ᑐᕉᑑ ᑐᓴᖅᑎᑦᑎᔪᖅ ᓴᐳᔾᔭᐅᓯᒪᓂᐊᖅᑐᒥᑦ ᓄᓇᕗᒥᑦ ᑭᙳᓪᓕᖅᐹᖓᓂ ᓯᑯᖃᓂᐅᔪᒥᒃ

“ᐊᓱᐃᓛᒃᖤᑕᐃᓐᓇᖅ, ᐃᓄᐃᑦ ᐱᓕᕆᔾᔪᑎᖃᓕᕐᐳᑦ ᐱᒻᒪᕆᖕᒥᑦ ᐱᓕᕆᐊᒧᑦ”

ᑲᓇᑕᐅᑉ ᐊᖓᔪᖅᑳᖓ ᔭᔅᑎᓐ ᑐᕉᑑ ᐃᖃᓗᖕᓃᓚᐅᕐᒪᑦ ᑎᓴᒻᒥᕐᒥᑦ, ᐋᒐᓯ 1, ᑐᓴᖅᑎᑦᑎᔭᖅᑐᕐᖢᓂ ᓯᕗᓪᓕᖅᐹᒥ ᐱᒋᐊᕈᑎᐅᓂᐊᕐᑐᓂᒃ ᐋᕿᒃᓱᐃᓂᕐᒥᒃ ᐊᑯᓂᕈᓗᒃ ᓴᐳᔾᔭᐅᓯᒪᕝᕕᐅᓂᐊᖅᑐᒥᒃ ᑲᓇᑕᐅᑉ ᖁᑦᑎᒃᑐᖓᓂᒃ—ᐅᓇ ᓄᑖᖅ ᑐᕙᐃᔪᐃᑦᑐᖅ ᑕᕆᐅᕐᒥᐅᑕᓂᒃ ᓴᐳᔾᔨᓯᒪᕝᕕᒃ.

By ᓴᐃᕋ ᕌᔾᔪᔅ

For an English version of this story, see Trudeau announces protection for Nunavut’s last-ice area

ᑲᓇᑕᐅᑉ ᐊᖓᔪᖅᑳᖓ ᔭᔅᑎᓐ ᑐᕉᑑ, ᓄᓇᕗᑦ ᓯᕗᓕᐅᖅᑎᖓ ᔫ ᓴᕕᑲᑖᖅ ᐊᒻᒪ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦᑕ ᐊᖓᔪᖅᑳᖓ ᐲ. ᔭᐃ. ᐊᕿᐊᕈᒃ ᐊᑎᓕᐅᕐᐳᑦ ᐆᒥᖓ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓄᑦ ᐃᑲᔫᓯᐊᖅᑖᕈᓐᓇᐅᑎᖏᓐᓄᓪᓗ ᐊᖏᕈᑎᓂᒃ ᐆᒧᖓ ᑕᓪᓗᕈᑎᐅᑉ ᐃᒪᖓᓂᒃ ᑕᕆᐅᕐᒥᐅᑕᓂᒃ ᓴᐳᔾᔨᓯᒪᕕᒃᒧᑦ ᐋᒐᓯ 1-ᖑᑎᓪᓗᒍ, ᑐᕉᑑ ᐳᓛᖅᑎᓪᓗᒍ ᐃᖃᓗᖕᓄᑦ. (ᐊᔾᔨᓕᐅᕆᔨ ᔨᒻ ᐱᐅᓪ)

ᒐᕙᒪᑐᖃᒃᑯᑦ ᑐᓴᖅᑎᑦᑎᓚᐅᕐᐳᑦ ᓄᑖᒥᑦ ᓴᐳᔾᔨᕝᕕᐅᓂᐊᖅᑐᒥᑦ ᓄᓇᕗᑦ ᐅᒥᒃᒪᐃᑦ ᓄᓇᖓᑕ ᐅᐊᖕᓇᖅᐸᓯᐊᑕ ᓯᒡᔭᖓᓂᒃ.

ᑲᓇᑕᐅᑉ ᐊᖓᔪᖅᑳᖓ ᔭᔅᑎᓐ ᑐᕉᑑ ᐃᖃᓗᖕᓄᙵᐅᓚᐅᕐᒪᑦ ᑎᓴᒻᒥᖅ, ᐋᒐᓯ 1-ᒥᓐ, ᑐᓴᖅᑎᑦᑎᔭᖅᑐᖅᖢᓂ ᐱᑕᖃᓕᕐᓂᖓᓂᒃ ᑐᕙᐃᔪᐃᑦᑐᖅ ᑕᕆᐅᕐᒥᐅᑕᓂᒃ ᓴᐳᔾᔨᕝᕕᒃᓴᒥᒃ. ᑐᕙᐃᔪᐅᑦᑐᖅ, ᖃᐅᔨᒪᔭᐅᖕᒥᔪᖅ “ᑭᖑᓕᖅᐹᖅ ᓯᑯᖃᕐᕕᒃᓴᖅ,” ᐃᓱᒪᒋᔭᐅᓂᖓᓄᑦ ᐊᐳᑎᑕᖃᐃᓐᓇᐅᔭᕐᓂᐊᕐᓂᖓᓂᒃ ᐊᕐᕌᒍᓕᒫᖅ ᐃᓗᐊᒍᑦ ᑭᓯᐊᓂ 2050 ᑎᑭᒃᑯᓂ.

ᑐᕉᑑᑉ ᐳᓛᕐᓂᖓ ᓇᓗᓇᐃᒃᑯᑎᐅᓚᐅᕆᕗᖅ ᐱᐊᓂᒃᑕᐅᓂᖓᓂᒃ ᐆᒪ ᑕᓪᓗᕈᑎᐅᑉ ᐃᒪᖓ ᑲᓇᑕᒥ ᑕᕆᐅᕐᒥᐅᑕᓂᒃ ᓴᐳᔾᔨᕕᐅᓂᐊᕐᓂᖓᓂᒃ ᐅᑯᑎᒎᓇᖅ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓄᑦ ᐃᑲᔫᓯᐊᖅᑖᕈᓐᓇᐅᑎᖏᓐᓄᓪᓗ ᐊᖏᕈᑎᓂᒃ ᐊᑎᓕᐅᖅᑕᐅᓚᐅᖅᑐᓂᒃ ᑎᓴᒻᒥᐅᑉ ᐅᓪᓛᖓᓂᒃ.

ᑖᒃᑯᐊ ᑲᑎᖢᑎᒃ ᐊᖏᓂᖃᓪᓗᐊᖅᑐᖅ 427,000 ᑭᑉᐹᕆᒃᑑᑎᑦ ᑭᓛᒥᑕᔅ, ᑕᐃᒪᓐᓇᓗ ᐋᑐᕚ ᐱᔭᕆᐊᖃᕐᓯᒪᔭᖏᑦ ᓴᐳᔾᔨᓯᒪᓂᕐᒥᒃ 10 ᐳᓴᓐᑎᒥ ᑲᓇᑕᐅᑉ ᑕᕆᐅᖏᓐᓂᑦ 2020 ᑎᑭᓚᐅᕐᑎᓐᓇᒍ.

ᓴᐳᔾᔨᓯᒪᓂᖅ ᓄᑖᓂᒃ ᖃᓄᐃᓕᐅᖅᑎᑦᑎᑦᑕᐃᓕᓇᔭᖅᑐᑦ ᐊᕐᕌᒍᑦ ᑕᓪᓕᒪᑦ ᑎᑭᓪᓗᒋ, ᐃᓄᐃᑦ ᐊᖑᓇᓱᒍᓐᓇᐃᓐᓇᕐᓂᐊᖅᖢᑎᒃ ᑕᒫᓂ.

“ᑖᒃᑯᓂᖓ ᐃᓂᒋᔭᐅᒻᒪᕆᒃᑐᓂᒃ, ᓴᐳᑎᓯᒪᓂᐊᕐᑕᕗᑦ ᐊᕙᑎᕗᑦ ᓯᕗᓂᒃᓴᑦᑎᓐᓄᑦ ᒪᑯᐊ ᐃᓄᐃᑦ ᐱᔪᓐᓇᕐᓂᖏᑦ ᓯᕗᒧᑦ ᐱᓇᓱᐊᖅᑎᓪᓗᒋᑦ ᐊᒻᒪᓗ ᓴᐳᔾᔨᓯᒪᓂᕐᒥᑦ ᐃᓄᐃᑦ ᐃᓕᖁᓯᑐᖃᖏᓐᓂᒃ ᐊᑐᕈᓐᓇᕐᓂᕐᒥᒃ, ᐅᖃᐅᓯᕐᓂᒃ ᐊᒻᒪ ᐃᓕᖁᓯᕐᓂᒃ,” ᑐᕉᑑ ᐅᖃᓚᐅᕐᑐᖅ ᐋᒐᓯ 1-ᒥᑦ ᑐᓴᒐᒃᓴᓕᐅᕐᓇᐅᑎᓪᓗᒍ ᐅᕙᓂ ᓄᓇᕗᑦ ᓯᓚᑦᑐᖅᓴᕐᕕᒃᒥᑦ.

ᑲᓇᑕᐅᑉ ᐊᖓᔪᖅᑳᖓ ᐳᓛᕐᓂᖓ ᐃᓚᖃᓚᐅᕐᒥᔪᖅ ᐃᑲᔫᑎᒃᓴᖅᑕᖃᕐᓂᕐᐊᕐᓂᕐᒥ ᑐᓴᖅᑎᑦᑎᓂᕐᒥᒃ ᐊᑐᖅᑕᐅᓂᐊᖅᑐᓂᒃ ᓴᐳᔾᔭᐅᓯᒪᔪᓂᒃ ᑕᕆᐅᕐᒥᐅᑕᓂᒃ: $190 ᒥᓕᐊᓐ ᐊᕐᕌᒍᓄᑦ 7-ᓄ ᐊᑐᕐᑕᐅᓂᐊᖅᑐᓂᒃ ᐃᒃᓴᕐᕕᓕᐅᕐᓂᕐᒧᑦ, ᓂᕿᓕᕆᕝᕕᒃᓴᓄᑦ ᐊᒻᒪ ᐊᔪᕈᓐᓃᕐᕕᒃᓴᓄᑦ ᑕᓪᓕᒪᓄᑦ ᓄᓇᓕᖕᓄᑦ ᑖᔅᓱᒥᖓ ᖃᓂᒃᓴᓛᓄᑦ: ᐊᐅᓱᐃᑦᑐᖅ, ᖃᐅᓱᐃᑦᑐᖅ, ᐃᒃᐱᐊᕐᔪᒃ, ᒥᑦᑎᒪᑕᓕᒃ ᐊᒻᒪ ᑲᖏᖅᑐᒑᐱᒃ.

ᐅᓇ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓄᑦ ᐃᑲᔫᓯᐊᖅᑖᕈᓐᓇᐅᑎᖏᓐᓄᓪᓗ ᐊᖏᕈᑎ ᑕᒪᐃᓐᓄᑦ ᓴᐳᔾᔭᐅᓯᒪᔪᓄᑦ ᐃᓂᒋᔭᐅᕙᒃᑐᓄᑦ ᐱᔪᓐᓇᖅᑎᑦᑎᒍᑎᐅᔪᖅ ᐃᓄᐃᑦ ᑲᒪᔨᐅᓂᐊᕐᓂᖏᓐᓂᒃ, ᑕᐃᒪᓐᓇᓗ ᐃᓚᒋᐊᖅᑕᐅᓯᒪᓪᓗᓂ $55 ᒥᓕᐊᓐᓂᒃ ᐃᓄᖕᓂᑦ ᐊᔪᕈᓐᓃᖅᓴᖅᑎᑦᑎᓂᕐᒧᑦ ᐊᒻᒪ ᐃᖅᑲᓇᐃᔭᖅᑎᑦᑎᓂᕐᒧᑦ.

“ᐊᓱᐃᓛᒃᖤᑕᐃᓐᓇᖅ, ᐃᓄᐃᑦ ᐱᓕᕆᔾᔪᑎᖃᓕᕐᐳᑦ ᐱᒻᒪᕆᒃᒥᑦ ᐱᓕᕆᐊᒧᑦ ᐃᔨᒋᔭᐅᓂᐊᕐᓗᑎᒃ ᐊᒻᒪ ᑐᓵᔨᐅᓂᐊᕐᓗᑎᒃ ᑖᒃᑯᓇᓂ,” ᐅᖃᖅᑐᖅ ᕿᑭᖅᑕᓂ ᐃᓄᐃᑦ ᖃᑐᔾᔨᖃᑎᒌᑦ ᐊᖓᔪᖅᑳᖓ ᐲ. ᔭᐃ. ᐊᕿᐊᕈᒃ.

ᐊᕿᐊᕈᒃ ᑐᓂᓯᓚᐅᕐᑐᖅ ᑲᓇᑕᐅᑉ ᐊᖓᔪᖅᑳᖓᓂᒃ ᐅᔭᕋᖕᒥᑦ ᓴᓇᙳᐊᕐᓯᒪᔪᒥᒃ ᐃᓄᒃ ᐊᖑᓇᓱᒃᑎᙳᐊᖅ ᓇᐅᒃᑭᐊᓕᒑᙳᐊᖅᑐᒥᒃ ᕿᓚᓗᒐᕐᒥᑦ, ᐅᖃᖅᖢᓂ ᐃᖅᑲᐃᑎᒍᑎᒋᖃᑦᑕᕐᓂᐊᕐᒪᒍ “ᐃᓄᐃᑦ ᐊᒃᑐᐃᓂᖃᕐᓂᖏᓐᓂᒃ ᑕᒪᑐᒥᖓ ᑕᕆᐅᕐᒥᑦ.”

ᑲᓇᑕᐅᑉ ᐊᖓᔪᖅᑳᖓ ᑐᕉᑑ ᑎᓴᒻᒥᐅᑉ ᐅᓐᓄᒃᓴᖓᓂᒃ ᐃᒃᐱᐊᕐᔪᓕᐊᓕᒑᓚᐅᕐᑐᖅ, ᑕᓪᓗᕈᑎᐅᑉ ᐃᒪᖓᓄᑦ ᐃᓯᕆᐊᕐᕕᒃᒧᑦ, ᐳᓛᕆᐊᕐᓗᓂ ᕕᒃᑐ ᐸᐃᒥᑦ ᐊᒻᒪᓗ ᓄᓇᓕᖕᓂᑦ ᓂᕆᕕᒡᔪᐊᖃᑕᐅᓂᐊᕐᓗᓂ.

ᑎᓴᒻᒥᐅᑉ ᐅᓐᓄᖓᓂᒃ, ᑐᕌᑑ ᐅᑎᓚᐅᕐᑐᖅ ᐃᖃᓗᖕᓂᑦ ᑐᓴᖅᑎᑦᑎᖃᑕᐅᔭᖅᑐᕐᖢᓂ ᓄᓇᕗᑦᒧᑦ ᓕᐳᕈᒃᑯᓐᓄᑦ ᓂᕈᐊᒐᒃᓴᐅᓂᐊᖅᑐᒥᒃ, ᒦᒐᓐ ᐱᔪ-ᓚᐃᐅᓪ.

ᓄᓇᕗᒧᑦ ᐳᓛᖅᑎᓪᓗᒍ, ᑲᓇᑕᐅᑉ ᐊᖓᔪᖅᑳᖓ ᓈᒻᒪᒃᓴᙱᓕᐅᕈᑎᓂᒃ ᑐᓴᖅᑎᑕᐅᑲᑕᓚᐅᕐᐳᖅ ᐃᒪᓐᓇ ᐳᓛᕋᔪᖕᓂᖓᓂᒃ ᓄᓇᕗᒧᑦ, ᑕᐅᑐᙳᐊᖅᖢᒍᓕ ᑭᖑᓪᓕᐅᓚᐅᕐᑐᖅ ᑲᓇᑕᐅᑉ ᐊᖓᔪᖅᑳᕆᓚᐅᕐᑕᖓ ᓯᑏᕙᓐ ᕼᐋᐳ, ᑖᓐᓇᓕ ᐱᓇᓱᐊᕈᓯᓕᒫᖅ ᐅᑭᐅᕐᑕᖅᑐᕐᒦᓪᓇᓱᖃᑦᑕᓚᐅᕐᑐᖅ ᐊᐅᔭᑕᒫᑦ.

ᑭᓯᐊᓂᓕ ᑐᕉᑑ ᓄᓇᕗᒻᒥᐅᓂ ᐅᔾᔨᕈᓱᖕᓂᕐᓴᐅᖁᔨᓚᐅᕐᑐᖅ ᖃᓄᖅ ᐱᓕᕆᓯᒪᓂᖏᓐᓂᒃ ᒐᕙᒪᖏᑦ ᐅᑭᐅᕐᑕᖅᑐᕐᒥᓐ, ᐱᓗᐊᕐᑐᒥᑦ ᐅᑯᑎᒎᓇᖅ ᐃᓄᐃᑦ-ᒐᕙᒪᑐᖃᒃᑯᑦ ᐱᓕᕆᖃᑎᒌᖕᓂᕐᒧᑦ ᑲᑎᒪᔨᕋᓛᑦ ᐋᕿᒃᑕᐅᓚᐅᕐᑎᓪᓗᒋᑦ 2017-ᒥᑦ.

“ᐱᓕᕆᖃᑎᒌᖕᓂᕐᑕᖃᓕᕐᒪᑦ ᒐᕙᒪᑐᖃᒃᑯᓐᓂᒃ ᐊᒻᒪᓗ ᐃᓄᐃᑦ ᑐᙵᕕᖓᒍᑦ ᐃᓱᒪᒌᖃᑦᑕᐅᑎᑦᑎᐊᕐᓂᕐᒥᒃ ᐊᒻᒪ ᐱᓕᕆᖃᑎᒌᖕᓂᕐᒥ,” ᑐᕉᑑ ᑐᓴᒐᒃᓴᓕᐅᕐᑎᓄᑦ ᐅᖃᓚᐅᕐᑐᖅ ᑎᓴᒻᒥᐅᑉ ᐅᓪᓛᖓᓂᒃ.

ᒫᓐᓇᓵᕐᓕ ᑕᒪᓐᓇ ᓴᕿᓐᓂᕐᓴᐅᓚᐅᕐᑐᖅ ᒐᕙᒪᒃᑯᑦ ᒪᒥᐊᑎᓪᓗᒋᑦ ᐊᐅᓚᑦᑎᑦᑎᑦᑎᐊᓚᐅᙱᓐᓂᖏᓐᓂᒃ ᐳᕙᒡᓗᒃᑐᓕᕆᓂᐅᓚᐅᕐᓯᒪᔪᖅ 1940-ᓗ 1960-ᓗ ᐊᑯᓐᓂᖓᓂᒃ, ᐊᒻᒪᓗ ᓄᖑᑎᑦᑎᔪᒪᓂᖏᑦ ᑖᔅᓱᒥᖓ ᐋᓐᓂᐊᒥᒃ ᐅᑭᐅᕐᑕᖅᑐᕐᒥᑦ 2030 ᑎᑭᓚᐅᕐᑎᓐᓇᒍ.

ᑭᓯᐊᓂᓕ, ᑐᕉᑑ ᐅᖃᒃᑲᓐᓂᕐᑐᖅ, “ᐱᓕᕆᔭᒃᓴᖅᑕᖃᒃᑲᓐᓂᒻᒪᕆᖕᒪᑦ ᓱᓕ.”

Share This Story

(0) Comments

Join the Conversation

Your email address will not be published. Required fields are marked *

*