‘ᑕᖃᓗᐊᕐᓂᕐᒥ’ ᐃᓕᓐᓂᐊᕐᕕᐊᕈᓯᕐᓂ ᐊᓯᐅᔨᓂᐅᔪᒥ ᐃᑲᔪᖅᓱᐃᓂᕐᒥ ᐱᓕᕆᔨᓂᑦ
ᐊᔪᖅᑎᑕᐅᓂᕐᒥ ᐃᓕᓐᓂᐊᖅᑐᓕᕆᓂᕐᒧᑦ ᑮᓇᐅᔭᖃᖅᑎᑕᐅᓂᐅᔪᓂ ᑐᒃᓯᕋᐅᑎᓂ ᐅᕘᓇ ᐃᓄᐃᑦ ᓱᕈᓰᑦ ᓯᕗᓪᓕᐅᑎᑕᐅᓪᓗᑎᒃ ᐱᓕᕆᐊᖑᕙᓪᓕᐊᓯᒪᔪᓂᑦ ᐊᒃᓱᕈᕈᑕᐅᕗᖅ, ᐅᖃᖅᐳᖅ ᐃᓕᓴᐃᔨᓄᑦ ᑲᑐᔾᔨᖃᑎᒌᖑᔪᓂ ᐊᖓᔪᖅᑳᖓ
ᐃᓄᑐᖃᕐᒥ ᑭᒻᒥᕈᒻᒥ ᐅᖃᓕᒫᖅᐳᖅ ᐃᓕᓐᓂᐊᕐᕕᖕᒥ ᓱᕈᓯᕐᓄᑦ ᐅᖃᓕᒫᕈᓐᓇᕐᓂᕐᒧᑦ ᑎᑎᕋᕈᓐᓇᕐᓂᕐᒥᓪᓗ ᖃᓄᐃᓐᓂᐅᔪᒥ ᐱᓕᕆᐊᖑᔪᒥ ᐅᑭᐊᒃᓵᒥ 2025−ᒥ. (ᓄᓇᕗᒻᒥ ᒐᕙᒪᒃᑯᑦ ᐊᔾᔨᖁᑎᖓ)
For the English version of this story, please see ‘Burnout and hardship’: Nunavut teachers struggle with loss of student support workers.
ᐃᓕᓴᐃᔨᐅᔪᑦ ᓄᓇᕗᒻᒥ ᐊᑐᐃᓐᓇᖃᓕᖅᐳᑦ ᐅᓄᙱᓐᓂᖅᓴᓂ ᐃᓕᓐᓂᐊᖅᑎᓄᑦ ᐃᑲᔪᖅᓱᐃᓂᕐᒧᑦ ᐃᑲᔪᖅᑎᐅᔪᓂ ᑕᒪᑐᒪᓂ ᐊᕐᕌᒎᔪᒥ ᐃᓕᓐᓂᐊᕐᕕᖕᒧᑦ-ᐱᔾᔪᑎᓕᖕᓂ ᑐᒃᓯᕋᐅᑕᐅᔪᓂ ᐊᔪᖅᑎᑕᐅᓕᖅᑎᓪᓗᒋᑦ ᑮᓇᐅᔭᖃᖅᑎᑕᐅᓂᕐᒥ ᐅᕘᓇ ᐃᓄᐃᑦ ᓱᕈᓰᑦ ᓯᕗᓪᓕᐅᑎᑕᐅᓪᓗᑎᒃ ᐱᓕᕆᐊᖑᕙᓪᓕᐊᓯᒪᔪᒥᑦ.
ᒐᕙᒪᑐᖃᒃᑯᑦ ᑮᓇᐅᔭᖃᖅᑎᑕᐅᓂᐅᔪᒥ ᐱᓕᕆᐊᖑᔪᖅ, ᐊᔾᔨᐸᓗᐊᓂ ᔪᐊᑕᓐ ᑐᙵᕕᐅᔪᒥ, ᓴᓇᓯᒪᕗᖅ ᓇᓗᓇᐃᖅᓯᓂᕐᒥ ᐃᓄᖕᓂ ᓱᕈᓯᕐᓂ ᑲᓇᑕᓕᒫᒥ ᓇᓕᒧᑦᑐᒥ ᐊᑐᐃᓐᓇᖃᕐᓂᖏᓐᓂ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ, ᐃᓅᖃᑎᒌᖕᓂᕐᒧᑦ ᐊᒻᒪ ᐃᓕᓐᓂᐊᖅᑐᓕᕆᓂᕐᒧᑦ ᐃᑲᔪᖅᓱᐃᓂᐅᔪᓂ.
2024-25−ᒥ ᐃᓕᓐᓂᐊᕐᕕᖕᒥ ᐊᕐᕌᒍᖓᓂ, ᐃᓄᐃᑦ ᓱᕈᓰᑦ ᓯᕗᓪᓕᐅᑎᑕᐅᓪᓗᑎᒃ ᐱᓕᕆᐊᖑᕙᓪᓕᐊᓯᒪᔪᑦ ᐱᔪᓐᓇᖅᑎᑦᑎᓚᐅᖅᐳᑦ ᓄᓇᕘᑉ 27−ᖑᔪᓂ ᐃᓕᓐᓂᐊᖅᑐᓕᕆᔨᒃᑯᑦ ᓄᓇᓕᖕᓂ ᐊᑭᓕᖅᓱᐃᓂᕐᒥ ᑮᓇᐅᔾᔭᒃᓴᓂᐅᔪᓂ 88−ᓄᑦ ᐃᖅᑲᓇᐃᔭᑲᐃᓐᓇᖅᑐᓂ ᐃᓕᓐᓂᐊᖅᑎᓄᑦ ᐃᑲᔪᖅᓱᐃᓂᕐᒧᑦ ᓴᓇᔨᐅᔪᓂ. ᐃᖅᑲᓇᐃᔭᖅᑏᑦ ᐱᓕᕆᓚᐅᖅᐳᑦ ᐱᒋᐊᓕᓵᖅᑐᓄᑦ ᐊᒻᒪ ᖁᑦᑎᒃᑐᒥ ᐃᓕᓐᓂᐊᕐᕕᓂᑦ, ᐅᖃᐅᓯᐅᓪᓗᓂ ᓇᐃᓴᐅᑎᓂ ᑐᓂᔭᐅᔪᓂ ᓄᓇᑦᑎᓯᐊᖅ ᑐᓴᒐᒃᓴᓕᕆᔨᒃᑯᓐᓄᑦ ᓄᓇᕘᑉ ᐃᓕᓐᓂᐊᖅᑐᓕᕆᔨᒃᑯᓐᓂ.
ᐊᕐᕌᓂ, ᐃᓕᓐᓂᐊᖅᑐᓕᕆᔨᒃᑯᑦ ᐊᖏᓚᐅᖅᐳᑦ 75−ᓂ ᐃᖅᑲᓇᐃᔭᑲᐃᓐᓇᖅᑐᓂ ᓴᓇᔨᐅᔪᓂ, ᐅᖃᓚᐅᖅᐳᖅ ᐃᓕᓐᓂᐊᖅᑐᓕᕆᔨᒃᑯᑦ ᐅᖃᖅᑎᖓ ᑲᑐᓚ ᒪᑦᓴᓯ ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ.
ᐅᖃᕈᒪᓚᐅᙱᓚᖅ ᖃᔅᓯᓂ ᐃᖅᑲᓇᐃᔭᑲᐃᓐᓇᖅᑐᓂ ᐃᑲᔪᖅᓱᐃᓂᕐᒥ ᓴᓇᔨᐅᔪᓂ ᐃᖅᑲᓇᐃᔭᕐᓂᖏᓐᓂ ᓄᓇᕗᒻᒥ ᐃᓕᓐᓂᐊᕐᕕᐅᔪᓂ ᑕᒪᑐᒪᓂ ᐊᕐᕌᒎᔪᒥ. ᐃᒪᓐᓇᖔᖅ, ᓇᓗᓇᐃᖅᓯᓚᐅᖅᐳᖅ “ᑭᒡᓕᖃᖅᑐᒥ ᐅᓄᕐᓂᐅᔪᓂ.”
“ᑕᐃᓐᓇ ᑮᓇᐅᔭᖃᖅᑎᑕᐅᓂᐅᔪᖅ ᐊᑐᐃᓐᓇᐅᑦᑎᐊᖅᑎᓪᓗᒍ,” ᐅᖃᓚᐅᖅᐳᖅ ᓄᓇᕗᒻᒥ ᐃᓕᓴᐃᔨᓄᑦ ᑲᑐᔾᔨᖃᑎᒌᖑᔪᒥ ᐊᖓᔪᖅᑳᖓ ᔭᔅᑎᓐ ᒫᑦᓯᑦ ᐊᐱᖅᓱᖅᑕᐅᓂᐅᔪᒥ, “ᐊᒥᓱᓂ ᐃᓕᓐᓂᐊᕐᕕᓂᑦ ᐊᑐᐃᓐᓇᖃᓚᐅᖅᑐᓂ ᑖᔅᓱᒥᖓ ᐊᒻᒪ ᐱᓪᓗᑎᒃ ᖄᒃᑲᓐᓂᐊᒍᑦ ᐃᑲᔪᖅᓱᐃᓂᐅᔪᒥ ᐃᖅᑲᓇᐃᔭᖅᑎᓂ.”
ᐃᓕᓐᓂᐊᖅᑎᓄᑦ ᐃᑲᔪᖅᓱᐃᓂᕐᒧᑦ ᓴᓇᔨᓂᑦ ᐃᓚᐅᖃᑕᐅᕗᑦ ᐃᓕᓐᓂᐊᕐᕕᐊᕈᓯᕐᒥ ᐃᓕᓴᐃᔨᐅᔪᓂ ᐃᑲᔪᕐᓂᕐᒧᑦ ᑐᓂᓯᓂᕐᒥ ᐃᓕᓐᓂᐊᕈᑎᒃᓴᓂ, ᐱᓗᐊᖅᑐᒥ ᑕᐅᑐᒃᑕᑐᐊᖃᑲᐃᓐᓇᕐᓂᕐᒥ ᐃᓕᓐᓂᐊᖅᑎᓄᑦ ᐱᔭᕆᐊᓕᖕᓂ ᐊᓯᐊᒎᖅᑐᒥ ᐊᖅᑭᒃᑕᐅᓯᒪᓂᐅᔪᓄᑦ.
ᕕᕗᐊᕆ 2025, ᓄᓇᖃᖅᑳᖅᓯᒪᔪᓄᑦ ᐱᔨᑦᑎᕋᕐᓂᕐᒧᑦ ᑲᓇᑕᒥ ᐅᖃᐅᓯᖃᓚᐅᖅᐳᑦ ᑐᒃᓯᕋᕐᓂᐅᔪᓂ ᐃᓕᓐᓂᐊᖅᑎᓄᑦ ᐃᑲᔪᖅᓱᐃᓂᕐᒧᑦ ᐃᑲᔪᖅᑐᐃᔨᐅᔪᓂ ᐊᔪᖅᑎᑕᐅᓂᐊᓕᕐᓂᖏᓐᓂ ᑮᓇᐅᔭᖃᖅᑎᑕᐅᓂᐅᔪᓂ ᐅᕘᓇ ᐃᓄᐃᑦ ᓱᕈᓰᑦ ᓯᕗᓪᓕᐅᑎᑕᐅᓪᓗᑎᒃ ᐱᓕᕆᐊᖑᕙᓪᓕᐊᓯᒪᔪᓄᑦ, ᑭᓯᐊᓂ ᐊᔾᔨᐅᙱᕐᔪᐊᖅᑐᓄᑦ ᖃᓄᐃᓐᓂᐅᔪᓂ.
ᓄᓇᕗᒻᒥ ᐃᓕᓐᓂᐊᕐᕕᐊᕈᓯᖏᑦ ᐊᔾᔨᒋᙱᕐᔪᐊᖅᐸᖓ ᑮᓇᐅᔭᖃᖅᑎᑕᐅᙱᑎᓪᓗᒋᑦ, ᒫᑦᓯᑦ ᐅᖃᓚᐅᖅᐳᖅ.
“ᐊᒥᓱᓂ ᐃᓕᖅᑯᓯᖓᓐᓄᑦ ᐱᔭᕆᐊᖃᕐᓂᖃᖅᐳᑦ, ᐊᒥᓱᓂ ᐃᓅᓕᓴᖅᑕᐅᓂᕐᒧᑦ ᓱᖅᑯᐃᖅᑕᐅᓂᐅᔪᓂ ᐱᔭᕆᐊᓕᖕᓂ ᐊᒻᒪ ᐱᓪᓗᐊᖅᑐᓂ ᐊᓯᐊᒎᖅᑐᒥ ᑲᒪᒋᔭᐅᔭᕆᐊᖃᕐᓂᐅᔪᓂ,” ᐅᖃᓚᐅᖅᐳᖅ. “ᐱᑎᑦᑎᕐᔪᐊᖅᐳᖅ ᐊᒃᓱᕈᕐᔪᐊᕐᓂᐅᔪᓂ, ᑕᖃᓗᐊᕐᓂᕐᒥ ᐊᒻᒪ ᐊᒃᓱᕉᓴᖕᓂᐅᔪᓂ ᐃᓕᓴᐃᔨᓄᑦ ᐊᐅᓚᑦᑎᓇᓱᐊᖅᑎᓪᓗᒋᑦ ᑕᒪᒃᑭᓕᒫᓂ ᖄᖓᒍᑦ ᐃᓕᓴᐃᓂᕐᒥ ᐃᓕᓐᓂᐊᕈᑎᒃᓴᓂ.”
ᓄᓇᕗᒻᒥ ᐃᖅᑲᓇᐃᔭᖅᑎᓄᑦ ᔫᓂᐊᖓ, ᑭᒡᒐᖅᑐᐃᔪᒥ ᓄᓇᕗᒻᒥ ᒐᕙᒪᒃᑯᑦ ᐃᖅᑲᓇᐃᔭᐃᓐᓇᖅᑐᓄᑦ ᐃᓕᓐᓂᐊᖅᑎᓄᑦ ᐃᑲᔪᖅᓱᐃᓂᕐᒧᑦ ᐃᑲᔪᑎᐅᔪᓂ, ᐊᑭᕋᖅᑐᙱᓚᑦ ᒐᕙᒪᒃᑯᓐᓂ ᐃᖅᑲᓇᐃᔭᖅᑎᑦᑎᓂᕐᒥ ᐅᓄᙱᓐᓂᖅᓴᓂ ᐃᖅᑲᓇᐃᔭᑲᐃᓐᓇᖅᑐᓂ ᐃᓕᓐᓂᐊᖅᑎᓄᑦ ᐃᑲᔪᖅᓱᐃᓂᕐᒧᑦ ᐃᑲᔪᖅᑎᐅᔪᓂ, ᐅᖃᓚᐅᖅᐳᖅ ᐊᖓᔪᖅᑳᖓ ᔭᐃᓴᓐ ᕉᓴᓐ ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ.
ᐃᓱᒫᓘᑎᖃᖅᓯᒪᕗᖅ ᐃᑲᔪᖅᓱᐃᓂᕐᒧᑦ ᐃᖅᑲᓇᐃᔭᖅᑎᓂ ᐊᑐᕐᓂᖃᐅᑎᖏᓐᓂ ᐅᕗᙵᖅᑐᓄᖅ ᔪᓂᐊᓐ−ᒥᙱᑦᑐᓄᑦ ᓴᓇᔨᐅᔪᓄᑦ.
“ᐅᑯᐊ ᐃᖅᑲᓇᐃᔭᑲᐃᓐᓇᖅᑐᓂ, ᐊᑭᓕᖅᓱᖅᑕᐅᙱᓐᓂᖅᓴᐅᔪᓂ ᐊᒻᒪ ᔫᓂᐊᒦᖃᑕᐅᙱᑦᑐᓂ ᐊᑐᕐᓂᖃᐅᑎᓂ ᑕᐃᒪᐃᑦᑐᓪᓚᕆᐅᔪᓂ ᐊᔾᔨᖓᓂ ᐱᓕᕆᓂᐅᔪᓂ ᔫᓂᐊᓐᒦᑦᑐᓂ [ᐃᑲᔪᖅᓱᐃᓂᕐᒧᑦ] ᐃᓂᐅᔪᓂ ᐅᕙᓂ ᐃᖅᑲᓇᐃᔭᖅᑎᓄᑦ ᐊᖏᖃᑎᒌᒍᑎᑦᑎᓐᓂ ᓄᓇᕗᒻᒥ ᒐᕙᒪᒃᑯᓐᓄᑦ,” ᐅᖃᓚᐅᖅᐳᖅ ᕉᓴᓐ.
“ᑕᒪᒃᑭᑦ [ᐃᑲᔪᖅᓱᐃᓂᕐᒧᑦ] ᐃᓂᐅᔪᑦ ᔫᓂᐊᓐᒦᓪᓗᐊᖅᐳᑦ ᐊᒻᒪ ᐊᑭᓕᖅᓱᖅᑕᐅᓗᑎᒃ ᓄᓇᕗᒻᒥ ᐃᖅᑲᓇᐃᔭᖅᑎᓄᑦ ᔫᓂᐊᖓᑕ ᐃᖅᑲᓇᐃᔭᖅᑎᓄᑦ ᐊᖏᖃᑎᒌᒍᑎᒥ ᓄᓇᕗᒻᒥ ᒐᕙᒪᒃᑯᓐᓄᑦ,” ᐃᓚᒋᐊᖅᓯᓚᐅᖅᐳᖅ. “ᐊᔭᐅᕆᕗᒍᑦ ᐃᖅᑲᓇᐃᔭᖅᑎᖁᑎᓕᖕᒥ ᓇᓗᓇᐃᖅᓯᓂᖏᓐᓂ ᓈᒻᒪᒃᑐᓂ [ᐃᑲᔪᖅᓱᐃᓂᕐᒧᑦ ᓴᓇᔨᐅᔪᓂ] ᐃᖅᑲᓇᐃᔮᖃᖅᑎᑕᐅᓂᖏᓐᓂ ᓄᓇᕗᒻᒥ ᐃᓕᓐᓂᐊᕐᕕᐅᔪᓂ.”
ᓄᓇᖃᖅᑳᖅᓯᒪᔪᓂ ᐱᔨᑦᑎᕋᕐᓂᕐᒧᑦ ᒥᓂᔅᑕᖓ ᒫᓐᑎ ᒑᓪ−ᒫᔅᑎ ᓱᓕᓂᕋᐃᓚᐅᖅᐳᖅ ᓄᕕᐱᕆ 2025−ᒥ ᓄᑖᙳᕆᐊᖅᑎᑕᐅᓂᖓᓂ ᐃᓄᐃᑦ ᓱᕈᓰᑦ ᓯᕗᓪᓕᐅᑎᑕᐅᓪᓗᑎᒃ ᐱᓕᕆᐊᖑᕙᓪᓕᐊᓯᒪᔪᒥᑦ ᐊᒻᒪ ᐃᖅᑲᓇᐃᔭᐃᓐᓇᖅᑎᐅᓗᑎᒃ. ᐅᖃᐅᓯᖃᓚᐅᖅᐳᖅ $115-ᒥᓕᐊᓐᓂ, ᐊᕐᕌᒍᒥ-ᐊᑕᐅᓯᕐᒥ ᐅᖓᕙᕆᐊᖅᑕᐅᓂᖓᓂ ᕕᕗᐊᕆᒥ.
$115-ᒥᓕᐊᓐᓂ ᐃᓚᒋᐊᖅᓯᓂᕐᒥ ᓇᓗᓇᐃᖅᓯᕗᖅ “ᑲᔪᓰᓐᓇᕐᓂᖓᓂ” ᐃᓕᓐᓂᐊᖅᑐᓕᕆᔨᒃᑯᑦ ᐱᓕᕆᑎᓪᓗᒋᑦ ᐊᑯᓂᐅᔪᒃᑯᑦ ᑐᕌᒐᕆᔭᐅᔪᒥ ᐃᓄᐃᑦ ᓱᕈᓰᑦ ᓯᕗᓪᓕᐅᑎᑕᐅᓪᓗᑎᒃ ᐱᓕᕆᐊᖑᕙᓪᓕᐊᓯᒪᔪᒧᑦ, ᐅᖃᓚᐅᖅᐳᖅ ᑭᐊᕈᓚᐃᓐ ᒍᕌᑎᓐ, ᐅᖃᖅᑎᐅᔪᖅ ᐃᓕᓐᓂᐊᖅᑐᓕᕆᔨᒃᑯᓐᓄᑦ, ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓄᑦ.
ᕿᓚᒻᒥᐅᔪᒥ, ᑕᒪᒃᑭᑦ ᑮᓇᐅᔭᖃᖅᑎᑕᐅᓂᐅᔪᓂ ᐃᓕᓐᓂᐊᕐᕕᖕᓄᑦ−ᐱᔾᔪᑎᓕᖕᓂ ᐱᔭᕆᐊᓕᖕᓂ ᕿᒥᕐᕈᔭᐅᕙᒃᐳᑦ ᐱᓕᕆᓂᐅᔪᒥ ᐱᓕᕆᓂᐅᔪᒧᑦ ᑐᙵᕕᓕᖕᒥ.
“ᐅᓇ ᐃᓄᐃᑦ ᓱᕈᓰᑦ ᓯᕗᓪᓕᐅᑎᑕᐅᓪᓗᑎᒃ ᐱᓕᕆᐊᖑᕙᓪᓕᐊᓯᒪᔪᑦ ᐃᑲᔪᖅᓱᐃᔪᓐᓇᕐᓂᖓᓂ ᓱᕈᓯᕐᒧᑦ-ᑐᕌᖓᔪᒥ ᐃᓕᓐᓂᐊᕐᓂᕐᒧᑦ-ᐱᔾᔪᑎᓕᖕᒥ ᑐᒃᓯᕋᕈᑕᐅᔪᓂ, ᓲᕐᓗ ᐃᓱᒪᓕᕆᓂᕐᒧᑦ ᐃᓕᓐᓂᐊᖅᑐᓕᕆᓂᕐᒥ ᖃᐅᔨᓴᐃᓂᐅᔪᓂ, ᐱᔭᕆᑐᔪᓂ ᐃᑲᔪᖅᓱᐃᓂᐅᔪᓂᑦ, ᐊᒻᒪ ᐃᓕᓐᓂᐊᕈᑎᒥᓂᒃ ᐃᑲᔪᕐᓂᐅᔪᒥ ᑭᐅᓂᕐᒧᑦ ᐃᒻᒥᒃᑯᑦ ᐃᓕᓐᓂᐊᖅᑎᓄᑦ ᐱᔭᕆᐊᓕᖏᓐᓂ, ᑐᕌᖓᓇᓱᐊᙱᓚᖅ ᐃᓇᖏᖅᓯᓂᕐᒥ ᐱᑕᖃᖅᐸᒌᖅᑐᓂ ᒐᕙᒪᑐᖃᒃᑯᑦ/ᑲᓇᑕᒥ ᐊᕕᒃᑐᖅᓯᒪᓂᐅᔪᓂ ᐅᕝᕙᓘᓐᓃᑦ ᓄᓇᕗᒻᒥ ᑭᒃᑯᓕᒫᓄᑦ ᐱᓕᕆᐊᖑᔪᓂ,” ᒍᕌᑎᓐ ᐅᖃᓚᐅᖅᐳᖅ.
(0) Comments