ᐃᓅᓱᒃᑐᑦ ᖁᒋᐊᖅᑕᐅᒐᒃᓴᓂᒃ ᑰᔾᔪᐊᖅᒧᐊᖅᓯᕗᑦ

For English version of this story, see Teens bring circus to Kuujjuaq

ᑖᒃᑯᐊ ᖁᙱᐊᖅᑕᐅᓂᐊᕐᑐᑦ ᑭᖑᓪᓕᖅᐹᖓᓄᑦ ᐱᙳᐊᕈᑎᒋᓂᐊᖅᑕᖓᓂᒃ ᐋᖅᑭᒃᓱᐃᔪᑦ ᒫᓂ   100-ᖏᓐᓂᒃ ᐃᓄᖕᓂᒃ ᐅᐸᒃᑐᖃᖅᑎᓪᓗᒍ ᑰᔾᔪᐊᖅᒥ ᔮᓂᒻᒪᕆᒃ ᐃᓕᓐᓂᐊᕐᕕᐅᑉ ᐃᖃᐃᓕᓴᕐᕕᖓᓂᒃ.

ᐱᐊᓂᒃᐸᑦ 25-ᖑᓗᑎᒃ ᖁᐊᒡᔪᐊᖅᑐᓕᐅᕐᓂᐊᖅᖢᑎᒃ ᑖᓐᓇᓗ ᐱᒃᑯᒋᔭᐅᓚᐅᖅᖢᓂ ᖁᙱᐊᖅᑐᓂᒃ.

ᐅᑯᐊ ᖁᙱᐊᖅᑕᐅᑲᑕᒃᑐᑦ ᓲᑲᔅ ᓄᓇᓕᖕᓃᓚᐅᕐᑐᑦ ᐱᓇᓱᐊᕈᓯᐅᑉ ᓄᙳᐊᓂᒃ ᑭᓯᐊᓂᓕ ᑖᒃᑯᐊ ᖁᙱᐊᖅᑕᐅᕙᒃᑐᑦ ᐊᐅᓪᓚᑲᑕᙱᑦᑐᑦ. ᐱᔾᔪᑎᖃᓗᐊᖅᖢᑎᒃ ᐃᓅᓱᒃᑑᒻᒪᑕ ᑰᔾᔪᐊᖅᒥᓪᓗ ᓄᓇᖃᖅᖢᑎᒃ.

“ᑕᑯᕋᓐᓂᑦᑎᐊᓚᐅᕐᑐᖅ, ᖃᓄᕈᓘᔭᐅᒐᓗᐊᖅ ᖃᓄᐃᙱᑦᑐᖅ,” ᐅᖃᕐᑐᖅ ᑮᓚ ᑕᕿᐊᐱᒃ, ᑖᓐᓇᓕ ᑲᓚᐅᓐᖑᓪᓗᓂ ᐊᕐᓴᓂᒃ ᐱᙳᐊᕈᑎᖃᖅᑎᐅᓚᐅᕐᑐᖅ.

ᑕᕿᐊᐱᒃ ᐊᒻᒪ ᐱᙳᐊᖃᑎᒋᔭᖏ ᐃᓚᐅᓚᐅᕐᒪᑕ ᓱᕿᓂᖅᒥᑦ, ᐃᓄᒋᐊᓄᑦ ᓲᑲᔅ ᖃᓄᐃᓕᐅᕈᑎ. ᓄᓇᕕᒻᒥ ᓄᓇᓕᖕᓄᑦ ᐅᐸᒍᑎᕙᒃᑐᑦ ᐊᒻᒪ ᐊᔪᕈᓐᓃᕐᓴᖅᑎᑦᑎᕙᒃᖢᑎᒃ ᐃᓅᓱᒃᑐᓂᒃ ᐊᕐᕌᒍᖃᕐᑐᓂᒃ 13 ᐅᖓᑖᓄᑦ ᖁᙱᐊᖅᑕᐅᖃᑦᑕᕐᓂᐊᕐᓗᑎᒃ.

ᐱᔾᔪᑎᒋᔭᐅᓗᐊᕐᑐᕐᓕ ᓄᓇᕕᒻᒥ ᐃᓅᓱᒃᑐᑦ ᐱᓕᕆᖃᑎᒌᒍᓐᓇᕐᓯᓗᑎᒃ, ᐃᓄᖕᓂ ᑕᑯᓕᒪᙱᑕᖏᓐᓂᒃ ᑕᑯᖃᑦᑕᕐᓗᑎᒃ ᐊᒻᒪᓗ ᐃᒻᒥᖕᓂᒃ ᐱᓕᕆᑎᒍᓐᓇᕐᓗᑎ ᐱᓕᕆᐊᖃᕐᓂᒃᑯᑦ ᓲᑲᔅᒥ ᖃᓄᐃᓕᐅᕈᑎᐅᕙᒃᑐᓂᒃ ᐅᖃᓚᐅᕐᑐᖅ ᕇᐱᑲ ᓚᓄᑦ, ᑐᑭᒧᐊᖅᑎᑦᑎᔨᐅᖃᑕᐅᔪᖅ ᐊᒻᒪᓗ ᐱᒋᐊᖅᑎᑦᑎᔨᐅᖃᑕᐅᓪᓗᓂ ᓲᕿᓂᖅᒥᒃ.

“ᐃᓄᖕᓄᑦ ᖁᕕᐊᒋᔭᐅᑦᑎᐊᖅᑐᖅ.” ᐅᖃᕐᑐᖅ.

ᖁᐊᒡᔪᐊᖅᑐᓕᐅᓚᐅᙱᑎᓪᓗᒋᑦ ᑖᒃᑯᐊ ᖁᙱᐊᖅᑕᐅᔪᑦ ᐊᔾᔨᒌᙱᑦᑑᑎᓂᒃ ᖃᓄᐃᓕᐅᕈᓘᔭᑲᑕᓚᐅᕐᑐᑦ ᐃᑲᕐᕋᓪᓗᐊᕐᒥ.

ᑲᓚᐅᓐᑕᖃᓚᐅᖅᖢᓂ ᐊᑕᐅᓯᕐᒥ ᒥᑭᑦᑐᕈᓗᖕᒥᓪᓗ ᐸᐃᓯᑯᕋᓛᖃᖅᖢᓂ ᐊᒻᒪ ᖁᙱᐊᖅᑕᐅᖕᒥᔪᓂᒃ ᖃᓄᖓᓴᑲᑕᒃᖢᓂ ᐊᒻᒪᓗ ᐊᓯᖓᓂ ᖁᙱᐊᕆᐊᖅᑐᓂᒃ ᓄᒃᑑᔾᔪᐊᖃᑎᖃᖅᑐᖃᖅᖢᓂ.

ᐊᓯᖏᑦᑕᐅᖅ ᐃᒡᓗᑭᓵᑲᑕᓚᐅᕐᒥᔪᑦ ᐊᒻᒪᓗ ᐱᓱᒍᑎᖃᖅᖢᑎᒃ ᕿᔪᖕᓂᒃ ᐊᒻᒪᓗ ᐊᓯᒃᑲᓐᓂᖓ ᐃᓅᓱᒃᑐᖅ ᐋᖅᑭᓱᐃᑲᐅᖅᑐᑲᑕᒃᖢᓂ ᕉᐱᒃᔅ ᑭᐅᑉᒥᒃ (Rubik’s cube).

ᖁᙱᐊᖅᑕᐅᕙᒃᑐᑦ Cirqiniq (ᓴᐅᒥᐊᓂᒃ ᑕᓕᕐᐱᐊᓄ) ᕆᕗᔅ ᓵᓐᑐᔅ, ᒪᑎᐅᑕ ᑲᐅᑭ ᐊᒻᒪ ᑮᓚ ᑕᕿᐊᐱᒃ ᐊᔾᔨᓕᐅᕐᑕᐅᔪᑦ ᖁᙱᐊᖅᑕᐅᓚᐅᖅᖢᑎᒃ ᑰᔾᔪᐊᖅᒥ. (ᐊᔾᔨᓕᐅᕆᔨ ᑕᐃᕕᑦ ᓛᕼᐄᑦ)

ᐊᒻᒪᓗ ᐊᔾᔨᒌᙱᑦᑑᑎᓂᒃ ᖃᓄᐃᓕᐅᑲᑕᓚᐅᕐᑐᑦ ᐊᒻᒪ ᓂᕕᖓᑲᑕᒃᖢᑎᒃ.

ᑕᕿᐊᐱᒃ, 19, ᐅᖃᓚᐅᕐᑐᖅ ᓱᕈᓯᐅᕐᓂᕐᒥᓂᒃ ᑕᐃᒪᐃᑦᑐᓂᒃ ᐱᓕᕆᐊᖃᕈᒪᓚᐅᕐᓯᒪᓂᕋᖅᑐᖅ. “ᖃᓄᐃᓕᐅᕈᓘᔭᕐᓇᕐᒪᓐ ᐊᒻᒪᓗ ᐱᙳᐊᕈᑎᖃᐅᖅᐸᒃᖢᑎᒃ ᐊᒻᒪᓗ ᐱᙳᐊᖃᑎᖃᐅᕐᓇᖅᖢᓂ,” ᐅᖃᕐᑐᖅ. “ᓲᕐᓗ ᓄᓇᖃᑎᒌᒃᑐᑦ.”

ᒪᑎᐅᑕ ᑲᐅᑭ, 17, ᑎᒥᒥᓂ ᖃᓄᐃᓕᐅᕈᓘᔭᖅᑎᐅᖃᑕᐅᔪᖅ ᐅᖃᓚᐅᕐᒥᔪᖅ ᓲᑲᔅ ᓲᕐᓗ ᐃᓚᒌᖕᓇᐅᓂᖓᓂᒃ.

ᑕᐃᒪᓐᓇᓕ ᐃᓱᒪᓕᖅᑎᑦᑎᓇᓱᖕᓂᕐᒥ ᐱᓇᓱᐊᒐᖃᖅᑐᑦ ᐅᑯᐊ ᓱᕿᓂᖅ, ᓚᓄᑦ ᐅᖃᓚᐅᕐᑐᖅ.

ᑖᒃᑯᐊ ᐱᒋᐊᓚᐅᕐᓯᒪᔪᑦ 2009-ᒥ ᐅᑯᐊ ᑲᑎᕕᒃ ᓄᓇᓕᓕᒫᓄᑦ ᒐᕙᒪᒃᑯᑦ ᐱᓕᕆᖃᑎᖃᖅᖢᑎᒃ ᐅᑯᓂᖓ ᓲᒃ ᑐ ᓱᓕ (Cirque du Soleil), ᐱᒋᐊᖅᑎᑦᑎᓚᐅᕐᓯᒪᖕᒪᑕ ᐃᑲᔪᖃᑎᒌᖕᓂᕐᒧᑦ ᐱᓕᕆᐊᒃᓴᒥᒃ ᐊᔪᕈᓐᓃᖅᓴᕈᑎᐅᓂᐊᕐᓗᓂ ᐃᓅᓱᒃᑐᓂᒃ ᐊᐅᓚᑦᑎᔪᓐᓇᕐᓯᑎᑦᑎᓗᑎᒃ ᓲᑲᔅᒧᑦ ᐃᓕᓐᓂᐊᕈᑎᒃᓴᐅᕙᒃᑐᓂᒃ.

ᓚᓄᑦ, ᓲᑲᔅᓯ ᐱᖑᐊᖅᑎᐅᓕᒪᓪᓚᕆᒃᑐᖅ, ᐱᓕᕆᐊᖃᖅᑎᑕᐅᓚᐅᕐᒪᑦ ᑖᓐᓇ ᐱᓕᕆᐊᒃᓴᖅ ᐱᕈᖅᐸᓪᓕᐊᑎᓐᓂᐊᕐᓗᒍ.

ᐅᓪᓗᒥ ᓄᓇᕕᒃᒥ ᓄᓇᓕᖕᓄᙵᐅᖃᑦᑕᕐᑐᑦ ᐱᓕᕆᓕᒪᓂᕐᓴᓂᒃ ᐊᔪᕈᓐᓃᕐᓴᖅᑎᖃᖅᖢᑎᒃ ᐊᒻᒪᓗ ᐱᒋᐊᓕᓵᖅᓯᒪᔪᓂᒃ ᑖᒃᑯᐊᓗ ᐱᓇᓱᐊᕈᓰᖕᓂ ᒪᕐᕉᖕᓂ ᐊᔪᕈᓐᓃᖅᓴᖅᑎᑦᑎᕙᒃᖢᑎᒃ ᐃᓅᓱᒃᑐᓄᑦ 13-ᓂ ᐊᕐᕌᒍᓕᖕᓂ ᐅᖓᑖᓄᑦ.

ᓚᓄᑦ ᐅᖃᓚᐅᕐᑐᖅ ᐊᔪᕈᓐᓃᖅᓴᖅᑎᑦᑎᓂᖅ ᐱᔾᔪᑎᖃᖅᑎᑕᐅᔪᖅ ᐱᐅᓯᕚᓪᓕᖅᑎᑦᑎᔾᔪᑎᐅᓪᓗᓂ ᐃᓱᒪᒧᑦ ᖃᓄᐃᑦᑕᐃᓕᒪᓂᕐᒥᒃ ᐊᒻᒪᓗ ᐃᓅᖃᑎᒌᒍᓐᓇᕐᓂᕐᒥᒃ.

ᐊᒻᒪᓗ ᓄᑖᓂᒃ ᐱᓕᕆᐊᖃᖅᑎᑦᑎᕙᒃᖢᑎᒃ ᐊᒻᒪ ᑕᒻᒪᕋᓗᐊᖅᐸᑕ ᐱᒋᐊᖅᑎᑦᑎᒃᑲᓐᓂᖅᑎᑦᑎᕙᒃᖢᑎᒃ, ᑕᐃᒪᓐᓇᓗ ᑕᒪᒃᑯᐊ ᐊᔪᕈᓐᓃᖅᓴᕈᑎᑦ ᐃᓅᓱᒃᑐᓂᒃ ᐃᓚᐅᖃᑕᐅᑎᑦᑎᑦᑎᐊᖃᑦᑕᖅᑐᖅ ᐊᒻᒪᓗ ᐅᖃᓪᓚᒍᓐᓇᖅᑎᑕᐅᕙᒃᖢᑎᒃ ᖃᓄᐃᓕᐅᖅᐸᓪᓕᐊᔾᔪᑎᖏᓐᓂᒃ.

“ᐅᒃᐱᕈᓱᒃᑲᑦᑕ ᐅᓇ ᓲᑲᔅ ᐃᑲᔪᖃᑦᑕᕐᓂᖓᓂᒃ ᐃᓄᖕᓂᒃ ᐃᓱᒪᒃᑯᑦ ᐊᒻᒪ ᐃᖕᒥᖕᓂᒃ ᐅᐱᕆᔪᓐᓇᖅᓯᓂᕐᒧᑦ,” ᐅᖃᕐᑐᖅ ᓚᓄᑦ.

ᑕᐃᒪᐃᒃᑲᓗᐊᖅᑎᓪᓗᒍ ᐃᓚᖏᑦ ᓄᓇᖃᖅᑐᑦ ᐃᓚᐅᖃᑦᑕᕐᑐᑦ ᖁᙱᐊᖅᑕᐅᖃᑕᐅᓕᖃᑦᑕᖅᑐᑦ. ᓚᓄᑦ ᐅᖃᓚᐅᕐᑐᖅ ᐊᑕᐅᓰᑦ ᐱᓕᕆᖃᑎᒌᒃᑐᑦ ᐊᔪᕈᓐᓃᖅᓴᖅᑎᑦᑎᔩᑦ ᐱᒋᐊᖅᑎᑦᑎᓚᐅᕐᒪᑕ ᐃᓄᐃᑦ ᐋᑎᒃ ᓲᑲᔅ ᐱᓕᕆᖃᑎᒌᖕᓂᒃ ᐊᒻᒪᓗ ᑖᒃᑯᐊ ᖁᙱᐊᖅᑕᐅᓯᒪᓕᖅᖢᑎᒃ ᐊᔅᑐᕇᓕᐊᒥ ᐊᒻᒪ ᒪᓐᑐᕆᐊᒥ.

ᓚᓄᑦ ᐅᖃᓚᐅᕐᑐᖅ ᐃᓄᖕᓄᑦ ᐅᖃᐅᔾᔭᐅᖃᑦᑕᕐᓂᖓᓂᒃ ᑖᓐᓇ ᐱᓕᕆᐊᖑᔪᖅ ᐱᒻᒪᕆᐊᓘᓂᖓᓂ ᐊᒻᒪᓗ ᑲᔪᓯᑎᑕᐅᔭᕆᐊᖃᕐᓂᖓᓂᒃ.

“ᑖᒃᑯᐊᓗ ᓲᕈᓰ ᐊᐱᕆᖃᑦᑕᕐᒥᖕᒪᑕ, “ᖃᑯᒍᓕ ᐅᑎᓛᕋᔅᓯ?” ᐅᖃᕐᑐᖅ.