ᕿᒧᑦᔪᐃᑦ ᑎᑕᒃᐳᑦ ᓇᓚᐅᑦᑎᐊᖅᑐᒥ ᐃᙱᐅᓯᓂᑦ ᓵᓚᖃᕋᓱᐊᖅᑎᐅᔪᓂ ᓂᕈᐊᖅᑎᐅᔪᓂᑦ

For English version, see Inukjuak band’s second album hits the right notes with contest judges

ᐃᓄᒃᔪᐊᒥ-ᑐᙵᕕᓖᑦ ᑎᑕᒃᑎᑦ ᕿᒧᑦᔪᐃᑦ ᐊᖏᕐᕋᐅᔾᔨᓚᐅᖅᐳᑦ ᓵᓚᖃᐅᓯᐊᒥᒃ ᓂᔾᔮᑎᑦᑎᓂᐅᔪᒥ ᐊᕐᕌᒍᒥ ᓄᓇᖃᖅᑳᖅᓯᒪᔪᓄᑦ ᐅᖃᐅᓯᕐᓂᑦ 2025−ᒥ ᐱᒻᒪᕆᐅᓛᖑᔪᒥ ᖁᕕᐊᓱᒍᑕᐅᔪᒥ  de L’ADISQ.

46−ᖓᓂ ᓴᖅᑭᑕᐅᓂᖓᓂ l’Association québécoise de l’industrie du disque, du spectacle et de la video — ᐅᕝᕙᓘᓐᓃᑦ ᑯᐸᐃᖕᒥ ᑲᑐᔾᔨᖃᑎᒌᖑᔪᓄᑦ ᓂᐱᓕᐅᕆᓂᕐᒥ, ᖁᙱᐊᖅᑕᐅᓂᐅᔪᒥ ᐊᒻᒪ ᑕᕐᕆᔭᓕᐊᓄᑦ ᓴᓇᔨᐅᔪᓄᑦ — ᖁᕕᐊᓱᒍᑎᖃᓚᐅᖅᐳᑦ ᐱᐅᓛᖑᔪᓂ ᑯᐸᐃᖕᒥ ᑐᓴᕐᓈᕐᓂᐅᔪᓂ ᐊᒻᒪ ᓴᓇᐅᒐᓂᑦ ᖁᕕᐊᓱᒍᑕᐅᔪᒥ ᓄᕕᐱᕆ 5−ᒥ ᒪᓐᑐᕆᐋᓪᒥ Théâtre Wilfrid-Pelletier−ᒥ.

ᓇᖕᒥᓂᖅ-ᑕᐃᒎᓯᓕᖕᒥ ᓂᔾᔮᑎᑦᑎᓂᐅᔪᖅ ᕿᒧᑦᔪᐃᑦ, ᑎᑕᒃᑏᑦ ᒪᕐᕈᖓᓂ ᓂᔾᔮᑎᑦᑎᓂᐅᔪᒥ, ᓴᖅᑭᑎᑕᐅᓚᐅᖅᐳᖅ ᑎᓯᐱᕆᐅᓚᐅᖅᑐᒥ. ᐊᑐᐃᓐᓇᐅᕗᖅ Spotify ᐊᒻᒪ Apple ᑐᓴᕐᓈᕐᓂᐅᔪᒥ. ᑎᑕᒃᑏᑦ, ᐃᓚᖃᖅᑐᒥ ᐃᙱᖅᑎᖓ ᐊᒻᒪ ᑯᑭᑦᑕᐹᖅᑎ ᓵᓕ ᐃᖃᓗᒃ ᐊᒻᒪ ᐊᓇᐅᓪᓚᒃᑎ ᐃᐊᕆᒃ ᐊᑕᒍᑦᑖᓗᒃ, ᐱᐊᓇᑎᑦᑎᔨ ᐸᐅᓗᓯ ᑲᓴᓪᓗᐊᖅ ᐊᒻᒪ ᖃᑎᑐᔪᒥ ᑯᑭᑦᑕᐹᖅᑎ ᔫᐱ ᐅᐃᑕᓗᒃᑐᖅ, ᐋᖅᑭᒃᑕᐅᓚᐅᖅᐳᑦ 1990ᕝᒥ.

“ᖁᒃᓴᓪᓚᕐᔪᐊᓚᐅᖅᐳᒍᑦ. ᓂᕆᐅᓚᐅᙱᑦᑎᐊᖅᐳᒍᑦ ᓵᓚᖃᕐᓂᕐᒥ ᓵᓚᖃᐅᓯᐊᖑᔪᒥ,” ᐊᑕᒍᑦᑖᓗᒃ ᐅᖃᓚᐅᖅᐳᖅ ᐊᐱᖅᓱᖅᑕᐅᓂᐅᔪᒥ.

ᑎᑕᒃᑏᑦ ᓴᖅᑭᑎᑦᑎᓚᐅᖅᐳᑦ ᓯᕗᓪᓕᖅᐸᐅᔪᒥ ᓂᔾᔮᑎᑦᑎᓂᐅᔪᒥ, ᑕᐃᒎᓯᓕᖕᒥ ᐃᓪᓗᕐᒥ, 1997−ᒥ. ᑕᐃᒪᙵᓂ, ᐊᑲᐅᙱᓕᐅᕈᑕᐅᔪᓂ ᐃᖅᑲᓇᐃᔭᕐᓂᕐᒧᑦ ᐃᑲᕐᕋᖏᓐᓂ ᐊᒻᒪ ᓇᖕᒥᓂᖅ ᐊᖏᖅᓯᒪᓂᐅᔪᓂ ᐊᔪᕐᓇᖅᑎᑦᑎᓚᐅᖅᐳᖅ ᐃᓚᒋᔭᐅᔪᓂ ᑲᑎᖃᑎᒌᖕᓂᕐᒧᑦ ᐊᒻᒪ ᑐᓴᕐᓈᕈᑎᓕᐅᕐᓗᑎᒃ, ᐅᖃᓚᐅᖅᐳᖅ ᐃᖃᓗᒃ, ᐊᑕᐅᓯᐅᔪᒥ ᑎᑕᒃᑎᓂ ᐃᙱᐅᓯᓂ ᑎᑎᕋᖅᑎᓪᓚᕆᐅᔪᒥ.

“ᓄᖅᑲᓚᐅᖅᐳᖓ ᐃᖅᑲᓇᐃᔮᓐᓂ ᐊᕐᕌᒍᐸᓗᖕᓂ 6−ᖑᓕᖅᑐᓂ. ᑕᐃᒫᒃ, ᐱᕕᒃᓴᖃᓕᖅᐳᖓ ᐱᙳᐊᖃᑎᖃᕐᓂᕐᒥ ᐱᔪᓐᓇᕐᓂᖅᓴᐅᓕᖅᖢᖓ,” ᐅᖃᓚᐅᖅᐳᖅ.

“ᑕᐃᒫᒃ ᓴᓇᔭᕆᐊᖃᓕᓚᐅᖅᐳᒍᑦ ᓄᑖᖑᔪᒥ ᓂᔾᔮᑎᑦᑎᓂᐅᔪᒥ.”

ᐊᕙᑕᖅ ᐃᓕᖅᑯᓯᒧᑦ ᐱᓕᕆᕝᕕᒃ, ᐃᓄᖕᓄᑦ ᐃᓕᖅᑯᓯᒧᑦ ᑲᑐᔾᔨᖃᑎᒌᖑᔪᒥ ᓄᓇᕕᖕᒥ, ᑐᓂᓯᓚᐅᖅᐳᑦ ᑎᑕᒃᑎᓂ ᑮᓇᐅᔭᖃᖅᑎᑦᑎᓂᐅᔪᒥ ᓂᐱᓕᐅᕆᓂᕐᒧᑦ ᓂᔾᔮᑎᑦᑎᓂᐅᔪᒥ, ᐊᑕᒍᑦᑖᓗᒃ ᐅᖃᓚᐅᖅᐳᖅ. ᑲᑐᔾᔨᖃᑎᒌᖑᔪᑦ ᑲᑎᖃᑎᖃᓚᐅᖅᐳᑦ ᑐᓴᕐᓈᕐᓂᕐᒥ ᓴᖅᑭᑎᑦᑎᔨᐅᔪᒥ ᓴᐃᒪᓐ ᐅᐊᓪᔅᒥ ᐊᒻᒪ Atty Records ᓂᐱᓕᐅᕆᓂᕐᒥ ᐃᓄᒃᔪᐊᒥᑦ, ᑰᔾᔪᐊᕐᒥ ᐊᒻᒪ ᓴᓪᓗᐃᑦᓂᑦ.

ᕿᒧᑦᔪᐃᑦ ᓴᓇᓯᒪᕗᖅ ᐃᙱᐅᓯᓂᑦ ᕿᑎᐊᓃᑦᑐᓂ ᐃᓅᓯᐅᔪᒥ ᐅᑭᐅᖅᑕᖅᑐᒥ, ᐃᓚᖃᖅᑐᒥ ᐃᓚᖏᓐᓂ ᑐᒃᓯᐊᕐᓂᕐᒧᑦ ᐃᙱᐅᓯᓂᑦ ᑎᑎᕋᖅᓯᒪᔪᓂ ᐃᓄᒃᑎᑐᑦ.

“ᐃᓱᒪᓗᐊᕌᓗᓚᐅᖅᓯᒪᕗᒍᑦ ᑎᑎᕋᕐᓂᕐᒥ ᐃᙱᐅᓯᓂᑦ ᐊᓯᐊᓂ ᐅᖃᐅᓯᕐᒥ ᑭᓯᐊᓂ ᓇᖕᒥᓂᖅ ᐅᖃᐅᓯᑦᑎᓐᓂ,” ᐊᑕᒍᑦᑖᓗᒃ ᐅᖃᓚᐅᖅᐳᖅ. “ᑕᐃᒪᐃᑐᐃᓐᓇᖅᐳᖅ ᑕᒪᒃᑭᑦ ᐃᙱᐅᓯᕗᑦ ᐃᓄᒃᑎᑑᕐᓂᖏᓐᓂ.”

ᐃᓚᒋᐊᖅᓯᓚᐅᖅᐳᖅ ᐃᓚᖏᑦ ᐃᙱᐅᓯᑦ ᓂᔾᔮᑎᑦᑎᓂᐅᔪᒥ ᑎᑎᕋᖅᑕᐅᓚᐅᖅᓯᒪᕗᑦ 1990−ᖏᓐᓂ ᑭᓯᐊᓂ ᓂᐱᓕᐅᖅᑕᐅᓚᐅᖅᓯᒪᙱᖦᖢᑎᒃ ᑭᓯᐊᓂ ᐊᕐᕌᒎᓚᐅᖅᑐᒥ.

ᐅᐃᑕᓗᒃᑐᖅ ᐃᖅᑲᐅᒪᓂᖃᓚᐅᖅᐳᖅ ᑎᑕᒃᑏᑦ ᐱᒋᐊᕐᓂᖏᓐᓂ ᐊᒻᒪ ᐊᖏᖅᓯᒪᓂᖏᓐᓂ ᐱᔨᑦᑎᕋᕐᓂᕐᒥ ᓄᓇᓕᐅᔪᒥ.

“ᐱᒋᐊᓚᐅᖅᑎᓪᓗᑕ 1990−ᒥ, ᐅᖃᐅᑏᓐᓇᐅᔭᖅᐸᓚᐅᖅᐸᒃᑲ ᐅᕙᓃᑉᐳᒍᑦ ᐊᓕᐊᓇᐃᒍᓱᖕᓂᖃᕐᓂᕐᒧᑦ, ᐱᙳᐊᕐᓂᕐᒧᑦ ᑐᓴᕐᓈᒐᒃᓴᓂ ᐊᒻᒪ ᑕᑯᓂᕐᒥ ᐃᓄᖕᓂ ᖁᕕᐊᓱᒃᑐᓂ,” ᐅᖃᓚᐅᖅᐳᖅ.

“ᐱᓯᒪᐃᓐᓇᖅᐸᕋ ᐅᖃᐅᓯᕐᒥ ᐊᒻᒪ ᓱᓕ ᑲᔪᓯᕗᖅ.”