ᐃᓄᐃᑦ ᐃᓅᓱᒃᑐᑦ ᐱᓕᕆᖃᑎᒌᒃᖢᑎᒃ ᖃᔭᓕᐅᑲᑕᓯᕗᑦ

ᐋᓯᕙᒃ ᐊᕐᓇᖁᖅ-ᐳᕆᐊᓪ ᐱᓕᕆᐊᖓᓂ ᐱᐊᓂᒃᓯᕙᓪᓕᐊᑎᓪᓗᒍ ᐃᓕᑕᖅᓯᓂᖅᑯᓐᓂ

ᐋᓯᕙᒃ ᐊᕐᓇᖁᖅ-ᐳᕆᐊᓪ, ᓴᐅᒥᐊᓃᑦᑐᖅ, ᐱᒋᐊᖅᑎᑦᑎᔨᐅᔪᖅ ᖃᔭᓕᐅᕐᓂᖅᒥᒃ ᐱᓕᕆᐊᖃᕐᓂᖅᒥᒃ, ᐊᒻᒪᓗ ᐅᕌᐳᑦ ᑰᒧ, ᐃᓕᓴᐃᔨᐅᔪᑦ ᐃᓚᖓ, ᕿᒥᕐᕈᐊᖅᑑᒃ ᐃᓄᖕᓄ ᐊᖑᓇᓱᒍᑎᐅᕙᒃᑐᕕᓂᕐᒥᒃ ᓴᓇᔭᐅᔪᒥᒃ. (ᐊᔾᔨᓕᐅᕆᔨ ᑕᐃᕕᑦ ᕕᐊᓐ)

By ᑕᐃᕕᑦ ᓛᕼᐄᑦ

For an English version of this story, see Inuit youth team up for qajait-building adventure

ᐅᓪᓗᖅ ᐅᓐᓄᙳᓕᖅᑎᓪᓗᒍ ᐃᖃᓗᖕᓂ, ᐋᓯᕙᒃ ᐊᕐᓇᖁᖅ-ᐳᕆᐊᓪ ᓴᓇᕝᕕᖓᓄᙵᐅᕙᓪᓕᐊᔪᖅ ᐊᖏᕐᕋᐅᙱᖢᓂᓕ ᐅᓪᓗᖅ ᐊᓂᒍᕐᓂᖓᓄᑦ.

ᐱᓕᕆᐊᒥᓂᒃ ᑲᔪᓯᑎᑦᑎᓇᓱᒃᖢᓂ ᖁᕕᐊᒋᓕᓵᕐᓂᑯᖓᓂᒃ: ᓇᖕᒥᓂᖅ ᖃᔭᓕᐅᕋᓱᖕᓂᕐᒥᒃ.

ᐅᓇ ᖃᔭᖅ, ᐅᕝᕙᓘᓐᓃᑦ ᖃᔭᐃᑦ ᐊᑕᐅᓯᑐᐊᙳᙱᒃᑯᓂ, ᐃᓄᖕᓄᑦ ᐊᑐᖅᑕᐅᕙᓚᐅᖅᓯᒪᔪᖅ ᐊᖑᓇᓱᒍᑎᒋᔭᐅᓪᓗᓂ. ᐅᓇ ᐊᕐᓇᖃᖅ-ᐳᕆᐊᓪ ᖃᔭᓕᐊᕆᔭᖓ ᓯᕗᓪᓕᖅᐹᖅ.

“ᖁᕕᐊᓇᖅᑐᐊᓘᒻᒪ,” ᐅᖃᖅᑐᖅ ᐱᓕᕆᓕᒪᓕᕐᓯᒪᓂᖓᓂᒃ.

ᐊᕐᓇᖁᖅ-ᐳᕆᐊᓪ, 20, ᖃᔭᓕᐅᖅᑐᖅ ᐅᑯᑎᒎᓇᖅ ᐃᓕᑕᖅᓯᓂᖅ, ᖃᓪᓗᓈᑐᑦ Nunavut Literary Council.

ᐱᓕᕆᓂᖅ ᑕᐃᔭᐅᔪᖅ ‘ᐃᑲᔪᕐᓂᖅ’ ᐃᓅᓱᒃᑐᓄᑦ ᐱᓕᕆᐊᖃᕈᑎᒃᓴᖅ. ᑮᓇᐅᔭᑎᒍᑦ ᐃᑲᔫᑎᑖᕐᓯᒪᓪᓗᓂ ᒐᕙᒪᑐᖃᒃᑯᓐᓂᒃ, ‘ᐃᑲᔪᕐᓂᖅ’ ᐃᓄᖕᓂ ᐊᕐᕌᒍᓕᖕᓂᒃ 13-ᓂ 25-ᒧ ᐱᓕᕆᐊᖃᖅᑎᑕᐅᕙᒃᖢᑎᒃ ᓄᓇᓕᖕᓄᑦ ᐃᑲᔪᕈᑎᐅᔪᓐᓇᕐᓂᐊᖅᑐᒥ ᐃᑲᕐᕋᓂᒃ 120-ᓂ ᐃᑲᔪᕈᑎᓂᒃ ᐱᐊᓂᒃᓯᓇᓱᒃᖢᑎᒡᓗ.

ᐊᕐᓇᖁᖅ-ᐳᕆᐊᓪᒧᓪᓕ, ᐃᖅᑲᓇᐃᔭᖅᑎ ‘ᐃᓕᑕᖅᓯᓂᖅ’ᑯᓐᓄᑦ, ᐊᒻᒪᓗ ᓄᓇᕗᑦ ᓯᓚᑦᑐᖅᓴᕐᕕᒃᒥ ᐊᕙᑎᓕᕆᓂᕐᒧᑦ ᐃᓕᓐᓂᐊᒐᒃᓴᒥᒃ ᐱᒋᐊᓕᒑᓪᓗᓂ ᐅᑭᐊᒃᓵᖅ, ᑕᒪᓐᓇᓕ ᑐᕌᒐᕆᓇᓱᓚᐅᕐᑕᖓ ᓇᖕᒥᓂᖅ ᐱᓕᕆᕝᕕᖃᕐᓗᓂ ᖃᔭᓕᐅᕐᕕᒋᓂᐊᖅᑕᖓᓂ ᓄᓇᓕᖕᓂ. ᐱᖃᑎᖃᖅᑐᖅ ᐃᓚᖓᓂ ᒨᓯᓯ ᐱᑦᓯᐅᓛᒃ, 19, ᐊᒻᒪ ᓘᒃ ᑯᐊᓐᕗᐄᑦ, 20, ᑖᒃᑯᐊᑦᑕᐅᖅ ᓇᖕᒥᓂᖅ ᖃᔭᓕᐅᕐᒥᔪᑦ.

ᐃᓕᓐᓂᐊᖅᑎᑕᐅᓚᐅᕐᑐᑦ ᐱᖓᓱᓄᑦ ᐃᓕᓴᐃᔨᓄ ᖃᔭᓕᐅᓕᒪᔪᓂᒃ.

ᐊᕐᓇᖁᖅ-ᐳᕆᐊᓪ ᑕᒪᑐᒥᖓ ᐱᓕᕆᐊᖃᕈᒪᔾᔪᑎᖓᓕ ᖃᔭᓕᐅᕐᓂᖅᒥ ᐱᒋᐊᕐᓂᑯ ᐃᖃᓗᐃᑦ ᐊᓯᐊᓂᒃ ᓄᓇᖃᓚᐅᑲᒃᖢᓂ ᐊᒻᒪᓗ ᐃᓕᖅᑯᓯᖓᓂᒃ ᐊᒃᑐᐊᙱᓗᐊᕆᒋᓪᓗᓂᓗ. ᐊᕐᕌᒍᖃᖅᖢᓂ 14-ᓗ 15-ᓗ ᐊᑯᓐᓂᖓᓂᒃ ᕗᕌᓐᔅᒥ, ᐊᒻᒪᓗ ᐊᕐᕌᒍᖃᓕᖅᖢᓂ 16-ᓗ 18-ᓗ ᐊᑯᓐᓂᖓᓂ ᐋᑐᕚᒦᖢᓂ ᐃᖃᓗᖕᓄᑦ ᐅᑎᓚᐅᙱᑎᓪᓗᒍ.

“ᖁᕕᐊᓇᕈᓘᔭᓚᐅᕐᑐᖅ ᐃᓚᒃᑲ ᖃᐅᔨᕚᓪᓕᖅᖢᒋᑦ ᐊᒻᒪᓗ ᐊᒃᑐᐃᕚᓪᓕᕈᓐᓇᖅᓯᓪᓗᖓ ᓯᕗᓕᕆᓚᐅᕐᓯᒪᔭᓐᓂᒃ ᓴᓇᓂᒃᑯᑦ ᓴᓇᓇᔭᓚᐅᖅᓯᒪᔭᖓᓂᒃ,” ᐊᕐᓇᖁᖅ-ᐳᕆᐊᓪ ᐅᖃᖅᑐᖅ.

ᖃᔭᐃ ᑐᐊᖢᑎᒃ ᐅᒥᐊᓕᐊᖑᓯᒪᔪᑦ ᐃᓚᒃᓴᖃᐅᕆᐊᖃᙱᖢᑎᒡᓗ. ᑕᑭᓂᖃᕐᓂᖅᓴᐅᕙᒃᖢᑎᒃ ᐃᓄᖕᒥ ᐃᑭᒪᓂᐊᖅᑐᒥ ᒪᕐᕈᐃᖅᖢᓂ ᐱᖓᓱᐃᖅᖢᓂᓘᓐᓃᑦ ᑕᑭᓂᖅᓴᐅᓪᓗᓂ. ᓴᓇᔭᐅᕙᓚᐅᖅᓯᒪᔪᖅ ᓴᐅᓂᖃᖅᖢᑎᒃ ᕿᔪᖕᓂ ᑎᓄᔾᔭᐅᓯᒪᔪᓂᒃ ᐊᒻᒪ ᐅᒡᔫᑉ ᕿᓯᖓᓂᒃ ᖃᖃᖅᖢᓂ.

ᐊᕐᓇᖁᖅ-ᐳᕆᐊᓪ ᐊᒻᒪ ᐱᓕᕆᖃᑎᒋᔭᖏᑦ ᖃᔭᓕᐅᖅᐸᓪᓕᐊᔪ ᕿᔪᖕᓂᒃ (cedar ᐊᒻᒪ white oak) ᓴᐅᓂᖃᖅᖢᓂ ᐊᒻᒪᓗ ᐊᐅᒃᑕᔫᕐᒥ ᖄᖃᖅᑎᑕᐅᓪᓗᓂ. ᕿᓪᓕᖅᑕᒥᒃ (polyurethane) ᐊᑐᖅᖢᑎᒃ ᐃᒻᒪᒃᑕᕈᓐᓃᖅᓯᒪᓪᓗᓂ.

ᑖᓐᓇ ᐅᒥᐊᖅ ᐃᒪᒃᑯᑦ ᐃᖏᕐᕋᑦᑎᐊᕈᓐᓇᖁᓪᓗᒍ ᐊᒥᖓ ᓱᑲᖓᔭᕆᐊᖃᒻᒪᕆᒃᑐᖅ ᒥᖅᓱᖅᓯᒪᑦᑎᐊᕐᓗᓂ.

“ᐃᓄᐃᑦ ᐅᖃᕐᓯᒪᔪᑦ ᑖᓐᓇ ᕿᓯᒃ ᖄᖓᒍᑦ ᐊᓇᐅᕌᕐᔪᒡᓗᒍ ᐊᓇᐅᓪᓚᕈᑎᐅᕙᓕᑦᑎᒐᔭᕐᓂᖓᓂᒃ,” ᐅᖃᖅᑐᖅ ᐊᕐᓇᖁᖅ-ᐳᕆᐊᓪ.

“ᑕᐃᒪᓐᓇᑎᒋ ᓱᑲᖓᑎᒋᔭᕆᐊᓕᒃ.”

ᑎᑎᕋᐅᓯᐅᓯᒪᓛᖑᔪᕐᓕ ᑲᓛᖡᑦ ᓄᓇᖓᓂ ᖃᔭᕆᔭᐅᔪᑦ, ᐆᒧᖓᓕ ᐊᕐᓇᖁᖅ-ᐳᕆᐊᓪᒧᑦ. ᐅᑯᓇ ᑐᐊᓐᓂᕐᓴᐅᔪᑦ, ᓇᐃᓐᓂᖅᓴᐅᓪᓗᑎᒃ ᐊᒻᒪᓗ ᐊᔾᔨᓕᐅᖅᑕᐅᓪᓗᑎᒃ ᐊᕐᓇᖁᖅ-ᐳᕆᐊᓪ ᓴᓇᕝᕕᖓᓂ.

“ᐃᓄᐃᑦ ᐅᓄᕈᓘᔭᕐᑐᑦ, ᐃᓚᒋᔭᐅᓪᓗᑎᒃ ᐃᓕᓴᐃᔨᐅᔪᑦ, ᐅᖃᕐᓯᒪᖕᒪᑕ ᐅᓇ ᖃᔭᖅ ᐃᓄᖕᓄᑦ ᐱᒋᐊᖅᑕᐅᓯᒪᓪᓚᕆᖕᓂᖓᓂᒃ,” ᐊᕐᓇᖁᖅ-ᐳᕆᐊᓪ ᐅᖃᖅᑐᖅ.

ᐊᕐᓇᖁᖅ-ᐳᕆᐊᓪ ᓴᓇᓛᕈᒪᔪᖅ ᕿᑭᖅᑖᓗᖕᒥᐅᓄᑦ ᖃᔭᕆᔭᐅᕙᒃᑐᓂᒃ. ᐅᖃᖅᖢᑕ ᑖᒃᑯᐊ ᐊᖏᓂᕐᓴᐅᓂᕋᖅᖢᓂᒋᑦ, ᑕᑭᓂᕐᓴᐅᓪᓗᑎᒡᓗ ᐊᒻᒪᓗ ᐋᕿᒃᓯᒪᓂᖓ ᐋᕿᒃᓯᒪᑦᑎᐊᓗᐊᕋᓂ.

ᖃᔭᐃᑦ ᐊᒃᑐᐃᓯᒪᒻᒪᕆᖕᒪᑕ ᓄᓇᕐᔪᐊᒥ ᐅᒥᐊᓕᕆᓂᕐᒧᑦ, ᓲᖃᐃᒻᒪ ᑕᒪᕐᒥᑦᑎᐊ ᖃᔭᖅ ᐊᑐᖅᑕᐅᔪᖅ ᐅᓪᓗᒥ ᐱᒋᐊᕐᕕᖃᖅᓯᒪᖕᒪᑦ ᖃᔭᕐᓂᒃ, ᐅᖃᖅᑐᖅ ᕌᐳᑦ ᑰᒧ, ᐃᓕᓴᐃᔨᒋᔭᐅᔪᖅ ᐃᓚᖓ.

“ᐃᓄᐃᑦ ᓄᓇᕐᔪᐊᓕᒫᒥ ᐅᖃᖃᑦᑕᐃᓐᓇᕐᓂᐊᖅᑐᑦ ᖃᔭᕐᒥ, ᑭᓯᐊᓂᓕ ᐃᓄᐃᑦ ᐱᒃᑯᓕᕙᒃᑐᑦ ᑖᔅᓱᒥᖓ ᐱᒋᐊᓕᖅᑎᑦᑎᓯᒪᓂᖏᓐᓂᒃ,” ᐅᖃᖅᑐᖅ.

ᖃᔭᓕᐅᕐᓂᕆᔭᖓ ᖃᔭᓕᐅᕐᓂᕐᒨᖓᓗᐊᙱᑦᑐᕐᓕ ᑭᓯᐊᓂᓕ ᐋᖅᑭᒃᓱᐃᕙᓪᓕᐊᓂᕐᒥᒃ ᓴᓇᕝᕕᒃᓴᒥᑦ, ᐊᓇᖁᖅ-ᐳᕆᐊᓪ ᐅᖃᖅᑐᖅ.

ᒪᑯᐊ ᐱᓕᕆᓂᐅᔭᕆᐊᓖᑦ ᓲᕐᓗ ᓇᓂᓯᔭᕆᐊᖃᕐᓂᖅ ᓯᕐᓗᐊᕐᒥ ᓴᓇᕝᕕᐅᓂᐊᕐᑐᒥᓐ, ᖃᓄᐃᑦᑐᓂᒃ ᕿᔪᖕᓂ ᑎᑭᓴᐃᔭᕆᐊᖃᕐᒪᖔᑦ ᐅᕝᕙᓘᓐᓃᑦ ᖃᓄᖅ ᐱᕐᕈᓗᐊᕿᑦᑕᐃᓕᓂᕐᒥᒃ ᐊᔪᕈᓐᓃᖅᓴᕐᓂᖅᒥᒃ ᖃᔭᖅᑐᕐᓗᓂ ᐱᔪᓐᓇᕐᒪᖔᑦ.

ᓯᕗᓪᓕᖅᐹᕐᓕ ᐱᓕᕆᓂᓪᓚᕆᐅᓚᐅᕐᓯᒪᔪᖅ ᐃᑲᔫᑎᒃᓴᖅᑖᕋᓱᖕᓂᖅ ᐱᓕᕆᐊᒧᑦ, ᑭᓯᐊᓂᓕ ᐅᑯᐊ ‘ᐃᓕᑕᖅᓯᓂᖅ’ ᐃᑲᔪᕐᓂᖅᒧᑦ ᖃᓄᐃᓕᐅᕈᑎᖏᓐᓄᑦ ᑕᒪᓐᓇ ᐋᖅᑭᑲᐅᖅᑐᓚᐅᖅᑐᖅ.

“ᐅᓇ ᐃᓅᓱᒃᑐᓂᒃ ᐅᔾᔨᕈᓱᓕᕈᑎᐅᓇᓱᒃᑐᖅ ᐃᓱᒪᒋᔭᖏᑦ ᓄᓇᓕᖕᓄᑦ ᐃᑲᔪᕈᑎᐅᔪᓐᓇᕐᓂᖏᓐᓂᒃᑕᐅᖅ,” ᔭᓯ ᐅᓈᐱᒃ ᒪᐃᒃ, ᐱᓕᕆᐊᒧᑦ ᑐᑭᒧᐊᖅᑎᑦᑎᔨ ᐃᓕᑕᖅᓯᓂᖅᒥᒃ ᐅᖃᓚᐅᕐᑐᖅ ᐆᒧᖓ ᐃᑲᔪᕐᓂᖅ ᐱᓕᕆᐊᒥᒃ.

ᐅᓇ ᖃᔭᓕᐅᕐᓂᕐᒧᑦ ᐱᓕᕆᐊᒃᓴᖅ ᖃᔭᓕᐅᑐᐃᓐᓇᓂᕐᒨᙱᑦᑐᖅ, ᐅᑯᐊ ᐊᕐᓇᖁᖅ-ᐳᕆᐊᓪ ᐊᒻᒪ ᑰᒨ ᐅᖃᓚᐅᕐᒪᑎ ᑕᒪᕐᒥ ᐃᓚᒋᔭᐅᔪᑦ ᐊᔪᕈᓐᓃᖅᓴᖅᑐᓂᒃ ᐱᖃᓐᓇᕇᒍᓐᓇᖅᓯᓚᐅᕐᒪᑕ, ᐃᓚᒌᓕᖅᖢᑎᒃ ᐊᒻᒪᓗ ᐊᑕᐅᓯᕐᒥ ᓯᕗᓕᖃᕈᑎᖃᖅᖢᑎᒃ.

ᑕᒪᑦᑕ ᐃᓅᓪᓗᑕ ᐊᖑᑎᐅᓪᓗᑕ ᐊᔪᕈᓐᓃᖅᓴᖃᑦᑕᐅᑎᔪᒍᑦ, ᑰᒧ ᐅᖃᖅᑐᖅ, ᐅᖃᒃᑲᓐᓂᖅᖢᓂ ᖁᕕᖓᒋᓂᕋᖅᖢᓂᐅᒃ ᐊᕐᓇᖁᖅ-ᐳᕆᐊᓪ ᑕᒪᑐᒥᖓ ᐱᓕᕆᐊᖃᕈᒪᓚᐅᕐᓯᒪᓂᖓᓂᒃ.

ᐊᕐᓇᖁᖅ-ᐳᕆᐊᓪ ᐅᖃᓚᐅᕐᑐᖅ ᑖᒃᑯᐊ ᐊᖑᑎ ᐱᔪᓐᓇᖅᓯᕙᓪᓕᐊᓂᖏᓐᓂᒃ ᑕᐅᑐᓚᐅᕐᓂᕋᖅᑐᖅ. ᒫᓐᓇᓕ ᐱᐊᓂᒃᓯᓕᕐᑐᑦ ᐊᒥᓕᖅᓱᖅᑕᐅᓂᖓ ᐅᒥᐊᑉ.

“ᐅᓇ ᐱᓕᕆᓐᓇᖅᑐᐊᓗᒃ,” ᐅᖃᖅᑐᖅ.

ᐃᑲᕐᕋᒐᓴᒻᒪᕆᖕᓂ ᐊᒻᒪ ᖃᓄᐃᓕᐅᕋᓱᕈᓘᔭᖅᖢᑎᒃ ᐱᐊᓂᒃᐸᓪᓕᐊᔪᓐᓇᒪᐅᕐᑐᑦ, ᑰᒧ ᐅᖃᖅᑐᖅ, ᖁᕕᐊᓱᖕᓂᕋᖅᖢᓂ ᐊᕐᓇᖁᖅ-ᐳᕆᐊᓪ ᐊᒻᒪ ᐱᖃᓐᓇᖏᑦ ᐃᒫᓃᓐᓂᐊᓕᕐᒪᑕ. ᐅᖃᖅᖢᓂ ᐅᓇ ᐊᓂᒍᐃᒍᑎᑦᑎᐊᕚᓗᒃ ᑖᔅᓱᒧᖓ ᐃᓚᖏᓐᓄᓪᓗ.

“ᐅᐊᕋᔭᖅ ᑕᑯᓛᖅᑕᒃᑯᑦ ᑖᒃᑯᐊ ᑕᑯᒃᐸᑕ.”

Share This Story

(0) Comments

Join the Conversation

Your email address will not be published. Required fields are marked *

*