SSi Canada ᐱᓕᕆᖃᑎᖃᓕᕐᐳᑦ ᕿᑭᖅᑖᓗᒃ ᑯᐊᐳᕇᓴᒃᑯᓐᓂᒃ ᐱᐅᓯᕚᓪᓕᖅᑎᑦᑎᓇᓱᒡᓗᑎᒃ ᖃᕋᓴᐅᔭᓄᑦ ᐊᑦᑕᑕᕈᓐᓇᐅᑎᓂᒃ

For an English version of this story, see SSi teams up with Qikiqtaaluk Corp to seek better Nunavut internet

ᐃᕿᐊᙳᕐᓯᒪᓕᕐᑐᓂᒃ ᖃᒥᒍᔾᔨᖃᑦᑕᕐᓂᕐᒥᒃ ᐊᒻᒪᓗ ᖃᕋᓴᐅᔭᒃᑯᑦ ᐊᑦᑕᑕᐅᑏᑦ ᓱᒃᑲᐃᓗᐊᕐᓂᖏᓐᓂᒃ ᐃᑲᔫᑎᒃᓴᓂᒃ ᐊᒡᒋᖅᑐᖃᑐᐃᓐᓇᕆᐊᖃᖅᑐᖅ ᑕᒪᒃᑯᓄᖓ ᖃᕋᓴᐅᔭᓂᒃ ᐊᒻᒪ ᐅᖄᓚᐅᑎᕋᓛᓂᒃ ᐊᑐᖅᐸᒃᑐᓄᑦ ᓄᓇᕗᒥᑦ

ᑕᒪᓐᓇ ᑕᐃᒪᐃᑦᑐᓐᓇᕋᔭᖅᑐᖅ ᑲᑐᔾᔨᖃᑎᒌᖕᓂᕐᒥᒃ ᐋᖅᑭᒃᓯᒍᑎᒃ ᐅᑯᐊ SSi Canada ᐊᒻᒪᓗ ᐃᓄᖕᓄᑦ ᓇᖕᒥᓂᕆᔭᐅᔪᖅ ᕿᑭᖅᑖᓗᒃ ᑯᐊᐳᕇᓴᒃᑯᑦ ᑲᔪᓯᒍᓐᓇᕐᓗᓂ ᐊᕐᕌᒍᓂᒃ ᖁᓕᓂᒃ ᐸᕐᓇᐅᑎᓂᒃ ᐱᐅᓯᕚᓪᓕᖅᑎᑦᑎᓂᕐᒥᒃ ᐱᐅᓂᕐᓴᒥᒃ ᖃᕋᓴᐅᔭᓂᒃ ᐊᑐᐃᓐᓇᖃᕈᓐᓇᕐᓂᕐᒥᒃ ᑲᓇᑕᐅᑉ ᐅᑭᐅᕐᑕᖅᑐᖓᓂᒃ.

“ᐅᓇ ᐱᔾᔪᑎᖃᕐᑐᖅ ᐱᓕᕆᕝᕕᒃᓴᓂᒃ ᐋᖅᑭᒃᓱᐃᓂᕐᒧᑦ ᐅᓪᓗᒥᑐᐃᓐᓇᕐᒨᙱᑦᑐᖅ, ᑭᓯᐊᓂᓕ ᓯᕗᓂᒃᓴᒧᑦᑕᐅᖅ, ᒪᐅᓇᓕ ᐱᐅᓯᕚᓪᓕᖅᑎᑦᑎᓂᕐᒥᒃ ᐊᑦᑕᑕᕈᓐᓇᐅᑎᖃᕐᓂᕐᒥᒃ,” ᐅᖃᖅᑐᖅ ᑏᓐ ᐳᕌᒃᑐ, ᐱᕙᓪᓕᐊᔪᓕᕆᓂᕐᒧᑦ ᐊᖓᔪᖅᑳᖅ ᐅᑯᓄᖓ SSi Canada-ᒧᑦ.

SSi Canada, ᖃᐅᔨᒪᔭᐅᓂᑯ ᐃᒪᓐᓇ SSi Micro, ᐊᐅᓚᑦᑎᔨᐅᔪᑦ ᓄᓇᕗᑦ ᕿᓂᖅ ᐊᒻᒪ SSi Mobile ᐊᑦᑕᑕᐅᑎᓕᕆᔾᔪᑎᓂᒃ. ᐅᑯᐊᓕ ᕿᑭᖅᑖᓗᒃ ᑯᐊᐳᕇᓴᓐᑯᑦ ᓇᖕᒥᓂᖃᖅᑐᓕᕆᔨᐅᕗᑦ ᐅᑯᓄᖓ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᓄᑦ.

ᕿᑭᖅᑖᓗᒃ ᑯᐊᐳᕇᓴᒃᑯᑦ ᖃᖓᑦᑎᐊᓵᖅ ᐱᒋᐊᖅᑎᑦᑎᓚᐅᕐᑐᑦ ᓄᑖᒥ ᑲᒻᐸᓂᒥᒃ ᑕᐃᔭᐅᔪᒥᒃ ᐹᓐᐋᑎᒃ ᑐᓴᐅᒪᔾᔪᑎᓕᕆᔨᑦ ᐃᖕᑰᐳᕇᑕᑦ. (Panarctic Communications Inc.) ᑖᓐᓇᓗ ᓇᓗᓇᐃᖅᑕᐅᓯᒪᓪᓚᕆᓕᕐᖢᓂ ᓴᓇᕝᕕᓕᕆᔨᒃᑯᓐᓂᒃ ᑲᓇᑕᒥᑦ (Industry Canada).

ᐊᒻᒪᓗ ᑖᒃᑯᐊ ᑲᒻᐸᓂᐅᔪᑦ ᐱᓕᕆᖃᑎᖃᕐᓂᐊᖅᑐᑦ SSi-ᒥ ᐃᒻᒥᒃᑰᖓᔪᖅ ᑕᐃᔭᐅᓪᓗᓂ “ᐹᓐᐋᑎᒃ ᑲᓐᓱᑎᐊᒻ.”

ᓯᐊᑕᓐ ᓂᒻᓴᒃ, ᕿᑭᖅᑖᓗᒃ ᑯᐊᐳᕇᓴᓐᑯᑦ ᑐᑭᒧᐊᖅᑎᑦᑎᔨᖓ ᐱᓕᕆᐊᒃᓴᓂᒃ ᐱᕙᓪᓕᐊᔪᓂᓕᕆᓂᕐᒧᑦ ᐊᒻᒪ ᐱᓕᕆᖃᑎᓕᐅᕐᓂᕐᒧᑦ, ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᑕᐃᒪᓐᓇ ᐃᓱᒪᒋᔭᐅᓕᓚᐅᕐᓯᒪᓂᖓᓂᒃ ᐃᓄᐃᑦ ᐅᑭᐅᕐᑕᖅᑐᓕᒫᒥᑦ ᑲᑎᒪᔨᕐᔪᐊᖏᑦ ᐱᓕᕆᐊᖃᕐᓂᕐᒧᑦ ᑲᑎᒪᓂᖃᖅᑎᓪᓗᒋᑦ ᐋᓐᑯᕆᔾ ᐊᓛᔅᑲᒥ ᖃᖓᑲᓪᓛᓗᒃ.

ᑕᕝᕙᓂ ᑲᑎᒪᑎᓪᓗᒋᑦ, ᐃᓄᐃᑦ ᑲᑎᒪᔭᖅᑐᕐᑐᑦ ᐅᑭᐅᕐᑕᖅᑐᕐᒥᐅᑕᑦ ᓄᓇᕐᔪᐊᒥ ᐊᖏᖃᑎᒌᓕᓚᐅᕐᓯᒪᖕᒪᑕ ᐅᑭᐅᕐᑕᖅᑐᕐᒥᐅᑕᑦ ᐃᓄᐃᑦ ᓇᖕᒥᓂᖓᓂᒃ ᑐᓴᐅᒪᔾᔪᑎᓕᕆᔾᔪᑎᒥᒃ ᓴᖅᑭᑎᑦᑎᖁᔨᓪᓗᑎᒃ.

“ᑕᐃᒪᓕ ᐅᓇ ᐹᓐᐋᑎᒃ ᐱᒋᐊᓕᓚᐅᕐᑐᖅ ᐃᓱᒪᒋᔭᐅᔪᕕᓂᕐᒧᑦ ᐊᒻᒪᓗ ᕿᑭᖅᑖᓗᒃ ᑯᐊᐳᕇᓴᒃᑯᑦ ᐱᒋᐊᖅᑎᑦᑎᔨᐅᓪᓗᑎᒃ ᑐᒃᓯᕋᐅᓯᐅᕐᓂᒃᑯᑦ ᑐᓴᐅᒪᔾᔪᑎᓕᕆᔨᙳᕈᒪᓂᕐᒥᒃ,” ᓂᒻᓴᒃ ᐅᖃᖅᑐᖅ.

ᒫᓐᓇᐅᔪᕐᓕ ᐅᑯᐊ SSi-QC ᑲᑐᔾᔨᖃᑎᒌᖕᓂᖏᑦ ᐱᐅᓯᕚᓪᓕᖅᑎᑦᑎᓇᓱᖕᓂᐊᖅᑐᑦ ᒫᓐᓇ ᓄᓇᕗᒥᑦ ᖃᖓᑦᑕᖅᑎᑕᐅᓯᒪᔪᒃᑯᑦ ᖃᕋᓴᐅᔭᓄᑦ ᐱᔨᑦᑎᕋᐅᑎᖏᓐᓂᒃ.

ᐊᑯᓂᐅᓂᕐᓴᕐᓕ ᐱᓕᕆᐊᖃᕐᓂᒃᑯᑦ, ᓂᒻᓴᒃ ᐅᖃᓚᐅᕐᑐᖅ ᐸᕐᓇᒃᓯᒪᓂᖏᓐᓂᒃ ᕿᒥᕐᕈᐊᕐᓂᐊᕐᓗᑎᒃ ᑕᒪᐃᓐᓂᒃ ᑕᕆᐅᑉ ᐃᖅᑲᖓᒍᑦ ᐊᑦᑕᑕᐅᑎᒃᓴᓕᐅᕐᓗᑎᒃ ᐊᒻᒪᓗ ᓄᓇᕐᔪᐊᒧᑦ ᖃᓂᑦᑐᓂᒃ ᖁᒻᒧᒃᑎᑕᐅᓯᒪᔪᓂᒃ, ᑭᓯᐊᓂᓕ ᐊᑦᑕᑕᐅᑎᒃᓴᓕᐅᕐᓂᖅ ᐅᐊᔭᓂ ᐊᑐᕐᓗᑎᒃ “ᓲᕐᓗ ᓯᕗᓂᒃᓴᒨᖓᓗᐊᖂᔨᖕᒪᑦ.”

“ᒪᑯᐊᓕ ᐅᐊᔭᐃᑦ ᐱᔾᔪᑎᒋᓪᓗᒋᑦ, ᐅᖃᐅᓯᖃᕐᓯᒪᔪᒍᑦ ᖃᓄᐃᓕᐅᕈᑎᒋᔪᓐᓇᕐᓂᑦᑎᓐᓂᒃ ᓄᓇᕐᔪᐊᒥᑦ ᐱᔭᐅᔪᒪᓯᒪᓂᖓᓄᑦ ᐃᓱᒪᒋᔭᖃᕐᓯᒪᓂᖏᓐᓂᒃ ᑕᕆᐅᑉ ᐃᖅᑲᖓᒍᑦ ᐅᐊᔭᓕᕐᓱᐃᓂᕐᒥᒃ ᓄᓇᕐᔪᐊᒥᐅᑦ ᑎᑎᕋᕐᓯᒪᔪᓂᒃ ᐱᔪᒪᓯᒪᓂᖏᓐᓄᑦ. ᑕᐃᒪᓕ ᑕᒪᓐᓇ ᐊᑯᓂᕈᓗᒃ ᐱᓕᕆᐊᖑᔪᓐᓇᕐᓂᕐᓴᐅᓇᔭᖅᑐᑦ ᐊᒻᒪᓗ ᐊᔪᕐᓇᕋᓱᒋᙱᖢᑎᒍᑦ,” ᓂᒻᓴᒃ ᐅᖃᖅᑐᖅ.

ᐊᒻᒪᓗ ᑖᓐᓇ ᓄᑖᖅ ᑐᓴᐅᒪᔾᔪᑎᓕᕆᓂᖅ ᐃᓄᐃᑦ ᓇᖕᒥᓂᖃᕐᓂᕐᓴᕆᓇᔭᖅᖢᓂᐅᒃ,” ᐅᖃᖅᑐᖅ.

ᑕᐃᒪᐃᓕᓚᐅᖅᖢᓂ, ᑏᓐ ᐳᕌᒃᑐ ᐅᖃᓚᐅᕐᑐᖅ SSi “ᒥᑭᓐᓂᕐᓴᒥ ᐱᓕᕆᓂᖃᕐᓂᐊᕐᑐᖅ” ᑕᕝᕙᓂ ᐃᒻᒥᒃᑰᖓᔪᒥᒃ.

“ᑕᒪᑐᒧᖓᓕ ᐱᒻᒪᕆᐊᓘᓂᐊᕐᑐᖅ ᐃᓄᐃᑦ ᐊᔪᕈᓐᓃᕐᓴᖅᑎᑕᐅᓂᖏᓐᓂᒃ ᐊᒻᒪᓗ ᓄᓇᓕᖕᓂ ᐃᖅᑲᓇᐃᔮᖃᓕᕐᓂᕐᒧᑦ. ᑕᕝᕙᓂᓕ ᐊᕐᕌᒍᑦ ᖁᓕᓄᑦ ᐸᕐᓇᐅᑎᓂᒃ, ᐋᖅᑭᒃᓱᐃᓯᒪᔪᒍᑦ ᐸᕐᓇᐅᑎᒃᓴᓂᒃ ᐃᖅᑲᓇᐃᔮᓄᑦ ᐱᓕᕆᖃᑕᐅᓂᕐᒥᒃ, ᓄᓇᓕᖕᓂᒃ ᐃᖅᑲᓇᐃᔮᒃᓴᓂᒃ, ᓄᓇᓕᖕᓂᒃ ᐊᔪᕈᓐᓃᕐᓴᕐᓂᕐᒥᒃ, ᓄᓇᓕᖕᓂ ᐊᐅᓚᑦᑎᒍᑎᒃᓴᓂᒃ ᐊᐅᓚᑦᑎᔨᐅᓂᐊᕐᑐᓄᑦ ᓄᓇᖏᓐᓂᒃ,” ᐳᕌᒃᑐ ᐅᖃᖅᑐᖅ.

“ᐅᓇ ᐱᒻᒪᕆᐊᓗᒃ, ᐱᓪᓚᕆᒃ ᓇᓗᓇᐃᔭᐃᓯᒪᔪᖅ ᐃᓄᐃᑦ ᐊᐅᓚᑎᑦᑎᓇᔭᕐᓂᖏᓐᓂᒃ ᐊᒻᒪ ᐊᐅᓚᑦᑎᔨᐅᓂᖏᓐᓄᑦ,” ᐅᖃᖅᑐᖅ.

ᑖᔅᓱᒧᖓᓕ ᐊᕐᕌᒍᓄᑦ ᖁᓕᓄᑦ ᐸᕐᓇᐅᑎᓂᒃ ᐊᑭᓕᐅᑎᖃᕐᓂᐊᕐᓂᕐᒧᑦ, ᐅᑯᐊ SSi-QC ᑲᑐᔾᔨᖃᑎᒌᖑᔪᑦ ᕿᓂᕐᑐᑦ ᑮᓇᐅᔭᓂᒃ ᑲᓇᑕᒥᒃ ᓈᓚᐅᑎᓕᕆᔨᒃᑯᓐᓂᒃ ᐊᒻᒪ ᑕᓚᕖᓴᓕᕆᔨᒃᑯᑦ ᐊᑦᑕᑕᕈᓐᓇᐅᑎᓕᕆᓂᕐᒧᑦ ᐃᑲᔫᑎᒃᓴᖏᓐᓂᒃ. ᐅᓇ ᐅᕙᙶᕋᔭᖅᑐᖅ $750 ᒥᓕᐊᓐᑖᓚᓂ, ᑖᓐᓇᓕ ᐊᕐᕌᒍᓄᑦ ᑕᓪᓕᒪᓄᑦ ᐃᑲᔫᑎᒃᓴᖅ ᐊᒻᒪᓗ $62.4 ᒥᓕᐊᓐ ᑖᓚᐃ ᑐᓐᓂᖅᑯᑎᐅᓵᓚᐅᖅᖢᑎᒃ ᑎᓴᒪᓄᑦ ᓄᐊᑦᕕᔅᑎᐅᓪ ᐱᓕᕆᐊᖏᓐᓄᑦ ᔫᑳᓐᒥᑦ ᐊᒻᒪᓗ ᓄᓇᑦᓯᐊᕐᒥᓐ.

ᐳᕌᒃᑐ ᐅᖃᓚᐅᕐᑐᖅ ᐱᓕᕆᖃᑎᒌᖕᓂᖅ ᒪᕐᕉᖕᓂ ᑐᕌᒐᖃᕐᓂᖓᓂᒃ.

ᐃᓚᖓᓪᓕ “ᒫᓐᓇᑲᐅᑎᒋ ᐃᑲᔪᕈᑎᒃᓴᖅ” ᓄᓇᕗᒥᑦ ᑐᓴᐅᒪᔾᔪᑎᓕᕆᓂᕐᒥ ᐱᔨᑦᑎᕋᖅᑕᐅᖃᑦᑕᖅᑐᓄᑦ, ᒪᐅᓇ ᖁᒻᒧᒃᑎᑕᐅᓯᒪᔪᒃᑯᑦ ᐃᑲᔪᕈᑎᒃᑲᒃᑲᓐᓂᕐᓂᕐᒥᒃ.

ᐊᐃᑉᐸᖓᓕ ᐱᕈᖅᑎᑦᑎᓇᓱᖕᓂᕐᒥᒃ ᐱᓕᕆᕝᕕᒃᓴᓂᒃ ᑕᒪᐃᓐᓂ ᓄᓇᓕᖕᓂ ᐸᕐᓇᐅᑎᐅᓂᐊᕐᑐᓂᒃ ᐅᐊᔭᒧᑦ ᐊᑦᑕᑕᐅᑎᒃᓴᓕᕆᓂᒃᓴᒥᒃ ᐊᒻᒪᓗ ᓄᓇᕐᔪᐊᒧᑦ ᖃᓂᒃᓴᖅᑐᓂᒃ ᖁᒻᒧᒃᑎᑕᐅᓯᒪᔪᓂᒃ.

“ᐱᑕᖃᕆᐊᖃᕐᒪᑦ ᐱᒋᐊᕐᕕᐅᓕᕈᓐᓇᖅᑐᓂᒃ ᐱᓕᕆᕝᕕᒃᓴᓂᒃ ᒪᑯᓄᖓᐅᙱᑦᑐᖅ ᒫᓐᓇ ᖁᒻᒧᒃᑎᑕᐅᓯᒪᔪᑎᒍᑦ ᓄᓇᓕᖕᓄᐊᕈᑎᒋᔭᐅᔪᓂᒃ, ᑭᓯᐊᓂᓕ ᓄᑖᓂᒃ ᖁᒻᒧᒃᑎᑕᐅᓯᒪᔪᓄᑦ, ᓄᓇᕐᔪᐊᒧᑦ ᖃᓂᒃᓴᖅᑐᓂᒃ ᖁᒻᒧᒃᑎᑕᐅᓯᒪᔪᓂᒃ ᐊᒻᒪᓗ ᑐᓚᒃᑕᕐᕕᐅᓇᔭᖅᑐᓂᒃ ᐅᐊᔭᐅᔪᑦ ᐊᖅᑯᑎᒋᔭᖏᓐᓄᑦ, ᓇᓂᓗ ᐊᒻᒪ ᖃᑯᒍᑦ ᐅᐊᔭᐃᑦ ᑎᑭᒐᔭᕐᓂᖏᓐᓂᒃ,” ᐳᕌᒃᑐ ᐅᖃᖅᑐᖅ.

ᑖᓐᓇᓕ ᐱᔾᔪᑎᒋᔭᐅᔪᖅ ᐅᑯᐊ SSi-ᑯᑦ ᐊᑯᓂᕈᓗᒃ ᐆᒧᖓ ᕿᒥᕐᓗᒃ ᑐᒃᓯᕋᐅᑎᖓᓄᑦ, ᓯᕗᓪᓕᖅᐹᖑᓚᐅᕐᑐᖅ ᐱᒋᐊᕈᑎᕕᓂᖓᑦ ᓴᖅᑭᑕᐅᓂᑯ 2015-ᒥᑦ. ᑕᕝᕘᓇᓕ, ᓄᓇᓕᖕᓂ ᑐᙵᕕᐅᔪᖅ, ᓴᓇᔭᐅᓯᒪᓪᓗᓂ ᐊᑕᐅᓯᕐᒥ ᐃᒡᓗᒥ, ᑖᓐᓇᓕ ᐃᑲᔫᑎᐅᓇᔭᖅᑐᖅ ᐅᓗᕈᓘᔭᒻᒪᕆᒃᑐᓂᒃ ᑐᓴᐅᒪᔾᔪᑎᓕᕆᓂᕐᒧᑦ ᐱᔨᑦᑎᕋᐅᑎᓂᒃ ᐊᒻᒪᓗ ᐊᑦᑕᑕᕈᓐᓇᕋᔭᖅᖢᓂ ᖁᒻᒧᒃᑎᑕᐅᓯᒪᔪᒧᑦ, ᐅᐊᔭᓄᑦ ᐅᕝᕙᓘᓐᓃᑦ ᒪᐃᑯᕈᕗᐃᕝᒧᑦ.

ᑖᓐᓇ ᑐᙵᕕᐅᔪᖅ ᐱᓕᕆᕝᕕᐅᖃᑦᑕᕋᔭᕐᑐᖅ ᐊᒻᒪᓗ ᑭᒃᑯᑐᐃᓐᓇᕐᓄᑦ ᐱᓕᕆᐊᖃᕋᓱᒃᑐᑦ, ᐊᖏᔪᑦ ᐊᒻᒪ ᒥᑭᑦᑐᑦ, ᑖᔅᓱᒥᖓ ᐊᔾᔨᒌᒥᒃ ᐊᑐᐃᓐᓇᖃᕋᔭᖅᖢᑎᒃ.

“ᓄᓇᓕᖕᓂ ᐱᒡᒍᓴᐅᑎᓇᓱᒃᑐᑦ ᓄᓇᓕᖕᓂ ᐊᑦᑕᑕᐅᑎᓕᕆᓂᕐᒧᑦ ᐱᓕᕆᕝᕕᖕᒥᑦ ᑕᑯᑎᑕᐅᓇᓱᖃᑦᑕᕐᒪᑕ ᖃᓄᐃᓕᐅᕈᑎᓪᓚᕆᖕᒥᑦ ᐱᓇᓱᒍᓐᓇᖁᓪᓗᒋᑦ ᐱᐅᓛᓂᒃ ᑮᓇᐅᔭᓕᕆᓂᒃᑯᑦ,” ᐳᕌᒃᑐ ᐅᖃᖅᑐᖅ.

ᐱᓕᕆᕝᕕᐅᖃᑦᑕᖅᑐᖅ, ᐊᔾᔨᒌᒃᑎᑦᑎᓂᒃᑯᑦ ᖃᓄᐃᓕᐅᕈᓯᖓᑦ ᐅᑯᐊ ᓄᐊᑦᕕᔅᑎᐅᒃᑯᓐᓄ, ᓇᖕᒥᓂᕆᔭᐅᔪᖅ ᐅᖄᓚᐅᑎᓕᕆᔨᕐᔪᐊᓄᑦ ᐱᐊᓪ ᑳᓇᑕᒧᑦ, ᖃᓄᐃᓕᐅᕈᓯᖏᓐᓄᑦ ᐊᔾᔨᒋᙱᑕᖓᓂᒃ ᐸᓯᔭᒃᓴᐅᑎᑕᐅᖕᒪᑦ ᒪᓂᒻᒪᐃᓯᒪᓂᕐᒥᒃ ᓄᓇᕗᒥᑦ.

ᓄᐊᑦᕕᔅᑎᐅᓪᑯᑦ ᑐᓂᔭᐅᓚᐅᕐᓯᒪᖕᒪᑕ $49.9 ᒥᓕᐊᓐ ᑖᓚᓂᒃ ᒐᕙᒪᑐᖃᒃᑯᓐᓂᒃ 2017-ᒥᑦ ᐃᑲᔫᑎᐅᓂᐊᕐᓗᓂ ᐊᑭᓕᕐᓯᓂᕐᒥ ᖁᒻᒧᒃᑎᑕᐅᓯᒪᔪᒃᑯᑦ ᐱᔨᑦᑎᕋᐅᑎᒥ ᐊᖏᒡᓕᒋᐊᕈᑎᒥ ᑕᐃᔭᖓᓐᓂᒃ ᐃᒪᓐᓇ “ᑕᒪᕐᒥᒃ ᓄᓇᓖᑦ.”

ᑕᓐᓇ ᐱᓕᕆᔾᔪᓯᖅ, ᐊᐅᓚᑕᐅᔪᖅ ᐊᑦᑕᑕᕈᓐᓇᐅᑎᓕᕆᓂᒃᑯᑦ ᐱᖁᑎᖃᖅᑎᑕᐅᓂᕐᒥᒃ ᐅᑯᓇᙵᑦ Telesat-ᑯᑦ ᓄᑖᖅ T-19 ᖁᒻᒧᒃᑎᑕᐅᓯᒪᔭᖓᓂᒃ, ᑖᓐᓇᓗ ᒫᓐᓇ ᐋᖅᑭᒃᑕᐅᓯᒪᓕᖅᖢᓂ ᐊᒻᒪ ᐊᑐᖅᑕᐅᓕᖅᖢᓂ.

ᑭᓯᐊᓂᓕ ᑕᐃᒪᙵᑦ ᐱᒋᐊᖅᑕᐅᓚᐅᕐᑎᓪᓗᒍ ᐅᓄᕐᑐᑦ ᓄᓇᕗᒥᑦ ᐱᔨᑦᑎᕋᖅᑕᐅᔪᑦ ᓈᒻᒪᒃᓴᕐᓯᒪᙱᓪᓚᕆᒃᓯᒪᔪᑦ ᓄᐊᑦᕕᔅᑎᐅᑯᓐᓂᒃ ᐊᒻᒪ ᐃᓚᖓᓂᒃ, ᐱᐅᓪ ᒧᐱᓕᑎᑯᓐᓂᒃ. ᔪᓚᐃᖑᓚᐅᕐᑐᒥᑦ ᐅᓄᕐᑐᑦ ᐱᔨᑦᑎᕋᖅᑕᐅᔪᑦ ᑐᓴᒐᒃᓴᓕᐅᕈᑎᑎᒍᑦ ᓈᒻᒪᙱᓕᐅᕈᑎᖏᓐᓂᒃ ᑎᑎᕋᐅᓯᖃᕐᓯᒪᓕᕐᐳᑦ ᑖᓐᓇ ᐱᔨᑦᑎᕋᐅᑎ ᓈᒻᒪᙱᓐᓂᕋᖅᖢᒍ.

ᐊᒻᒪᓗ ᓄᓇᕗᒧᑦ ᓴᓂᑐ ᑕᓂᔅ ᐹᑐᓴᓐ, ᐅᓂᒃᑳᓕᐊᖏᑦᑎᒍᑦ ᖃᖓᑦᑎᐊᓵᖅ ᓴᖅᑭᑕᐅᓚᐅᕐᑐᓂᒃ ᓄᓇᑦᓯᐊᕐᒥ ᐱᕙᓪᓕᐊᔪᓂᒃ, ᐱᒡᒐᖅᑎᑦᑎᓚᐅᕐᐳᖅ ᐱᐊᓪᑯᓐᓂᒃ ᐊᒻᒪ ᓄᐊᑦᕕᔅᑎᐅᑯᓐᓂᒃ ᐊᑐᑐᐃᓐᓇᕐᓂᖏᓐᓂᒃ ᒐᕙᒪᑐᖃᒃᑯᑦ ᑮᓇᐅᔭᖏᓐᓂᒃ ᐱᖁᑎᑖᖅᑐᕋᓱᑐᐃᓐᓇᕐᓂᕐᒧᑦ.

“ᐅᓇ ᐊᖏᔪᐊᓗᒃ ᐃᑲᔫᑎᒃᓴᖅ ᑭᒃᑯᓕᒫᓄᑦ ᐱᔪᓐᓇᖅᑎᒍᑎᐅᓯᒪᖕᒪᑦ ᐅᑯᓂᖓ ᐱᐊᓪ/ᓄᐊᕕᔅᑎᐅᒃᑯᓐᓂᒃ ᑕᒪᑐᒥᖓ ᐱᖃᓪᓗᐊᑕᕋᓱᖕᓂᕐᒥᒃ,” ᐹᑐᓴᓐ ᐅᖃᖅᑐᖅ.

ᒫᓐᓇᐅᔪᕐᓕ, SSi ᐊᒻᒪ ᕿᑭᖅᑖᓗᒃ ᑯᐊᐳᕇᓴᒃᑯᑦ ᐅᑕᖅᑭᔪᑦ ᑭᐅᔭᐅᔾᔪᑎᖏᓐᓂᒃ ᑐᒃᓯᕋᐅᑎᒋᓚᐅᕐᑕᖏᓐᓂᒃ ᑐᓂᔭᕕᓂᖏᓐᓂᒃ ᑲᓇᑕᒥ ᓈᓚᐅᑎᓕᕆᔨᒃᑯᑦ ᐊᒻᒪ ᑕᓚᕖᓴᓕᕆᔨᒃᑯᓐᓄᑦ ᐊᑦᑕᑕᕈᓐᓇᐅᑎᓕᕆᓂᕐᒧᑦ ᐃᑲᔫᑎᑖᕋᓲᑎᖏᓐᓂᒃ.