ᐊᔾᔨᓕᐅᒐᖅ ᐱᙳᐊᕈᑎ ᐃᑲᔪᕐᐳᖅ ᐃᓅᓱᒃᑐᓂ ᐃᓱᒪᒃᑯᑦ ᖃᓄᐃᑦᑕᐃᓕᓂᕐᒧᑦ ᖃᓄᐃᓕᐅᕈᑎᒃᓴᓂᒃ

ᐅᓇ ᓖᑎᐊ ᑲᓪᓗᒃ ᑎᑎᕋᖅᑎᓪᓗᒍ ᐃᙱᐅᓯᖓᓂ ᒫᓐᓇᒥ ᓵᓚᒃᓴᐅᓯᐊᕋᓱᒃᑎᓪᓗᒋᑦ ᓄᓇᑦᓯᐊᕐᒥ, ᖃᐅᔨᒪᓚᐅᕐᓯᒪᙱᑦᑐᖅ ᑖᓐᓇ ᓂᓪᓕᐊᑎᑕᐅᓂᐊᕆᐊᒃᓴᖓᓂ ᐱᙳᐊᕈᑎᓕᐊᕆᔭᐅᔪᒥᒃ ᐱᐅᓯᕚᓪᓕᖅᑎᑦᑎᓇᓱᒃᑐᒥ ᐃᓱᒪᒃᑯᑦ ᖃᓄᐃᑦᑕᐃᓕᓂᕐᒥᒃ ᐃᓄᐃᑦ ᐃᓅᓱᒃᑐᖏᓐᓂ.

ᐅᕙᓂ ᑕᕐᕆᔭᒐᖅ ᖃᒡᒋᖅᒥ, ᐅᖃᐅᓯᐅᓯᒪᔪᖅ ᓯᕗᓪᓕᖅᐹᖑᓂᖓᓂ ᐃᓄᖕᓄᑦ ᐋᖅᑭᒃᓱᖅᑕᐅᕙᓪᓕᐊᓂᖓᓂ ᑕᕐᕆᔭᒐᖅ ᐱᙳᐊᕈᑎ ᐅᖄᓚᐅᑎᕋᓛᓄᑦ ᐋᖅᑭᒃᑕᐅᓂᐊᖅᖢᓂ, ᐃᓄᒃᑎᑐᑦ ᐃᙱᕐᑐᒥ ᑐᓴᕐᓴᐅᔪᖃᖅᖢᓂ ᐃᓐᓇᕐᓂ ᑕᕐᕆᔭᒐᕐᓂ ᓴᖅᑭᔮᖅᑎᑦᑎᓕᕌᖓᑕ.

“ᐃᙱᐅᑎᐅᑉ ᑎᑎᕋᖅᑕᐅᓯᒪᓂᖏᑦ ᐃᒪᓐᓇᐸᓘᕐᑐᑦ, ‘ᐊᖑᑎ ᖃᐅᔨᒪᑦᑎᐊᖅᑐᐊᓗᒃ ᐅᕙᓐᓄᑦ ᐅᖃᓚᐅᕐᓯᒪᖕᒪᑦ ᓱᓕ ᒪᒃᑯᒃᑐᑎᑦ. ᐃᓅᓯᖃᕈᑎᖃᐅᖅᖢᑎᑦ. ᓄᓇᕐᔪᐊᕐᓗ ᑕᑯᐊᓂᒃᓯᒪᙱᖢᒍᑦ,” ᐅᖃᕐᑐᖅ ᑲᓪᓗᒃ, ᐃᒃᐱᐊᕐᔪᒃᒥᐅᑕᖅ, ᐊᐱᕐᓱᖅᑕᐅᑎᓪᓗᒍ.

“ᐅᓇ ᐱᐅᔪᐊᓗᒃ [ᐃᓅᓱᒃᑐᓄᑦ] ᑐᓵᑎᖢᒋᑦ ᐃᖏᐅᑎᓂ ᐅᖃᐅᓯᖏᑦᑎᒎᖓᔪᓂ. ᐅᕙᓐᓄᓪᓕ ᐃᓗᐊᕈᑎᒻᒪᕆᒐ ᐃᙱᕐᑎᐅᓪᓗᖓ ᐃᑲᔫᑎᖃᕈᓐᓇᕋᒪ ᑖᔅᓱᒧᖓ.”

ᔪᐊᒃ ᓯᓚᑦᑐᖅᓴᕐᕕᐊᓗᒃᒥ ᖃᐅᔨᓇᓱᒃᑎᐅᔪᑦ, ᐃᓄᐃᑦ ᐃᓅᓱᒃᑐᑦ ᐊᒻᒪ ᐃᓕᖅᑯᓯᕐᒥ ᖃᐅᔨᒪᔨᑦ ᐋᖅᑭᒃᓱᐃᕙᓪᓕᐊᓕᓚᐅᕐᓯᒪᔪᑦ ᐱᙳᐊᕈᑎᒥ 2022-ᖑᑎᓪᓗᒍ.

ᐅᓇ ᒪᓕᒃᑐᖅ ᐊᓛᓱᐊᒥ, ᐱᙳᐊᖅᑎᓪᓗᐊᑕᐅᔪᖅ, 7-ᓂ ᐊᔾᔨᒌᙱᑦᑑᑎᓂ ᐊᓂᒍᐃᕙᓪᓕᐊᓇᓱᒃᑎᓪᓗᒍ ᓴᓇᔭᐅᓯᒪᓪᓗᓂ ᐃᓄᐃᑦ ᐃᓕᖅᑯᓯᖓᒍᑦ ᖃᓄᐃᓕᐅᕈᓯᕐᓂ ᐊᒻᒪ ᐃᓱᒪᒃᑯᑦ ᖃᓄᐃᑦᑕᐃᓕᓂᕐᒧᑦ ᖃᓄᐃᓕᐅᕈᑎᒃᓴᓂᒃ, ᐅᖃᓚᐅᕐᑐᖅ ᐱᓕᕆᐊᒧᑦ ᑐᑭᒧᐊᖅᑎᑦᑎᔨ ᔪᒌᑕ ᓯᖕ.

ᐊᑕᐅᓯᖅ ᖃᓄᐃᓕᐅᕈᑎᒥ ᓂᕐᔪᑎᙳᐊᖅ ᐃᒥᖅᑎᑦᑎᓇᓱᒃᖢᓂ ᐱᐅᙱᑦᑐᕈᓗᒥ ᐊᓛᓱᐊᒥ ᑲᑎᕐᓱᐃᓂᕐᒥᓂ ᐃᒪᑦᑎᐊᕙᒃᒥ ᐊᒻᒪ ᓂᓚᖕᓂ. ᐱᙳᐊᖅᑐᑦ ᐊᔪᕈᓐᓃᕈᓐᓇᖅᑐᑦ ᑖᔅᓱᒥᖓ ᐱᑦᑕᐃᓕᒪᓂᕐᒥᒃ ᐊᒻᒪ ᐃᓱᒫᓘᑎᒋᔭᐅᔪᑦ ᐊᓂᒍᖅᑎᑕᐅᔪᓐᓇᕐᓂᖏᓐᓂ ᐃᒥᐊᓗᙱᒃᑲᓗᐊᕐᓗᑎ, ᓯᖕ ᐅᖃᕐᑐᖅ.

ᓂᐱᓕᐅᕐᓯᒪᔪᖅ ᐃᓚᖃᕐᒥᔪᖅ ᐃᙱᑦᒥ ᑭᖓᕐᓂᑦ ᓄᓇᖃᖅᑐᒥ ᓘᓚ ᐅᓱᐃᑦᑐᒃ, ᐊᒻᒪ ᕿᓚᐅᔾᔭᖅᑎᓪᓗᒍ ᑭᒻᒥᕈᒻᒥᐅᑕᖅ ᓕᐅ ᑎᒥᓚ, ᐊᒻᒪᓗ ᑲᑕᔾᔭᖅᑐᓂᒃ ᔭᓗᓇᐃᒥᐅᑖᖕᓂ ᑎᕕᓂ ᑯᓕᒃᑖᓇ ᐊᔭᓕᒃ ᐊᒻᒪ ᑲᐃᓕ ᐃᓄᒃᓱᒃ ᒪᒦ, ᖃᐅᔨᒪᔭᐅᖕᒥᔪᖅ ᐱᖅᓯᖅᒥ.

ᐱᙳᐊᖅ ᖃᐅᔨᓴᖅᑕᐅᓚᐅᕐᓯᒪᔪᖅ ᐅᕙᙵᑦ ᐅᒃᑑᐱᕆ 2025-ᒥ ᒪᐅᖓ ᔪᓚᐃ 2026-ᒧ, 276 ᐃᓄᐃᑦ ᐃᓅᓱᒃᑐᑦ ᓄᓇᓕᖕᓂᙶᖅᑐᑦ 21-ᓂ ᓄᓇᕗᒥᑦ ᐊᒻᒪ 16-ᓂ ᐊᓯᖏᓐᓂ ᓄᓇᓕᖕᓂ ᑲᓇᑕᒦᑦᑐᓂᒃ ᐃᓚᐅᑎᑕᐅᓪᓗᑎᒃ, ᓯᖕ ᐅᖃᕐᑐᖅ.

ᐱᙳᐊᑲᑕᒃᑐᑦ ᐱᐊᓂᒃᓯᓚᐅᕐᑐᑦ 39-ᓂ ᐊᐱᖅᑯᑎᐅᔪᓂᒃ ᖃᓄᐃᑦᑕᐃᓕᓂᕐᒧᑦ ᐱᙳᐊᒥ ᐱᙳᐊᓚᐅᖅᑎᓐᓇᒋᑦ ᐊᒻᒪ ᐱᙳᐊᕌᓂᒃᓯᒪᓕᖅᑎᓪᓗᒋᑦ, ᐱᓕᕆᑎᑕᐅᓪᓗᑎ ᐊᔪᕈᓐᓃᕐᓴᓯᓐᓈᑦ ᐅᑯᓇᓂ ᓄᓇᓕᖕᓂᑦ ᐃᒃᐱᐊᕐᔪᒃ, ᑭᖓᐃᑦ, ᐸᓐᓂᕐᑑᖅ, ᐃᖃᓗᐃᑦ, ᖃᒪᓂᑦᑐᐊᖅ ᐊᒻᒪ ᐋᑐᕚᒥ. ᐊᓯᖏᑦ ᐊᖏᕐᕋᖏᓐᓂ ᖃᐅᔨᓴᓚᐅᕐᑐᑦ ᐱᙳᐊᕈᑎᒥ, ᓯᖕ ᐅᖃᕐᑐᖅ.

“ᐃᓅᓱᒃᑐᐃᑦ ᐃᓱᒪᓚᐅᕐᑐᑦ ᐊᔪᕈᓐᓃᕐᓂᕋᖅᖢᑎᒃ ᖃᓄᐃᓕᐅᕈᑎᒃᓴᓂᒃ ᐃᖕᒥᖕᓂ ᐃᑲᔪᕈᑎᒃᓴᖏᓐᓂ ᑯᕕᐊᓇᙱᓗᐊᖅᑐᓂᒃ ᐃᓱᒪᓗᐊᓕᕌᖓᑕ, ᐃᖕᒥᖕᓂ ᖃᓄᐃᑦᑐᓐᓃᕐᑎᑦᑐᕐᓇᕐᒥᒃ ᐊᒻᒪ ᐃᓗᐊᕐᓴᕐᓂᖅᓴᐅᓕᖅᖢᑎᒃ ᐃᑲᔪᖅᑕᐅᔪᒪᓗᑎ ᐊᐱᕆᔭᕆᐊᒃᓴᖅ, ᓲᕐᓗ ᐃᒪᓐᓇ, ᖁᕕᐊᓇᙱᑦᑐᖅᓯᐅᖅᐸᓪᓕᐊᓕᕈᓂ,” ᐅᖃᕐᑐᖅ ᐃᕚᓐ ᐳᐊ, ᐱᓕᕆᐊᒃᓴᒧᑦ ᐊᖓᔪᖅᑳᕆᔭᐅᔪᖅ ᖃᐅᔨᓇᓱᖃᑦᑕᕐᓂᕐᒥ ᐅᕙᓂ ᔪᐊᒃ ᓯᓚᑦᑐᖅᓴᕐᕕᐊᓗᒃᒥ.

“ᐃᒪᓐᓇᐅᓂᕐᓴᐅᕙᒃᖢᓂ ᑕᒪᒃᑯᐊ ᐃᓕᓐᓂᐊᕈᑎᒋᔭᕗᑦ ᐃᓛᓐᓂ ᑐᑭᓯᑲᐅᑎᒋᕙᙱᖢᑎᒍᑦ, ᑭᓯᐊᓂᓕ ᐊᓯᔾᔨᖅᐸᓪᓕᐊᓂᕐᑕᖃᓚᐅᕐᒪᑦ ᑭᖑᓂᑦᑎᐊᑯᓗᐊᒍᑦ ᑖᓐᓇᓗ ᐃᑲᔫᑎᒻᒪᕆᐅᓪᓗᓂ,” ᐅᖃᒃᑲᓐᓂᖅᑐᖅ.

ᖃᐅᔨᓇᓱᒃᑐᑦ ᓇᓂᓯᓚᐅᙱᒻᒥᔪᑦ ᓈᒻᒪᙱᓕᐅᕈᑎᐅᓇᔭᕐᑐᓂ ᐃᓚᐅᑎᑕᐅᔪᓄᑦ ᖃᓄᐃᑦᑕᐃᓕᓂᕐᒧᑦ ᐱᙳᐊᑲᑖᓚᓚᐅᖅᖢᑎᒃ ᐱᙳᐊᕈᑎᒥ.

ᑲᓪᓗᒃ ᐅᖃᓚᐅᕐᑐᖅ ᐃᑲᔪᓚᐅᕐᓂᕋᖅᖢᑎ ᑐᑭᓕᐅᕆᓂᕐᒥ 12-ᓂ ᐊᐱᖅᓱᖅᑕᐅᔪᕕᓂᕐᓂ ᐃᓐᓇᑐᖃᕐᓂ ᐃᒃᐱᐊᕐᔪᒃᒥ, ᑭᙵᓂᑦ, ᖃᒪᓂᑦᑐᐊᕐᒥ ᐊᒻᒪ ᐸᓐᓂᕐᑑᕐᒥ, ᑕᒪᒃᑯᐊᓗ ᐊᑐᐃᓐᓇᐅᓪᓗᑎᒃ ᐱᙳᐊᖃᑦᑕᖅᑐᓄᑦ ᖃᕋᓴᐅᔭᒃᑯᑦ ᖃᒡᒋᖅᒥ, ᐅᕝᕙᓘᓐᓃᑦ ᐃᓕᖅᑯᓯᑎᒍ ᑲᑎᒪᖃᑎᒌᖕᓂᕐᒧᑦ ᐱᙳᐊᖅᑎᓪᓗᒋᑦ.

“ᑕᕐᕆᔭᒐᕐᑕᖃᐅᕌᕐᔪᒃᑐᖅ ᐅᖃᐅᓯᖃᖅᑐᓂᒃ ᐃᖃᓗᒐᓱᖕᓂᕐᒥᒃ, ᐊᖑᓇᓱᒋᐊᕐᓂᕐᒥᒃ, ᐊᒻᒪᓗ ᐃᓱᒪᒃᑯᑦ ᐋᓐᓂᐊᖃᖅᑕᐃᓕᓂᕐᒨᖓᔪᓂᒃ. ᐃᓐᓇᑐᖃᐅᑉ ᐃᓱᒪᒋᔭᖏᑦ ᐱᒻᒪᕆᐊᓘᖕᒪᑕ, ᐊᒻᒪᓗ ᐱᒻᒪᕆᐅᓪᓗᓂ ᑕᒪᒃᑯᓂᖓ ᐃᑲᑎᖃᕆᐊᖃᕐᓂᖅ ᐊᑐᐃᓐᓇᐅᔪᓂᒃ ᐃᓅᓱᒃᑐᓄᑦ,” ᑲᓪᓗᒃ ᐅᖃᕐᑐᖅ.

ᐱᓕᕆᖃᑎᒌᒃᑐᑦ ᐱᓕᕆᐊᖃᕐᑐᑦ ᑖᒃᑯᐊ ᐱᙳᐊᒐᒃᓴᐃᑦ ᐊᑐᐃᓐᓇᐅᓕᕈᓐᓇᕐᓗᑎᒃ ᑕᕐᕆᔭᕈᓐᓇᐅᑎᓂ ᑎᒍᒥᐊᒐᕐᓂ ᐊᒻᒪᓗ ᐅᖃᐅᓯᖃᖅᐸᓪᓕᐊᓪᓗᑎᒃ ᓄᓇᕗᒥᑦ ᐃᓕᓐᓂᐊᖅᑐᓕᕆᔨᒃᑯᓐᓂ ᐊᑐᕈᓐᓇᕆᐊᒃᓴᖏᓐᓂ ᐃᓕᓐᓂᐊᕐᕕᖕᓂᑦ.

ᓯᖕ ᐅᖃᓚᐅᕐᑐᖅ ᐃᓱᒪᓂᕋᖅᖢᓂ ᐅᓇ ᑕᕐᕆᔭᒐᖅ ᖃᒡᒋᖅᒥᑦ ᐊᑐᐃᓐᓇᐅᔪᓐᓇᕐᓯᓂᐊᕐᓗᓂ 2027 ᐱᒋᐊᓵᖅᓯᒪᓕᖅᑎᓪᓗᒍ ᒪᑯᑎᒎᖓ ᐅᖄᓚᐅᑎᕋᓛᑎᒍᑦ ᐊᒻᒪᓗ ᑎᒍᒥᐊᒐᖅᑎᒍ ᑕᕐᕆᔭᕈᓐᓇᐅᑎᑎᒍᑦ.

“ᐊᒃᓱᐊᓗᒃ ᐅᕙᓐᓂ ᐅᐱᒋᕙᒃᑐᖓ ᐃᓅᓪᓗᖓ ᑕᐃᒪᐃᑦᑐᓕᐅᖅᑐᓂ ᐃᓚᐅᓂᓐᓂ, ᐅᓇ ᐱᒋᐊᓕᓵᕈᑎᒻᒪᕆᒃ ᐃᓅᓱᒃᑐᓄᑦ ᓄᓇᕗᒥᑦ,’ ᑲᓪᓗᒃ ᐅᖃᕐᑐᖅ.