ᐱᕈᖅᑐᕕᓂᕐᓂ ᐊᑐᒃᑲᓐᓂᕈᑎᒃᓴᓂᒃ ᐱᓕᕆᐊᒃᓴᑦ ᐊᖏᒡᓕᒋᐊᖅᑕᐅᔪᒪᔪᖅ ᓄᓇᕕᒃᒥ

ᐅᓄᕐᓂᕐᓴᐃᑦ ᓄᓇᓕᖕᓂ ᐊᒃᑕᑯᓄᑦ ᐃᓂᒋᔭᐅᔪᑦ ᑕᑕᑉᐸᓪᓕᐊᖕᒪᑕ, ᐅᖃᕐᑐᖅ ᐊᕙᑎᓕᕆᔨᒃᑯᑦ ᐱᓕᕆᔨᒻᒪᕆᖓ ᑲᑎᕕᒃ ᓄᓇᓕᓕᒫᑦ ᒐᕙᒪᖓᓂ

ᑲᑎᕕᒃ ᓄᓇᓕᓕᒫᑦ ᒐᕙᒪᖓ ᖃᐅᔨᓇᓱᒃᑐᑦ ᐱᕈᖅᑐᕕᓂᕐᓂᒃ ᐊᑐᒃᑲᓐᓂᕈᑎᒃᓴᓂᒃ ᐊᒻᒪ ᓴᕕᕋᔭᖕᓂ ᐊᑐᕈᓐᓃᕐᓯᒪᔪᓂᒃ ᐱᓕᕆᐊᖃᕈᒪᓂᕐᒥᒃ ᓄᓇᕕᒃᒥ ᐊᓂᑕᐅᕙᓪᓕᐊᔪᓂᒃ ᐊᐅᓚᑦᑎᓇᓱᒃᖢᑎᒃ ᑕᑕᑉᐸᓪᓕᐊᔪᓂ ᐊᒃᑕᕐᕕᖕᓂ ᐃᓗᑦᑐᕐᑎᕐᓯᒪᔪᓂᒃ ᐆᑐᓇᖅ ᑰᔾᔪᐊᖅᒥ ᐊᒃᑕᕐᕕᖕᓂ, ᓴᖅᑭᔮᖅᑐ ᐅᕙᓂ. (ᐊᔾᔨᙳᐊᖅ ᑲᑎᕕᒃᑯᓐᓂ)

By ᔨᐊᕝ ᐱᐊᑦᓯᐄ
ᓄᓇᓕᖕᓂ ᑐᓴᒐᒃᓴᓕᐅᕐᑎᐅᓂᕐᒧᑦ ᐱᓕᕆᐊᒃᓴᓄᑦ ᑐᓴᒐᒃᓴᓕᐅᕐᑎ

For the English version of this story, please see Composting, scrap metal recycling programs set to expand in Nunavik.

ᐱᕈᖅᑐᕕᓂᕐᓂ ᐊᑐᒃᑲᓐᓂᕈᑎᒃᓴᓂᒃ ᐊᒻᒪ ᓴᕕᕋᔭᖕᓂ ᐊᑐᕈᓐᓃᕐᑐᓂᒃ ᐊᑐᒃᑲᓐᓂᕈᑎᒃᓴᓕᕆᓂᕐᒧᑦ ᐱᓕᕆᐊᒃᓴᑦ ᐊᖏᒡᓕᒋᐊᖅᑕᐅᔪᒪᔪᑦ ᓄᓇᕕᒃᒥ ᑕᒪᒃᑯᐊ ᓄᓇᓕᖕᓂ ᐊᒃᑐᑯᖃᕐᕖᑦ ᑕᑕᑉᐸᓪᓕᐊᑎᓪᓗᒋᑦ.

ᑲᑎᕕᒃ ᓄᓇᓕᓕᒫᑦ ᒐᕙᒪᖓ ᐱᓕᕆᐊᖃᕐᒪᑕ ᐃᓄᖕᓂ 14ᓂ ᓄᓇᓕᖕᓂ ᐱᓕᕆᑎᑦᑎᔪᒪᓪᓗᑎᒃ ᐊᒃᑕᑯᓕᕆᓂᕐᒧᑦ ᐊᐅᓚᑦᑎᓂᕐᒥᒃ ᓄᓇᖏᓐᓂᒃ ᐊᒻᒪᓗ ᑕᒪᑐᒥᖓ ᖃᓄᖅ ᐋᖅᑭᒋᐊᕈᑎᖃᕈᓐᓇᕐᒪᖔᑕ, ᐅᖃᓚᐅᕐᑐᖅ ᐋᒪᑦ ᑲᐅᑭ, ᐊᕙᑎᓕᕆᔨᒃᑯᓐᓄᑦ ᐱᓕᕆᔨ ᑲᑎᕕᒃᑯᓐᓂ.

ᒐᕙᒪᒃᑯᑦ ᑭᒡᒐᖅᑐᐃᔨᖏᑦ ᐊᔪᕈᓐᓃᕐᓴᖅᖢᑎᒃ ᑲᑎᒪᓚᐅᕐᒪᑕ ᓄᕕᐱᕆ 15ᒥ 17ᒧ ᐅᖃᐅᓯᖃᖅᖢᑎᒃ ᐊᒃᑕᑯᓂᒃ ᐊᐅᓚᑦᑎᓂᕐᒥᒃ ᓄᓇᓕᖕᓂ ᐊᒻᒪᓗ ᐊᔪᕈᓐᓃᕐᓴᖅᑎᑦᑎᒃᑲᓐᓂᕈᒪᓪᓗᑎᒃ ᑭᖑᓂᐊᒍᑦ.

ᐃᒪᐃᓕᖓᐅᕐᒪᑕ ᑕᒫᓂ ᓄᓇᓕᖕᓂ ᐊᒃᑕᕐᕕᖏᑦ — ᐃᓚᖏ ᐊᕐᕌᒍᒐᓴᒻᒪᕆᖕᓂ ᐊᑐᕐᑕᐅᓪᓗᑎᒃ — ᑕᑕᑉᐸᓪᓕᐊᓕᕐᒪᑕ, ᐊᒻᒪᓗ ᖃᓄᐃᓕᐅᕐᓯᒪᓗᐊᙱᖢᑎᒃ ᑕᒪᒃᑯᓂᖓ ᐊᐅᓚᑦᑎᓂᓕᕆᓂᕐᒥᒃ.

“ᐅᓄᕐᓂᕐᓴᐃᑦ ᑕᑕᑦᑎᐊᓕᕐᒪᑕ,” ᑲᐅᑭ ᐅᖃᕐᑐᖅ ᐊᐱᕐᓱᖅᑕᐅᑎᓪᓗᒍ.

ᐃᓚᒋᔭᐅᔪᕐᓕ ᓄᓇᓖᑦ ᓄᓇᕕᒃᒥ ᐱᓕᕆᐊᖃᕌᖓᒥᒃ ᐊᒃᑐᑯᑦ ᐅᓄᓗᐊᕌᖓᑕ ᐃᑭᑎᑕᐅᕙᒃᖢᑎᒃ — ᑕᐃᒪᓐᓇᓗ ᐊᔪᙱᑎᑕᐅᓪᓗᑎᒃ ᑲᐅᑭ ᐅᖃᓚᐅᕐᑐᖅ ᑭᓯᐊᓂᓕ ᑕᒪᓐᓇ ᐋᖅᑭᒍᑎᓪᓚᕆᐅᙱᒻᒪ. ᓲᕐᓗ ᒪᑯᐊ ᓴᕕᕋᔭᕈᔪᐃᑦ ᐃᑭᑦᑐᓐᓇᙱᒻᒪᑕ.

ᑕᐃᒪᓕ ᑕᒪᒃᑯᓂᖓ ᐊᒃᑕᑯᓂ ᐱᓕᕆᐊᖃᕋᓱᒃᖢᑎᒃ, ᑲᑎᕕᒃ ᓄᓇᓕᓕᒫᑦ ᒐᕙᒪᖓ ᐊᑐᕐᓂᐊᖅᑐᑦ $6.7 ᒥᓕᐊᓐ ᑖᓚᓂ ᐱᒋᐊᕐᑎᑦᑎᓂᕐᒥᒃ ᓴᕕᕋᔭᖕᓂᒃ ᐊᑐᒃᑲᓐᓂᕈᓐᓇᖅᑐᓕᕆᓂᕐᒥᒃ ᓄᓇᕕᒃᒥ. ᑕᒪᑐᒥᖓ ᐱᒋᐊᓚᐅᕐᓯᒪᔪᑦ ᑲᖏᕐᓱᒃᒥ ᑕᒪᓐᓇ ᐊᕐᕌᒍ ᐱᒋᐊᕐᓯᒪᓕᕐᑎᓪᓗᒍ, ᐊᒻᒪᓗ ᒫᓐᓇ ᒐᕙᒪᒃᑯᑦ ᑕᒪᑐᒥᖓ ᐅᓄᕐᓂᕐᓴᓂᒃ ᓄᓇᓕᖕᓂ ᐱᓕᕆᐊᖑᑎᑦᑐᒪᔭᖓᑦ.

“ᐱᓕᕆᓂᖅ ᐅᓇ ᐱᓕᕆᐊᕆᔭᐅᑎᓐᓇᓱᒃᑐᖅ 14ᓂ ᓄᓇᓕᖕᓂ,” ᑲᐅᑭ ᐅᖃᕐᑐᖅ.

“ᒫᓐᓇ ᑮᓇᐅᔭᖃᕋᑦᑕ ᐊᓯᒃᑲᓐᓂᐊᓂᒃ ᓄᓇᓕᖕᓂ ᑕᐃᒪᓐᓇ ᐱᓕᕆᐊᖃᖅᑎᑦᑎᑲᓐᓂᕈᓐᓇᖅᖢᑎᒃ ᐊᒻᒪᓗ ᐊᕐᕌᒍ ᑕᐃᒪᐃᓛᖅᖢᓂ.”

ᐱᓕᕆᐊᖃᕐᓂᖅ ᐅᓄᕐᓯᕚᓪᓕᖅᑎᑦᑎᓇᓱᖕᓂᕐᒥ ᐊᒻᒪᓗ ᓇᓕᐊᑦ ᓄᓇᓖᑦ ᐱᓕᕆᕝᕕᐅᓂᐊᕆᐊᒃᓴᖏᑦ ᓱᓕ ᐱᓕᕆᐊᖑᔭᕆᐊᖃᕐᑐᑦ, ᐅᖃᓚᐅᕐᑐᖅ.

ᓄᓇᓕᖕᓂ ᐱᕈᖅᑐᕕᓂᕐᓂᒃ ᐱᓕᕆᐊᖃᕐᓂᖅ ᐊᒻᒪ ᐱᓕᕆᐊᖑᕙᓪᓕᐊᔪᖅ.

ᒫᓐᓇᓕ, ᐱᕈᖅᑐᕕᓂᕐᓂᒃ ᐱᓕᕆᐊᖃᕐᓂᖅ ᒥᑭᑦᑐᒃᑯᑦ ᐱᓕᕆᐊᖑᔪᖅ ᓄᓇᓕᖕᓂ, ᐋᖅᑭᒃᓯᓯᒪᓪᓚᕆᙱᖢᑎᒃ ᐊᖏᓂᕐᓴᒃᑯᑦ ᐱᓕᕆᓂᕐᒥᒃ.

ᑭᓯᐊᓂᓕ, ᐊᕐᕌᒍ ᐃᓄᒃᔪᐊᒃ ᓯᕗᓪᓕᖅᐹᖑᓂᐊᕐᑐᖅ ᓄᓇᓕᖕᓂ ᐱᕈᖅᑐᕕᓂᕐᓂᒃ ᓂᕿᕕᓂᕐᓂᒡᓗ ᐱᓕᕆᐊᖃᕐᓂᕐᒥᒃ, ᑲᐅᑭ ᐅᖃᕐᑐᖅ. ᑕᐃᑲᓂ ᐱᓕᕆᐊᖑᑦᑎᐊᖅᐸᑦ ᑕᐃᒪᓕ ᐊᓯᖏᓐᓂᒃ ᐱᓕᕆᐊᖑᑐᐃᓐᓇᕆᐊᓕᒃ.

ᐅᓇ ᐱᕈᖅᑐᕕᓂᕐᓂᒃ ᐱᓕᕆᐊᖃᕐᓂᖅ ᐃᓄᒃᔪᐊᕐᒥ ᐃᓱᒪᒋᔭᐅᔪᑦ ᐊᑭᖃᕋᔭᕆᐊᒃᓴᖓᓂᒃ ᒫᓂ $1.2 ᒥᓕᐊᓐ ᑖᓚᑐᕐᓗᓂ.

“ᓄᓇᓯᐅᑎᑕᖃᕐᓂᐊᕐᒪ ᑲᑎᑦᑎᖃᑦᑕᕐᑐᒥ ᓂᕿᕕᓂᕐᓂ ᐊᒻᒪᓗ ᐱᓕᕆᕝᕕᖃᕐᓂᐊᖅᖢᑕ ᑕᒪᒃᑯᓄᖓ,” ᐅᖃᕐᑐᖅ.

“ᐅᓇ ᐱᓕᕆᐊᒃᓴᖅ ᐊᓂᒍᐃᑦᑎᐊᕐᓂᐊᖁᔭᕗᑦ, ᐊᒻᒪᓗ ᐊᓂᒍᐃᑦᑎᐊᖅᐸᑦ ᑕᐃᒪᓕ ᐊᓯᐊᓂ ᓄᓇᓕᖕᓂ ᐱᓕᕆᐊᖑᓕᕐᓂᐊᖅᖢᓂ.”

ᐃᑲᔫᑎᑎᒍᓪᓕ, ᑲᐅᑭ ᐅᖃᓚᐅᕐᑐᖅ ᐅᒃᐱᕈᓱᖕᓂᕋᖅᖢᓂ ᑯᐸᐃᒃ ᒐᕙᒪᒃᑯᑦ ᖃᐅᔨᒪᓇᓱᒋᓪᓗᓂᒋ5 ᓄᓇᕕᒃᒥ ᓄᓇᓖᑦ ᖃᓄᐃᑦᑐᓂᒃ ᐱᖃᕆᐊᖃᕐᓂᖏᓐᓂᒃ ᐊᒻᒪᓗ ᐃᑲᔪᕈᓐᓇᕐᓂᐊᖅᖢᑎᒃ.

“ᐅᖃᕈᓐᓇᕐᑐᖓ ᐊᕐᕌᓂᐅᓚᐅᕐᑐᖅ ᐊᒻᒪ ᑕᒪᑐᒪᓂ, ᐱᓕᕆᖃᑎᒌᓚᐅᕋᑦᑕ ᐊᒃᓱᕈᖅᖢᑕ — ᐱᓗᐊᕐᑐᒥ ᐊᕙᑎᓕᕆᓂᕐᒧᑦ ᒥᓂᑦᑕᓂ — ᑕᒪᒃᑯᐊ ᐱᓕᕆᐊᒃᓴᐃᑦ ᐊᑐᓕᕈᓐᓇᖁᓪᓗᒋᑦ.” ᐅᖃᕐᑐᖅ.

“ᐋᖅᑭᒍᑎᒃᓴᓂ ᕿᓂᕆᐊᖃᓕᕋᑦᑕ ᒫᓐᓇ, ᐊᕐᕌᒍᓂᒃ ᐊᓂᒍᖅᑐᓂ ᑕᒪᑐᒧᖓ ᐱᓕᕆᐊᖃᕐᓯᒪᓗᐊᙱᒻᒪᑕ ᐊᒃᑕᑯᓕᕆᓂᕐᒧᑦ ᐊᐅᓚᑦᑎᓂᕐᒥᒃ.”

Share This Story

(0) Comments