ᐃᓪᓗᓕᐅᖅᑐᑦ ᐃᓄᐃᑦ, ᐃᓪᓗᓕᐅᖅᑐᑦ ᐊᖏᕐᕋᔅᓴᓂᑦ

ᐊᖏᕐᕋᕗᑦ ᑎᓴᒪᐅᓕᖅᑲᖓᓪᓗᓂ ᐅᓂᒃᑳᕆᔭᐅᔪᖅ ᓄᓇᑦᑎᐊᕐᒥ ᓇᒻᒥᓂᖅᑖᕈᑎᔅᓴᐅᓚᐅᖅᓯᒪᔪᖅ ᐃᓪᓗᓄᑦ ᐊᒻᒪᓗ ᐱᕙᓪᓕᐊᓂᕐᒧᑦ ᐊᒻᒪᓗ ᐃᓄᓐᓄᑦ ᐃᑲᔫᑎᔅᓴᓂᒃ ᓄᓇᕗᒻᒥᐅᑕᕐᓄᑦ ᓇᒻᒥᓂᖅ ᐃᓪᓗᓕᐅᕈᓐᓇᖁᓪᓗᒋᑦ. ᐅᖃᓕᒫᒃᑲᓂᕐᓗᑎᑦ:

ᓯᕗᓪᓕᖅᐹᖓ 1: ᒪᕐᕉᓪᓗᑎᒃ ᐃᓄᒃ ᐱᒋᐊᖅᑳᖅᑐᒥᓃᒃ ᐃᓪᓗᒻᒥᑦ ᓇᒻᒥᓂᕆᓂᐊᖅᑕᖓᓐᓂ ᐅᑭᐅᓂᑦ 35−ᓂᒃ ᐊᓂᒍᖅᓯᒪᓕᖅᑐᑎᓪᓗ 

ᐊᐃᑉᐸᖓ 2: ᐃᓪᓗᑖᕈᔅᓴᒥᑦ ᓇᒻᒥᓂᖅ (HAP) ᐃᑲᔪᕈᓐᓇᓪᓚᕆᑦᑐᑦ ᐊᑲᐅᓐᖏᓕᐅᕈᑕᐅᔪᓂᒃ “ᐊᑯᓂᐊᓗᒃ ᐅᑕᖅᑭᖃᑦᑕᖅᑐᓂᒃ” ᐃᓅᓯᕐᒥᓂᒃ ᐃᓪᓗᑖᕋᓱᐊᖅᑐᑦ ᐃᓪᓗᓕᕆᔨᒃᑯᓐᓂ ᐋᖅᑭᐅᒥᒐᔭᖅᑐᖅ 

ᐅᑎᖅᐸᓪᓕᐊᓪᓗᓂ ᐅᓐᓄᓴᒃᑯᑦ ᐊᐅᓪᓛᖅᓯᒪᖅᑲᐅᓪᓗᓂ ᓇᐅᔭᓂᑦ ᐅᑭᐊᔅᓴᓕᖅᑎᓪᓗᒍ, ᐃᓐᓇᖅ ᑕᐃᕕᑦ ᓄᓗᒃ ᐃᔅᓯᕚᖅᑐᖅ ᑰᖃᕐᕕᒻᒥ ᒐᕙᒪᒃᑯᓐᓂ ᓇᒻᒥᓂᕆᔭᐅᔪᒥᑦ ᓄᓕᐊᖓᓗ, ᐃᓐᓇᖅ ᓲᓴᓐ ᓄᓗᒃ, ᒪᕐᕉᓐᓂᒃ ᓯᕙᖃᖅᑐᑎᑦ ᑕᒫᓂ. ᑖᓐᓇ ᐃᓪᓗᓕᐊᕆᓚᐅᖅᓯᒪᔭᖓ ᐃᓅᓱᑦᑐᓂᑦ ᐃᓚᖃᖅᑐᓂᑦ ᖁᓕᑦ ᐅᑭᐅᑦ ᐊᓂᒍᖅᓯᒪᓕᖅᑐᑦ 9−ᓂᑦ ᐃᓄᓐᓂᑦ ᐃᓚᖃᖅᑐᓂ ᓴᓇᔨᓂᓪᓗ ᓴᓇᑦᑎᐊᒃᑲᐅᓂᖅᐹᑦᑎᐊᑦ ᑕᐃᒃᑯᐊ ᓄᓇᓕᓐᓂᑦ.

ᓄᓗᒃ ᐃᖅᑲᐅᒪᔪᖅ ᓲᕐᓗ ᒫᓐᓇᓕᓴᖅᑎᑐᑦ ᐊᐅᔭᐅᓚᐅᖅᑐᑎᑐᑦ ᐃᓪᓗᓕᐅᖅᑎᓪᓗᖏᑦ. ᓇᑎᖓ ᐃᑭᐊᖅᑎᔅᓴᖃᕐᓇᓂ, ᐃᑲᔪᕐᓂᖃᕋᔭᖅᑑᒐᓗᐊᖅ, ᑭᓯᐊᓂᓕ ᐅᖅᑰᓂᖅᓴᐅᖃᑦᑕᕋᔭᕐᒥᔪᑦ ᐅᑭᐅᒃᑯᑦ ᐋᖅᑭᔅᓯᒪᓂᖏᓐᓂ “ᐋᖅᑭᔅᓱᒐᖅᑎᑐᑦ” ᑕᐃᒪᐃᓕᖓᒻᒪᑕ. ᐊᖏᕐᕋᐃᑦ ᓴᓇᔭᐅᕙᔪᔪᑦ ᐃᓚᖓᓐᓂ ᓯᓚ ᒪᓕᑦᑐᒍ ᐊᐱᓚᐅᓐᖏᓐᓂᖓᓐᓂ ᓯᓚᓗᖃᑦᑕᓚᐅᓐᖏᓐᓂᖓᓂᓗ, ᐅᖃᖅᑐᓂᓗ, ᐅᖁᖅᐸᓪᓕᐊᕙᑦᑐᑦ ᑭᓯᐊᓂ ᑯᕕᕋᕐᓂᕋᐃᒻᒪᑦ ᐃᒥᖅᑕᐅᑎ ᖃᑦᑕᖓ ᐃᒻᒪᑦᑕᐅᒐᓱᐊᖅᑎᓪᓗᒍ.

ᑖᒃᑯᐊ ᐃᖅᑲᓇᐃᔭᖃᑎᒌᑦ ᓴᓇᓚᐅᖅᓯᒪᔪᑦ “ᐃᓄᐃᑦ ᐱᖅᑯᓯᖏᑎᒍᑦ,” ᐃᖅᑲᐅᒪᔪᖅ, ᖃᓄᐃᑦᑕᐃᓕᒪᑎᑦᑎᔾᔪᑎᖃᖅᑐᑎᑦ, ᑐᐊᕕᖅᑐᑎᑦ ᐱᑦᑎᐊᕋᓱᐊᖅᑐᑎᓪᓗ.

ᓄᓗᒃᑯᑦ ᑕᕝᕙᓂᒥᐅᑕᐅᔪ ᐃᓪᓗᒥ — ᐊᒥᑲᓪᓚᓂᑦᑕᐅ ᓴᓇᓯᒪᒻᒥᔪᖅ 1970-ᖏᓐᓂ ᐃᓪᓗᓕᕆᔨᒃᑯᓐᓄᑦ. (ᐊᔾᔨᓕᐅᒐᖓ ᑕᐃᕕᑦ ᕙᓐ)

ᓯᓚᕐᔪᐊᖅ ᐃᓅᓇᓱᐊᕐᕕᕗᑦ ᐊᓯᔾᔨᖅᓴᒪᔪᖅᐹᓘᓕᕐᖓᑦ ᐅᐊᑦᑎᐊᕈᓂᑦ, ᓇᐅᔮᖅᑕᖃᓚᐅᖅᑎᓐᓇᒍᓕ. ᕿᒧᔅᓯᒃᑯᑦ ᓇᒧᓐᖓᖅᐸᔪᒐᓗᐊᕐᖓᑦ, ᐊᐅᔭᓕᒪᖅ ᖃᒻᒪᒦᑦᑐᑎᑦ, ᐅᑭᐅᒃᑯᑦ ᐃᓪᓗᕕᒐᕐᒦᑦᑐᑎᑦ − ᐃᓅᓚᐅᖅᓯᒪᔪᖅ ᐃᓪᓗᕕᒐᕐᒥᑦ, ᐅᐱᒋᑦᑎᐊᖅᑕᖓ, ᐅᓂᒃᑳᕆᒋᐊᖓ ᐅᐱᒋᑦᑎᐊᖅᑐᓂᐅᒃ ᑕᒪᓐᓇ ᐅᓪᓗᒥ, “ᐃᓅᔪᖓ! ᐃᓪᓗᕕᒐᕐᒥ ᐃᓅᓚᐅᖅᓯᒪᔪᖓ. ᐃᓪᓗᕕᒐᕐᒥ ᐃᓅᓂᑰᓪᓗᖓ ᓇᓗᓇᐃᒃᑯᑎᒋᕙᕋ ᐃᓅᓂᕐᓂᑦ.” ᖃᔭᕐᒥᑦ ᐅᒥᐊᖅᑐᓚᐅᖅᑐᓂᑦ ᐊᐅᓚᐅᑎᖃᓲᖑᓕᖅᑐᖅ 225-ᓂᒃ ᓴᓐᖏᓂᓕᓐᓂᑦ, ᐃᓪᓗᕋᓛᕐᒥ ᓯᓂᖃᑦᑕᖅᓂ ᓯᑭᑑᒃᑰᖃᑦᑕᖅᑐᓂᓗ.

“1968−ᒥᓕ, ᐃᓪᓗᓕᐅᖅᐸᓪᓕᐊᓕᓚᐅᖅᓯᒪᔪᑦ ᓇᐅᔮᓂᑦ. ᑕᐃᔅᓱᒪᓂ ᐃᓕᓚᐅᖅᓯᒪᔪᖓ ᐃᓪᓗᕕᒐᓕᐅᕆᐊᖓ−“ ᓇᒻᒥᓂᖅ ᐋᖅᑭᒋᐊᖅᑐᓂᐅᒃ ᐅᖃᖅᑕᓂᒃ, “ᐃᓪᓗᓕᒃ.”

ᑳᓐᑐᓛᑦᑏᑦ ᓂᕈᐊᖅᑕᐅᓚᐅᖅᓯᒪᔪᖅ ᓄᓗᒃ 16−ᓂᒃ ᐅᑭᐅᖃᑐᐃᓐᓇᑎᓪᓗᒍ ᖃᓪᓗᓇᐅᔭᕈᓐᓇᕐᓂᖓᓐᓄᑦ. ᐅᑭᐅᑦ ᖁᓕᑦ ᐊᓂᒍᖅᑎᓪᓗᒋᑦ, ᓯᕗᓪᓕᖅᐹᖑᓪᓗᓂ ᒪᐃᔭᕈᓚᐅᖅᓯᒪᔪᖅ ᓇᐅᔭᓂ ᑲᓐᑐᓛᑦᑕᐅᕙᑦᑐᓂᑦ ᐲᑕ ᑲᑐᖅᑲᒧᑦ ᑕᓪᓕᒪᓂᒃ ᐃᓪᓗᓕᐅᕐᓂᐊᖅᑐᑎᑦ ᓂᐅᕕᕐᕕᐅᑉ ᖃᓂᒋᔭᖓᓐᓂ, ᓂᐅᕕᕈᒪᒐᓗᐊᕋᒥ ᓯᑭᑑᕐᒥᑦ ᐊᓯᕙᕈᑎᔅᓴᖓᓐᓂ.

ᐅᖃᖅᑐᓂᓗ ᓱᒃᑲᖅᐹᓘᓚᐅᖅᓯᒪᒻᒪᑦ ᓄᓕᐊᓂᒃᑲᒥ ᓲᓴᓐᒥᑦ, ᓄᓕᐊᕆᓕᖅᑕᖓ 50−ᓄᑦ ᐅᑭᐅᓄᑦ ᐅᖓᑖᓄᑦ, ᓇᒡᒍᐊᒥᑦᑖᕈᓐᓇᓚᐅᖅᓯᒪᓐᖏᒻᒪᕆᑦᑐᖅ.

2020−ᒥ, ᓄᓇᕗᑦ ᒐᕙᒪᒃᑯᖏᑦ ᐃᓚᒌᑦ ᐱᔨᑦᑎᖅᑕᐅᓂᖏᓐᓄᑦ ᖃᐅᔨᓚᐅᖅᓯᒪᔪᑦ 1,200 ᐃᖅᑲᓇᐃᔭᖅᑎᐅᔪᑦ ᖃᓪᓗᓈᓃᓐᖔᖅᓯᒪᔪᑦ − ᐃᓪᓗᓕᐅᖅᑏᑦ, ᓂᕿᓕᐅᖅᑏᑦ, ᐅᖁᒪᐃᑦᑐᕐᓂᑦ ᐊᖁᑏᑦ − ᓄᓇᕗᓕᐊᖅᐸᑦᑐᑦ ᐃᖅᑲᓇᐃᔭᕆᐊᖃᖅᑐᑎᑦ 50−ᓄᑦ ᐃᓪᓗᓕᐅᕐᓂᕐᒨᖅᑐᓂᒃ 24−ᓄᑦ ᓄᓇᓕᓐᓄᑦ ᐊᑭᖃᕋᔭᓐᖑᐊᖅᑐᓂ $600−ᒥᓕᐊᓂᑦ. ᑕᒪᒃᑯᐊ ᐃᖅᑲᓇᐃᔮᑦ ᓄᓇᕗᒻᒥᐅᓄᑦ ᑎᒍᒥᐊᖅᑕᐅᔪᓐᓇᖅᑑᒐᓗᐊᑦ ᐃᖅᑲᓇᐃᔭᕐᕕᒃ ᑕᐃᒪᐃᓕᓪᓗᓂ.

ᐊᓯᖏᓐᓂᑦᑕᐅ ᐱᔾᔪᑎᖃᕐᒥᔪᑦ ᐃᖅᑲᓇᐃᔮᑦ ᐃᓐᓄᑦᑕᐅᕙᑦᑐᑦ ᓄᓇᕗᒻᒥ ᐃᓕᓐᓂᐊᕐᕕᑦᑕᖃᓐᖏᑦᑎᐊᕐᖓᑦ ᐃᓄᑦᑎᑐᑦ, ᐱᔪᓐᓇᖅᑐᑕᖃᓐᖏᒻᒪᑦ ᐃᓕᓴᐃᒍᓐᓇᖅᑐᒥ ᓄᓇᓕᕋᓛᖓᓂᖅᓴᓂᑦ, ᖃᓪᓗᓈᓃᓐᖔᖅᑐᑦ ᑳᓐᑐᓛᑦᑏᑦ ᐱᖅᑯᓯᕐᒥᑦ ᐱᓇᓱᐊᖃᑦᑕᖏᑦᑐᑦ, ᐃᓄᐃᑦ ᐱᔪᓐᓇᖅᑐᒋᔭᐅᓐᓇᑎᑦ ᐃᖅᑲᓇᐃᔭᕐᓂᐅᔪᓂᒃ ᐃᓕᓐᓂᐊᓂᕐᒥᑦ ᐱᔪᓐᓇᕐᖓᑕ ᐃᖅᑲᓇᐃᔭᖅᓯᓐᓇᕐᓗᑎᑦ, ᑕᐃᒫᒃ ᖃᐅᔨᓯᒪᔪᑦ ᐃᖅᑲᓇᐃᔭᕐᕕᒃ.

ᑕᐃᕕᑦ ᓄᓗᒃ ᐃᖅᑲᐅᒪᔪᖅ ᐊᒥᓱᑦ ᐃᓄᐃᑦ ᐃᓪᓗᓕᐅᖅᑎᓪᓗᒋᑦ ᓇᒻᒥᓂᖅ, ᐃᓪᓘᑉ ᐃᓗᐊᓂ ᓴᓇᓪᓗᓂ ᓇᔪᖅᑕᐅᓕᖅᑐᑎᓪᓗ. (ᐊᔾᔨᓕᐅᒐᖓ ᑕᐃᕕᑦ ᕙᓐ)

ᓄᓗᒃ ᐃᓪᓗᓕᐅᓚᐅᖅᓯᒪᔪᖅ ᐱᔪᒥᓇᑦᑎᐊᖅᑐᒥᑦ ᐃᓪᓗᓂᑦ. ᐃᓚᖏᑦ ᓇᒻᒥᓂᖃᕐᓂᕐᒧᑦ ᐃᓯᐊᕐᓂᑦ ᑕᑯᔭᐅᓚᐅᖅᑐᑦ − ᐃᓄᐃᑦ ᓇᒻᒥᓂᖅᑖᖅᑎᑕᐅᔪᓐᓇᖅᑐᑦ ᒐᕙᒪᒃᑯᓐᓂ ᓱᓇᒃᑯᑖᖃᖅᑎᑕᐅᓗᑎᑦ − ᑕᐃᒫᔅᓴᐃᓐᓇᖅ ᐊᑑᑎᖃᕐᓂᐊᖅᑐᒋᔭᐅᓪᓗᑎᓪᓗ. ᑕᒪᒃᑯᐊ ᐱᒋᐊᕈᑏᑦ ᐅᖃᐅᓯᐅᓯᒪᔪᑦ ᐅᐱᒋᔭᐅᑦᑎᐊᕐᓂᖏᓐᓂ, ᐱᕙᓪᓕᐊᓂᖏᓐᓂ ᓄᓇᖓᓐᓂ ᐊᒻᒪᓗ ᐃᓪᓗᓕᐅᕆᐅᖅᓴᓪᓗᑎᑦ ᐃᖅᑲᓇᐃᔮᖃᓕᕈᓐᓇᖅᑐᑎᑦ ᐃᑲᔪᕐᓂᐅᑉ ᓯᓚᑖᓂ.

ᐅᐃᓕᐊᒻ ᕇᔅ ᖃᐅᔨᓚᐅᖅᑐᑦ ᑕᒪᒃᑯᐊ ᓱᓕᔪᐃᓐᓇᐸᓗᒋᐊᖏᑕ ᒫᔾᔨᒥ 1990−ᐅᑎᓪᓗᒍ ᖃᐅᔨᓴᕐᓂᕐᒧᑦ ᐅᓂᒃᑳᖅ, ᐱᓕᕆᖃᑎᖃᖅᑐᓂ ᑕᐃᕕᑦ ᕼᐅᓴᓐᔅᑭᒥᑦ, ᓇᒻᒥᓂᖅ ᐃᓪᓗᑖᕈᑎᔅᓴᖃᕐᓂᕐᒧᑦ ᐃᑲᔫᓯᐊᕐᓂᑦ (HAP) ᐳᐊᑦ ᒍᑦ ᕼᐅᑉᒥ, ᓄᓇᑦᑎᐊᕐᒥ. ᐅᓂᒃᑳᓚᐅᖅᑐᖅ “ᐱᐅᓯᕚᓪᓕᑎᑦᑎᑲᓐᓂᓪᓚᕆᒻᒪᑦ ᐱᐅᓂᑐᐃᓐᓇᐅᓐᖏᑦᑐᒥᑦ ᐊᒥᓱᓂᑦᑕᐅ ᓄᓇᓕᓐᓂ ᐃᓪᓗᓂᑦ, ᑭᓯᐊᓂᓕ ᓄᓇᓕᓐᓄᑦ ᐅᐱᒋᔭᐅᒋᐊᖃᕐᒥᔪᑦ, ᐃᒻᒥᒃᑰᖅᑐᓂᑦ ᓇᒻᒥᓂᕐᓗ ᐅᑉᐱᕆᓂᖅᓴᐅᓕᖅᑐᑎᑦ ᐃᑲᔪᕐᓂᖃᓚᐅᖅᑐᑦ ᑕᐃᒫᒃ.”

1980−ᖏᓐᓂ, ᐳᐊᑦ ᒍᑦ ᕼᐅᑉ (Fort Good Hope), ᐊᓪᓚᖓᔪᓄᑦ ᓄᓇᓕᒋᔭᐅᓂᖅᓴᐅᓪᓗᓂ ᒪᑲᓐᔨ ᑰᖓ ᖃᓂᑦᑐᖅ ᐅᑭᐅᖅᑕᖅᑑᑉ ᑲᔾᔨᖓᓐᓄᑦ ᑕᒪᓂᖃᐃ 590−ᓂᑦ ᐃᓄᓕᒃ ᑕᐃᔅᓱᒪᓂ, ᐃᓪᓗᑭᔅᓴᖅᑐᐊᓘᓚᐅᖅᓯᒪᒻᒪᑕᑦᑕᐅ ᑕᐃᒫᓪᓗ ᓄᓇᕗᒻᒥ ᓄᓇᓕᓐᓂ ᐅᓪᓗᒥᐅᔪᖅ ᐊᑐᖅᑕᐅᒻᒪᑦ ᑕᒪᓐᓇ.

ᐃᓪᓗᖃᓚᐅᖅᓯᒪᔪᑦ ᓱᒃᑯᕈᓗᓐᓂᑦ, ᐅᑭᐅᖅᑕᖅᑐᒥ ᐃᑭᐊᖅᑎᔅᓴᑭᑦᑐᐊᓘᒻᒪᑕ ᐃᓚᖏᑦ ᖁᐊᖃᑦᑕᖅᑐᑎᑦ ᖃᑦᑕᖏᑦ, ᓇᑎᒃᑯᓪᓗ ᐊᒻᒪᖅᑐᑎᑦ, ᐊᓯᖏᓐᓂᓪᓗ ᓄᓇᐅᑉ ᐃᑭᐊᖓᓂ ᖁᐊᖑᓂᖓᓂ ᐱᔾᔪᑎᖃᖅᑐᑎᑦ, ᐅᓂᒃᑳᓕᐅᓚᐅᖅᓯᒪᔪᖅ ᑕᐃᒫᒃ ᕇᔅ. ᐃᓄᒋᐊᕌᓘᓪᓗᑎᓪᓗ, ᐃᓄᖃᓐᖏᑦᑐᑎ 0%−ᖑᓪᓗᑎᑦ, ᐊᒻᒪᓗ ᐊᑯᓂᐊᓗᒃ ᐃᓪᓗᑖᖅᓯᖃᑦᑕᖅᑐᑦ ᒐᕙᒪᒃᑯᓐᓂ. ᐊᒥᓱᓪᓗ ᐱᐅᓐᖏᑦᑐᕈᓘᓪᓗᑎᒃ ᐊᑭᑐᔪᐊᓘᓪᓗᑎᓪᓗ.

ᐊᒥᓲᓂᖅᓴᐃᑦ ᕼᐊᒻᒪᓚᒃᑯᑦ ᓇᒻᒥᓂᖅ ᐃᓪᓗᑖᕈᑎᔅᓴᖃᕐᓂᕐᒧᑦ ᐃᑲᔫᓯᐊᕐᓂᑦ (HAP) ᑐᓂᔭᐅᓚᐅᖅᓯᒪᔪᑦ ᐅᑭᐅᖅᑕᖅᑑᑉ ᐊᕕᖅᑐᖅᓯᒪᓂᖏᓐᓂ ᐃᓪᓗᓕᕆᔨᕐᔪᐊᒃᑯᓐᓂ. ᑭᓯᐊᓂᓕ, ᐊᖏᔪᖅᑲᐅᑎᖏᑦ ᐳᐊᑦ ᒍᑦ ᕼᐅᒻᒥ ᑕᐃᒫᖑᓐᖏᑦᑐᖅ ᐋᖅᑭᓱᖅᑕᐅᖔᓕᕐᓂᒥᒻᒪᑕ ᐃᓚᖏᑦ ᐃᓪᓗᓐᓄᑦ ᐃᑲᔫᑎᔅᓴᐃᑦ ᐊᐅᓚᑕᐅᖔᓕᖅᑐᑎᑦ ᑮᓇᐅᔭᖅᑖᕈᒪᓪᓗᑎᓪᓗ ᓄᓇᓕᓐᓂ ᑕᐃᒫᒃ ᐃᓱᒪᓕᐅᖅᑕᐅᓪᓗᑎᑦ ᔨᐊᓗᓇᐃᒥᐅᓐᖏᑦᑐᖅ.

ᐊᒥᓱᑲᓪᓚᓐᓂᑦ ᐊᕐᕌᒍᓂᑦ ᐃᑲᔫᑎᓕᕆᑎᓪᓗᒋᑦ, 32% ᐳᐊᑦ ᒍᑦ ᕼᐅᒻᒥ ᐃᓪᓗᐃᑦ ᐱᑕᖃᓚᐅᖅᑐᑦ ᓇᒻᒥᓂᖅ ᐃᓪᓗᑖᕈᑎᔅᓴᖃᕐᓂᕐᒧᑦ ᐃᑲᔫᓯᐊᕐᓂᑦ (HAP) ᐅᕝᕙᓘᓐᓃᑦ ᒥᑭᔫᑎᓂᑦ ᓄᓇᓕᓐᓂ ᐊᖏᕐᕌᒧᑦ ᐃᑲᔫᑎᔅᓴᓂᑦ ᑮᓇᐅᔭᖅᑖᕈᑎᔅᓴᐃᑦ, ᐃᓪᓗᓕᕆᔨᒃᑯᑦ ᐃᓪᓗᖁᑎᖏᑦ ᐃᓄᖃᓐᖏᓂᖅᓴᐅᓕᖔᖅᑐᑎᑦ. (SSHAG ᓇᒻᒥᓂᖅ ᐃᓪᓗᑖᕈᑎᔅᓴᖃᕐᓂᕐᒧᑦ ᐃᑲᔫᓯᐊᕐᓂᑦ (HAP) ᑲᒪᔨᐅᓚᐅᖅᑐᑦ ᐃᓚᖏᓪᓗ ᑲᑎᖅᓱᖅᑕᐅᖔᖃᑦᑕᖅᑐᑎᑦ.)

ᑕᕝᕙᓂ ᐅᖃᐅᓯᖏᓐᓂ 33−ᓂᒃ ᐊᕐᕌᒍᓂᑦ ᐊᓂᒍᖅᑐᓂᑦ, ᓇᒻᒥᓂᖅ ᐃᓪᓗᑖᕈᑎᔅᓴᖃᕐᓂᕐᒧᑦ ᐃᑲᔫᓯᐊᕐᓂᑦ (HAP) “ᐱᕕᖃᖅᑎᑦᑎᖃᑦᑕᓚᐅᖅᑐᖅ ᓇᒻᒥᓂᖅ ᐊᐅᓚᑦᑎᓂᖅᓴᐅᒍᓐᓇᓕᕐᓗᑎᑦ ᐃᓅᓯᕐᒥᓂᒃ ᐊᖏᓗᐊᓐᖏᑦᑑᒐᓗᐊᒥᑦ.

“ᓂᕕᓐᖓᐃᖃᑦᑕᖅᑐᑎ ᓇᓴᕐᒥᓂᒃ ᐅᐱᒍᓱᑦᑎᐊᖅᑐᑎᑦ ᓇᒻᒥᓂᖅ ᐱᔪᓐᓇᓚᐅᕐᓂᖏᓐᓂ, ᓇᒻᒥᓂᕐᓗ ᐃᓱᒪᓕᐅᖃᑦᑕᖅᑐᑎᑦ,” ᕇᔅ ᐅᖃᖅᑐᓂ. “ᓇᒻᒥᓂᖅ ᐃᓪᓗᓕᐅᖅᑐᐊᓗᓪᓗᑎᑦ ᐊᒻᒪᓗ ᐅᐱᖅᑲᑦᑎᐊᖅᑐᑎᑦ ᑕᐃᒫᒃ.”

ᕌᐳᑦ ᕼᐃᒃᔅ, ᑲᖏᖅᖠᓂᕐᒥ ᐃᓐᓇᕆᔭᐅᔪᖅ ᓇᒻᒥᓂᖅ ᐃᓪᓗᓕᐅᓚᐅᖅᓯᒪᔪᖅ ᐃᑲᔫᑎᑎᒍᑦ (HAP), ᐃᑉᐱᒋᔭᖃᓚᐅᖅᓯᒪᔪᖅ ᑲᔪᓯᑦᑎᐊᖅᑐᐊᓘᓐᓂᕐᒥᓂᒃ ᐊᖏᕐᕋᒥᒃ ᐱᔭᕇᖅᑐᓂᐅᓪᓗ. ᕼᐊᓚᓐ ᐃᒍᑉᑕᒃ, ᑲᖏᖅᓕᓂᕐᒥᑦᑕᐅ ᐃᓐᓇᐅᒻᒥᔪᖅ, ᐅᖃᓚᐅᖅᑐᖅ ᐅᐃᖓ, ᐃᓐᓇᐅᒻᒥᔪᖅ ᔮᑭ ᐃᒍᑉᑕᒃ, ᐊᓯᖏᓪᓗ ᐅᐱᒋᔭᖃᑦᑎᐊᖅᑐᑦ ᐱᔭᕇᖅᓯᓚᐅᖅᓯᒪᓐᓂᕐᒥᓂᒃ.

“ᐅᐱᖅᑲᓪᓚᕆᒃᑲᔭᖅᑐᖅ ᐃᓪᓗᓕᒫᕌᓗᒻᒥ ᐱᔭᕇᖅᓯᓂᖅᑲᑕ. ᓇᒻᒥᓂᕐᓗ ᐱᐅᓂᖅᓴᐅᒋᓗᑎᑦ ᐃᓪᓗᓕᐅᓚᐅᕐᓂᒥᓂᒃ,” ᐃᒐᑉᑲᒃ ᐅᖃᖅᑐᓂ.

ᔮᓐ ᒪᑲᓚᐅᑦ ᓇᖏᑦᑐᖅ ᓵᖓᓐᓂ ᓄᓇᕗᑦ ᓯᓚᑦᑐᖅᓴᕐᕕᒃᑯᓐᓂ ᓴᓇᑐᓕᖅᓴᕐᕕᒻᒥ ᓴᓇᔨᔅᓴᓄᑦ ᐃᓕᓐᓂᐊᕐᕕᒻᒥ, ᑎᑎᕋᖅᑐᖅ ᖃᑯᖅᑕᒥ ᓈᓴᐅᑎᓯᕆᓂᕐᒥᑦ ᐃᓕᓐᓂᐊᕐᕕᐅᑉ. (ᐊᔾᔨᓕᐅᒐᖓ ᑕᐃᕕᑦ ᕙᓐ)

“ᐱᓇᓱᐊᕈᓯᐅᑉ ᓄᓐᖑᐊᓂᑦᑎᐊᖃᖅᑭᓯ? ᐱᓇᓱᐊᕈᓯᐅᑉ ᓄᓐᖓᐊᓂᑦᑎᐊᖃᓐᖏᓚᓯ?” ᐃᓪᓗᓕᐅᖅᑎ ᐊᐱᕆᓚᐅᖅᑐᖅ ᔮᓐ ᒪᑲᓚᐅᑦ ᐃᓕᓐᓂᐊᖅᑎᓄᑦ ᓄᓇᕗᑦ ᓯᓚᑦᑐᖅᓴᕐᕕᖓᓐᓄᑦ ᓴᓇᑐᓕᖅᓴᕕᓐᓄᑦ ᓴᓇᔨᔅᓴᐅᔪᓄᑦ. ᑭᐅᔭᐅᓪᓗᓂ, ᓂᐱᑭᑦᑐᕈᓗᒻᒧᑦ ᐅᓪᓛᕈᓗᒃᑯᑦ ᖃᓐᓂᐅᔮᕐᔪᑎᓪᓗᒍ ᑲᖏᖅᖠᓂᕐᒥ.

ᐸᐃᑉᐹᖃᓐᖏᑉᐸᑕ ᓯᕗᓪᓕᖅᐹᖅᓯᐅᑎᒥᒃ ᐃᓕᓴᐃᔨᖓ ᑭᖑᕙᓐᖏᑉᐸ ᐃᓪᓘᑉ ᖁᓛᓂ ᓴᓇᔨᔅᓴᐅᓂᕐᒧᑦ ᑲᖏᖅᖠᓂᕐᒥ, ᐃᓕᓐᓂᐊᖅᑏᑦ ᐱᓕᒻᒪᓴᖅᑎᑕᐅᖃᑦᑕᕐᖓᑕ ᓄᓇᕗᑦ ᐃᓪᓗᓕᐅᖅᑎᒃᑯᖏᓐᓄᑦ ᑕᐃᑲᓃᒌᖅᑐᔅᓴᐅᓪᓗᑎᓪᓗ.

ᑭᓯᐊᓂᓕ ᐅᓪᓘᑉ ᖄᖓᓂ ᓴᓇᔨ ᑎᑭᓚᐅᓐᖏᑦᑐᖅ ᒪᑲᓚᐅᑦᓗ 14−ᓗ ᐃᓕᓐᓂᐊᖅᑎᖏᑦ ᓈᓴᐅᓯᕆᖔᓕᓚᐅᖅᑐᑦ. “ᓈᓴᐅᑎᕆᖃᑦᑕᕐᖓᑕ, ᓇᒥᑐᐃᓐᓇᖅ ᑕᐃᒪᐃᓲᖑᒻᒪᑕ, ᓈᓴᐅᓯᕆᔪᓐᓇᑦᑎᐊᖏᑦᑐᑦ.” ᕿᔪᓐᓂ ᓇᓗᓇᐃᒃᑯᓯᖅᓱᖅᓯᒪᔭᖏᓐᓂ ᓂᕐᕆᕕᖓᓅᖅᓯᓪᓗᓂ ᐊᐱᕆᖅᑕᓕᖅᑲᖏᑦ ᐃᓕᓐᓂᐊᖅᑎᖏᑦ ᑎᑎᕋᖁᓪᓗᓂᒋᑦ ᓈᓴᐅᑎᓂᒃ ᓇᐅᒃᑰᕐᒪᖔᖅ ᐊᒻᒪᓗ ᑭᐅᔭᐃᓐᓇᕆᓗᒋᑦ.

ᐃᓕᓐᓂᐊᖅᑎ ᑯᓗᓛᖅ ᑯᓗᓛᖅ (ᓴᐅᒥᒃ) ᐊᒻᒪᓗ ᑕᒋᓚᔅ ᓇᓄᕐᓗᒃ ᓈᓴᐅᓯᕆᓂᕐᒥᑦ ᑎᑎᕋᖅᑐᑦ ᓇᒡᒐᔾᔭᐅᒥ ᓴᓇᒃᑐᓕᖅᓴᕐᕕᒻᒥ ᓴᓇᔨᔅᓴᓄᑦ ᐃᓕᓐᓂᐊᕕᒻᒥ. (ᐊᔾᔨᓕᐅᒐᖓ ᑕᐃᕕᑦ ᕙᓐ)

… ᓈᓴᐅᑎᖓ ᐃᓚᖓᓐᓂ ᐃᒪᐃᑦᑑᒋᐊᓕᒃ 2, 4, 6 ᐃᒪᐃᑦᑑᖃᑕᐅᓗᓂ …

… ᐊᒡᒍᑐᕐᓗᒋᑦ 12−ᑎᒍᑦ …

ᒪᑲᓚᐅᑦ ᐅᓂᒃᑳᖃᖅᑐᓂ ᐃᓕᓐᓂᐊᕈᑎᐅᑉ ᒥᔅᓵᓄᑦ, ᓄᓇᕗᒻᒥᐅᑦ ᐊᒡᒐᒥᓄᑦ ᐊᑐᖅᑐᑎᑦ ᓴᓇᕐᕈᑎᔅᓴᓂᓪᓗ ᐱᓕᒻᒪᓴᖅᐸᑦᑐᑦ “ᐊᖅᑯᑎᒋᓂᐊᖅᑕᒥᓂᒃ ᐃᖅᑲᓇᐃᔮᕆᔪᒫᖅᑕᒥᓄᑦ ᐃᓕᓐᓂᐊᖅᓯᒪᔭᒥᓄᑦ.” ᐃᖅᑲᓇᐃᔭᓕᒻᒪᔅᓯᒪᓐᖏᑦᑐᓂᑦ ᑲᓐᑐᓛᑦᑎᖃᓐᖏᒻᒪᑕ ᑕᐃᒪᐃᓐᓂᖓᓐᓄᑦ ᐊᒥᓱᑦ ᐃᓄᐃᑦ ᐃᖅᑲᓇᐃᔭᖅᑎᑖᖑᕙᓐᖏᑦᑐᑦ, ᒪᑲᓚᐅᑦ ᐅᖃᖅᑐᓂ, ᐃᖅᑲᓇᐃᔭᖅᑖᖑᓐᓂᖏᒃᑲᓗᐊᖅᑲᑕ ᑲᒻᐸᓂᐅᔪᓄᑦ ᐃᓕᓐᓂᐊᑎᑦᑎᖃᑦᑕᖏᒻᒪᑕ. ᑕᐃᒪᐃᓐᓂᖓᓐᓄᑦ ᐃᓄᐃᑦ ᐃᑲᔪᖅᑎᑐᐃᓐᓇᐅᓕᓲᖑᕗᑦ ᓴᓇᔨᐅᓪᓗᑎᑦ.

ᓴᓇᑐᓕᖅᓴᕐᕕᒃ ᐃᓄᒋᐊᑦᑐᑦ, ᑭᓯᐊᓂᓕ ᑕᐃᒫᑐᐊ ᐃᓕᓐᓂᐊᑎᑦᑎᕙᓐᖏᑦᑐᑦ ᐃᓄᐃᑦ ᐃᖅᑲᓇᐃᔭᕈᓐᓇᕐᓂᖏᓐᓄᑦ.

“ᓇᒻᒥᓂᖅ ᐃᓪᓗᑖᕈᑎᔅᓴᖃᕐᓂᕐᒧᑦ ᐃᑲᔫᓯᐊᕐᓂᑦ (HAP). ᐃᓛᒃ, ᒪᑲᓚᐅᑦ ᐅᖃᖅᑐᓂ, ᓄᓇᕗᒻᒥᐅᓚᐅᖅᓯᒪᔪᖅ 1980−ᖏᓐᓂ ᐊᒻᒪᓗ 1990-ᖏᓐᓂ ᐅᑭᐅᓂᓪᓗ 40−ᓄᑦ ᐃᓪᓗᓕᐅᖅᑎᐅᓯᒪᓕᖅᑐᖅ. “ᐅᑎᕆᐊᓕᐅᒐᓗᐊᖅ ᑕᐃᓐᓇ ᐃᑲᔫᑎᔅᓴᖅ. ᐃᓪᓗᓕᕆᔨᒃᑯᖏᓐᓂ ᐃᓪᓗᖃᕈᓐᓃᓂᖅᓴᐅᓕᓲᖑᒻᒪᑕ, ᐱᓕᒻᒪᓴᖅᑐᑎᑦ ᐃᓄᐃᑦ, ᑕᒪᒃᑯᐊ ᐱᓕᒻᒪᓐᓂᖏᑦ ᐊᑐᕐᓗᓂᒋᑦ ᐃᓪᓗᐅᕐᓂᕐᒥᑦ ᓇᓂᓯᒍᓐᓇᕋᔭᖅᑐᑦ.”

ᒪᑲᓚᐅᑦ, ᓇᒻᒥᓂᖅ ᐃᓪᓗᑖᕈᑎᔅᓴᖃᕐᓂᕐᒧᑦ ᐃᑲᔫᓯᐊᕐᓂᑦ (HAP) ᐃᓪᓗᖃᕐᒥᔪᖅ, ᐱᐅᓂᖅᓴᓪᓚᕇᑦ ᐊᓯᖏᓐᓂ ᐊᖏᕐᕋᓂᑦ ᓄᓇᓕᓐᓂᑦ. “ᐃᓱᒪᒋᐊᖃᓕᖅᑯᑎᓪᓕ ᐃᒫᒃ, ᓱᒻᒪᒃᑭᐊᖓᐃ?”

ᓂᕆᐅᒋᔭᖃᖅᑐᑦ ᐃᖅᑲᓇᐃᔮᕆᓯᒪᔪᒪᔭᒥᓂᒃ ᐃᓕᓐᓂᐊᕐᓗᑎᑦ ᐱᔪᓇᖅᓯᒐᔭᕐᖓᑕ ᒐᕙᒪᒃᑯᓐᓄᑦ ᐅᑭᐅᓄᑦ ᑎᓴᒪᓄᑦ ᐸᐃᑉᐹᖅᑖᕋᓱᐊᕐᓂᖏᓐᓂ ᐊᖏᔪᖅᑳᕈᓪᓗᑎᑦ, ᒪᑲᓚᐅᑦ ᐅᖃᖅᑐᓂ, ᑭᓯᐊᓂᓕ ᑕᐃᒃᑯᐊ ᐅᓪᓗᐃᑦ ᐃᓱᓕᔅᓯᒪᓕᖅᑐᑦ ᓇᒻᒥᓂᖅᑖᕋᓱᐊᕐᓂᒧᓪᓗ ᐃᓪᓗᓕᐅᖅᑎᐅᓂᕐᒥᑦ ᐃᓄᐃᑦ ᐃᓪᓗᔅᓴᖏᓐᓄᑦ.

“ᑭᓱᑐᐃᓐᓇᐃᑦ ᐊᓯᔾᔨᖅᓯᒪᓕᕐᖓᑕ,” ᐅᖃᖅᑐᓂ. ᐸᑦᑕᑐᖅᐸᑦᑐᓂ ᐅᖃᕇᕋᐃᒻᒪᑦ, ᐅᖃᒃᑲᓂᖅᑐᓂ, “ᐃᓕᓐᓂᐊᑎᑦᑎᒋᐊᖃᓕᖅᑐᑦ ᐃᓄᓐᓂᑦ.”

ᑕᐃᒫᒃ ᑕᑯᓐᓇᕐᖓᒍ ᓇᒻᒥᓂᖅ ᐃᓪᓗᑖᕈᑎᔅᓴᖃᕐᓂᕐᒧᑦ ᐃᑲᔫᓯᐊᕐᓂᑦ (HAP) ᐃᑲᔫᑎᐅᒐᔭᖅᑐᑦ ᐃᓄᓐᓄᑦ ᐃᓕᓐᓂᐊᖅᑎᑕᐅᓯᒪᔪᑦ ᑲᒻᐸᓂᐅᔪᓪᓗ ᐃᖅᑲᓇᐃᔭᖅᑎᑖᖅᑐᕐᓗᑎᓪᓗ ᓄᓇᓕᒻᒥᐅᑕᕐᓂᑦ ᑕᐃᒪᐃᒋᐊᓖᑦ.

ᓴᓇᔨᒻᒪᕆᒃ ᐊᐅᓚᐅᓯᕆᓂᕐᒥᑦ ᐴᒍᓴᓐ ᓯᒻᒥᒃ ᑲᓛᒃ, ᕿᒥᕐᕈᓚᐅᖅᓯᒪᔪᖅ ᓇᒻᒥᓂᖅ ᐃᓪᓗᑖᕈᑎᔅᓴᖃᕐᓂᕐᒧᑦ ᐃᑲᔫᓯᐊᕐᓂᑦ (HAP) 1987−ᒥ, ᐅᖃᖅᑐᓂ ᑕᒪᓐᓇ ᐊᒥᓱᐊᓗᓐᓂ ᐱᓕᒻᒪᔅᓴᐃᔾᔪᑕᐅᕙᓚᐅᖅᑐᖅ, ᐃᓪᓗᓕᐅᕐᓂᑐᐃᓐᓇᐅᓐᖏᑦᑐᒥᑦ ᑭᓯᐊᓂᑦᑕᐅ ᐸᐃᑉᐹᓕᕆᓂᕐᒥᑦ, ᐊᖏᔪᖅᑳᖑᓂᕐᒥᑦ, ᓴᓇᑐᒐᓱᐊᕐᓂᕐᒥᑦ, ᖃᐅᔨᓴᕐᓂᕐᒥᑦ ᐃᓕᓐᓂᐊᑎᑦᑎᓂᕐᒥᓪᓗ.

ᓇᒻᒥᓂᖅ ᐃᓪᓗᑖᕈᑎᔅᓴᖃᕐᓂᕐᒧᑦ ᐃᑲᔫᓯᐊᕐᓂᑦ (HAP) ᐊᐅᓚᒃᑲᓂᕐᓂᐊᓂᖅᑲᑦ, ᒐᕙᒪᒃᑯᑦ ᐃᓕᓐᓂᐊᑎᑦᑎᔾᔪᑎᔅᓴᓂᑦ ᐋᖅᑮᒋᐊᓖᑦ ᐊᖏᔪᖅᑳᓂᑦ ᑎᑎᕋᕈᓐᓇᕐᓗᑎᑦ ᖃᓄᐃᑦᑑᓂᖏᓐᓂ ᓇᒻᒥᓂᖅ ᐃᓪᓗᑖᕈᑎᔅᓴᖃᕐᓂᕐᒧᑦ ᐃᑲᔫᓯᐊᕐᓂᑦ (HAP) ᐃᓪᓗᓄᑦ, ᑎᒥᐅᔪᓂᓪᓗ ᓇᓂᓯᓗᑎᑦ.

ᐃᖅᑲᓇᐃᔮᔅᓴᑦᑕᖃᖃᑦᑕᓚᐅᖅᓯᒪᒻᒪᑦ ᐊᐅᓚᑦᑎᔾᔪᑎᖃᕐᓗᑎᑦ ᐃᓕᓐᓂᐊᕈᑏᑦ, ᓲᕐᓗ, ᐊᐅᓪᓚᑎᑦᑎᖃᑦᑕᓂᕐᒥᑦ, ᓄᓇᓕᓐᓂ ᓇᒻᒥᓂᖁᑏᑦ ᓇᓗᓇᐃᖅᑕᐅᓪᓗᑎᓪᓗ ᑮᓇᐅᔭᓕᐅᕈᓐᓇᕐᓂᖏᓐᓂ ᐊᒥᓱᓂᑦ ᓇᒻᒥᓂᖅ ᐃᓪᓗᑖᕈᑎᔅᓴᖃᕐᓂᕐᒧᑦ ᐃᑲᔫᓯᐊᕐᓂᑦ (HAP) ᐃᓪᓗᓕᐅᕐᓂᖅᑲᑕ ᓄᓇᓕᓐᓂᑦ. 1986−ᒥ, ᐊᑐᓂ ᓇᒻᒥᓂᖅ ᐃᓪᓗᑖᕈᑎᔅᓴᖃᕐᓂᕐᒧᑦ ᐃᑲᔫᓯᐊᕐᓂᑦ (HAP) ᐱᓯᒪᔪᑦ ᑮᓇᐅᔭᓂᑦ ᐊᑐᓚᐅᖅᓯᒪᔪᑦ ᑕᒫᓂᐸᓗᒃ $11,000−ᓂᑦ ᐊᑭᓕᐅᑕᐅᓪᓗᑎᑦ ᓲᕐᓗ ᓴᓇᕐᕈᑎᓄᑦ ᓱᓇᒃᑯᑖᕐᓄᑦ, ᓄᓇᓕᓐᓂ ᐊᑭᓕᐅᑕᐅᓐᓂᖅᑲᑕ, ᐃᑲᔪᕐᓂᖃᕋᔭᕐᒥᔪᑦ ᓄᓇᓕᓐᓂ ᐱᕙᓪᓕᐊᑎᑦᑎᓂᕐᒥᑦ.

ᕇᔅ ᐅᓂᒃᑳᖃᓚᐅᖅᑐᖅ ᐱᐅᔪᐊᓘᓪᓗᒍ ᐃᑲᔫᑎᔅᓴᖅ ᐳᐊᑦ ᒍᑦ ᕼᐅᒻᒥ ᐃᓕᓚᐅᖅᑐᓂᑦ ᐊᓪᓚᕕᓕᕆᓂᕐᒥᑦ ᐃᓪᓗᓕᐅᕐᓂᕐᒥᓪᓗ ᑕᕝᕘᓇ ᓇᒻᒥᓂᖅ ᐃᓪᓗᑖᕈᑎᔅᓴᖃᕐᓂᕐᒧᑦ ᐃᑲᔫᓯᐊᕐᓂᑦ (HAP) ᐃᖅᑲᓇᐃᔭᕈᓐᓇᖅᓯᒍᓐᓇᖅᑐᑎᓪᓗ ᓯᓚᑖᓂ ᐃᓕᓐᓂᐊᕈᑎᒥᑦ; ᖃᑦᑏᓇᐅᓂᖅᓴᐃᑦ ᓄᓇᓕᓐᓂ ᐊᐅᓪᓚᖃᑦᑕᖏᓐᓂᖅᓴᐅᖃᑦᑕᕋᔭᖅᑐᑦ ᑕᐃᒪᐃᑦᑐᓂᑦ ᒪᓂᒪᑦᑎᕕᐅᑉᐸᑕ; ᐊᒻᒪᓗ ᐃᓄᐃᑦ ᐱᓯᒪᑦᑎᑦᑎᐊᓂᖅᓴᐅᓕᕐᓗᑎᑦ ᐱᖁᑎᒋᔭᒥᓂᒃ ᓴᓇᔭᒥᓂᕐᒥᓂᒃ (“ᐃᓛᒃ, ᕿᑐᕐᖏᐅᕈᑎᓂᑦ ᐊᑐᕐᓂᖅᑲᑕ ᐃᓪᓗᓕᐅᓂᕐᒧᑦ, ᑕᐃᒫᕈᓗᑐᐃᓐᓈᓐᖏᓂᖅᓴᕐᔪᐊᕌᓗᒋᒐᔭᖅᑕᐃᑦ ᐅᑭᐅᖑᓕᖅᑲᑦ”).

ᐃᑲᔫᑎᐅᔪᑦ ᐃᓚᖏᑦ ᐅᖃᐅᓯᕆᓪᓗᓂᒋᑦ ᕇᔅ ᐱᓗᐊᖅᑐᒥᑦ ᐳᐊᑦ ᒍᑦ ᕼᐅᒻᒥ (Fort Good Hope), ᓄᓇᑦᑎᐊᕐᒥ ᑕᐃᓐᓇᑐᐊᖑᕙᓪᓚᐃᔪᖅ ᐊᐅᓚᑕᐅᓚᐅᖅᑐᑦ ᑮᓇᐅᔭᓂᖏᑦ. ᐃᓛᒃ, ᐃᓚᖏᓐᓂ ᓄᓇᑦᑎᐊᕐᒥ ᐃᖅᑲᓇᐃᔭᖅᑏᑦ ᓄᓇᓕᓐᓂᑦ ᐱᑕᖃᓐᖏᒻᒪᑦ ᓇᐹᑦᑐᐃᑦ ᑭᓪᓕᖏᓐᓂ − ᕿᑭᖅᑖᓗᒃ, ᐱᓗᐊᖅᑐᒥᑦ − ᐱᓕᕆᖃᑎᖃᖅᑐᑎᑦ ᑲᔪᓯᑎᑦᑎᓇᓱᐊᓚᐅᖅᑐᑦ ᓇᒻᒥᓂᖅ ᐃᓪᓗᑕᕈᑎᔅᓴᒥᑦ ᐃᑲᔪᓯᐊᕐᓂᑦ (HAP) ᑐᕌᒐᖏᓐᓂ ᑕᐃᑲᓂ 1980−ᖏᓐᓂ, ᐊᒥᓱᑲᓪᓚᐃᑦ ᐱᔪᒪᓯᒪᓂᕋᕋᓗᐊᖅᑎᓪᓗᒋᑦ.

ᓄᓇᑦᑎᐊᑉ ᐃᓪᓗᓕᕆᔨᕐᔪᐊᒃᑯᖏᑕ ᐃᖅᑲᓇᐃᔭᖅᑎᖓ ᐃᑲᔫᑎᖃᕐᓂᕋᐃᓚᐅᖅᓯᒪᓐᖏᑦᑐᑦ ᑕᒪᒃᑯᓂᖓ, ᐊᓪᓛᒃ ᓇᒻᒥᓂᖁᑎᖏᓐᓂ ᐱᓯᒪᑦᑎᒍᓐᓇᖏᓐᓂᕋᐃᓪᓗᑎᑦ, ᐃᓪᓗᔅᓴᐃᓪᓗ ᓯᓚᑖᓂ ᓄᓇᓖᑦ ᓂᐅᕕᐊᕆᓗᒋᑦ ᑭᓯᐊᓂ, ᑕᐃᒫᒃ ᐅᓂᒃᑳᓕᐅᓚᐅᖅᓯᒪᔪᖅ ᕇᔅ. ᐃᖅᑲᓇᐃᔭᖅᑏᑦ ᐅᖃᓚᐅᖅᓯᒪᒻᒥᔪᑦ ᐃᓚᖏᑦ ᐱᕙᓪᓕᐊᓂᕐᒧᑦ ᐃᑲᔫᑏᑦ ᐳᐊᑦ ᒍᑦ ᕼᐅᑉᒥ ᓄᓇᓕᓐᓂ ᐃᖅᑲᓇᐃᔭᖅᑎᖃᕐᓂᖏᓐᓄᑦ ᐊᑭᓕᖅᓱᖅᑕᐅᔪᓂᒃ ᐃᓪᓗᓕᐅᖁᔭᐅᓪᓗᑎᑦ ᓇᒻᒥᓂᖅ ᐃᓪᓗᑖᕈᑎᔅᓴᖃᕐᓂᕐᒧᑦ ᐃᑲᔫᓯᐊᕐᓂᑦ (HAP) ᓯᓚᑖᓂ ᑮᓇᐅᔭᖃᖅᑎᑕᐅᓪᓗᑎᑦ − ᑕᐃᒫᒃ ᐊᑐᐃᓐᓇᐅᓚᐅᓐᖏᑦᑐᑦ ᓄᓇᓕᓐᓄᑦ.

ᐆᒪᔪᓂᑦ ᖃᐅᔨᓴᖅᑎ ᐱᐅᓪ ᕇᔅ ᐳᐊᑦ ᒍᑦ ᕼᐅᒻᒦᑦᑐᓂᑦ ᑕᐃᔅᓱᒪᓂ ᓄᓇᓕᓐᓂ ᑮᓇᐅᔭᖃᖅᑎᑕᐅᕙᓪᓕᐊᓕᖅᑎᓪᓗᒋᑦ ᓄᓇᑦᑎᐊᑉ ᐃᓪᓗᓕᕆᔨᕐᔪᐊᒃᑯᖏᓐᓂ ᓇᒻᒥᓂᖅᑖᕈᑎᔅᓴᓄᑦ ᐃᓪᓗᓄᑦ ᐃᑲᔫᑎᑎᒍᑦ. ᐅᖃᖅᑐᓂ ᑕᒪᒃᑯᐊ ᐱᐅᔪᐊᓘᓚᐅᖅᑐᑦ (ᑕᕐᕆᔭᓕᐅᕈᑎᒃᑰᖅᑐᖅ Zoom)

ᑕᒪᓐᓇ ᐱᐅᔫᓪᓗᓂ ᓇᒻᒥᓂᖅ ᐃᓪᓗᑖᕈᑎᔅᓴᖃᕐᓂᕐᒧᑦ ᐃᑲᔫᓯᐊᕐᓂᑦ (HAP) ᐱᔫᒐᓗᐊᖅ ᐱᓕᒻᒪᑲᓐᓂᕈᓐᓇᖅᑐᑎᑦ ᐃᖅᑲᓇᐃᔮᖃᕈᒪᔪᑦ ᑕᐃᒪᐃᑦᑐᓂᒃ ᐃᓕᓐᓂᐊᖅᑐᑦ, ᖃᐅᔨᓴᖅᑎᑦ ᑕᒪᑐᒥᖓ 1987−ᒥ ᐊᒥᓱᑦ ᐃᓕᓐᓂᐊᑎᑦᑎᒋᐊᔅᓴᖅ ᓱᕙᓕᑭᐊᔅᓴᓚᐅᖅᓯᒪᒻᒪᑕ ᐊᒻᒪᓗ ᐊᑕᐅᓯᐊᑐᐃᓐᓇᑦᑎᐊᕐᓗᑎ ᓴᓇᓂᐊᕐᖓᑕ ᐃᓪᓗᓂᑦ ᐃᓱᒪᖃᖅᑐᑎᑦ ᑕᐃᒫᒃ.

ᕇᔅ ᐅᓂᒃᑳᓕᐅᖅᑐᓂ ᐊᐅᓚᑦᑎᔩᑦ ᑲᓇᑕᒥ ᐊᖏᕐᕋᓄᑦ ᓇᒻᒥᓂᕆᔭᖓᓐᓄ ᐊᑭᓕᖅᓱᐃᓂᕐᒥᑦ ᐃᓪᓗᓕᕆᔨᕐᔪᐊᒃᑯᓪᓗ, ᐊᒥᓱᓂᑦ ᐃᑲᔪᓚᐅᖅᓯᒪᔪᑦ ᐊᑭᓕᖅᓱᕆᐊᖃᖅᑕᐅᔪᓂᒃ. ᐊᒻᒪᓗ ᐃᑲᔪᓗᐊᖅᑐᐊᓘᓂᕋᐃᓪᓗᑎᑦ ᓇᒻᒥᓂᖅ ᐃᓪᓗᑖᕈᑎᔅᓴᖃᕐᓂᕐᒧᑦ ᐃᑲᔫᓯᐊᕐᓂᑦ (HAP) ᐃᑲᔪᖅᑕᐅᓂᖏᓐᓂ, ᑕᐃᒫᒃ ᐃᑲᔫᑎᒃ, ᐅᖃᖅᑐᐃᓐᓇᖅᑐᒍ ᑕᐃᒫᒃ: “ᐅᐊᐹᓘᓚᐅᖅᓯᒪᔪᖅ,” ᐃᓱᒪᒋᔭᐅᓪᓗᑎᑦ.

ᐃᓪᓗᑖᕈᔅᓴᒥᑦ ᓇᒻᒥᓂᖅ ᐃᑲᔫᓯᐊᖅᑎᒍᑦ (HAP) ᑐᓂᔭᐅᑐᐃᓐᓇᖅᑑᒐᓗᐊᖅ ᑕᒪᓐᓇ ᓱᓕᔪᖅ, ᑭᓯᐊᓂᓕ ᑐᓂᔭᐅᕙᑦᑐᓂᒃ ᒐᕙᒪᒃᑯᓐᓂ ᐃᖅᑲᓇᐃᔭᖅᑎᑖᖅᑐᖃᑦᑕᕐᓂᖏᓐᓂ ᖃᓪᓗᓈᓂᑦ ᑕᒪᐅᓐᖓᖅᑐᑎᑦ ᐃᓪᓗᓕᐅᕆᐊᖅᑐᖅᑐᑎᒃ ᓄᓇᓕᓐᓄᑦ, ᕇᔅ ᐅᖃᖅᑐᓂ.

ᑕᒪᓐᓇ ᐃᓪᓗᑭᔅᓴᕐᓂᑦ ᐊᔅᓱᕉᑕᐅᖏᓐᓇᖅᑐᖅ ᐅᑭᐅᑕᖅᑐᒥ ᐊᐅᓚᑦᑎᒍᒪᔪᓂᒃ ᖃᓪᓗᓈᓂᑦ ᑎᑭᓯᒪᓕᖅᑎᓪᓗᒋᑦ ᐊᒥᓱᓪᓗ ᒐᕙᒪᒃᑯᑦ ᑲᔪᓯᖃᑦᑕᖏᒻᒪᑕ ᐱᓕᕆᐊᖏᑦ ᓄᓇᖃᖅᑳᖅᑐᒥᓂᕐᓂᑦ ᐃᑲᔪᖅᑐᐃᒐᓱᐊᕐᓂᖏᓐᓂ.

ᐃᓪᓗᑖᕈᔅᓴᒥᑦ ᓇᒻᒥᓂᖅ ᐃᑲᔫᓯᐊᖅᑎᒍᑦ (HAP), ᐳᐊᑦ ᒍᑦ ᕼᐅᑉᒥ (Fort Good Hope), ᓴᖅᑭᖅᑕᐅᑲᓐᓂᖅᑲᑕ ᓄᓇᓕᓐᓂ ᐃᑲᔪᑏᑦ ᐱᔨᑦᑎᕋᐅᑏᓪᓗ, ᐃᓪᓗᓕᐅᒃᑲᓂᓕᕐᓗᑎᑦ ᐃᓄᐃᑦ ᐱᔪᓇᕋᔭᖅᑐᑦ.

“ᐱᓯᒪᑦᑎᔨᖃᕐᓂᕈᕕᑦ, ᐱᔨᑦᑎᖅᑕᐅᖏᓐᓇᕐᓗᑎ ᑭᓯᐊᓂ ᓇᒻᒥᓂᖅ ᑲᒃᑭᓪᓗᑎᑦ, ᖃᓄᐊᓗᓪᓕ ᐱᓇᓱᒍᓐᓇᕋᔭᕋᕕᑦ ᐱᔾᔪᔾᔭᐅᖏᓐᓇᕐᓗᑎᑦ” ᐅᖃᖅᑐᓂ. “ᐃᓪᓗᑖᕈᔅᓴᒥᑦ ᓇᒻᒥᓂᖅ ᐃᑲᔫᓯᐊᖅᑎᒍᑦ (HAP) ᑕᐃᒫᒃ ᐱᔪᓐᓇᓚᐅᖅᑐᑦ. ᐃᓪᓗᑖᕈᔅᓴᒥᑦ ᓇᒻᒥᓂᖅ ᐃᑲᔫᓯᐊᖅᑎᒍᑦ (HAP) ᐱᕕᖃᖅᑎᑦᑎᓚᐅᖅᑐᑦ. ᑐᓂᓯᓂᑐᐃᓐᓇᐅᒐᓗᐊᖅᑎᓪᓗᒋᑦ, ᐱᐅᓂᖅᓴᓪᓚᕆᒃ ᑐᓂᕙᑦᑕᖏᓐᓂ ᒐᕙᒪᒃᑯᑦ ᓇᒻᒥᓂᖅ ᓴᓇᓪᓗᓂᒋᑦ ᓄᓇᒥᑦ ᑕᑉᐸᐅᖓ ᑎᑎᑦᑐᒍ.”

ᑎᓴᒪᖓ 4: ᓇᒻᒥᓂᖅ ᐃᓪᓗᖃᖅᑐᓂᑦ ᐱᕈᔅᓴᐅᓯᒪᔪᑦ ᐃᓪᓗᑖᔅᓴᓂᑦ ᐱᔪᓐᓇᕆᐊᓖᑦ, ᐅᖃᖅᑐᖅ KIA−ᑯᓐᓄᑦ ᓯᕗᓕᖅᑎ