ᐋᓐᓂᖅᑎᖅᑕᐅᕙᓐᓂᖏᑦ ᓄᓇᖃᖅᑳᕐᓯᒪᔪᑦ ᐊᕐᓇᖏᑕ ᑐᑭᖃᕐᒪᑦ ᓄᖑᑎᕆᓇᓱᒃᓯᒪᓂᕐᒥᒃ: MMIWG-ᑯᑦ ᑐᓵᓂᖃᖅᑎᓪᓗᒋᑦ

“ᓄᓇᕐᔪᐊᕐᒥ ᓄᓇᖃᕋᑦᑕ ᒪᓕᒐᖁᑎᖃᖅᑐᓂ ᐊᒻᒪᓗ ᐃᖅᑲᓇᐃᔭᕐᕕᖃᖅᑐᓂ ᐱᔪᓐᓇᐅᑎᒋᔭᐅᔪᓂᒃ ᓯᖁᒥᑦᓯᔾᔪᑎᐅᕙᒃᑐᒥ”

ᑲᒥᓯᓄᕐᒋᔭᐅᔪᑦ ᑲᓇᑕᒥ ᑭᒡᓕᓯᓂᐊᖅᑐᒃᑯᑦ ᑐᓵᓂᖃᖅᑎᓪᓗᒋᑦ ᐊᓯᐅᔨᔭᐅᓯᒪᔪᑦ ᐊᒻᒪᓗ ᐃᓄᐊᖅᑕᐅᓯᒪᔪᑦ ᓄᓇᖃᖅᑳᕐᓯᒪᔪᑦ ᐊᕐᓇᖏᑦ ᐊᒻᒪᓗ ᓂᕕᐊᖅᓯᐊᖏᑦ – ᒥᐊᕆᐊᓐ ᐳᓪᓗᕐ (ᓴᐅᒥᐊᓂ ᓵᖓᓂ), ᐳᕋᐃᐊᓐ ᐃᔫᓪᕝᓴᓐ (ᐅᖓᑖᓂ ᓴᐅᒥᐊᓂ), ᒥᓯᐊᓪ ᐋᑎᑦ (ᓴᐅᒥᐊᓂ ᓵᖓᓂ) ᐊᒻᒪᓗ ᖃᔮᖅ ᕌᐱᓐᓴᓐ (ᐅᖓᑖᓂ ᑕᓕᖅᐱᐊᓂ) – ᑭᖑᓪᓗᓕᖅᐹᒥᒃ ᐱᓕᕆᓂᖃᕈᑎᓂᒃ ᐱᔭᕇᖅᓯᒋᐊᖅᑎᐅᑎᓪᓗᒋᑦ ᑎᑭᓈᒐᓐ ᖁᕕᐊᓱᒍᑎᖃᖅᑎᑦᓯᑎᓪᓗᒋᑦ ᑲᒥᓱᓄᕐᒋᔭᐅᔪᑦ ᐅᒃᑯᐊᖅᓯᔾᔪᑎᖃᕆᐊᕐᓂᕐᒥᓐᓄᑦ ᖁᕕᐊᓱᖃᑎᒌᓐᓂᖓᓐᓂ ᓇᒡᒐᔾᔭᐅᑎᒥ, ᔫᓂ 3-ᖑᑎᓪᓗᒍ. ᑎᑭᓈᒐᓐ ᖁᕕᐊᓱᖃᑎᒌᓐᓂᕐᒥ, ᑲᒥᓯᓄᕐᒋᔭᐅᔪᑦ ᐃᖅᕚᓚᐅᖅᐳᑦ ᐅᓪᓗᕆᐊᖖᒍᐊᓕᒃ ᕿᐱᐅᑉ ᖄᖓᓂ ᐊᒻᒪᓗ, ᐅᓂᒃᑳᓕᐊᖑᓯᒪᔪᑦ ᐴᖅᑕᐅᓯᒪᓕᖅᑎᓪᓗᒋᑦ ᐊᒻᒪᓗ ᐃᓕᔭᐅᓯᒪᓕᖅᓱᑎᒃ ᐃᓂᒃᓴᕆᔭᖓᓄᑦ, ᑕᐃᒪᓕ ᐊᒃᑐᐃᓯᒪᓕᓚᐅᖅᐳᑦ ᒪᒃᐱᕋᖏᓂᒃ ᐅᐱᓐᓇᖅᑐᒻᒪᕆᐅᓪᓗᑎᒃ ᑎᑎᕋᖅᑕᐅᓯᒪᔪᖁᑎᓂᒃ ᐊᔾᔨᒌᖖᒋᐅᖅᑐᓂ ᓄᓇᖃᖅᑳᕐᓯᒪᔪᓂᑦ. ᐅᓂᒃᑳᓕᐊᖑᓯᒪᔪᑦ ᑕᐃᒪᓕ ᐃᒧᔭᐅᓯᒪᓕᓚᐅᖅᐳᑦ ᕿᐱᓕᐊᖑᓯᒪᔪᒥ ᐊᒻᒪᓗ ᕿᓚᒃᓱᒐᐅᓪᓗᓂ ᐊᑐᖅᓱᑎᒃ ᐊᓪᓚᖓᔪᑦ ᖃᑦᓱᖓᐅᑎᓕᐊᖓᓄᑦ. ᐊᓈᓇᑦᓯᐊᖑᔪᑦ ᐊᒻᒪᓗ ᐃᓚᒋᔭᐅᔪᑦ, ᑕᑯᒃᓴᐅᓪᓗᑎᒃ ᐅᖓᑖᓂ ᐃᒃᓯᕚᖅᑐᑦ ᑲᒥᓯᓇᓂᑦ, ᑕᐃᒪᓕ ᐃᓕᑕᖅᓯᓯᒪᓕᓚᐅᖅᓱᑎᒃ ᐃᒧᔭᐅᓯᒪᔪᓂᒃ ᑐᓂᔭᐅᖅᑳᕐᑎᓐᓇᒍ ᑲᓇᑕᒥ ᐊᖏᔪᖅᑳᕐᔪᐊᖅ ᔭᔅᑎᓐ ᑐᕉᑑᒧᑦ. (ᐊᔾᔨᓕᐅᖅᑕᖓ ᑳᓛᓐ ᒥᐅᕌᓐ)

By ᑎᑎᕋᖅᑕᖏᑦ: ᓯᐊᕋ ᕌᔾᔪᕐᔅ

For an English version of this story, see Violence against Indigenous women amounts to genocide: MMIWG inquiry

ᖁᐊᖅᓵᕐᓇᒻᒪᕆᒃᑑᓪᓗᑎᒃ ᖁᑦᓯᖕᓂᐅᔪᑦ ᐋᓐᓂᖅᑎᕆᔭᐅᕙᒃᑐᓄᑦ ᓄᓇᖃᖅᑳᕐᓯᒪᔪᑦ ᐊᕐᓇᖏᑕ ᐊᒻᒪᓗ ᓂᕕᐊᖅᓯᐊᖏᑕ ᑲᓇᑕᒥ ᐃᒪᓐᓇᐃᓐᓂᖃᕐᐳᑦ ᑭᓇᐅᓂᖏᓐᓄᑦ ᑐᖖᒐᕝᕕᖃᖅᑎᑕᐅᓪᓗᑎᒃ ᓄᖑᑎᕆᓇᓱᒃᓯᒪᓂᕐᓄᑦ, ᑲᓇᑕᒥ ᑲᒥᓯᓄᕐᒋᔭᐅᔪᑦ ᑭᐅᓪᓕᕐᒥᒃ ᐅᖃᐅᓯᒃᓴᒥᓐᓂᒃ ᓴᖅᑮᓯᒪᓕᕈᑎᖃᓚᐅᕐᒪᑕ, ᐅᑭᐅᓐᓄᑦ ᒪᕐᕉᓐᓄ ᑐᓵᓂᖃᖅᐸᓪᓕᐊᓯᒪᓂᒥᓐᓂᑦ.

ᑭᖑᓪᓕᖅᐹᕐᓯᐅᑎᓂᒃ ᐅᓂᒃᑳᓕᐊᕆᓯᒪᔭᒥᓐᓂ, ᑲᓇᑕᒥ ᑭᒡᓕᓯᓂᐊᖅᑎᒃᑯᑦ ᑐᓵᓂᖃᕐᓂᖓᑦ ᐊᓯᐅᔨᔭᐅᓯᒪᔪᑦ ᐊᒻᒪᓗ ᐃᓄᐊᖅᑕᐅᓯᒪᔪᑦ ᓄᓇᖃᖅᑳᕐᓯᒪᔪᑦ ᐊᕐᓇᖏᓂ ᐊᒻᒪᓗ ᓂᕕᐊᖅᓯᐊᖏᓂ ᐅᖃᓚᐅᖅᐳ ᑕᐃᒪᓐᓇᐃᓐᓇᓱᒍᑕᐅᓯᒪᓪᓗᑎᒃ, ᑲᔪᓯᑎᑕᐅᓯᒪᓪᓗᑎᒃ ᑭᒃᑯᑐᐃᓐᓇᐃᑦ ᐊᒻᒪᓗ ᓄᓇᖃᖅᑳᕐᓯᒪᔪᑦ ᐱᔪᓐᓇᐅᑎᖏᓂᒃ ᓯᖁᒥᑦᓯᓯᒪᖃᑦᑕᕐᓂᐅᓂᖏᑦ ᐱᒋᐊᕐᕕᐅᓂᖏᑕ ᐊᓐᓂᖅᑎᕆᕙᓐᓂᐅᔪᓄᑦ.

“ᐊᔾᔨᒌᖖᒋᐅᕐᓂᖃᕋᓗᐊᖅᑎᓪᓗᒋᑦ ᐃᓕᖓᓐᓂᕆᔭᖏᑎᒍᑦ ᐊᒻᒪᓗ ᐊᑐᖅᓯᒪᔭᖏᑎᒍᑦ, ᑕᒪᕐᒥᒃ ᐊᓯᐅᔨᔭᐅᓯᒪᔪᑦ ᐊᒻᒪᓗ ᐃᓄᐊᖅᑕᐅᓯᒪᔪᑦ ᐊᑕᕝᕕᒋᑐᕋᐅᓐᓂᖃᕐᒪᑕ ᑮᓇᐅᔭᓕᐅᕋᓱᐊᖅᐸᓐᓂᖅᑎᒍᑦ, ᐃᓅᓯᕐᒥᒃᑎᒍᑦ ᐊᒻᒪᓗ ᒐᕙᒪᓕᕆᓂᕐᒥᓐᓂ ᐃᓚᐃᓐᓈᖅᑎᑕᐅᓯᒪᓂᕐᒥᓐᓄᑦ, ᐊᑭᕋᖅᑐᒐᐅ-ᓯᒪᓂᕐᒥᓐᓄᑦ, ᐊᒻᒪᓗ ᐊᕐᓇᐅᓂᖏᓐᓄᑦ ᕿᐸᖏᔭᐅᓂᕐᒥᓐᓄᑦ ᐊᑐᓕᖅᑎᑕᐅᓯᒪᔪᓄᑦ ᑲᓇᑕᒥᐅᓂ ᐃᓅᖃᑎᒌᖑᔪᓂᑦ,” ᐅᖃᖅᓱᓂ ᑭᒡᓕᓯᓂᐊᖅᑎᒃᑯᓐᓄᑦ ᐃᓱᒪᑕᒻᒪᕆᐅᓪᓗᓂ ᑲᒥᓯᓄᕐᒋᔭᐅᔪᖅ ᒥᐊᕆᐊᓐ ᐳᓪᓗᕐ ᑲᒥᓱᓂᕐᒋᔭᐅᔪᑦ ᐅᒃᑯᐊᖅᓯᒋᐊᕈᑎᒋᓪᓗᒍ ᖁᕕᐊ-ᓱᓐᓂᖃᖅᑎᑦᓂᖓᓐᓄᑦ ᒑᑎᓅ, ᑲᐃᐸᒃᒥ, ᓇᒡᒐᔾᔭᐅᒥ, ᔫᓂ 3-ᖑᑎᓪᓗᒍ.

“ᑐᓴᕆᐊᒥᒃ ᑐᓴᕐᓂᖖᒋᒃᑲᓗᐊᖅᑎᓪᓗᒍ ᓱᓕᕗᖅ ᓄᓇᕐᔪᐊᖃᕋᑦᑕ ᒪᓕᒐᖁᑎᖃᖅᑐᓂᒃ ᐊᒻᒪᓗ ᐃᖅᑲᓇᐃᔭᕐᕕᖃᖅᑐᓂᒃ ᓯᖁᒥᑦᓯᓯᒪᓕᕆᐊᕐᕕᐅᕙᒃᓱᑎᒃ ᐱᔪᓐᓇᐅᑎᒋᔭᐅᔪᓂᒃ, ᑕᐃᒪᓗ ᓄᖑᑎᑦᓯᓯᒪᓕᕈᐊᕈᑎᐅᓯᒪᓪᓗᑎᒃ ᓄᓇᖃᖅᑳᕐᓯᒪᔪᑦ ᐊᕐᓇᖏᓂᒃ, ᓂᕕᐊᖅᓯᐊᖏᓂᒃ ᐊᒻᒪᓗ 2SLGBTQQIA-ᖑᔪᓂᒃ (ᒪᕐᕉᖕᓂᒃ ᑕᕐᓂᓖᑦ, ᐊᕐᓇᐃᑦ ᐊᕐᓇᓂᒃ ᐊᐃᑉᐸᖃᓲᑦ, ᐊᖑᑎᑦ ᐊᖑᑎᐅᖃᑎᒥᓐᓂᒃ ᐊᐃᑉᐸᖃᓲᑦ, ᐊᕐᓇᓂᒃ ᐊᖑᑎᓂᒃᓗ ᐊᐃᑉᐸᖃᓲᑦ, ᐊᓯᔾᔨᖅᑕᐅᓯᒪᔪᑦ, ᑯᐃᐅᕐᒍᓂᕋᖅᑕᐅᔪᑦ, ᓱᓕ ᑐᑭᓯᓯᒪᖖᒋᑦᑐᑦ ᓇᓪᓕᐊᓅᕐᒪᖔᕐᒥᓐᓃᒃ, ᑕᒪᐃᓐᓂᒃ ᐱᖃᖅᑐᑦ ᐊᒻᒪᓗ ᐊᐃᑉᐸᖃᓲᖑᖖᒋᑦᑐᑦ) ᐃᓄᐃᑦ.”

ᐅᓂᒃᑳᓕᐊᖑᓯᒪᔪᑦ ᐊᑐᖅᑕᐅᔪᕕᓂᑐᖃᕐᓄᑦ ᑕᑯᓐᓇᕆᐊᖅᓯᒪᕗᑦ ᓯᕗᓪᓕᖅᐹᑦᓯᐊᒥᒃ ᐊᓐᓂᕐᓇᖅᑑᑎᑎᒍᑦ ᑲᑎᖃᑦᑕᓕᓚᐅᖅᓯᒪᓂᖏᓐᓂᒃ ᓄᓇᖃᖅᑳᕐᓯᒪᔪᑦ ᐊᕐᓇᖏᓐᓂ, ᐅᑭᐅᖏᑦ 1500 ᐊᑐᖅᑎᓪᓗᒋᑦ ᐅᒥᐊᕐᔪᐊᑎᒍᑦ ᑎᑭᖃᑦᑕᓕᓚᐅᖅᓯᒪᓂᕐᓂᑦ ᑕᕆᐅᕐᔪᐊᑉ ᐊᑭᐊᓂᑦ ᐊᒻᒪᓗ ᑯᕋᐃᔅᑑᓯᒧᑦ ᐅᒃᐱᕐᓂᓕᕆᔨᐅᔪᑦ, ᓇᖕᒥᓂᖅᑖᕐᓯᒪᓕᓚᐅᖅᑐᓂᒃ ᐋᑦᓯᓪᓗᑎᒃ ᓄᓇᖃᖅᑳᕐᓯᒪᔪᑦ ᓄᓇᖁᑎᖏᓐᓂᒃ ᐊᒻᒪᓗ ᓴᖖᒋᓵᕐᕕᖃᖃᑦᑕᖅᓯᒪᓪᓗᑎᒃ ᓄᓇᖃᖅᑳᕐᓯᒪᔪᓄᑦ ᓯᕗᓕᖅᑎᐅᔪᓐᓇᕐᓂᖏᓐᓄᑦ ᐊᒻᒪᓗ ᐃᓅᓯᕆᔭᖓᓐᓄᑦ.

ᑕᐃᒃᑯᐊ ᒐᕙᒪᖃᐅᓯᖅᑖᕐᓯᒪᓂᖅᑎᒍᑦ ᐊᐅᓚᑦᓯᓂᐅᓕᓚᐅᖅᓯᒪᔪᑦ ᓱᓕ ᐊᑐᖅᑕᐅᕙᒻᒪᑕ ᐅᓪᓗᒥ, ᐅᓂᒃᑳᓕᐊᖑᓯᒪᔪᑦ ᐅᖃᖅᓯᒪᓪᓗᑎᒃ, ᓴᓇᕐᕈᑎᓕᐅᖅᓯᒪᓂᖅᑎᒍᑦ ᓲᕐᓗ ᐃᖅᑭᓖᑦ ᒪᓕᒐᖁᑎᖓᓂᒃ, ᐃᓕᓐᓂᐊᕆᐊᖅᐸᓚᐅᖅᑐᓂ ᐊᒻᒪᓗ ᓱᕈᓯᓕᕆᓂᕐᒥ ᐱᓕᕆᐊᖃᕈᑎᑎᒍᑦ. ᑐᓵᓂᐅᕙᓪᓕᐊᔪᒥᑦ ᐅᓂᒃᑳᓕᐊᖑᓯᒪᔪᑦ ᐃᓕᑕᖅᓯᓯᒪᕗᑦ ᐊᖏᖃᑎᒌᖖᒋᓯᒪᓂᐅᔪᓄᑦ ᑐᕌᖓᔪᓄᑦ ᖃᓄᖅ ᑐᑭᖃᖅᑎ-ᑕᐅᔭᕆᐊᖃᕐᓂᖓᑕ ᓄᖑᓴᐃᕙᓪᓕᐊᓯᒪᓂᕐᒧᑦ ᐅᖃᕈᓯᐅᔪᒧᑦ ᐊᒻᒪᓗ ᑲᓇᑕᐅᑉ ᓄᓇᕐᔪᐊᖓᓄᑦ ᐊᑐᓕᖅᑎᑕᐅᓯᒪᒻᒪᖔᑦ ᐊᑐᓕᖅᑎᑕ-ᐅᓯᒪᖖᒋᒻᒪᖔᓪᓘ.

“ᓄᖑᑎᕆᓂᖅ ᐱᔾᔪᑎᖃᕐᒪᑦ ᑲᑎᓪᓗᒋᑦ ᐃᓅᓯᕐᒥ ᐱᓇᓱᐊᕈᓯᐅᕙᒃᑐᓄᑦ, ᐃᓱᒪᔾᔪᓯᕆᔭᐅᕙᒃᑐᓄᑦ, ᐊᒻᒪᓗ ᐱᓕᕆᓂᐅᕙᒃᑐᓄᑦ ᓇᓗᓇᐃᔭᖅᑕᐅᓯᒪᓪᓗᑎᒃ ᑖᒃᑯᓇᓂ ᐅᓂᒃᑳᓕᐊᖑᓯᒪᔪᓂ; ᓲᕐᓗ ᐊᒥᓱᑦ ᐅᖃᓪᓚᒋᐊᖅᓯᒪᔪᑦ ᐅᖃᖃᑦᑕᓚᐅᕐᒪᑕ, ᑲᓇᑕᐅᑉ ᓄᓇᕐᔪᐊᖓᑕ ᐃᓗᐊᓂ ᐅᓇᑕᕕᒡᔪᐊᓕᕐᓂᐅᒻᒪᑦ, ᐊᒻᒪᓗ ᓄᓇᖃᖅᑳᕐᓯᒪᔪᑦ ᐊᕐᓇᖏᑦ, ᓂᕕᐊᖅᓯᐊᖏᑦ, ᐊᒻᒪᓗ 2SLGBTQQIA-ᖑᔪᑦ ᐊᕙᑕᖏᖅᑕᐅᓯᓂᖃᖅᓱᑎᒃ ᑕᒪᑐᒪᓂ,” ᐅᓂᒃᑳᓕᐊᖑᓯᒪᔪᑦ ᐅᖃᖅᓯᒪᓪᓗᑎᒃ.

ᑲᒥᓯᓄᕐᒋᔭᐅᔪᑦ ᐅᖃᓚᐅᖅᐳᑦ ᐊᔪᕐᓇᓪᓚᕆᒻᒪᑦ ᖃᐅᔨᓯᒪᓕᕆᐊᒥᒃ ᖃᔅᓯᓪᓚᑦᑖᖑᒻᒪᖔᑕ ᐊᒥᓲᓂᖏᑦ ᐊᓯᐅᔨᔭᐅᓯᒪᔪᑦ ᐊᒻᒪᓗ ᐃᓄᐊᖅᑕᐅᓯᒪᔪᑦ ᓄᓇᖃᖅᑳᕐᓯᒪᔪᑦ ᐊᕐᓇᖏᓂ ᑲᓇᑕᒥ, ᓇᓚᐅᑦᓵᖅᑕᐅᓯᒪᒐᓗᐊᖅᑎᓪᓗᒍ ᑕᐅᓴᓐᑎᖏᓐᓃᓐᓇᓱᒋᔭᐅᓪᓗᑎᒃ.

ᑭᖑᓪᓕᖅᐹᒥᒃ ᑲᑎᓯᒪᓂᖃᖅᑎᓪᓗᒋᑦ ᐅᐸᒍᑎᖃᑕᐅᓯᒪᒐᒥ, ᑲᓇᑕᒥ ᐊᖏᔪᖅᑳᕐᔪᐊᖅ ᔭᔅᑎᓐ ᑐᕌᑑ ᖁᕕᐊᓱᒍᑎᖃᓚᐅᕐᐳᖅ ᐅᓂᒃᑳᓕᐊᖑᓯᒪᔪᖅ ᐱᔭᕇᖅᑕᐅᓯᒪᓕᕐᓂᖓᑕ ᐊᒻᒪᓗ ᓇᓗᓇᐃᖅᓯᓪᓗᓂ ᒐᕙᒪᐅᔪᑦ ᐃᑲᔪᖅᓯᓂᖃᕐᓂᐊᕐᒪᑕ ᑭᐅᔭᐅᓯᒪᓕᖁᓪᓗᒋᑦ ᐊᑐᓕᖅᑎᑕᐅᖁᔭᐅᓪᓗᑎᒃ ᐃᓱᒪᓕᐅᕈᑎᓕᐊᖑᓯᒪᔪᑦ “ᒥᒃᓯᖃᑦᓯᐊᖅᑐᑎᒍᑦ, ᓄᓇᖃᖅᑳᕐᓯᒪᔪᓂᒃ ᓯᕗᓕᖅᑎᖃᕐᓗᑎᒃ ᐱᓕᕆᐊᖑᓂᖃᕐᓂᐊᕐᓂᖏᑕ.”

ᑭᓯᐊᓂᓗ ᐊᒥᓱᑦ ᐅᔾᔨᕈᓱᓚᐅᕐᒪᑕ ᑲᓇᑕᒥ ᐊᖏᔪᖅᑳᕐᔪᐊᖅ ᐅᖃᓪᓚᒃᑲᒥ ᐊᑐᓚᐅᖖᒋᒻᒪᑦ ᐊᒻᒪᓗ ᐊᑐᖅᑕᐅᓂᖓᑕ ᓄᖑᑎᕆᕙᓪᓕ-ᐊᓂᖅ ᐅᖃᕈᓯᕐᒥᒃ.

ᑕᒪᑐᒧᖓ ᐊᐱᕆᔭᐅᒐᒥ ᑭᖑᓂᐊᓂ, ᐃᓱᒪᑕᒻᒪᕆᒃ ᑲᒥᓯᓄᕐᒋᔭᐅᔪᖅ ᐳᓪᓗ ᑭᐅᓚᐅᕐᐳᖅ: “ᐅᖃᕈᓯᖅ ᓄᖑᑎᕆᓂᖅ ᐊᑐᖅᑕᐅᑎᓪᓗᒍ ᑐᓴᕆᐊᖃᖖᒋᑦᑐᒍ ᑲᓇᑕᒥ ᐊᖏᔪᖅᑳᕐᔪᐊᖑᔪᒥᒃ, ᐱᔾᔪᑎᒋᓪᓗᒍ ᐃᓚᒋᔭᐅᔪᓂᑦ ᐅᖃᐅᔾᔭᐅᓯᒪᒐᑦᑕ ᓱᓕᔪᖁᑎᒋᔭᒥᓐᓂᒃ.”

ᐅᓂᒃᑳᓕᐊᖑᓯᒪᔪᑦ ᑲᑎᑕᐅᓯᒪᓂᐅᒻᒪᑕ ᐱᓕᕆᐊᖃᖅᐸᓪᓕ-ᐊᓂᐅᓯᒪᔪᓂᑦ ᐅᑭᐅᒃ ᒪᕐᕉᓐᓄᑦ ᓇᑉᐸᖓᓂᒃᓗ ᐊᒻᒪᓗ ᐃᓚᖃᖅᑎᑕᐅᓯᒪᓪᓗᑎᒃ ᓄᓇᓕᐅᔪᓂ ᑐᓵᓂᖃᖃᑦᑕᓚᐅᕐᓂᕐᓂᑦ, ᖃᐅᔨᒪᔨᒻᒪᕆᐅᔪᑦ ᑲᑎᒪᔨᖏᓐᓂᑦ, ᐊᒻᒪᓗ ᐅᓂᒃᑳᒃᓴᕆᔭᐅᔪᓂᑦ ᐊᒻᒪᓗ ᐅᖃᖅᑕᐅᓯᒪᔪᓂᑦ ᐅᖓᑖᓄᑦ 2,300-ᖑᓪᓗᑎᒃ ᐃᓄᓐᓂᑦ, ᐱᖃᓯᐅᑎᓪᓗᒋᑦ ᐊᒥᓱᕐᔪᐊᒻᒪᕆᐅᓪᓗᑎᒃ ᐃᓄᓐᓂᓄᑦ ᐅᓂᒃᑳᒃᓴᒥᓐᓂᒃ ᐅᕝᕙᓘᓐᓃᑦ ᐅᖃᐅᓯᒃᓴᒥᓐᓂᒃ ᓴᖅᑭᑕᐅᓚᐅᖅᑐᓂᒃ.

ᐅᓂᒃᑳᓕᐊᖑᓯᒪᔪᑦ ᐃᓗᓕᖃᕐᐳᑦ 231-ᓂᒃ ᐊᑐᓕᖁᔭᐅᓪᓗᑎᒃ ᐃᓱᒪᓕᐅᕈᑎᓂᒃ, ᑕᐃᔭᐅᓪᓗᑎᒃ ᐃᑲᔪᖅᑐᒐᐅᑦᓯᐊᓕᖁᔨᓂᕐᒧᑦ ᑎᓕᐅᕆᔾᔪᑎᓂᒃ ᑐᕌᖓᓪᓗᑎᒃ ᒐᕙᒪᐅᔪᓄᑦ, ᐃᓅᓯᓕᕆᔨᒃᑯᓐᓄᑦ, ᓴᓇᕝᕕᓐᓄᑦ ᐊᒻᒪᓗ ᑲᓇᑕᒥᐅᖑᔪᓄᑦ.

ᑕᐃᒃᑯᐊ ᐃᑲᔪᖅᑐᒐᐅᑦᓯᐊᓕᖁᔨᓂᕐᒧᑦ ᑎᓕᐅᕆᓯᒪᔾᔪᑎᑦ ᒪᑯᓂᖓ ᐃᓚᖃᖅᐳᑦ:

  • ᓴᖖᒋᓂᖅᓴᐅᔪᑎᒍᑦ ᑎᒍᔭᐅᓯᒪᕙᓕᖁᓪᓗᒋᑦ ᐊᖑᑎᑦ ᐸᓯᔭᒃᓴᐅ-ᓂᖏᓐᓄᑦ ᖃᐅᔨᔭᐅᓯᒪᓕᖅᑐᑦ ᐊᐃᑉᐸᕆᔭᒥᓐᓂᒃ ᐋᓐᓂᖅᑎ-ᕆᕙᓐᓂᖏᓐᓄᑦ ᐊᒻᒪᓗ ᐃᒡᓗᒥᐅᖃᑎᒥᓐᓂᒃ ᐋᓐᓂᖅᑎᕆᕙᓐᓂᖏᓐᓄᑦ
  • ᒐᓛᑑ ᑐᖖᒐᕝᕕᖁᑎᖓᑕ ᕿᒥᕐᕈᔭᐅᖁᓪᓗᒍ ᐃᖅᑲᖅᑐᐃᕝᕕᒃᑎᒍᑦ ᐊᒻᒪᓗ ᐊᒥᓱᒃᑲᓐᓂᐅᔪᑦ ᓄᓇᖃᖅᑳᕐᓯᒪᔪᓄᑦ ᑐᕌᖓᓪᓗᑎᒃ ᐸᓯᔭᒃᓴᖖᒍᖅᑎᑕᐅᓯᒪᓂᕐᒥᓐᓄᑦ
  • ᐋᖅᑭᐅᒪᓕᖅᑎᑕᐅᕙᒍᓐᓇᕐᓂᖏᑦ ᐊᒥᓂᖅᓴᐅᓕᖅᑎᑕᐅᖁᓪᓗᒋᑦ ᓄᓇᖃᖅᑳᓯᒪᔪᓄᑦ ᐱᔾᔪᑎᖃᖅᑎ-ᐅᕙᒃᑐᑦ ᐱᕋᔭᒃᓯᒪᔪᓄᑦ ᐃᖅᑲᖅᑐᐃᕝᕕᓐᓂ ᐱᓕᕆᔾᔪᓯ-ᐅᕙᒃᑐᓂ ᐱᒋᐊᖅᑎᑦᓯᓯᒪᓕᖁᓪᓗᒋᑦ ᑲᓇᑕᒥ ᓄᓇᖃᖅᑳᕐᓯᒪᔪᑦ ᐊᒻᒪᓗ ᑭᒃᑯᑐᐃᓐᓇᑦ ᐱᔪᓐᓇᐅᑎᖏᓐᓄᑦ ᑲᒪᔨᐅᓕᕋᔭᖅᑐᒥᒃ ᐊᒻᒪᓗ ᑭᒃᑯᑐᐃᓐᓇᑦ ᐱᔪᓐᓇᐅᑎᖏᓐᓄᑦ ᑲᑎᒪᔨᕐᔪᐊᓂᒃ
  • ᐊᑯᓃᖅᑐᒧᑦ ᑮᓇᐅᔭᖁᑎᒃᓴᖏᓂᒃ ᐱᑎᑕᐅᓯᒪᓕᖁᓪᓗᒋᑦ ᐃᓕᓐᓂᐊᕐᓂᓕᕆᓂᕐᒥ ᐱᓕᕆᐊᖑᔪᓄᑦ ᐊᒻᒪᓗ ᐅᔾᔨᕈᓱᓕᖅᑎᑦᓯᒋᐊᕈᑎᓄᑦ ᐱᓕᕆᐊᓄᑦ ᑐᕌᖓᑎᑕᐅᓯᒪᓪᓗᑎᒃ ᐋᓐᓂᖅᑎᕆᖃᑦᑕᖁᔨᖖᒋᓐᓂᕐᒧᑦ
  • ᐃᓱᓕᑎᑕᐅᓯᒪᓕᖁᓪᓗᒍ ᑎᒍᔭ-ᐅᕙᓐᓂᖏᑦ ᓄᓇᖃᖅᑳᕐᓯᒪᔪᑦ ᓱᕈᓯᖏᑕ ᐱᔾᔪᑎᖃᖅᐸᒃᓱᑎᒃ ᐊᒃᖢᓗᐊᕐᓂᖏᓐᓄᑦ ᐊᒻᒪᓗ ᐱᐅᓯᑐᖃᖏᓐᓂᒃ ᐊᑭᕋᖅᑐ-ᐃᓂᕐᒧᑦ

ᐅᓂᒃᑳᓕᐊᖑᓯᒪᔪᑦ ᐃᓚᖃᕐᒥᔪᑦ 46-ᖑᔪᓂᒃ ᐃᓄᓐᓄᑦ ᑐᕌᖓᓪᓗ-ᑎᒃ ᐊᑐᓕᖅᑎᑕᐅᖁᔭᐅᓪᓗᑎᒃ ᐃᓱᒪᓕᐅᕈᑎᓂᒃ. ᐃᓚᖃᖅᓱᑎᒃ, ᑎᓕᐅᕆᓯᒪᓂᕐᒥᒃ ᒐᕙᒪᐅᔪᑦ ᐅᐱᒍᓱᑦᓯᐊᖁᓪᓗᒋᑦ ᓄᓇᓕᕆᔾᔪᑎᓂᒃ ᐊᒻᒪᓗ ᐃᓅᓯᓕᕆᓂᕐᒥ-ᑮᓇᐅᔭᓕᐅᕋᓱᐊᖅᐸᓐᓂᕐᒥ ᐱᓕᕆᐊᒃᓴᕆᔭᒥᓐᓂᒃ ᐃᓄᓐᓄᑦ, ᐋᖅᑭᒃᓱ-ᐃᖁᔭᐅᓪᓗᑎᒃ ᒪᓕᒐᖁᑎᓂᒃ ᐊᒻᒪᓗ ᐱᔨᑦᓯᕋᕈᑎᓂᒃ ᒥᐊᓂᖅᓯᔾᔪᑎᐅᓂᐊᕐᓗᑎᒃ ᐃᓄᐃᑦ ᐱᐅᓯᑐᖃᖓᓐᓂᒃ, ᐊᒻᒪᓗ ᐃᓕᑕᕆᔭᐅᓯᒪᓕᖁᓪᓗᒍ ᐃᓄᒃᑐᑦ ᐅᖃᐅᓯᖅ ᐃᓕᑕᕆᔭᐅᓯᒪᓪᓗᓂ ᐅᖃᐅᓯᐅᖃᑕᐅᓂᖓᑕ ᑲᓇᑕᒥ.

ᐃᓱᒪᑕᒻᒪᕆᒃ ᑲᒥᓯᓄᕐ ᐳᓪᓗᕐ ᐅᖃᓚᐅᕐᐳᖅ ᓇᒡᒐᔾᔭᐅᑦ ᐅᓪᓛᖓᓂ ᑎᓕᐅᕆᓯᒪᔾᔪᑎᑦ ᐃᑲᔪᖅᑐᐃᑦᓯᐊᓕᖁᔨᓂᕐᒧᑦ “ᐃᓱᒪᓕᐅᕈ-ᑎᑐᐃᓐᓇᐅᖖᒋᒻᒪᑕ, ᒪᓕᒐᑎᒍᑦ ᐱᓕᕆᐊᖑᓯᒪᔭᕆᐊᖃᓪᓚᕆᒃᑑᒻᒪᑕ.”

ᐃᓗᐃᒃᑲᐅᓗᒍ ᐅᓂᒃᑳᓕᐊᖑᓯᒪᔪᖅ ᐅᖃᓕᒫᖅᑕᐅᔪᓐᓇᕐᐳᖅ ᖃᓪᓗᓈᑎᑦ, ᐊᒻᒪᓗ ᐃᓱᒪᑕᐃᑦ ᓇᐃᒡᓕᒋᐊᖅᓯᒪᓪᓗᒍ ᐅᖃᐅᓯᒃᓴᖏᑦ ᐅᓂᒃᑳᓕᐊᖑᓯᒪᔪᓄᑦ ᐃᓄᒃᑎᑑᓕᖅᓯᒪᔪᖅ ᑐᓵᓂᖃᓚᐅᕐᓂᕐᒧᑦ ᑲᕆᑕᐅᔭᑎᒍᑦ ᐱᑐᒃᓯᒪᕝᕕᐊᓐᓂ ᐅᕙᓂ mmiwg-ffada.ca.

ᐅᖃᓕᒫᒃᑲᓐᓂᕈᓐᓇᖅᐸᓯ ᐃᓄᓐᓄᑦ ᑐᕌᖓᑎᑕᐅᓪᓗᑎᒃ ᐃᓱᒪᓕᐅᕈᑎᐅᓯᒪᔪᑦ ᐊᒻᒪᓗ ᖃᓄᖅ ᐅᖃᐅᓯᒃᓴᕆᔭᐅᔪᑦ ᐅᓂᒃᑳᓕ-ᐊᖑᓯᒪᔪᓄᑦ ᐅᕙᓂ Nunatsiaq.com.

ᑐᓵᓂᖃᓚᐅᕐᓂᕐᒧᑦ ᐃᑲᔪᖅᑎᒃᓴᐅᔪᑦ ᐅᖄᓚᐅᑎᑎᒍᑦ ᐊᑐᐃᓐᓇᐅᑎᑕᐅᕗᑦ ᖃᓪᓗᓈᑎᑐᑦ ᐊᒻᒪᓗ ᐃᓄᒃᑎᑐᑦ ᐅᕙᓂ ᐅᖄᓚᐅᑎᖓᓂ 1-844-413-6649.

Share This Story

(0) Comments