ᐸᓖᓯᒃᑯᑦ ᑎᒍᓯᔪᑦ ᑯᑲᐃᓐ, ᑯᕌᒃᒥ ᑰᔾᔪᐊᖅᒥ ᓱᐴᖅᑐᒐᕐᓂ ᑎᒍᓯᑎᓪᓗᒋᑦ

For English version, see Police seize cocaine, crack in Kuujjuaq drug bust

27-ᓂ ᐊᕐᕌᒍᓕᒃ ᐊᖑᑎ ᐸᓯᔭᒃᓴᙳᖅᑎᑕᐅᕗᖅ ᑯᑲᐃᓐᒥ ᐊᒻᒪ ᑯᕌᒃᒥ ᑎᒍᓯᑎᓪᓗᒋᑦ ᔭᓄᐊᕆ 20-ᒥ ᓱᐴᖅᑐᒐᕐᓂ ᓇᓂᓯᑎᓪᓗᒋᑦ ᑰᔾᔪᐊᖅᒥᑦ, ᐸᓖᓯᑦ ᐅᖃᕐᑐᖅ.

ᓄᓇᕕᒃᒥ ᐊᒻᒪ ᑯᐸᐃᒃᒥ ᐸᓖᓯᑦ ᕿᓂᓚᐅᕐᑐᑦ ᐃᒡᓘ ᐃᓗᐊᓂ ᑕᕝᕙᓂ ᑰᔾᔪᐊᖅᒥ ᑕᖅᑭᐅᓚᐅᕐᑐᒥᒃ, ᑐᓴᒐᒃᓴᕆᔭᐅᔪᑦ ᐅᖃᕐᓯᒪᓚᐅᕐᑐᑦ ᔭᓄᐊᕆ 25-ᒥ ᓄᓇᕕᒃᒥ ᐸᓖᓯᒃᑯᓐᓂ.

“ᐅᓇ ᐱᓕᕆᓂᐅᔪᖅ ᑎᒍᓯᔾᔪᑎᐅᓚᐅᕐᑐᖅ 100 ᑐᕌᒻᔅ ᐅᖓᑖᓂ ᑯᑲᐃᓐᒥ ᐊᒻᒪ 10 ᒍᕌᒻᔅ ᑯᕌᒃᒥ,” ᑐᓴᒐᒃᓴᐃᑦ ᐅᖃᕐᓯᒪᓚᐅᕐᑐᑦ.

ᐸᓖᓯᒃᑯᑦ ᑎᒍᓯᓚᐅᕐᒥᔪᑦ $1,200-ᓂ ᑮᓇᐅᔭᓂᒃ ᐊᒻᒪ ᐅᖄᓚᐅᑎᕋᓛᓂᒃ ᑎᒍᒥᐊᒐᓂᒃ.

ᐸᓯᔭᒃᓴᖅ, ᓇᓗᓇᐃᖅᑕᐅᓚᐅᕐᑐᖅ ᑲᖏᖅᓱᐊᓗᔾᔪᐊᖅᒥ ᓄᓇᖃᕐᓂᑰᓪᓗᓂ ᑰᔾᔪᐊᖅᒥᐅᑕᐅᓕᖅᖢᓂ, ᑎᒍᔭᐅᓚᐅᕐᑐᖅ ᐊᒻᒪ ᐸᓯᔭᒃᓴᙳᖅᑎᑕᐅᓪᓗᓂ ᐱᓯᒪᓂᕐᒥᒃ ᓂᐅᕕᐊᒃᓴᖃᕋᓱᖕᓂᕐᒥᒃ ᑯᑲᐃᓐᒥ.

ᐊᓂᑎᑕᐅᓯᒪᓕᕐᑐᖅ ᖃᓄᐃᓕᐅᕆᐊᖃᙱᓯᒪᓪᓗᓂ, ᑳᑉᑕᓐ ᐸᑐᕇᔅ ᐊᐃᐳᓪ ᓄᓇᕕᒃᒥ ᐸᓖᓯᒃᑯᓐᓄᑦ ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ.

ᐅᓇ ᐸᓯᔭᒃᓴᖅ ᐃᓚᒋᔭᐅᓇᓱᒋᔭᐅᙱᑦᑐᖅ ᐊᓯᒃᑲᓐᓂᖏᓐᓂᒃ ᓱᐴᖅᑐᒐᕐᓂ ᓇᓂᓯᕝᕕᐅᑲᑕᒃᑐᓂᒃ ᑰᔾᔪᐊᖅᒥ ᐃᑉᐸᒃᓴᕆᓚᐅᕐᑕᖓᓂᒃ, ᐃᓱᒪᔪᖅ ᐊᐃᐳᓪ.

ᐃᑉᐸᒃᓴᖓᓂ ᖃᓄᐃᓕᐅᕈᑎᐅᓚᐅᕐᑐᓂᒃ, ᒪᕐᕉᒃ ᐊᖑᑏᒃ ᑎᒍᔭᐅᓚᐅᕐᓯᒪᔫᒃ ᐊᒻᒪ ᐸᓯᔭᒃᓴᙳᖅᑎᑕᐅᓪᓗᑎᒃ ᐸᓖᓯᒃᑯᑦ ᐱᓕᕆᐊᖃᖅᖢᑎᒃ ᓱᐴᖅᑐᒐᕐᓂᒃ ᓄᓇᕕᐅᑉ ᐊᓯᐊᓂᙶᖃᑦᑕᖅᑐᓂᒃ.

ᓄᓇᕕᒃᒥ ᐸᓖᓯᒃᑯᑦ ᐅᖃᓚᐅᕐᑐᑦ ᑭᓇᑐᐃᓐᓇ ᖃᐅᔨᒪᔭᐅᑎᙱᓪᓗᓂ ᑭᓇᐅᖕᒪᖔᑦ ᐅᖃᐅᓯᖃᕈᓐᓇᕐᓂᖏᓐᓂᒃ ᓱᐴᖅᑐᒐᕐᓂᒃ ᓂᐅᕐᕈᑎᖃᖃᑦᑕᖅᑐᓂᒃ ᐊᒻᒪ ᐃᒥᐊᓗᒃᒥ ᐅᕗᖓ tips@nunavikpolice.ca.