ᐃᓄᒃᔪᐊᒃᒥ ᐃᓕᓐᓂᐊᕐᑏᑦ “ᖁᕕᐊᓱᑦᑎᐊᖅᑐᑦ” ᒥᐊᓕ ᓴᐃᒪᓐᒥ ᑕᑯᒐᒥᒃ

ᒍᕇᑦ 4-ᒥ ᐃᓕᓐᓂᐊᕐᑐᑦ ᐃᓕᓐᓂᐊᕈᑎᖃᓚᐅᕐᒪᑕ ᒐᕙᓇ ᔭᓄᕉᑉ ᐃᓅᓯᖓᓂ ᐱᓇᓱᐊᕈᓯᑲᓪᓚᖕᓂ ᓯᕗᓂᐊᒍᑦ ᑎᑭᕝᕕᒋᓂᐊᖅᑕᖓᓂ ᒪᐃ 12-ᒥ

ᒐᕙᓇ ᔭᓄᕈᓪ ᒥᐊᓕ ᓴᐃᒪᓐ (ᕿᑎᐊᓂ) ᑕᐅᑐᒃᑐᖅ ᕗᐃᓕᐊᒻ ᓂᖏᐅᒃᒥ (ᓴᐅᒥᐊᓂ) ᐊᒻᒪ ᐅᕇ ᐹᓕᓱ ᐊᒃᖢᓈᕐᒥ ᕿᓯᖕᒥ ᓴᓇᓯᒪᔪᒥ ᑭᐱᓯᑎᓪᓗᒋᑦ ᐳᓛᖅᑎᓪᓗᒍ ᐅᓈᖅ ᐊᖑᑎᑦ ᑲᑐᔾᔨᖃᑎᒌᓄᑦ ᐃᓄᒃᔪᐊᒃᒥ ᒪᐃ 12-ᒥ. (ᐊᔾᔨᓕᐅᕆᔨ ᔨᐊᕝ ᐱᐊᓯᐃ)

By ᔨᐊᕝ ᐱᐊᓯᐃ

For English version, see Inukjuak schoolkids ‘really excited’ to meet Mary Simon

ᐱᓇᓱᐊᕈᓯᑲᓪᓚᖕᓂ ᐃᓕᓴᐃᔨ ᒪᑑᕋ ᐅᑕᔭᑯᒪᕐ ᐊᒻᒪ ᒍᕇᑦ 4-ᒥ ᐃᓕᓐᓂᐊᖅᑎᑕᖏᑦ ᐅᕙᓂ ᐃᓐᓇᓕᒃ ᐃᓕᓐᓂᐊᕐᕕᒃᒥ ᐃᓄᒃᔪᐊᒃᒥ ᖁᕕᐊᓱᒃᐸᓪᓕᐊᑐᐃᓐᓇᓚᐅᖅᑐᑦ ᒐᕙᓇ ᔭᓄᕈᓪ ᒥᐊᓕ ᓴᐃᒪᓐ ᑎᑭᓛᕐᓂᖓᓂᒃ.

ᐊᓱᐃᓛᒡᓕ ᖃᐅᒃᐸᖓᓂ ᑎᑭᓐᓂᐊᖅᑎᓪᓗᒍ ᓇᓗᓇᓕᓚᐅᕐᒥᔪᖅ ᑎᑭᓐᓂᐊᕆᐊᒃᓴᖓᓂᒃ.

ᓴᐃᒪᓐ ᐃᓄᒃᔪᐊᒃᒧᑦ ᖃᖓᑕᕝᕕᒃᓴᖃᓚᐅᕐᑐᖅ ᑲᖏᖅᓱᔾᔪᐊᖅᒥ ᒪᐃ 11-ᒥ, ᑭᓯᐊᓂᓕ ᓯᓚ ᐱᐅᙱᓐᓂᖓᓄᑦ ᑰᔾᔪᐊᖅᒦᑐᐃᓐᓇᓚᐅᕐᑐᖅ, ᐃᖅᑲᓇᐃᔭᖅᑎᖏᓪᓗ ᐊᒻᒪ ᑐᓴᒐᒃᓴᓕᐅᖅᑎᑦ ᖃᓂᒃᓴᑲᑕᒃᖢᑎᕐ.

ᑭᓯᐊᓂᓕ ᖃᓄᐃᑦᑐᓐᓃᓚᐅᕐᑐᖅ ᑭᖑᕙᕋᓗᐊᖅᖢᑎᒃ. ᒪᐃ 12 ᐱᒋᐊᓕᓵᖅᑎᓪᓗᒍ ᓴᐃᒪᓐ ᐱᖃᑎᒋᔭᖏᓪᓗ ᖃᖓᑕᓲᒧ ᓵᑕᕐᓯᒪᔭᒧᑦ ᐃᑭᓕᓚᐅᕐᓯᒪᔪᑦ ᐃᓄᒃᔪᐊᓕᐊᖅᖢᑎᒃ ᐊᒻᒪ ᐳᓛᕈᓐᓇᓕᓚᐅᖅᖢᓂ ᖃᓄᐃᒃᑲᓐᓂᙱᖢᑎᒃ.

“ᖁᕕᐊᓱᑦᑎᐊᕐᒪᑕ ᐊᒻᒪᓗ ᐊᓕᐊᓇᐃᒋᒻᒥᔭᕋᑦᑕᐅᖅ.”

ᐅᓪᓗᕆᓚᐅᕐᑕᖓ 4 ᓴᐃᒪᓐ ᑕᓪᓕᒪᓂᒃ ᐳᓛᑲᑕᒃᑎᓪᓗᒍ ᐅᑭᐅᕐᑕᖅᑐᕐᒥ, ᐅᕗᖓᑦᑕᐅᖅ ᑲᖏᖅᓱᐊᓗᔾᔪᐊᖅᒧᑦ ᐃᓅᕝᕕᕕᓂᖓᓄᑦ ᐊᒻᒪᓗ ᐊᖏᕐᕋᖓᓄᑦ ᑰᔾᔪᐊᖅᒧᑦ.

ᐅᑕᔭᑯᒪᐅᑉ ᐃᓕᓐᓂᐊᖅᑎᑕᖏ ᐱᓇᓱᐊᕈᓯᕐᓂ ᐃᓕᓐᓂᐊᕐᓯᒪᖕᒪᑕ ᓴᐃᒪᓐ ᐃᓅᓯᖓᓂᒃ ᐊᒻᒪ ᐃᖅᑲᓇᐃᔮᕆᓯᒪᔭᖏᓐᓂᒃ.

ᐱᓕᕆᐊᖃᓚᐅᕐᒪᑕ ᓴᐃᒻᒪᑎᓕᐅᖅᖢᑎᒃ ᑐᙵᓱᒃᑎᑦᑎᔾᔪᑎᒃᓴᒥᒃ ᐃᓕᓐᓂᐊᕐᕕᖓᓄᑦ ᐊᒻᒪᓗ ᑐᓂᔭᐅᓪᓗᓂ ᐅᖃᓕᒫᒐᕐᒥ ᑎᑎᕋᖅᑕᖏᓐᓂᒃ ᑖᔅᓱᒧᖓ ᐃᓅᓯᖏᓐᓂᒃ ᐊᒻᒪ ᖃᓄᐃᓯᒪᔭᖏᓐᓂᒃ.

ᓴᐃᒪᓐ ᐳᓛᕐᑎᓪᓗᒍ ᐃᓄᒃᔪᐊᒃᒧᑦ ᐊᔾᔨᒋᓚᐅᕐᒥᔭᖓ ᐊᓯᐊᒍᑦ ᓄᓇᕕᒃᒥ ᐳᓛᖅᑎᓪᓗᒍ: ᑐᙵᓱᒃᑎᑕᐅᓚᐅᖅᖢᓂ ᓄᓇᓕᖕᓂ ᒥᑦᑕᕐᕕᒃᒥ, ᐱᙳᐊᕐᕕᒃᒥ ᑲᑎᖃᑎᖃᓚᐅᕐᑐᖅ ᐃᓕᓐᓂᐊᖅᑎᓂᒃ ᐊᒻᒪ ᐃᓐᓇᑐᖃᕐᓂᒃ ᐊᒻᒪᓗ ᐅᖃᐅᓯᖃᖅᖢᓂ ᓄᓇᓕᖕᓂ ᐃᓱᒫᓘᑎᓂᒃ ᒪᐃᔭᐃᒥ ᐊᒻᒪ ᑲᑎᒪᔨᓂ.

ᓴᐃᒪᓐ ᐃᓄᒃᔪᐊᒃᒧᑦ ᐳᓛᖅᖢᓂ ᐅᖃᖃᑎᖃᕐᓂᕐᓴᐅᓚᐅᕐᑐᖅ ᑲᑐᔾᔨᖃᑎᒌᓂ ᓄᓇᓕᖕᓃᑦᑐᓂᒃ ᐱᓕᕆᐊᖃᖅᑐᓂᒃ ᐃᓄᐃᑦ ᐅᖃᐅᓯᖏᓐᓂᒃ ᐊᒻᒪ ᐃᓕᖅᑯᓯᖏᓐᓂᒃ ᐊᓯᐅᑎᑦᑎᑦᑕᐃᓕᔪᓂᒃ.

ᓴᐃᒪᓐ ᐊᕙᑕᖅ ᐃᓕᖅᑯᓯᓕᕆᔨᒃᑯᓐᓄᐊᓚᐅᕐᒥᔪᖅ, ᑲᑐᔾᔨᖃᑎᒌᑦ ᐃᓄᒃᑎᑐᑦ ᐃᓕᓐᓂᐊᕈᑎᒃᓴᓂᒃ ᐋᖅᑭᒃᓱᐃᔨᐅᔪᑦ ᐊᒻᒪ ᓄᓇᙳᐊᓂᒃ. ᑐᙵᓱᒃᑎᑕᐅᓚᐅᕐᑐᖅ ᖁᓪᓕᕐᒥ ᐃᑯᒻᒪᐃᔪᖃᖅᖢᓂ — ᐃᓕᖅᑯᓯᖅ ᐅᕇᑑ ᕼᐋᒥ ᐊᑐᖅᑕᐅᑎᓚᐅᑕᖓ — ᑐᓐᓂᖅᑯᓯᐊᖅᑖᖅᑐᕈᓘᔭᖅᖢᓂᓗ ᑕᕝᕙᙵᑦ ᐃᓕᖅᑯᓯᓕᕈᕝᕕᒃᒥᑦ ᐃᓚᖃᖅᖢᓂ ᐊᑕᕙᒃᑯᑦ ᐃᓚᒌᓂ ᓇᓗᓇᐃᔭᕐᓯᒪᔪᓂᒃ ᓴᓇᔭᐅᓯᒪᔪᒥ.

“ᐅᓇ ᐃᒃᐱᒋᑦᑎᐊᓚᐅᕐᑕᕋ ᓲᖃᐃᒻᒪ ᖃᐅᔨᕚᓪᓕᓚᐅᕋᒪ ᐃᓚᓐᓂ,” ᓴᐃᒪᓐ ᐅᖃᕐᑐᖅ. “ᖃᓄᐃᓕᓂᐊᕆᐊᒃᓴᖅ ᓇᓗᔪᖓ ᓲᖃᐃᒻᒪ ᖁᔭᓕᑦᑎᐊᒻᒪᕆᒃᑲᒪ.”

ᑖᒃᑯᐊᒡᓗ ᓴᐃᒪᓐ ᐅᐃᖓᓗ ᕗᐃᑦ ᕗᕇᓱ ᑖᒃᑯᓂᖓ ᕗᕇᓲᑉ ᐅᖃᓕᒫᒐᓕᐊᖓᓂᒃ True North Rising ᐊᑎᓕᐅᖅᖢᒍ ᑐᓂᓯᓚᐅᕐᒥᔪᑦ.

ᐊᕙᑕᒃᑯᑦ ᐊᖓᔪᖅᑳᕆᑲᐃᓐᓇᖅᑕᖓ ᔩᓂ ᓄᙵᒃ ᐅᖃᐅᓯᖃᓚᐅᕐᑐᖅ ᑲᑐᔾᔨᖃᑎᒌᑦ ᐱᓇᓱᐊᒐᖃᕐᓂᖏᓐᓂᒃ ᐃᓄᐃᑦ ᐃᓅᓱᒃᑐᑦ ᓄᓇᕕᒃᒥ ᐅᖃᐅᓯᖏᓐᓂᒃ ᐃᓕᓐᓂᐊᖅᑎᑕᐅᕙᒡᓗᑎᒃ ᑕᐃᒪᓐᓇᓗ ᐱᓕᕆᐊᖃᖅᑎᑦᑎᓗᐊᖅᐸᙱᖢᑎᒃ ᐃᓕᓐᓂᐊᕐᕕᒃᒥ.

“ᐅᓇ ᐱᒻᒪᕆᐊᓘᖕᒪ ᑖᒃᑯᓄᖓ, ᓲᖃᐃᒻᒪ ᐊᔪᕈᓐᓃᕐᓴᖃᑦᑕᕐᒪᑕ ᖃᓪᓗᓈᑐᑦ ᐊᒻᒪ ᐅᐃᕖᑐᑦ ᓄᓇᕕᒃᒥ ᓲᖃᐃᒻᒪ ᐃᓕᓐᓂᐊᕈᑎᒃᓴᖃᐅᕐᓂᕐᓴᖅ ᖃᓪᓗᓈᓂᙶᖅᑐᓂᒃ,” ᓄᙵᒃ ᐅᖃᕐᑐᖅ.

ᐊᕙᑕᖅᒦᓚᐅᖅᖢᑎᒃ ᓴᐃᒪᓐ ᐱᖃᑎᒋᔭᖏᓪᓗ ᐳᓛᓚᐅᕐᑐᑦ ᖁᓪᓗᖅ ᐃᓅᓱᒃᑐᓄᑦ ᒪᒥᓴᕐᕕᒃᒥ ᓂᕕᐊᕐᓵᓄᑦ, ᑭᓯᐊᓂᓕ ᑐᓴᒐᒃᓴᓕᐅᕐᑎᓄᑦ ᐅᐸᒃᑕᐅᔪᓐᓇᓚᐅᙱᑦᑐᖅ.

ᑭᖑᓂᑦᑎᐊᖓᒍ ᐅᕗᖓᐅᓚᐅᕐᑐᖅ ᐅᓈᖅ ᐊᖑᑎᑦ ᑲᑐᔾᔨᖃᑎᒌᖏᓐᓄᑦ, 2018-ᒥ ᐋᑎᒃ ᐃᓐᔅᐳᕇᓴᓐᒥ ᓵᓚᒃᓴᐅᓯᐊᕐᓯᒪᔪᖅ ᑲᑐᔾᔨᖃᑎᒌᑦ ᐊᔪᕈᓐᓃᕐᓴᖅᑎᑦᑎᕙᒃᑐᑦ ᐃᓅᓱᒃᑐᓂᒃ ᐊᒻᒪ ᓄᑲᑉᐱᐊᓂᒃ ᐃᓄᖕᓂ ᐊᖑᓇᓱᖃᑦᑕᕐᓂᕐᒥᒃ ᐊᒻᒪ ᐆᒪᓇᓱᒍᓐᓇᕐᓂᕐᒥᒃ.

ᓴᐃᒪᓐ ᑲᑎᖃᑎᖃᓚᐅᕐᑐᖅ ᐃᓚᖏᓐᓂᒃ ᐊᖑᑎᓂ, ᓄᑲᑉᐱᐊᓂᒡᓗ ᐅᑭᐅᖃᖅᑐᑦ 9-ᓂ ᓄᑲᖅᖠᖅᐹᖃᖅᖢᑎᒃ. ᐃᓐᓇᑐᖃᐃᑦ ᑲᑐᔾᔨᖃᑎᒌᖕᓂ ᑕᑯᑎᑦᑎᓚᐅᕐᑐᑦ ᓴᐃᒪᓐᒥ ᖃᓄᖅ ᐃᓕᓐᓂᐊᖅᑎᑦᑎᖃᑦᑕᕐᒪᖔᑕ ᐊᖑᑎᓂᒃ ᐃᓅᓱᒃᑐᓂᒃ ᒪᑯᓂᖓ ᐊᒃᖢᓈᓕᐅᕈᓐᓇᕐᓯᓂᕐᒥᒃ ᑭᓯᖕᓂ.

ᐊᐅᓚᑦᑎᔨᐅᑉ ᐃᑲᔪᕐᑎᖓ ᑖᒥ ᐹᓕᓱ ᐅᖃᓚᐅᕐᑐᖅ ᑲᑐᔾᔨᖃᑎᒌᑦ ᐱᒋᐊᖅᑕᐅᓚᐅᕐᓯᒪᓂᕋᖅᖢᓂᐅᒃ ᓈᒻᒪᙱᓕᐅᕈᑎᓂᒃ ᐃᓄᒃᔪᐊᒃᒥ ᐊᖑᑎᓄᑦ ᐋᖅᑭᒋᐊᕈᑎᐅᓇᓱᒃᖢᓂ. ᑭᓯᐊᓂᓕ ᐱᕈᕐᓯᒪᓕᕐᑐᖅ ᒪᑯᓂᖓ ᐃᓅᓱᒃᑐᓂᒃ ᐊᖑᑎᓂᒃ ᐊᖑᓇᓱᒍᓐᓇᖅᓯᑎᑦᑎᕙᒃᖢᑎᒃ ᐊᒻᒪ ᓯᕗᕚᖏᓐᓂᒃ ᐱᒃᑯᒋᔭᖃᕈᓐᓇᓕᖅᖢᑎᒃ.

“ᐱᕕᖃᖅᑎᑦᑎᒐᑦᑕ ᓄᑲᕐᖠᕐᓂᒃ ᐊᔪᕈᓐᓃᖅᓴᕈᓐᓇᓕᕐᓗᑎᒃ ᐊᒻᒪᓗ ᐃᓐᓇᑐᖃᐃᑦ ᖃᐅᔨᒪᔭᖏᓐᓂᒃ ᖃᐅᔨᑎᑦᑎᕙᒃᖢᑎᒃ ᑖᒃᑯᓂᖓ ᐊᖑᑎᓂᒃ ᐃᓅᓱᒃᑐᓂᒃ,” ᐹᓕᓱ ᐅᖃᕐᑐᖅ.

“ᖃᐅᔨᒪᓗᓂ ᑭᖑᓪᓖᑦ ᐊᖑᓇᓱᒍᓐᓇᓛᕐᓂᖏᓐᓂ ᓄᓇᓕᖕᓄᑦ ᐊᒃᓱᐊᓗ ᑕᒪᓐᓇ ᖁᕕᐊᒋᑦᑎᐊᕋᑦᑎᒍᑦ.”

ᐃᓕᖅᑯᓯᓕᕆᕝᕕᒃᒥ ᐳᓛᕐᓯᒫᓪᓚᓚᐅᖅᖢᑎᒃ ᐃᓄᒃᔪᐊᒃᒥ ᑖᓐᓇ ᐳᓛᕐᓂᐅᔪᖅ ᓄᓇᖃᖅᑐᓂᒃ ᒥᕝᕕᓕᐊᕈᑎᐅᓚᐅᕐᑐᖅ ᐅᓄᕈᓘᔭᕐᑐᓂᒃ, ᐃᓕᓐᓂᐊᕐᕕᒃᒧᓪᓗ ᐊᒻᒪᓗ ᐅᓪᓗᕈᒻᒥᑕᕐᕕᖕᒥ ᐅᑯᓇᙵᑦ ᓯᕆᕕᒃ ᓂᕿᓕᐅᕐᕕᒃᒥ ᑐᓂᔭᐅᔪᓂᒃ.

ᐸᐅᓗᓯ ᑲᓱᓗᐊᒃ, ᐃᓄᒃᔪᐊᒃᒥ ᒪᐃᔭ, ᐅᖃᓚᐅᕐᑐᖅ ᐳᓛᖅᑕᐅᓂᖓ ᓄᓇᓕᖕᓂ ᑲᑎᑎᑦᑎᕚᓪᓕᕈᑎᐅᓚᐅᕐᑐᖅ ᖃᖓᑲᓪᓚᕈᓗᖕᓂ ᐅᓇ ᓄᕙᒡᔪᐊᕐᓇᖅ-19 ᑲᑎᖃᑎᒌᓐᓇᙱᓐᓂᖓᓄᑦ.

“ᐅᓇ ᓯᕗᓪᓕᖅᐹᖅ ᐅᓄᕈᓘᔭᕐᑐᓂᒃ ᐃᓄᖕᓂ ᑕᑯᕗᒍᑦ ᐊᑕᐅᓯᕐᒦᑦᑐᓂᒃ,” ᐅᖃᕐᑐᖅ. “ᐅᓇ ᐱᒻᒪᕆᐊᓘᖕᒪ ᑭᒃᑯᓕᒫᓄᑦ.”

Share This Story

(0) Comments

Join the Conversation

Your email address will not be published. Required fields are marked *

*