐊᑐᕐᓱᑎᒃ ᓂᐅᕐᕈᑎᖃᕈᓐᓇᕐᓂᕐᒧᑦ ᓱᕐᕋᓇᕐᑐᓂᒃ ᓇᓗᓇᐃᒃᑯᑕᓂᒃ, ᑕᐃᔭᐅᔪᒥᒃ Vertical, ᐊᒻᒪ ᑕᐃᒪᐃᒍᓐᓇᕐᓯᓚᐅᕐᑐᑦ ᐊᖏᖃᑎᒌᓐᓂᖃᓚᐅᕐᑎᓪᓗᒋᑦ ᓄᓇᕗᒻᒥ ᐃᒥᐊᓗᓕᕆᓂᕐᒧᑦ ᐊᒻᒪ ᓱᕐᕋᓇᕐᑐᓕᕆᓂᕐᒧᑦ ᐃᕕᒐᕐᓂᒃ ᑎᒥᐅᔪᕐᓗ.
• ᓄᓇᕗᒻᒥ ᓄᑖᒥᒃ ᐊᕐᓇᓄᑦ ᑲᑐᔾᔨᖃᑎᒌᑖᓚᐅᕐᐳᑦ, ᓄᓇᕗᒻᒥ ᐃᓄᐃᑦ ᐊᕐᓇᐃᑦ ᑲᑐᔾᔨᖃᑎᒌᖏᓐᓂᒃ, ᐅᕝᕙᓘᓐᓂᑦ (NIWA), ᑲᒪᒋᔭᐅᓪᓗᑎᒃ ᒪᑦᑎᓕᓐ ᕆᐊᑦᕗᕐᑦᒧᑦ, ᐃᖃᓗᓐᓂ ᒪᐃᔭᕆᔭᐅᓚᐅᕐᑐᖅ. ᑖᒃᑯᐊ ᑲᑐᔾᔨᖃᑎᒌᑦ ᑐᕌᒐᖃᕐᑐᑦ ᑲᔪᖏᕐᓱᐃᒋᐊᖅ ᐃᓄᓐᓂᒃ ᐊᕐᓇᓂᒃ ᓯᕗᓕᕐᑎᐅᒧᒃᓴᐅᓂᕐᒧᑦ, ᑲᒪᓂᕐᒧᑦ ᐊᕐᓱᕈᕐᓇᕐᑐᓂᒃ ᓵᕐᓗ ᐃᓚᐃᓐᓈᕐᑕᐅᖏᓐᓂᕐᒥᒃ, ᐱᕙᓪᓕᐊᔪᓕᕆᒍᓐᓇᕐᓂᕐᒥᒃ, ᐊᒻᒪ ᐋᖅᑭᒃᓱᐃᓂᒃᑯᑦ ᐃᑲᔪᕈᑎᒃᓴᓂᒃ ᓯᓚᕐᔪᐊᒥ ᐊᒃᑐᕐᑕᐅᓯᒪᓂᑦᑎᓐᓄᑦ ᖃᓪᓗᓈᑦ ᑕᐃᒪᖓᓂᐊᓗᒃ ᐊᐅᓚᑦᓯᒍᓯᕆᕙᓚᐅᕐᑕᖏᓐᓄᑦ.
• ᐅᓄᕐᓂᕐᓴᐃᑦ 800 ᐅᖁᒪᐃᑦᑐᓂᐊᕈᑎᓂᒃ ᐊᖁᑦᑏᑦ, ᐃᖅᑲᓇᐃᔭᕐᑐᕐᑖᕐᑐᕐᑐᑦ ᐊᖁᑎᓂᒃ, ᐃᓕᓐᓂᐊᕐᓯᒪᔪᓂᓪᓗ ᓂᐅᕕᐊᒃᓴᓕᐅᕐᓂᕐᒧᑦ ᐊᒻᒪ ᐃᖅᑲᓇᐃᔭᕐᑎᓂᒃ ᓄᓇᕗᒻᒥ ᐅᔭᕋᓐᓂᐊᕐᕕᐊᓂ ᓄᓘᔭᓂ ᐋᖅᑭᒃᓱᐃᒋᐊᓪᓚᓚᐅᕐᑐᑦ ᓯᕗᓪᓕᕐᐹᒥ ᐊᖏᖃᑎᖃᕈᑎᒥᓂᒃ Baffinland Iron Mines Corp ᐅᔭᕋᓐᓂᐊᕐᑎᓂᒃ ᒪᓕᓪᓗᒋᑦ Local 793 ᓯᓚᕐᒧᐊᒥ ᑲᑐᔾᔨᖃᑎᒌᖏᓐᓂᒃ ᐊᐅᓚᑦᓯᓂᕐᒧᑦ ᐅᖁᒪᐃᑦᑐᓕᕆᐅᑎᓂᒃ.

ᒪᐃ

• ᐃᒡᓗᓕᒑᕐᔪᒻᒥ ᐃᓅᓂᑯ ᐱᓐᖑᐊᕐᑎᐅᓪᓗᓂ ᐊᒻᒪ ᐃᖃᐃᓴᕐᑎ ᔮᑎ ᔮᓂ ᐃᓴᓗᒃ ᐊᑎᖓ ᑕᐃᔭᐅᓚᐅᕐᑐᖅ ᕿᒥᕐᕈᔨᐅᖃᑕᐅᓂᐊᓂᒃ ᑲᓇᑕᒥ ᕿᒥᕐᕈᐊᒐᓕᕆᓂᕐᒧᑦ ᑎᒥᐅᔪᒧᑦ ᐃᓚᒋᔭᐅᓕᕐᓱᓂ. ᐃᒻᒥᓂᖅ ᐅᖃᖅᑐᖅ “ᓯᓚᒥᐅᑕᐅᕗᖓ ᐊᖑᑕᐅᓪᓗᖓ” ᓯᕗᓪᓕᕐᐸᐅᓪᓗᓂᓗ ᓄᓇᖃᖅᑳᖅᓯᒪᔫᓪᓗᓂ ᐃᓕᔭᐅᓂᖃᕐᑐᖅ ᑕᒪᑐᒧᖓ.
• ᐃᓕᓐᓂᐊᕐᐸᓚᐅᕐᑐᖅ ᑭᕙᓪᓕᐅᑉ ᐃᓕᓐᓂᐊᕐᕕᐊᐅᕙᓚᐅᕐᑐᒥ ᑲᖏᕐᖠᓂᕐᒥ ᐆᒃᑐᕋᓚᑐᖅ ᐃᓕᓪᓕᐊᕐᑎᑕᐅᕙᓚᐅᕐᓂᕐᒧᑦ ᐊᑭᓕᕐᑕᐅᔪᒪᓂᕐᒧᑦ. ᑭᖑᓂᐊᓂ ᔪᓚᐃ 2018,ᒥ ᐃᓱᒪᓕᐅᓚᐅᕈᑎᖃᓚᐅᕐᑎᓐᓇᒋᑦ ᓄᓇᕗᒥ ᐃᖅᑲᕐᑐᐃᕕᒃᑯᑦ ᐆᑦᑐᕆᐊᓪᓚᓐᓂᕐᒧᑦ, ᐊᒻᒪ ᐊᓯᐊᒍᑦ ᒥᑭᓂᕐᓴᒃᑯᑦ ᐃᓱᒪᓕᐅᕈᑕᐅᓚᐅᕐᑎᓪᓗᒍ, ᐃᖅᑲᕐᑐᐃᕕᒃᑯᑦ ᑐᓂᓯᓚᐅᕐᑐᑦ ᐊᑐᓕᖁᔨᔾᔪᑎᒥᒃ ᑕᑕᑎᕆᐊᓕᓐᓄᑦ ᐃᐳᓪ 25, 2019,ᒥ. ᐃᓕᓐᓂᐊᕐᓂᑯᐃᑦ ᑭᕙᓪᓕᕐᒥ ᐃᓕᓐᓂᐊᕕᕕᓂᕐᒥ ᐆᒃᑐᕋᕈᓐᓇᕐᓂᕐᒧᑦ ᐱᕕᒃᓴᖃᕐᐳᑦ ᑎᑭᓐᓇᓱᐊᕐᓂᐊᓂ ᔭᓄᐊᕆ 25, 2020.
• ᖃᒪᓂᑦᑐᐊᑉ ᑭᒡᒐᕐᑐᕐᑎᖓ ᒪᓕᒐᓕᐅᕐᕕᒻᒥ ᐊᒻᒪ ᑐᓪᓕᖓ ᐅᖃᕐᑎᐅᑉ ᓴᐃᒪᓐ ᒥᑦᑐᖑᐊᖅ ᓂᕈᐊᕐᑕᐅᓚᐅᕐᑐᖅ ᐅᖃᖅᑎᐅᓂᐊᓕᕐᑎᓪᓗᒍ ᓄᓇᕗᒻᒥ ᒪᓕᒐᓕᐅᕐᕕᒻᒥ ᓂᕈᐊᕐᓂᒃᑯᑦ. ᓂᕈᐊᕐᓂᖃᓚᐅᕐᒪᑕ ᑐᖁᑳᓪᓚᒻᒪᑦ ᐅᖃᖅᑎᐅᓚᐅᕐᑐᖅ ᔫ ᐃᓄᒃ ᒪᕐᔨᒥ.
• ᑭᖑᓂᐊᓂ ᐊᕐᕌᒍᓕᒫᑉ ᖁᓪᓕᒃᑯᑦ ᓄᓇᕗᒻᒥ ᐊᕐᓇᐃᑦ ᑲᑎᒪᔨᖏᑦ ᓂᐱᖃᕈᑎᖃᓚᐅᕐᑎᓪᓗᒋᑦ, ᑲᓇᑕᐅᑉ ᒐᕙᓄᕐᖓ ᐅᑎᕐᑎᑦᓯᑕᐃᓐᓇᓚᐅᕐᐳᖅ ᐊᐃᒃ ᕼᐊᐅᓕᐅᑉ ᑐᓂᔭᐅᓯᒪᓂᐊᓂᒃ ᑕᐃᒪᓐ ᔪᐸᓕᒥᒃ ᓴᕕᕋᔭᒥᒃ. ᕼᐊᐅᓕ, ᓇᒻᒥᓂᖃᖅᓯᒪᔪᖅ ᐊᑯᓂ ᐃᒡᓗᓕᒻᒥ, ᐅᖃᐅᓯᕆᔭᐅᓚᐅᕐᒪᑦ ᒪᒃᑯᓗᐊᕐᑐᓂᒃ ᑯᔭᓐᓂᕆᕙᓐᓂᐊᓄᑦ ᐃᖅᑲᕐᑐᐅᔨᒧᑦ ᐅᕈᓪ ᔮᓐᓴᓐᒧᒥᑦ ᓄᓇᕗᒻᒥ ᐃᖅᑲᕐᑐᐃᕕᒻᒥ ᐃᐳᓪ 18, 2018,ᒥ.

ᓂᑰᓪ ᑲᒻᕼᐊᒃ ENB Artisan,ᑯᓐᓂᖓᕐᑐᖅ, ᐱᐅᓴᐅᑎᓕᐅᕐᐸᑦᑐᑦ ᐊᑐᕋᒃᓴᓂᒃ ᐊᒻᒪ ᓇᑦᓯᔭᓂᒃ ᑲᒫᓗᓕᐅᕐᐸᑦᓱᓂ, ᐊᑐᕐᑐᖅ ᑲᒦᓐᓂ ᐃᓄᐃᑦ ᑕᐱᕇᑦ ᑲᓇᑕᒥ ᓂᐅᕕᐊᒃᓴᖃᕐᑎᑦᓯᓂᐊᓂ, ᐋᑐᕗᐊᑉ ᑕᑯᔭᒐᖃᕕᐊᓂ ᑎᑎᕋᐅᔭᕐᓯᒪᔪᓂᒃ ᐱᖓᔪᐊᓐᓂ, ᒪᐃ 15,ᒥ. (ᐊᔾᔨᓕᐊᖓ ᑲᓛᓐ ᒪᕋᓐ)

ᔫᓂ

• ᐅᓄᕐᑐᒻᒪᕆᐊᓘᓂᖏᑦ ᐋᓐᓂᕐᑎᕐᑕᐅᕙᑦᑐᑦ ᓄᓇᖃᖅᑳᕐᓯᒪᔪᑦ ᐊᕐᓇᐃᑦ ᐊᒻᒪ ᓂᕕᐊᕐᓯᐊᑦ ᑲᓇᑕᒥ ᐱᔾᔪᑎᖃᕐᐳᑦ ᓄᖓᓴᐃᓂᕐᒥᒃ ᐱᖅᑯᓯᖃᓂᒃᑯᑦ, ᖃᐅᔨᓯᒪᔪᑦ ᑲᓇᑕᒥ ᑭᓪᓕᓯᓂᐊᕐᑎᑦᓯᒪᐅᕐᑐᓄᑦ, ᐊᕐᕌᒍᓐᓃ ᒪᕐᕉᓐᓂ. ᑭᖑᓪᓕᕐᐹᓯᐅᑎᓂᒃ ᐅᓂᒃᑰᓂᒃ ᓴᖅᑭᑎᑦᓯᑎᓪᓗᒋᑦ, ᑲᓇᑕᒥ ᖃᐅᔨᓴᕐᓂᐅᓚᐅᕐᑐᖅ ᐊᓯᐊᒪᔪᓂᒃ ᐊᒻᒪ ᐃᓄᐊᕐᑕᐅᓯᒪᔪᓂᒃ ᓄᓇᖅᑳᕐᓯᒪᔪᓂᒃ ᐊᕐᓇᓂᒃ ᐊᒻᒪ ᓂᕕᐊᕐᓯᑎᐊᓂᒃ ᐅᖃᕐᓯᒪᔪᑦ ᐃᒫᒃ ᐱᔮᕆᔭᐅᓪᓗᑎᒃ, ᑕᐃᒪᖓᑦ ᓱᕋᐃᒍᑕᐅᕙᒻᒪᑕ ᓄᓇᖃᖅᑳᕐᓯᒪᔪᑦ ᐱᔪᓐᓇᐅᑎᖏᓐᓂᒃ ᓱᕋᑦᑎᕆᓂᒃᑯᑦ ᐊᑐᕐᑕᐅᖏᓐᓇᕐᓯᒪᔪᓄᑦ ᐋᓐᓂᕐᑎᕆᓂᒃᑯᑦ.
• ᓄᓇᕗᒻᒥ ᐃᓕᓐᓂᐊᕐᓂᓕᕆᓂᕐᒧᑦ ᒥᓂᔅᑕᐅᔪᖅ ᑕᐃᕕᑦ ᔪᐊᓇᓯ ᓴᖅᑭᑎᑦᓯᓚᐅᕐᑐᖅ ᐱᖃᔭᕐᒥᒃ Bill 25 ᒪᓕᒐᓕᐅᕐᕕᒻᒥ, ᑐᒃᓯᕋᕈᑕᐅᔪᒥᒃ ᐊᑐᓕᕐᑎᑕᐅᑎᑦᓯᒋᐊᖅ ᐃᓄᐃᑦ ᐅᖃᐅᓯᖓᓂᒃ ᐊᑐᕐᓗᑎᒃ ᐃᓕᓴᐃᓂᕐᒧᑦ ᑕᐃᒪᖓᓂᑦ 20 ᐊᕐᕌᒍᓂ ᐊᑐᓕᖁᔭᐅᓯᒪᓪᓗᑎᒃ. ᑕᒪᓐᓇ ᑐᑭᖃᕐᑐᖅ ᑎᑭᓐᓇᓱᐊᕐᓂᐊᓂ ᔪᓚᐃ 1, 2039, ᐃᓕᓐᓂᐊᕐᓂᖃᕐᑐᑦ 12,ᓂ ᐃᓄᑦᑎᑐᑦ ᐃᓕᓐᓂᐊᕐᖃᑦᑕᓕᕋᔭᕐᒪᑕ ᓯᕗᓪᓕᕐᐸᐅᑎᓪᓗᒍ ᐅᖃᐅᓯᖅ ᐃᓄᑦᑎᑐᑦ.
• ᐃᒡᓗᓕᒻᒥᐅᖅ ᑕᕐᕆᔭᒐᒃᓴᓕᐅᕐᑎ ᓴᑭᕆᐊᓯ ᑯᓄᒃ ᑐᓂᔭᐅᓚᐅᕐᑐᖅ ᐃᓕᑕᖅᓯᒍᑎᒥᒃ ᓄᓇᕗᒻᒥ, ᖁᑦᓯᓐᓂᕐᐹᒥ ᐃᓕᑕᕐᓯᒍᑎᒥᒃ. ᖁᕕᐊᓱᒍᑎᖃᕐᑎᓪᓗᒋᑦ, ᑯᓄᒃ ᐅᖃᓚᐅᕐᑐᖅ ᓄᓇᕗᒻᒥᐅᑦ ᐊᑐᐃᓐᓇᖃᕐᓂᕐᓴᐅᒋᐊᖃᓂᖏᓐᓂᒃ ᓱᒃᑲᔪᒃᑰᕈᓐᓇᕐᑐᓂᒃ ᖃᕆᑕᐅᔭᓂᒃ. “ᖃᐅᔨᒋᐊᕐᕕᑦ, Websites ᐊᒻᒪ ᖃᕆᑕᐅᔭᒃᑰᕈᑏᑦ ᓯᕗᓂᕆᓂᐊᕐᑐᒥ,” ᑯᓄᒃ ᐅᖃᓚᐅᕐᑐᖅ.
• ᑲᓇᑕᐅᑉ ᒐᕙᒪᖏᑕ ᑲᑎᒪᕕᐊᓗᐊᓂ ᓯᓂᑦᑯᑦ ᓄᓇᖃᖅᑳᕐᑐᓕᕆᓂᕐᒧᑦ ᐊᖏᕈᑎᖃᓚᐅᕐᑐᑦ ᐋᖅᑭᒋᐊᕐᓯᒪᓕᕐᑎᓪᓗᒍ ᐱᖁᔭᖅ ᐅᓇ Bill C-91, ᓄᓇᖃᖅᑳᕐᓯᒪᔪᑦ ᐅᖃᐅᓯᓕᕆᓂᐊᓄᑦ ᐱᖁᔭᕐᔪᐊᖅ, ᐊᓯᔾᔨᕐᑐᕐᑕᐅᓂᖏᓪᓗ ᐃᓄᓐᓄᑦ ᓂᕆᐅᒋᔭᐅᓯᒪᒻᒪᕆᑦᓱᑎᒃ. ᒪᓕᒐᖅ ᓴᖅᑭᑎᑦᓯᒍᑕᐅᔪᓐᓇᕐᑐᖅ ᐊᓪᒪᕕᒻᒥᒃ ᑲᒥᓯᓇᒧᑦ ᓄᓇᖃᖅᑳᕐᓯᒪᔪᑦ ᐅᖃᐅᓯᓕᕆᓂᐊᓄᑦ, ᐱᓂᐊᕐᓂᖏᑎᒍᑦ ᐃᑲᔪᕐᓯᔭᐅᓯᒪᓗᑎᒃ ᐊᒻᒪ ᑲᔪᖏᕐᓱᐃᓂᒃᑯᑦ ᒪᑭᑎᑦᓯᒋᐊᕐᓂᕐᒥᒃ ᐅᖃᐅᓯᕐᓂᒃ. ᑖᓐᓇ ᐱᖁᔭᖅ ᐊᖏᕐᑕᐅᒋᐊᓕᒃ ᓄᖑᓚᐅᕐᑎᓐᓇᒍ ᑕᖅᑭᐅᔪᖅ.

ᒪᕐᕉᒃ ᒪᒃᑯᑦᑑᒃ ᐊᕐᓈᒃ ᑕᐅᑐᑦᑑᒃ ᑎᑭᓈᑲᓐᒥ (ᕿᔪᒐᕐᕕᒥᒃ) ᖁᕕᐊᑦᑕᖃᑎᒌᑦᑐᓄᑦ ᐊᑐᕐᑕᐅᕙᑦᑐᒥᒃ, ᑖᒃᑯᓄᖓ ᑲᓇᑕᒥ ᓈᓚᑦᑎᑦᓯᓚᐅᕐᑐᓄᑦ ᐊᓯᐅᒪᔪᑦ ᐊᒻᒪ ᑐᖁᑕᐅᒪᔪᑦ ᓄᓇᖃᖅᑳᕐᓯᒪᔪᑦ ᐊᕐᓇᐃᑦ ᐊᒻᒪ ᓂᕕᐊᕐᓯᐊᑦ ᒥᒃᓵᓄᑦ ᐸᕐᓇᓇᐃᕐᑐᑦ ᐅᐸᑦᑐᑦᓴᐅᒋᐊᖅ ᑲᓇᑕᐅᑉ ᐊᖓᔪᖅᑳᖓᓄᑦ ᔭᔅᑕᓐ ᑐᕉᑐᒧᑦ ᓇᒡᒐᕐᔭᐅᒍᑎᓪᓗᒍ, ᔫᓂ 3. (ᐊᔾᔨᓕᐊᖓ ᑲᓛᓐ ᒥᐅᕋᓐ)

ᑲᓇᑕᒥ ᐃᖏᕐᕋᐅᑎᓕᕆᔨᒃᑯᑦ ᑐᓴᕐᑎᑦᓯᓚᐅᕐᐳᑦ ᔫᓂ 19,ᒥᐊᖏᕈᑎᖃᕐᓂᕐᒥᓂᒃ ᑲᓇᑕᒥ ᖃᖓᑕᔫᑦ, Canadian North ᐊᒻᒪ ᕗᕐᑦ ᐃᐅᔅ, First Air ᑲᑎᑎᑕᐅᓚᐅᕐᓂᖏᓐᓂᒃ. ᓄᕕᐱᕆ 1,ᒥ ᑖᒃᑯᐊ ᒪᕐᕉᒃ ᖃᖓᑕᓲᒃ, ᑲᑎᑎᑕᐅᓯᒪᓕᕐᒪᑕᑎᒃ ᐊᑎᖃᕐᓕᕐᑎᓪᓗᒍ ᖃᖓᑕᔫᖅ Canadian North, ᐊᒻᒪ ᓄᑖᓂᒃ ᖃᖓᒃᑯᑦ ᐃᖏᕐᕋᖃᑦᑕᕋᔭᕐᓂᖏᑦ ᐊᓯᔾᔨᕐᓱᑎᒃ, ᐃᒫᒃ ᐅᓪᓗᖅ ᒪᕐᕈᕕᓪᓗᒍ ᐃᖏᕐᕋᔭᓪᓗᑎᒃ ᐱᓴᓱᐊᕈᓯᕐᓂ ᐋᑐᓄᐊᒥᑦ ᐃᖃᓗᓐᓄᑦ.

ᔪᓚᐃ

• ᓄᓇᕗᒻᒥ ᐊᑯᓂᐅᓂᕐᐹᖅ ᓂᕈᐊᕐᑕᐅᓯᒪᓚᐅᕐᑐᖅ ᓯᕗᓕᕐᑎᐅᓪᓗᓂ, ᓘᑎ ᐸᓪᓗᖅ, ᑐᖁᓚᐅᕐᐳᖅ ᔪᓚᐃ 1,ᒥ ᐊᕐᕌᒍᖃᓕᕐᓱᓂ 76,ᓂᒃ, ᐊᑯᓂ ᖃᓂᒪᓚᐅᕐᓱᓂ. ᐊᕙᑎᓂ ᐊᕐᕌᒍᓂ ᑭᒡᒐᕐᑐᕐᑎᐅᓚᐅᕐᑐᖅ ᓄᓇᕗᒻᒥ ᒪᓕᒐᓕᐅᕐᑎᓄᑦ ᓄᓇᑦᓯᐊᒥ, ᑭᒡᒐᕐᑐᕐᓱᓂ ᖁᑦᓯᑦᑐᒥᐅᓂᒃ, ᐊᒻᒪ ᓄᓇᕗᒻᒥᐅᓂᒃ, ᐅᓪᓗᒥ ᑕᐃᔭᐅᓂᖃᓕᕐᑐᒥᒃ ᖁᑦᑎᑦᑐᖅ.
• ᓄᓇᕗᑦ ᑐᓐᖓᕕᒃᑯᑦ ᓇᓗᓇᐃᕐᓯᓚᐅᕐᐳᑦ ᓄᓇᕗᒻᒥ ᐅᓪᓗᕆᔭᐅᑎᓪᓗᒍ ᐃᖅᑲᓇᐃᔭᕐᕕᒻᒥ ᐃᓄᑦᑎᑐᑦ ᐅᖃᐅᓯᖃᖁᓕᕐᓱᒋᑦ. ᓄᓇᕗᑦ ᑐᓐᖓᕕᒃᑯᓐᓄᑦ ᐊᖓᔪᖅᑳᑦ ᑐᓴᕐᑎᑦᓯᓚᐅᕐᒪᑕ ᐸᕐᓇᒃᓯᒪᓂᕐᒥᓂᒃ ᑕᒪᑐᒧᖓ ᑰᒑᒍᕐᒥ ᔪᓚᐃ 9,ᒥ.

:ᐹᓕ ᑐᓄ ᖃᐅᔨᓴᕐᑐᖅ ᐊᐃᕕᕐᑕᐅᕋᑖᕐᑐᒥᒃ ᓯᒡᔭᖓᓂ ᑭᓐᖓᐃᑦ, ᐊᓪᓕᑎᓪᓗᒍ, ᔪᓚᐃ 14. ᓴᓂᐊᓂ 200 ᓄᓇᖅᑲᑎᒌᑦ ᐃᑲᔪᓚᐅᕐᑐᑦ ᐆᒪᔪᕐᑐᒥᒃ ᐊᒻᒪ ᐱᓚᑦᑐᐃᔪᓂᒃ ᐊᖑᒻᒥᒃ ᐊᖏᔪᒻᒪᕆᐊᓗᒻᒥᒃ ᐊᒻᒪ ᐊᕐᓇᒥᒃ ᐊᐃᕕᕐᒥᒃ ᐅᓪᓗᒃᑯᑦ. (ᐊᔾᔨᓕᐊᖓ ᒃᓘᑦ ᑲᓐᔅᑕᑎᓄ)

ᐅᒍᓯᑎ

• ᑲᓇᑕᐅᑉ ᐊᖓᔪᖅᑳᖓ ᔭᔅᑕᓐ ᑐᕉᑐ ᑐᓴᕐᑎᑦᓯᓚᐅᕐᐳᖅ ᑐᕙᐃᔪᐃᑦᑑᑉ ᐃᒪᖓᑕ ᒥᐊᓂᕆᔭᐅᒋᐊᖃᓂᐊᓂᒃ. ᑐᕙᐃᔪᐃᑦᑐᖅ, ᖃᓪᓗᓈᑎᑐᑦ ᑐᑭᓕ “ᓯᑯ ᐊᐅᓚᐅᕐᓯᒪᖏᑦᑐᖅ,” ᐊᒻᒪ ᖃᐅᔨᒪᔭᐅᓂᖃᕐᓱᓂ “ᓄᓇᒥ ᓯᑯ,” ᐊᒻᒪ ᓂᕆᐅᒋᔭᐅᓪᓗ ᑕᐃᒪᐃᖏᓐᓇᕐᓂᖓ ᐊᕐᕌᒍᓕᒫᑉ ᐃᓗᐊᓂ 2050,ᒧᑦ.
• ᑭᐅᕐᓕᓐ ᐱᓂᑦ, ᑲᓇᑕᐅᑉ ᒐᕙᒪᖏᑕ ᒥᓂᔅᑕᖓ ᐃᓄᓕᕆᔨᑐᖃᒃᑯᓐᓄᑦ ᐊᒻᒪ ᐅᑭᐅᕐᑕᕐᓕᕆᓂᕐᒧᑦ, ᒪᒥᐊᓚᐅᕐᑐᖅ ᕿᑭᕐᑕᓂ ᐃᓄᓐᓄᑦ ᑭᒡᒐᕐᑐᕐᓱᓂ ᑲᓇᑕᐅᑉ ᒐᕙᒪᒃᑯᖏᑕ ᐊᐅᓚᑦᓯᒍᓯᕆᓯᒪᔭᖏᓐᓂᒃ ᑕᐃᒪᖓᓂᐊᓗ ᐊᑐᕐᑕᐅᑎᑦᓱᒋᑦ ᐊᕐᕌᒍᑦ ᐊᑯᓐᓂᖏᓐᓂ 1950,ᒥᑦ 1975,ᒧᑦ, ᐊᒻᒪ ᕿᒻᒦᔭᕐᑕᐅᓚᐅᕐᓯᒪᓂᖏᓐᓄᑦ, ᓅᑎᕋᕐᑕᐅᓚᐅᕐᓯᒪᓂᖏᓐᓄᓪᓗ ᐊᒻᒪ ᐊᕕᑦᑐᐃᕙᓚᐅᕐᓂᕐᒧᑦ ᐃᓚᒌᓂᒃ.
• ᓄᓇᕗᒻᒥ ᐊᐅᓚᑦᓯᒍᓐᓇᕐᓯᓚᐅᕆᕗᑦ ᑲᓇᑕᐅᑉ ᒐᕙᒪᖏᑕ ᓄᓇᖏᓐᓂᒃ ᐊᒻᒪ ᓄᓇᒥᐅᑕᓂᒃ ᐊᐅᓚᑦᓯᒍᓐᓇᕐᓯᓗᑎᒃ, ᑭᒡᒐᕐᑐᕐᑎᖏᓪᓗ ᒐᕙᒪᑐᖃᒃᑯᑦ, ᓄᓇᕗᑦ ᑐᓐᖓᕕᒃᑯᓪᓗ ᐊᒻᒪ ᓄᓇᑦᓯᐊᕐᒥ ᐊᑎᓕᐅᕈᑎᖃᓚᐅᕐᑐᑦ ᑐᓐᖓᕕᒃᓴᓂᒃ ᐊᖏᖃᑎᒌᒍᑎᒃᓴᓂᒃ.


ᑲᓇᑕᐅᑉ ᐊᖓᔪᖅᑳᖓᓐ ᔭᔅᑕᓐ ᑐᕌᑐ ᐃᔪᖃᑎᓕᒃ ᐃᒃᐱᐊᕐᔪᒻᒥ ᐃᓄᑐᖃᕐᒥᒃ ᖄᑉᐱᒃ ᐊᑕᒍᑎᓯᐊᒥᒃ, ᐊᕐᕌᒍᓕᒻᒥᒃ 99,ᓂᒃ, ᓄᓇᓕᓐᓂ ᓂᕆᖃᑎᒌᑦᑎᓪᓗᒋᑦ ᐅᓪᓗᑐᐃᓐᓴᖓᓂ ᐅᒍᓯᑎ 1, ᖁᔭᓕᓂᖃᕐᓱᑎᒃ ᐱᔭᕇᕐᑕᐅᓂᖏᓐᓂᒃ ᐃᓄᓐᓄᑦ ᐱᕙᓪᓕᕈᑎᒃᓴᓄᑦ ᐊᖏᖃᑎᒌᒍᑕᐅᓯᒪᔪᑦ ᐊᑐᕐᑕᐅᒐᔭᕐᑎᓪᓗᒋᑦ ᑕᓪᓗᕈᑎᐅᑉ ᐃᒪᖓᓂ ᑲᓇᑕᒧᑦ ᐃᒪᕐᒥᐅᑕᓂᒃ ᒥᐊᓂᕐᓯᕕᐅᓂᐊᕐᓗᓂ. (ᐊᔾᔨᓕᐊᖓ ᔨᒻ ᐱᓪ)

• ᑲᓇᑕᐅᑉ ᒐᕙᒪᖏᑦ ᐱᓂᐊᕐᓂᕐᑖᓚᐅᕐᑐᑦ ᐊᑐᕆᐊᖅ $151 ᒥᓕᐊᓂᒃ ᐊᑭᑐᖏᓐᓂᕐᓴᐅᖁᓪᓗᒋᑦ, ᖃᕆᑕᐅᔭᖃᓂᒃᑯᑦ ᓄᓇᕗᑦ ᒐᕙᒪᖃᕐᕕᐊᓂ. ᑕᒪᓐᓇ ᐱᓕᕆᐊᖑᓕᕐᐸᑦ ᐊᔾᔭᕐᑐᐃᒋᐊᖃᕋᔭᕐᑐᑦ 1,700 ᑭᓛᒥᑐᕐᔅᓂᒃ ᐅᐊᔭᓂᒃ ᓅᒃᒥᑦ, ᐊᑯᑭᑦᑐᓂᑦ, ᑕᐅᕘᓇ ᑕᓪᓗᕈᑎᐅᑉ ᐃᒪᖓᒍᑦ ᐃᖃᓗᓐᓄᑦ. ᑕᐃᑲᖓᑦ, ᐱᑐᒃᓯᒪᒻᒥᓗᑎᒃ ᑭᒻᒥᕈᒧᑦ. ᑖᓐᓇ ᐅᐊᔭᑯᑖᒃ ᐱᑐᒃᓯᒪᒐᔭᕐᑐᖅ ᐊᑯᑭᑦᑐᓂᑦ ᓂᐅᕙᐅᓐᓛᒧᑦ.
• ᑲᓇᑕᐅᑉ ᖁᑦᓯᑦᑐᖓᓂ ᖃᐅᔨᓴᕐᕕᒃ ᐃᖃᓗᑦᑑᑦᑎᐊᒥ ᒪᑐᐃᓚᐅᕐᑐᖅ ᖃᐃᓯᒪᑎᓪᓗᒋᑦ ᐃᓄᖏᑦ ᐊᒻᒪ ᐳᓛᕐᑎᓪᓗᒋᑦ ᑲᑎᒪᔨᐅᔪᑦ ᐊᒻᒪ ᑭᒡᒐᕐᑐᕐᑎᐅᔪᑦ. “ᐅᓪᓗᒥ ᖁᕕᐊᓱᖃᑎᒌᓐᓂᖅ ᐱᒻᒪᕆᐅᒻᒪᑦ ᓄᓇᓕᑦᑎᓐᓄᑦ,” ᐃᖃᓗᑦᑐᑦᑎᐊᑉ ᒪᐃᔭᖓ ᒪᐱᓚ ᒃᕌᔅ.

ᓯᑎᐱᕆ

• ᐸᓖᓯᒃᑯᑦ ᑐᓴᕐᑎᑦᓯᓚᐅᕐᑐᑦ ᐃᑯᐊᓪᓚᓐᓂᕐᒧᑦ ᐊᑭᖃᓗᐊᑲᓴᓚᐅᕐᓂᐊᓂᒃ $100,000,ᓂᒃ ᓱᕋᑦᑎᕐᑕᐅᓂᖓᓄᑦ ᖁᕐᓗᒃᑑᒥ ᐃᓕᓐᓂᐊᕐᕕᐊᓘᑉ ᓯᑎᐱᕆ 3,ᒥ ᐊᒻᒪ ᐱᔮᕆᔭᐅᖅᑰᑐᕕᓂᖅ ᓱᕈᓯᕐᓄᑦ.
• ᐅᖃᖅᑎ ᓴᐃᒪᓐ ᒥᑯᕙᒃ ᑐᓴᕐᑎᑦᓯᓚᐅᕐᑐᖅ ᓄᓇᕗᒻᒥ ᒪᓕᒐᓕᐅᕐᑏᑦ ᓴᖅᑭᑎᑦᓯᓂᐅᔭᕐᓂᖓᓂᒃ ᕿᓂᕆᐊᖃᓂᕐᒧᑦ ᓄᑖᒥᒃ ᐅᖃᐅᓯᓕᕆᓂᕐᒧᑦ ᑲᒥᓯᓇᑦᓴᒥᒃ, ᑭᖑᓂᐊᓂ ᕼᐃᓕᓐ ᒃᓕᓐᑭᓐᐳᒃ ᓄᖅᑲᓚᐅᕐᑎᓪᓗᒍ ᐱᔾᔪᑎᖃᕐᓱᓂ ᖃᓄᐃᓐᓂᕐᒥᓂᒃ. ᐅᖃᐅᓯᓕᕆᓂᕐᒧᑦ ᑲᒥᓯᓇ ᑲᒪᔨᐅᔭᕆᐊᓕᒃ ᐅᖃᐅᓯᓕᕈᓂᕐᒧᑦ ᐱᔪᓐᓇᐅᑎᓂᒃ ᑲᒪᔨᐅᓂᕐᒧᑦ ᓄᓇᕗᒻᒥ.
• ᓄᓇᕗᑦ ᒐᕙᒪᖏᑦ ᐊᖏᕈᑎᖃᓚᐅᕐᑐᑦ ᐊᕐᓇᑦ-ᐊᖑᑎᓪᓗ ᓇᓐᓄᒍᓐᓇᐅᑎᖏᓐᓂᒃ ᓄᓇᕗᓕᒫᒥ, ᐊᒻᒪ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔨᕐᔪᐊᑦ ᐃᒃᓯᕙᐅᑕᖓ, ᑖᓐ ᓱᕗᐃᓴᒃ, ᐅᖃᓚᐅᕐᑐᖅ ᕿᑎᕐᒥᐅᑦ ᐆᒪᔪᓕᕆᓂᕐᒧᑦ ᑲᑎᒪᔨᖏᑦ ᐊᕐᕌᒍᑕᒫᕐᓯᐅᒻᒥᒃ ᑲᑎᒪᕐᔪᐊᕐᓂᖃᕐᑎᓪᓗᒋᑦ ᐃᖃᓗᑦᑑᑦᑎᐊᒥ.
• ᓄᓇᕗᒻᒥ ᒪᓕᒐᓕᐅᕐᑏᑦ ᑲᑎᒪᔨᕈᓯᖏᑦ ᒪᓕᒐᐅᑉ ᐊᑐᕐᑕᐅᓂᖏᓐᓂᒃ ᑲᔪᓯᒋᐊᓪᓚᑎᑦᓯᒍᒪᓪᓗᑎᒃ ᒪᑐᕕᐊᓂᒃ ᑐᓂᔭᐅᔪᓐᓇᕐᓂᖏᑕ ᑭᒃᑯᑐᐃᓐᓇᕐᓄᑦ ᒪᓕᒐᖅ ᐅᓇ Bill 25, ᐱᖁᔭᕐᔪᐊᖅ ᐋᖅᑭᒋᐊᕐᓯᒍᓐᓇᕐᓂᕐᒧᑦ ᐃᓕᓐᓂᐊᕐᓂᕐᓕᕆᓂᕐᒧᑦ ᐱᖁᕐᔪᐊᒥ ᐊᒻᒪ ᐃᓄᐃᑦ ᐅᖃᐅᓯᖓᓂᒃ ᓴᐳᒻᒥᓂᕐᓂᕐᒧᑦ ᐱᖁᔭᕐᔪᐊᖅ, ᐃᓱᓕᓪᓗᒍ ᐅᒃᑐᐱᕆ 11,ᒧᑦ. ᑭᒃᑯᑐᐃᓐᓇᐃᑦ ᖃᐃᖁᔭᐅᓯᒪᓚᐅᕐᑐᑦ ᑐᓂᓯᖁᔭᐅᓪᓗᑎᒃ ᑲᑎᒪᔨᕈᓯᓂᒃ ᐱᖁᔭᕐᒧᑦ, Bill 25 ᓴᖅᑭᑕᐅᑎᓪᓗᒍ ᒪᓕᒐᓕᕆᕕᒻᒥ ᑲᑎᒪᑎᓪᓗᒋᑦ ᒪᓕᒐᓕᐅᕐᑏᑦ ᐅᐱᕐᖔᒥ ᔫᓂᒥ.


:ᑕᕐᓴᓕᓐᓄᑦ ᐊᒥᐊᕐᑕᐅᓯᒪᔪᑦ ᐊᔾᔨᖑᐊᖓ ᑲᖏᕐᖠᓂᕐᒥ ᐊᖅᑯᑎᐅᑉ ᓯᕿᓐᓂᕐᑎᓪᓗᒍ ᓯᑎᐱᕆᒥ. (ᐊᔾᔨᓕᐊᖓ ᐃᒪ ᑐᕌᑐᕐ)

• ᐃᓄᐃᑦ ᑕᐱᕇᑦ ᑲᓇᑕᒥ ᑲᑎᒪᔨᖏᑦ ᐊᖏᖃᑎᒌᓚᐅᕐᐳᑦ ᐊᑯᓂᐊᓗᒃ ᐅᑕᖅᑎᑕᐅᓯᒪᓕᕐᑐᒥᒃ ᐃᓄᐃᑦ ᐃᓄᑦᑎᑐᑦ ᑎᑎᕋᐅᓯᖓᓂᒃ ᐊᓯᔾᔩᒋᐊᖅ ᐅᖃᖅᐸᐅᔭᕐᓂᑯᑎᑐᑦ. ᐅᖃᖅᐸᐅᔭᕈᓰᑦ, ᑕᐃᔭᐅᔪᑦ ᐃᓄᑦᑎᑐᑦ ᖃᓕᐅᔭᕐᐸᐃᑦ, ᐊᑐᕐᓂᑯᑦ ᖃᓪᓗᓈᑎᑐᑦ ᑎᑎᕋᐅᓯᕐᓂᒃ – ᐊᑐᕐᑕᐅᕙᒻᒥᔪᓄᑦ ᖃᓪᓗᓈᑎᑐᑦ. ᐃᓄᐃᑦ ᑕᐱᕇᑦ ᑲᓇᑕᒥ ᐅᖃᕐᓯᒪᔪᑦ ᐃᒫᒃ ᐃᓄᑦᑎᑐᑦ ᖃᓕᐅᔭᕐᐸᐃᑦ ᐊᑐᕐᑕᐅᓂᐊᓕᕐᑎᓪᓗᒋᑦ ᑎᑎᕋᐅᓯᐅᓗᑎᒃ ᐃᓄᐃᑦ ᐃᖃᐅᓯᖓᓂᒃ, ᐊᔾᔨᒌᖏᑦᑐᓂᒃ ᐅᖃᕈᓯᕐᓄᑦ, ᓇᓂᓕᒫᕐᓗ ᐃᓄᐃᑦ ᓄᓇᖓᓂ.

ᐅᒃᑐᐱᕆ

• ᓂᐅᕐᕈᔪᓕᕆᔩᑦ ᓂᐅᕐᕈᒧᓕᕆᓂᒃᑯᑦ ᐊᑭᓖᒋᐊᖃᓕᕐᒪᑕ ᐊᑐᕐᓂᐊᕈᑎᒃ ᐃᓄᐃᑦ ᓄᓇᖏᓐᓂᒃ ᓇᒻᒥᓂᕆᔭᐅᒧᓂᒃ ᕿᑭᕐᑕᑕᓂ, ᐃᒫᒃ ᕿᑭᕐᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ ᐅᒥᐊᕐᔪᐊᓄᑦ ᐳᓚᕋᕐᑕᐅᓂᕐᐸᐅᕙᒻᒪᑕ ᓄᓇᕗᒻᒥ.
• ᑕᐃᕕᑦ ᖃᒪᓂᖅ, ᑭᒡᒐᕐᑐᕐᑎᐅᓕᓵᕐᑐᖅ ᑐᓄᓂᕐᒧᑦ, ᐊᑎᓕᐅᕐᑎᑕᐅᓚᐅᕐᑐᖅ ᓄᓇᕗᑦ ᑲᒥᓯᓇᖓᓄᑦ ᓂᐊᓕ ᑯᓱᒐᕐᒧᑦ ᑲᑎᑦᑎᓪᓗᒋᑦ ᓄᓇᕗᒻᒥ ᒪᓕᒐᓕᐅᕐᕕᒻᒥ ᑎᓴᒻᒥᐅᑎᓪᓗᒍ, ᐅᒃᑐᐱᕆ 17,ᒥ. ᖃᒪᓂᖅ ᓵᓚᒃᓴᓚᐅᕐᑐᖅ ᓂᕈᐊᕐᓂᖃᕐᑎᓪᓗᒋᑦ ᓯᑎᐱᕆᒥ ᐃᓂᒋᓕᕐᑕᒥᓄᑦ, ᑭᒡᒐᕐᑐᓕᕐᓱᓂ ᒥᑦᑎᒪᑕᓕᒻᒥᒃ, ᑐᖁᓚᐅᕐᓯᓪᓗᒍ ᐅᖃᖅᑎᐅᓚᐅᕐᑐᖅ ᒪᓕᒐᓕᐅᕐᕕᒻᒥ ᔫ ᐃᓄᒃᒧᑦ.
• ᑭᒡᒐᕐᑐᕐᑎᕈᓕᓵᕐᑐᖅ ᓂᐅ ᑎᒥᑯᕌᑎᒃᑯᓐᓄᑦ ᒧᒥᓛᖅ ᖃᖅᑲᖅ ᑭᒡᒐᕐᑐᕐᑎᕈᓚᐅᕐᐳᖅ ᒐᕙᒪᑐᖃᒃᑯᑦ ᑲᑎᒪᕕᐊᓗᐊᓂ. ᖃᖅᑲᖅ, ᐊᕐᕌᒍᓕᒃ 25,ᓂᒃ ᑲᑎᒪᔨᕈᓕᓵᕐᑐᖅ, ᓵᓚᒃᓴᓚᐅᕐᒪᑦ ᐅᓄᕐᓂᖃᕐᑐᓄᑦ 3,717 ᓂᕈᐊᕐᑕᐅᓪᓗᓂ, ᐅᕝᕙᓘᓐᓃᑦ 41.2 ᐳᕐᓯᓐᒧᑦ ᓂᕈᐊᕐᑕᐅᓪᓗᓂ.
• ᐅᔭᕋᓐᓂᐊᕐᑎᒃᑯᑦ, Agnico Eagle Mines Ltd.,ᑯᑦ ᑐᓴᕐᑎᑦᓯᓚᐅᕐᑐᑦ ᐲᔭᐃᓂᕐᐸᐅᓂᕐᒥᓂᒃ ᒎᓗᒥᒃ ᑕᖅᑭᓂ ᐱᖓᓲᕋᑖᕐᑐᓂ, ᐊᒻᒪ ᑕᒪᑐᖓ ᖁᔭᓕᕙᕗᑦ ᒪᓕᐊᑏᓐᒥ ᐅᔭᕋᓐᓂᐊᕐᕕᒃ ᓄᓇᕗᒻᒥ ᐃᓱᓕᕝᕕᐊᓄᑦ ᐱᕙᓪᓕᐊᑎᑦᓯᓪᓗᑎᒃ. ᑲᒻᐸᓂᐅᔪᑦ ᓇᑉᐸᖏᑕ ᐅᖓᑖᓄᑦ ᑮᓇᐅᔭᓕᐅᓚᐅᕐᑐᑦ ᑲᑎᓪᓗᒋᑦ $76.7 ᒥᓕᐊᓂᒃ. ᐅᓄᕐᓯᒋᐊᕐᓯᒪᓂᖃᕐᑐᓂᒃ $17.1 ᒥᓕᐊᓂᑦ ᐅᔭᕋᓐᓂᐊᕐᓂᒃᑯᑦ 2018,ᒥ.

ᓄᕕᐱᕆ

• ᖃᕆᑕᐅᔭᒃᑯᑦ ᐱᓕᕆᔾᔪᑎᐅᔪᑦ ᑐᓴᐅᒪᐅᑏᑦ ᓄᓇᕗᒻᒥ ᐃᓱᐃᓪᓕᑐᕐᑕᐅᓚᐅᕐᐳᑦ ᖃᕆᑕᐅᔭᒃᑯᑦ, ᐊᒻᒪ ᑕᐃᒪᐃᒻᒪᑦ ᐃᖅᑲᓇᐃᔭᕐᕕᓐᓂᒃ ᐊᒃᑐᐃᓂᖃᒻᒪᕆᑦᓱᑎᒃ ᐅᑭᐅᕐᑕᕐᑐᓕᒫᒥ. ᓄᓇᕗᑦ ᒐᕙᒪᖏᑦ ᐃᓱᒪᓕᐅᓚᐅᕐᑐᑦ ᐊᑭᓖᒍᒪᓇᑎᒃ ᐊᑲᐅᖏᓕᐅᕈᑕᐅᔪᓂᒃ ᐊᒻᒪ, ᐋᖅᑭᒃᓱᐃᒋᐊᖔᕈᒪᓪᓗᑎᒃ ᐱᑐᒃᓯᒪᐅᑎᓂᒃ ᐃᒻᒪᖃᐅᑎᒃᓴᓂᒃ ᑐᑭᓯᒋᐊᕐᕕᒃᓴᐅᓪᓗᑎᒃ.
• ᓄᓇᕗᒻᒥ ᐱᕙᓪᓕᐊᑎᑦᓯᓂᕐᒧᑦ ᐊᒃᑐᕐᑕᐅᓂᕐᒧᑦ ᑲᑎᒪᔨᐅᔪᑦ ᑐᓵᑎᑦᓯᓚᐅᕐᐳᑦ ᓄᓘᔭᓂ ᐅᔭᕋᓐᓂᐊᕐᑎᒃᑯᑦ ᑐᒃᓯᕋᕐᑕᖓᓂᒃ ᐱᔾᔪᑎᖃᕐᓱᑎᒃ ᐊᖏᓪᓕᒋᐊᓪᓚᖁᔨᓂᕐᒥᒃ ᐅᔭᕋᓐᓂᐊᕐᓂᕐᒥᒃ, ᑭᓯᐊᓂ ᓄᖅᑲᑳᓪᓚᓚᐅᕐᑐᖅ ᑲᑎᒪᓂᖅ, ᒪᕐᕉᓐᓂ ᒪᕐᕉᓐᓂᒃ ᒥᑦᑎᒪᑕᓕᒻᒥ ᑲᑎᒪᒐᔭᕐᓂᖅ ᓄᖅᑲᕐᑎᑕᐅᓪᓗᓂ. ᓄᓇᕗᑦ ᑐᓐᖓᕕᒃᑯᑦ ᐊᖓᔪᖅᑳᖓᓐ ᐊᓗᑭ ᑰᑦᑎᖅ ᐱᒋᐊᕐᑎᑦᓯᓚᐅᕐᒪᑦ ᓄᖅᑲᕐᑎᑦᓯᓂᕐᒧᑦ ᓈᓚᑦᑎᑦᓯᓂᐅᒐᔭᕐᑐᒥᒃ ᑕᖅᑭᐅᓂᐊᕐᑐᓄᑦ ᑎᓴᒪᐅᔪᕐᑐᓂᑦ ᐊᕐᕌᒍᒧᑦ.
• ᓄᓇᕗᑦ ᐅᓪᓗᕆᔭᖓ, ᔪᓚᐃ 9, ᓇᓗᐃᕐᑕᐅᓚᐅᕐᑐᖅ ᐅᓪᓗᕆᔭᐅᓂᐊᓕᕐᑎᓪᓗᒍ ᓄᖅᑲᖓᑲᐃᓐᓇᕐᓂᕐᒧᑦ ᓄᓇᕗᓕᒫᒥ. ᓄᓇᕗᑦ ᒪᓕᒐᓕᐅᕐᑎᖏᑦ ᓂᕈᐊᓚᐅᕐᑐᑦ ᐊᖏᕐᑕᐅᒍᑎᐊᓂᒃ ᐱᖁᔭᐅᑉ ᐆᒪ Bill 29, ᐱᖁᔭᕐᑎᒍᑦ ᐊᓯᔾᔩᒋᐊᕐᓂᕐᒧᑦ ᐃᖅᑲᓇᐃᔭᕐᑐᓕᕆᓂᕐᒧᑦ ᐱᖁᔭᕐᓂᒃ ᐊᒻᒪ ᑐᑭᖏᓐᓂᒃ ᐱᖁᔭᕐᔪᐊᑉ ᐱᔾᔪᑎᒋᓗᒍ ᑭᐅᔾᔪᑕᐅᓗᓂ ᓄᓇᕗᒻᒥ ᐅᓪᓗᕆᔭᐅᓕᕐᑐᒧᑦ, ᐱᐊᔪᒋᔭᖓᓂ ᐅᖃᓕᒫᕐᑕᐅᓂᐊᑎᒍᑦ ᒪᓕᒐᓕᐅᕐᕕᒻᒥ. ᐅᓪᓗᒥᒧᑦ, ᓄᓇᕗᑦ ᐅᓪᓗᕆᔭᖓ ᓄᖅᑲᖓᕕᐅᕙᓚᐅᕐᒪᑦ ᒪᓕᑦᓱᒍ ᑭᒃᑯᑐᐃᓐᓇᕐᓄᑦ ᐱᔨᑦᑎᕋᕐᑎᓄᑦ ᐱᖁᔭᖅ, ᐃᒫᒃ ᑐᑭᖃᓚᐅᕐᓚᑦ ᑐᕌᖓᓂᐊ ᐃᖅᑲᓇᐃᔭᕐᑎᖏᓐᓄᑦ ᒐᕙᒪᖏᑕ ᓄᓇᕗᒻᒥ ᑭᓯᐊᓂ.
• ᑭᕙᓪᓕᕐᒥ ᓄᓇᕘᕐᑕᖃᑕᐅᓯᒪᔪᑦ ᐃᓚᖏᑦ, ᐱᖃᓯᐅᑎᓪᓗᒋᑦ ᔫ ᓴᕕᑲᑖᖅ, ᖃᐅᔨᑕᐃᓐᓇᓚᐅᕐᒪᑕ ᓂᕈᐊᕈᓐᓇᖏᓐᓂᕐᒥᓂᒃ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᖏᑦ ᓂᕈᐊᕐᓂᖃᕐᑎᓪᓗᒋᑦ, ᐱᔾᔪᑕᐅᓪᓗᓂ ᓂᕈᐊᕐᓂᖅ ᑐᕌᖓᒻᒪᑦ ᑭᓯᐊᓂ “ᐅᐸᑦᓯᒪᓪᓚᑦᑖᕐᓗᑎᒃ ᐊᒻᒪ ᓄᓇᖃᓪᓛᑦᑖᕆᐊᖃᓂᖏᓐᓂᒃ ᑭᕙᓪᓕᕐᒥ ᑕᖅᑭᓂ 12 ᑕᖅᑭᓂᒃ ᐊᓪᓗᑲᑕᐃᖏᓪᓗᓂ ᑭᖑᓂᑦᓯᐊᖓᒍᑦ ᓂᕈᐊᕐᓇᓚᐅᕐᑎᓪᓗᒍ ᐅᓪᓗᖓᓂ.”
• ᐃᓐᑎᐱᒃᑯᑦ, NDP ᓯᕗᓕᕐᑎᖓ ᔭᒃᒦᑦ ᔅᓃ, Jagmeet Singh ᑐᓴᕐᑎᑦᓯᓚᐅᕐᑐᖅ ᒧᒥᓛᖅ ᖃᖅᑲᖅ ᓯᕗᓕᕐᑎᒋᔭᐅᓂᐊᕐᓂᖓᓂᒃ ᐃᓐᑎᐱᒃᑯᓐᓄᑦ ᑭᒡᒐᕐᑐᕐᓗᓂ ᐅᑭᐅᕐᑕᕐᑐᒥᐅᓂᒃ, ᑲᓇᑕᐅᑉ ᐅᑭᐅᕐᑕᕐᑐᐊᓂ ᐱᕙᓪᓕᐊᔪᓕᕆᓂᕐᒥᒃ ᐊᒻᒪ ᑐᓪᓕᕆᔭᐅᓗᓂ ᓄᓇᒥᐅᑕᓕᕆᓂᕐᒧᑦ. ᔅᓃ ᑐᓴᕐᑎᑦᓯᓚᐅᕐᑐᖅ ᑭᖑᓂᑦᓯᐊᖓᓂ ᐱᖓᓱᓂ ᐅᓪᓗᓂ ᐃᖃᓗᓐᓂᐊᖃᑎᖃᕐᓂᐊᕐᓱᓂ ᖃᖅᑲᖅᒥᒃ.

ᑎᓯᐱᕆ

• ᓯᕗᓪᓕᕐᐹᒥ ᐱᓂᐊᕐᓂᖃᕕᒋᔭᒥᑎᒍᑦ, ᔭᔅᑕᓐ ᑐᕉᑐ ᒐᕙᒪᖏᑦ ᓕᐳᕈᓪᑯᑦ, ᓴᖅᑭᑎᑦᓯᓂᐅᔭᓕᕐᑐᑦ ᒪᓕᒐᕐᒥᒃ ᐊᑐᓕᕐᑎᑕᐅᔭᕆᐊᓕᒻᒥᒃ ᔪᓇᐃᑎᑦ ᓇᐃᓴᒻᒥ ᐅᖃᒻᒪᕆᐅᑎᑎᒍᑦ ᐱᔾᔪᑎᒋᓗᒋᑦ ᐱᔪᓐᓇᐅᑎᖃᓂᖏᑦ ᓄᓇᖃᖅᑳᕐᓯᒪᔪᑦ, ᒐᕙᒪᒃᑯᑦ ᐅᖃᕈᑎᒋᓚᐅᕐᑕᖓ ᐅᖃᓕᒪᓪᓗᓂ ᓯᕗᓪᓕᕐᒥ ᓂᕈᐊᕐᑕᐅᓚᐅᕐᓱᓂ. ᑖᓐᓇ ᓄᑖᖅ ᒪᓕᒐᖅ ᐊᑐᓕᖁᔭᐅᔪᖅ – ᐅᖃᓕᒪᒍᑎᒋᓚᐅᕐᑕᖓ ᒐᕙᒪᒃᑯᑦ ᐱᓕᕆᓂᐊᕐᓂᕋᕐᓱᒋᑦ ᓴᐃᒻᒪᖃᑎᒌᑉᐸᓪᓕᐊᓂᒃᑯᑦ – ᐋᖅᑭᓱᐃᖃᑎᒌᓐᓂᒃᑯᑦ ᓄᓇᖃᖅᑳᕐᓯᒪᔪᓂᒃ, ᐅᖃᓚᐅᕐᑐᑦ ᒐᕙᒪᒃᑯᑦ.
• ᕿᑭᕐᑖᓗᒻᒥ ᐅᔭᕋᓐᓂᐊᕐᑏᑦ, Baffinland Iron Mines Inc. ᐸᓯᔭᒃᓴᕈᑎᑦᑕᐅᓯᒪᔪᑦ 16,ᕕᓪᓗᒋᑦ ᒪᓕᓪᓗᒋᑦ ᓄᓇᕗᒻᒥ ᖃᓄᐃᖏᑦᓯᐊᕋᓱᐊᕐᓂᓕᕆᓂᕐᒧᑦ ᐊᒻᒪ ᐊᑦᑕᓇᖏᕐᑐᒥᒋᐊᖃᓂᕐᒧᑦ ᐱᖁᔭᕐᔪᐊᖅ, ᐱᔾᔪᑎᖃᕐᓱᑎᒃ ᐅᔭᕋᐃᑦ ᓱᕋᑦᑎᕐᓯᒪᓂᖏᓐᓂᒃ ᑎᓱᓪᓗᑎᒃ ᓄᓘᔭᒥ ᐅᔭᕋᓐᓂᐊᕐᕕᒻᒥ ᑐᖁᔪᖃᕐᑎᓪᓗᒍ ᑎᓯᐱᕆ 2018,ᒥ. ᐃᖅᑲᓇᐃᔭᕐᑎᑦ ᐊᑦᑕᓇᖏᑦᑐᒥᒋᐊᖃᓂᖏᓐᓄᑦ ᐊᒻᒪ ᐊᑭᓕᕐᑕᐅᒋᐊᖃᓂᕐᒧᑦ ᑲᒥᓴᓐ ᓴᖅᑭᑎᑦᓯᓚᐅᕐᑐᑦ ᐸᓯᔭᐅᑎᑦᓯᓂᕐᒥᓂᒃ ᓄᓇᕗᑦ ᐃᖅᑲᕐᑐᐃᕕᔪᐊᖓᓂ ᑎᓯᐱᕆ 5,ᒥ.
• ᐃᓄᐃᑦ ᑳᓐᑐᕌᓱᑎᒃ ᐃᖅᑲᓇᕐᔭᕐᑎᑦ ᓄᖅᑲᕐᑎᑕᐅᓯᒪᔪᑦ ᓄᓘᔭᒥ ᐅᔭᕋᓐᓂᐊᕐᕕᒻᒥ ᐅᓄᕈᓐᓇᐃᕆᐊᕈᑕᐅᑎᓪᓗᒍ ᐃᖅᑲᓇᐃᔭᕐᑐᓄᑦ, ᑎᓯᐱᕆ ᑐᒥ, 96,ᓂᑦ 48,ᑦ ᐅᔭᕋᓐᓂᐊᕐᕕᒻᒥ ᐃᖅᑲᓇᐃᔭᕐᑎᑦ ᐅᖃᓚᐅᕐᑐᑦ ᓄᓇᕗᒻᒥ ᐃᒪᓕᕆᓂᕐᒧᑦ ᑲᑎᒪᔨᐅᔪᑦ. ᑲᒻᐸᓂᐅᔪᖅ ᓴᖅᑭᑎᑦᓯᓚᐅᕐᒥᔪᑦ ᑐᑭᓯᒋᐊᕐᕕᒃᓴᓂᒃ ᑎᓯᐱᕆ 6,ᒥ ᑎᑎᖅᑲᓂ ᑲᑎᒪᔨᓄᑦ ᓴᖅᑭᑎᑦᓯᖁᓪᓗᒋ5 ᐊᕐᕌᒍᒧᑦ ᐅᖓᕙᕆᐊᖁᓪᓗᒋᑦ ᐅᔭᕋᓐᓂᐊᕐᕕᒻᒥ 6 ᒥᓕᐊᓐ-ᑕᓐᓂᒃ ᐊᕐᕌᒍᑕᒫᑦ ᐅᔭᕋᓐᓂᐊᕐᑎᓪᓗᒋᑦ, ᐃᓱᓕᓐᓂᖃᓛᕐᓗᓂ ᑎᓯᐱᕆ 31,ᒥ. ᑲᒻᐸᓂᐅᔪᖅ ᐊᖏᕐᓯᒪᔪᑦ ᓄᖅᑲᕐᑎᑦᓯᓛᖏᒋᐊᖅ ᐃᖅᑲᓇᐃᔭᕐᑎᓂᒃ ᐃᓄᓐᓂᒃ, ᐊᖏᕐᑕᐅᒍᑎᒋᒍᑎᐅᒃ.
• ᐃᖏᑎᑦᓯᐊᕙ ᓴᓂᑭᓗᐊᕐᒥᐅᖅ, ᑭᐊᓕ ᐊᒪᐅᔭᖅ ᕗᕋᐃᓱᕐ, ᑐᖁᑲᓪᓚᓚᐅᕐᑐᖅ ᕗᐃᓂᐸᐃᒃᒥ ᐅᓐᓄᐊᓂ ᖁᕕᐊᓱᒡᕕᐅᑉ.