50%−ᑲᓴᖕᓂ ᓄᓇᕕᖕᒥ ᖁᑦᑎᖕᓂᖅᓴᒥ ᐃᓕᓐᓂᐊᕐᕕᖕᒥ ᐃᓕᓐᓂᐊᖅᑎᓂ ᓱᐴᖅᑐᓲᖑᕗᑦ: ᖃᐅᔨᓴᕐᓂᖅ

For the English version of this story, please see Nearly half of Nunavik secondary students smoke: Study.

ᓄᑖᖑᔪᒥ ᖃᐅᔨᓴᕐᓂᐅᔪᒥ ᓇᓂᓯᕗᖅ ᓇᑉᐸᑲᓴᓪᓗᐊᖓᓂ ᓄᓇᕕᐅᑉ ᖁᑦᑎᖕᓂᖅᓴᒥ ᐃᓕᓐᓂᐊᕐᕕᖕᒥ ᐃᓕᓐᓂᐊᖅᑎᓂ ᓯᒡᒐᓕᐊᒥ ᓱᐴᖅᑐᖅᑎᐅᕗᑦ.

ᐅᓂᒃᑳᓕᐊᒥ ᓴᖅᑭᑎᑕᐅᔪᒥ ᒫᔾᔨᒥ ᑯᐸᐃᖕᒥ ᑭᓪᓕᓯᓂᐊᕐᓂᕐᒥ ᐱᓕᕆᕝᕕᖓᓂ, ᑕᐃᔭᐅᔪᒥ ᐅᕕᒃᑲᕗᑦ ᖃᓄᐃᑉᐸᑦ, ᓇᓂᓯᓚᐅᖅᐳᑦ ᓱᐴᖅᑐᕐᓂᕐᒥ 43 ᐳᓴᓐᑎᒥ ᐅᑯᓇᙵᑦ ᑲᑎᙵᓂᐅᔪᓂ, ᐊᑕᐅᓯᕐᒥ ᐱᖓᓱᓂ ᐊᑐᖅᓯᒪᓪᓗᑎᒃ ᓯᒡᒐᓕᐊᙳᐊᓂ. ᑭᓪᓕᓯᓂᐊᕐᓂᖅ ᐱᓕᕆᐊᖑᓚᐅᖅᐳᖅ 2022−ᒥ.

ᓱᐴᖅᑐᒐᔪᒃᑐᑦ ᐋᖅᑭᒃᓱᖅᓯᒪᕗᑦ 34 ᐳᓴᓐᑎᒥ ᑲᑎᙵᓂᐅᔪᓂ, 9 ᐳᓴᓐᑎᒥ ᐃᓱᒪᒋᔭᐅᓪᓗᑎᒃ “ᐱᒋᐊᓕᓵᖅᑐᓂ ᓱᐴᖅᑐᖅᑎᐅᓂᕐᒥᑦ,” ᑐᑭᖃᖅᑐᒥ ᓱᐴᖅᑐᖃᑦᑕᖅᐳᑦ ᕿᑎᐊᓂ ᐊᑕᐅᓯᕐᒥ ᐊᒻᒪ 99 ᓯᒡᒐᓕᐊᓂ ᐃᓗᐊᓂ ᐅᓪᓗᓂ 30−ᓂ ᐱᓕᕆᓂᕐᒥ ᑭᓪᓕᓯᓂᐊᕐᓂᕐᒥ.

ᐅᐃᕆᓐᓇᕐᓂᐅᔪᖅ ᑐᓂᔭᐅᕙᓪᓕᐊᕗᖅ ᐃᓐᓇᕐᓂ, ᐅᖃᓚᐅᖅᐳᖅ ᕕᒃᑐᐊᕆᐊ ᒍᕋᐃ, ᑕᕝᕚᑭᒥ ᐱᑎᑦᑎᑦᑕᐃᓕᒪᓂᕐᒧᑦ ᐱᓕᕆᔨᐅᔪᒥ ᓄᓇᕕᖕᒥ ᐊᕕᒃᑐᖅᓯᒪᓂᐅᔪᒥ ᑲᑎᒪᔨᖏᓐᓂ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᐊᒻᒪ ᐃᓄᓕᕆᔨᒃᑯᓐᓄᑦ.

80 ᐳᓴᓐᑎᐸᓗᖕᒥ ᓄᓇᕕᒻᒥᐅᓂ ᓱᐴᖅᑐᓲᖑᕗᑦ ᓯᒡᒐᓕᐊᓂ, ᐅᖃᓚᐅᖅᐳᖅ.

“ᐅᖃᓪᓚᖃᑎᖃᖅᓯᒪᕗᖓ ᐊᖓᔪᖅᑳᖑᔪᓂ ᐊᑐᕐᔪᐊᖅᓯᒪᔪᓂ ᐃᓅᓯᕐᒥ,” ᒍᕋᐃ ᐅᖃᓚᐅᖅᐳᖅ ᐊᐱᖅᓱᖅᑕᐅᓂᐅᔪᒥ. “ᐋᓐᓂᖅᓯᖅᑕᐅᕙᓚᐅᖅᐳᑦ, ᐊᒻᒪ ᑕᕝᕚᑭᒥ ᓱᐴᖅᑐᕐᓂᕐᒥ ᐱᖃᓐᓇᕆᓛᕆᕙᖓᑦ.”

ᐅᖃᓚᐅᖅᐳᖅ ᐅᒃᐱᕈᓱᒃᐳᖅ ᒪᒃᑯᒃᑐᑦ ᐃᔅᓴᒃᓯᕙᖕᓂᖏᓐᓂ ᐊᒃᓱᕈᕐᓂᐅᔪᒥ ᐊᐅᓚᑕᐅᔪᓂ ᐊᖓᔪᖅᑳᖑᔪᓂ ᐊᒻᒪ ᐃᓄᑐᖃᕐᓂ, ᐱᑎᑦᑎᔪᒥ ᐊᒃᓱᕉᓴᖕᓂᕐᒥ ᐊᒻᒪ ᑐᕌᖅᑎᑦᑎᔪᒥ ᓯᒡᒐᓕᐊᓂ ᓱᐴᖅᑐᖃᑦᑕᕐᓂᕐᒥ.

“ᐅᓇ ᖁᑦᑎᒃᑐᖅ ᐅᓄᕐᓂᐅᔪᓂ ᐊᑦᑎᒃᓯᕙᓪᓕᐊᙱᓚᖅ,” ᐅᖃᓚᐅᖅᐳᖅ ᒍᕋᐃ.

ᓱᐴᖅᑐᕐᓂᖅ ᓈᒻᒪᒋᔭᐅᓯᒪᕗᖅ ᓄᓇᕕᖕᒥ, ᐅᖃᓚᐅᖅᐳᖅ ᐊᓚᐃᓐ ᐊᐃᓴᒃ, ᑲᑎᙵᓂᐅᔪᒥ ᓯᕗᓕᐊᖅᑎ ᑕᕝᕚᑭᒥ ᐱᑎᑦᑎᑦᑕᐃᓕᒪᓂᕐᒧᑦ ᐱᓕᕆᕝᕕᖕᒥ.

“ᑕᐃᒪᐃᒐᔪᒃᐳᑦ ᓱᐴᖅᑐᕐᓂᕐᒥ ᑭᒃᑯᓕᒫᑦ ᖃᓂᒋᔭᕐᓂ ᓱᐴᖅᑐᖅᐸᒃᑎᓪᓗᒋᑦ,” ᐅᖃᓚᐅᖅᐳᖅ, ᐃᓚᒋᐊᖅᓯᓪᓗᓂ ᓱᐴᖅᑐᕐᓂᖅ ᐃᓅᖃᑎᒌᖑᔪᓄᑦ ᐅᐃᕆᓯᒪᓂᐅᒋᕗᖅ.

ᐊᐃᓴᒃ ᐅᖃᓚᐅᖅᐳᖅ ᐃᓚᖏᑦ ᓄᓇᕕᖕᒥ ᒪᒃᑯᒃᑐᓂ ᓱᐴᖅᑐᖃᑦᑕᓕᓚᐅᖅᐳᑦ ᒪᒃᑯᒃᑎᒋᔪᒥ 6−ᓂ ᐅᑭᐅᓕᖕᓂ.

“ᒪᒃᑯᖕᓂᖅᓴᐅᑎᓪᓗᑎᑦ ᓱᐴᖅᑐᖅᑎᙳᕈᕕᑦ, ᐊᔪᕐᓇᕐᓂᖅᓴᐅᓂᐊᖅᐳᖅ ᓄᖅᑲᕐᓂᕐᒥ ᓱᐴᖅᑐᕐᓂᕐᒥ ᓯᕗᓂᒃᓴᒥ,” ᐅᖃᓚᐅᖅᐳᖅ.

ᐊᐃᓴᒃ ᐅᖃᓚᐅᖅᐳᖅ ᐃᓱᒪᒋᔭᖃᖅᐳᖅ ᓂᐅᖅᑕᐅᕙᒃᑐᓂ ᓯᒡᒐᓕᐊᙳᐊᓂ ᐅᐃᕆᓐᓇᕐᓂᖅᓴᐅᓂᖏᓐᓂ ᓯᒡᒐᓕᐊᑐᐃᓐᓇᓂ, ᐅᐃᕆᓐᓇᖅᑐᖓ ᓂᑯᑏᓐ ᐊᖏᓂᖓᓂ ᓂᐅᖅᑕᐅᕙᒃᑐᓂ ᖁᑦᑎᖕᓂᖅᓴᐅᒐᔪᖕᒪᑕ ᐊᒻᒪ ᖃᕋᓴᕐᒧᐊᖅᐸᒃᖢᓂ ᖃᔅᓯᐊᕐᔪᑯᓗᖕᓂ ᒥᓗᒃᓯᓂᐅᔪᒥ.

ᐊᐃᓴᒃ ᐊᒻᒪ ᒍᕋᐃ ᐱᓕᕆᓂᖓ ᐅᖃᐅᔾᔨᓂᕐᒧᑦ, ᐃᓕᓐᓂᐊᖅᑎᑦᑎᓂᕐᒥ, ᐊᒻᒪ ᐊᑐᐃᓐᓇᖃᖅᑎᑦᑎᓂᕐᒥ ᓱᐴᖅᑐᖃᑦᑕᕈᓐᓃᕐᓂᕐᒥ ᐱᔨᑦᑎᕋᕐᓂᐅᔪᓂ ᐋᓐᓂᐊᕕᖕᓂ ᐊᕕᒃᑐᖅᓯᒪᓂᐅᔪᒥ.

ᒍᕋᐃ ᐊᐅᓪᓛᓲᖑᕗᖅ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᓂᐅᔪᒥ ᐅᖃᓪᓚᒋᐊᖅᑐᖅᖢᓂ ᓱᔪᐃᓂᐅᔪᓐᓴᖅᑐᓂ ᐊᒃᑐᐃᓂᐅᔪᓂ ᑕᕝᕚᑭᒥ.

“ᓴᐱᓕᕆᐊᖃᙱᑉᐳᒍᑦ, ᐅᖃᐅᓯᖃᐃᓐᓇᕆᐊᖃᖅᐳᒍᑦ ᓱᔪᐃᓂᐅᔪᓂ, ᐊᒻᒪ ᑳᓐᓱᒥ ᐱᑎᑦᑎᓲᖑᓂᖓᓂ, ᐱᓪᓚᕆᐅᓂᖓᓂ ᓱᐴᖅᑐᖅᑎᐅᓪᓗᓂ ᐃᓅᓯᓕᒫᖕᓂᑦ,” ᐅᖃᓚᐅᖅᐳᖅ, ᐊᑐᖅᖢᓂ ᐅᓂᒃᑳᖅᑐᐊᖑᔪᒥ ᐅᐃᖓᓂ, ᓱᐴᖅᑐᒃᑲᐅᕕᒡᔪᐊᓚᐅᖅᑐᒥ ᒪᒥᔪᐃᑦᑐᒥ ᐊᓂᕐᓂᑭᑦᑐᒥ ᐋᓐᓂᐊᕐᓇᒥ ᐊᒻᒪ ᑳᓐᓱᒥ ᐆᒃᑑᑎᐅᓗᓂ ᓱᐴᖅᑐᕐᓂᖅ ᑐᕌᕈᓐᓇᕐᓂᖓᓂ.

“ᐅᖃᐅᑎᒻᒪᕆᓚᐅᖅᑕᕋ ᐅᐃᒐ, ᐃᓅᔪᓐᓃᕈᕕᑦ ᑳᓐᓱᒥ ᐅᖃᕐᓂᐊᖅᐳᖓ ᑐᖁᓚᐅᕐᓂᕐᓂ ᓯᒡᒐᓕᐊᒥ ᓱᐴᖅᑐᕐᓂᕐᒧᑦ,” ᐅᖃᓚᐅᖅᐳᖅ.

“ᐊᒃᑐᖅᑕᐅᓯᒪᕐᔪᐊᖅᐳᖓ, ᐅᓇ ᐃᓚᓐᓃᓪᓚᕆᖕᒪᑦ. ᑕᐃᒫᒃ ᐃᓕᓐᓂᐊᖅᑎᑦᑎᔭᑉᐳᖓ ᐅᓪᓗᒥ ᑭᓇᑐᐃᓐᓇᒥ ᑐᖁᔪᖃᖅᑎᓪᓗᒍ ᓱᐴᖅᑐᖃᑦᑕᓗᐊᒧᑦ ᐃᓅᓯᓕᒫᖓᓐᓂ.”