ᑲᓇᑕᐅᑉ ᐊᖓᔪᖅᑳᖓ ᒪᒥᐊᑉᐸᖅ ᐃᒻᒪᑲᓪᓚᒃ ᐱᑦᑎᐊᖅᑕᐅᕙᓚᐅᙱᑦᑐᓄᑦ ᐃᓄᖕᓄᑦ ᐳᕙᒡᓗᒋᐊᕐᓯᒪᔪᓂᒃ

“ᐅᓪᓗᒥ ᐅᕙᓃᑉᐳᖓ ᒪᒥᐊᑦᑐᒪᓪᓗᖓ”

ᑲᓇᑕᐅᑉ ᐊᖓᔪᖅᑳᖓ ᔭᔅᑎᓐ ᑐᕉᑑ ᐅᖃᓪᓚᖃᑎᖃᖅᑐᖅ ᓕᔨ ᐃᐳ-ᔪᐊᒃᒥ ᑰᔾᔪᐊᕐᒥᐅᑕᕐᒥᒃ ᐊᒻᒪ ᐋᓚᓯ ᔫᒥ ᓂᐊᖁᙴᒥᐅᑕᖅ, ᐅᖃᓪᓛᓂᒃᑎᓪᓗᒍ ᒐᕙᒪᒃᑯᑦ ᒪᒥᐊᓐᓂᖏᓐᓂᒃ ᐊᐅᓚᑎᑦᑎᐊᓚᐅᕐᓯᒪᙱᓐᓂᖏᓐᓂᒃ ᐳᕙᒡᓗᒋᐊᕐᓯᒪᔪᓂᒃ ᐃᓄᖕᓂᑦ ᖃᓪᓗᓈᓄᑦ 1940-ᖏᓐᓂᒃ 1960-ᖏᓐᓄᑦ, ᐃᖃᓗᖕᓂᑦ ᑕᓪᓕᕐᒥᖅ, ᒫᑦᓯ 8-ᒥᑦ. ᐃᐳ-ᔪᐊᒃ ᐅᖃᓚᐅᕐᑐᖅ ᖃᓪᓗᓈᑦ ᓄᓇᖓᓄᐊᓚᐅᕐᓯᒪᓂᖓᓂᒃ ᐊᓈᓇᖓᑕ ᐊᒫᖅᖢᓂᐅᒃ ᓱᕈᓯᓛᖑᑎᓪᓗᒍ ᐳᕙᒡᓗᖕᓇᒧᑦ, ᐅᓇᓕ ᔫᒥ ᐃᖅᑲᐅᒪᔪᖅ ᐊᐃᑉᐸᖓ ᐊᐅᓪᓚᓚᐅᕐᓯᒪᓂᖓᓂᒃ ᐳᕙᒡᓗᒃᖢᓂ 1967-ᒥ. ᐅᑎᓚᐅᕐᓯᒪᙱᑦᑐᖅ, ᕿᒪᐃᓯᒪᓪᓗᓂ ᑖᔅᓱᒥᖓ ᓱᕈᓯᖏᓐᓂᒡᓗ ᑖᒃᑯᐊᓗ ᐊᒃᓱᕈᕈᓘᔭᖅᐸᒃᖢᑎᒃ. (ᐊᔾᔨᓕᐅᕆᔨ ᐱᐊᑦ ᐳᕋᐅᓐ)

By ᔭᐃᓐ ᔪᐊᔾ

To read this story in English, see Prime minister apologizes for historic mistreatment of Inuit TB patients

ᐃᓄᐃᑦ ᐃᖃᓗᖕᓂ ᑐᓵᓚᐅᕐᑐᑦ ᑲᓇᑕᐅᑉ ᐊᖓᔪᖅᑳᖓᓂ ᔭᔅᑎᓐ ᑐᕉᑑ ᒪᒥᐊᔾᔪᑎᐊᓂᒃ ᑕᓪᓕᕐᒥᖅ, ᒫᑦᓯ 8, ᒐᕙᒪᑐᖃᒃᑯᑦ ᐊᐅᓚᑎᑦᑎᐊᓚᐅᕐᓯᒪᙱᓐᓂᖏᓐᓂᒃ ᐳᕙᒡᓗᑲᑕᒃᑎᓪᓗᒋᑦ ᐃᓄᐃᑦ ᒫᓂ 1940-ᖏᓐᓂᒃ 1960-ᖏᓪᓗ ᐊᑯᓐᓂᖓᓐᓂᒃ ᐸᑦᑕᒃᑐᓚᐅᕐᑐᑦ, ᐃᕿᖃᑦᑕᐅᑎᓪᓗᑎᒃ ᐊᒻᒪ ᖁᕝᕕᐅᕐᖢᑎᒃ.

ᓱᕋᒃᑕᐅᓂᑯ ᒐᕙᒪᑐᖃᒃᑯᑦ ᐱᓕᕆᐊᖓ ᖃᓪᓗᓈᓂᑦ ᐋᓐᓂᐊᕐᕕᓕᐊᖅᑎᑦᑎᓂᖅ ᐳᕙᒡᓗᒃᑐᓄᑦ ᐃᒪᐃᓕᒍᑎᐅᓚᐅᕐᐳᖅ “ᓱᕋᐃᒍᑎᐅᓪᓗᓂ” ᐊᒻᒪ “ᑕᒻᒪᕐᓯᒪᔪᒃᑯᑦ” ᐃᓄᒋᐊᒃᑐᒦᓕᖅᑎᑕᐅᓯᒪᓂᖅ, ᑐᕉᑑ ᐅᖃᓚᐅᕐᑐᖅ 100 ᐅᖓᑖᓂᑦ ᐃᓄᖕᓂᑦ ᐃᓄᐃᑦ ᓄᓇᖓᓂᙶᖅᑐᓂᒃ ᑎᓴᒪᓂᒃ ᐊᕕᒃᑐᖅᓯᒪᓂᒃᑰᖓᔪᓂᒃ.

ᑐᕉᑑ, ᐅᖃᓪᓚᒃᖢᑎ ᐅᓪᓗᕐᒥ ᑭᖑᕙᕆᐊᖅᓯᒪᓪᓗᓂ ᐃᖃᓗᐃᑦ ᕗᕉᐱᓱ ᑐᔪᕐᒥᕕᐊᓂᒃ ᐱᕐᓯᓚᐅᕐᓂᖓᓄᑦ ᓄᓇᕗᑦ ᐊᖓᔪᖅᑳᖃᖅᕕᖓ, ᐱᐅᒃᓴᙱᓐᓂᕋᓚᐅᕐᑐᖅ ᐃᓄᐃᑦ ᐊᐅᓪᓚᖅᑎᑕᐅᕙᓚᐅᕐᓂᖏᓐᓂᒃ ᐳᕙᒃᓗᒃᑐᓕᕆᕝᕕᖕᓄᑦ—ᐊᒥᓱᓪᓗ ᑖᒃᑯᓇᙵᑦ ᐅᑎᙲᓐᓇᕐᓯᒪᔪᑦ.

ᑕᐃᓚᐅᕐᑕᖓ “ᑲᙳᓇᕐᓂᐅᔪᖅ ᑲᓇᑕᐅᑉ ᖃᓄᐃᑉᐸᓪᓕᐊᓂᖓᒍ” ᐊᒻᒪ ᐅᖃᒻᒪᕆᒃᖢᓂ ᐱᐅᓂᕐᓴᒥᑦ ᐱᓕᕆᐊᖃᕋᔭᕐᓂᖏᓐᓂᒃ ᓯᕗᓂᑦᑎᓐᓂᒃ, ᐅᖃᒃᑲᓐᓂᖅᖢᓂ ᒐᕙᒪᒃᑯᑦ ᐱᓇᓱᐊᕐᓂᖓᑦ ᐳᕙᒡᓗᖕᓇᖅ ᐅᑭᐅᕐᑕᖅᑐᕐᒥᑦ ᐱᑕᖃᕈᓐᓃᖅᑎᑕᐅᓇᓱᖕᓂᖓᓂᒃ 2030 ᑎᑭᒐᓱᖕᓂᖓᓂᒃ.

ᑐᕉᑑ ᐅᖃᓚᐅᕐᑐᖅ ᑭᖑᓂᑦᑎᓐᓂᒃ, ᐃᓄᐃᑦ ᐸᕐᓇᒃᓯᒪᕙᓚᐅᙱᒻᒪᑕ ᐊᖏᕐᕋᖏᓐᓂᒃ ᐊᐅᓪᓚᕐᓂᐊᖅᑎᓪᓗᒋᑦ ᐊᒻᒪᓘᓐᓃᑦ ᑕᕝᕙᐅᕗᑏᖅᑎᑕᐅᓇᑎᒃ. ᐊᒥᓱᑦ ᓱᕈᓰ ᐊᖓᔪᖅᑳᖏᓐᓂᒃ ᕿᒪᐃᑎᑕᐅᔪᑦ ᐊᒻᒪᓗ ᐊᒥᓱᑦ ᐃᓐᓇᑐᖃᐃᑦ ᐊᖏᕐᒃᕋᖏᓐᓂᑦ ᐊᐅᓪᓚᖅᑎᑕᐅᓪᓗᑎᒃ.

“ᑕᐃᔅᓱᒪᓂ ᐃᓄᑑᓐᓇᕐᓂᐅᓚᐅᕐᓯᒪᔪᖅ, ᓇᓗᓇᕐᓂᐅᓪᓗᓂ ᐊᒻᒪ ᐋᓐᓂᐊᑲᑕᖕᓂᐅᓪᓗᓂ,” ᑐᕉᑑ ᐅᖃᖅᑐᖅ.

ᑕᒪᒃᑯᐊ ᑕᒻᒪᖅᑕᐅᓯᒪᔪᑦ ᐊᓯᐅᑐᐃᓐᓇᔾᔮᙱᑦᑐᑦ, ᐅᖃᖅᑐᖅ.

“ᐅᓪᓗᒥ ᐅᕙᓃᑉᐳᖓ ᒪᒥᐊᑦᑐᒪᓪᓗᖓ.”

ᑐᕉᑑ ᒪᒥᐊᓚᐅᕐᑐᖅ ᒐᕙᒪᒃᑯᑦ ᐃᓱᒪᒋᔭᖃᙱᓗᐊᓚᐅᕐᓯᒪᓂᖏᓐᓂᒃ ᑲᒪᒋᔭᖃᑦᑎᐊᙱᖢᑎᒡᓗ ᐃᓄᖕᓂ ᐊᒻᒪ ᒪᒥᐊᒃᑲᓐᓂᖅᖢᓂ, ᐅᖃᖅᖢᓂ “ᒪᒥᐊᑉᐳᒍᑦ ᐋᓐᓂᐊᕈᑎᒋᔭᔅᓯᓐᓄᑦ.”

ᓇᓂᓚᐅᕐᓚᕗᑦ

ᐅᖃᒻᒪᕆᓚᐅᕐᑐᖅ “ᓄᑖᒥ ᐱᓕᕆᒋᐊᕈᑎᒥᑦ” ᐱᓕᕆᓕᕐᓗᑎᒃ ᐅᑯᓂᖓ ‘ᓇᓂᓚᕗᑦ’ ᐱᓕᕆᐊᑎᒍᑦ, ᐃᓄᖕᓄᑦ ᐊᐅᓚᑕᐅᓪᓗᓂ ᐱᓕᕆᐊᒃᓴᖅ, ᐃᒪᐃᓕᐅᕐᓂᐊᖅᖢᑎᒃ, ᐊᓯᖏᓐᓂᒡᓗ, ᐋᕿᒃᓱᐃᓗᑎᒃ ᖃᕋᓴᐅᔭᒃᑯᑦ ᐃᓕᐅᖃᐃᕝᕕᒃᓴᒥᑦ ᐃᓄᖕᓂ ᐊᓯᐅᔨᔭᐅᓂᑯᓂᒃ ᐅᕝᕙᓘᓐᓃᑦ ᑐᖁᔪᕕᓂᕐᓂᒃ ᐳᕙᒡᓗᒋᐊᖅᑐᕐᓯᒪᑎᓪᓗᒋ ᖃᓪᖢᓈᑦ ᓄᓇᖓᓂ.

ᑐᓴᐅᒪᔭᐅᔭᕆᐊᓕᖕᓂ ᐱᓕᕆᐊᖃᕋᓗᐊᖅᑎᓪᓗᒋᑦ, ᐅᖓᑖᒍᒃᑲᓐᓂᖅ ᑮᓇᐅᔭᐃᑦ ᐃᑲᔫᑎᐅᓂᐊᕐᒥᔪᑦ ᓇᓗᓇᐃᔭᖅᑕᐅᓗᑎᒃ ᐃᓗᕕᕆᔭᐅᔪᑦ, ᑎᑎᕋᕐᓯᒪᔪᓂᒃ ᐊᒻᒪ ᐃᖅᑲᐅᒪᓂᕐᒧᑦ ᖃᓄᐃᓕᐅᕈᑎᓄᑦ, ᐊᒻᒪᓗ ᐃᑲᔫᑎᐅᓗᓂ ᐃᓄᖕᓂᑦ ᐃᓚᒋᓚᐅᖅᑕᖏᑦᑕ ᐅᐸᒃᓯᒪᓂᑯᖏᓐᓄᑦ ᐃᓅᔪᓐᓃᕐᕕᕕᓂᖏᓐᓂᒡᓘᓐᓃᑦ ᐅᐸᒍᓐᓇᕐᓗᑎᒃ, ᐅᖃᖅᑐᖅ.

“ᖃᓄᑐᐃᓐᓇᖅ ᐅᑎᖅᑎᑦᑎᔭᒃᓴᐅᙱᑦᑐᖅ ᓂᐱᒋᔭᐅᔪᓂᒃ ᐊᖓᔪᖅᑳᕆᓚᐅᕐᑕᒧᑦ ᐅᕝᕙᓘᓐᓃᑦ ᐃᕿᑦᑎᒃᑲᓐᓂᕆᐊᒃᓴᖅ, ᑭᓯᐊᓂᓕ ᖃᐅᔨᒪᓗᓂ ᐃᓗᕕᖅᑕᐅᕝᕕᖏᓐᓂᒃ ᐱᒋᐊᕈᑎᐅᓂᐊᕐᑐᖅ ᐃᓱᒪᒋᔭᐅᔾᔪᑎᒍᑦ,” ᐅᖃᖅᑐᖅ.

ᐊᕕᒃᑐᕐᓯᒪᓂᒃᑯᑦ ᐃᓄᐃᑦ ᑲᑐᔾᔨᖃᑎᒌᖏᑦ ᑕᒪᑐᒥᐊ ᐊᐅᓚᑦᑎᔨᐅᓂᐊᕐᑐᑦ.

ᑐᕉᑑ ᐅᖃᓚᐅᕐᒥᔪᖅ ᐳᕙᒡᓗᖕᓇᖅ ᐋᓂᐊᖑᓪᓗᓂ ᐃᓄᖕᓂᒃ ᐊᒃᑐᐃᓴᕋᐃᓐᓂᕐᓴᐅᓂᕋᖅᖢᓂᐅᒃ ᖃᓪᓗᓈᓂᓪᓕ, “ᑖᓐᓇᓗ ᐃᓅᓕᓴᐅᑎᑐᐃᓐᓇᕐᒧᑦ ᒪᒥᓴᖅᑕᐅᔪᓐᓇᙱᖢᓂ.”

“ᐱᓕᕆᐊᑦᑕ ᓴᓂᑦᑎᐊᖓᒍᑦ ᐳᕙᒡᓗᖕᓇᖅ ᓄᖑᑎᒐᓱᖕᓂᒃᑯᑦ, ᐃᑲᔫᑎᒃᓴᓂ ᐱᔭᐅᔭᕆᐊᓕᖕᓂ ᑐᓂᓯᓂᐊᖅᑐᒍᑦ, ᐃᓚᖃᕐᓗᑎᒃ $640 ᒥᓕᐊᓐ ᑖᓚᓂ ᐃᒡᓗᒃᓴᓄᑦ,” ᐅᖃᖅᑐᖅ, ᐅᖃᐅᓯᖃᖅᖢᓂ ᐃᑲᔫᑎᒃᓴᓂᒃ ᓯᕗᓂᑦᑎᐊᖓᒍᑦ ᐅᖃᐅᓯᐅᓂᑯᓂᒃ ᒐᕙᒪᖏᓐᓂᒃ.

ᐅᓇ ᐃᓚᖃᕐᑐᖅ $240 ᒥᓕᐊᓐ ᑖᓚᓂ ᐊᕐᕌᒍᓄᑦ ᖁᓕᓄᑦ ᐃᒡᓗᓕᐅᕐᓂᕐᒧᑦ ᓄᓇᕗᒥᑦ ᑖᒃᑯᐊ ᒐᕙᒪᖏᑦ ᐅᖃᐅᓯᕆᓚᐅᕐᓯᒪᔭᖓᑦ 2017-ᒥᑦ, ᐊᒻᒪᓗ $400 ᒥᓕᐊᓐ ᑖᓚᓂ ᐃᒡᓗᓕᐅᕐᓂᕐᒧᑦ ᐊᓯᖏᓐᓄᑦ ᐱᖓᓱᓄᑦ ᐊᕕᒃᑐᖅᓯᒪᓂᒃᑯᑦ ᐃᓄᐃᑦ ᓄᓇᖓᓂ, ᐊᒻᒪᑦᑕᐅᖅ ᐊᕐᕌᒍᓄᑦ ᖁᓕᓄᑦ ᐊᑐᖅᓂᐊᖅᖢᓂ.

ᒐᕙᒪᑐᖃᒃᑯ ᐊᒻᒪ ᑐᓂᓯᓂᐊᕐᓂᕋᕐᓯᒪᔪᑦ $27.5 ᒥᓕᐊᓐ ᑖᓚᓂ ᐊᕐᕌᒍᓂᒃ ᑕᓪᓕᒪᓄᑦ ᐳᕙᒡᓗᒃᑐᓕᕆᓂᕐᒧᑦ ᐃᓄᐃᑦ ᓄᓇᖓᓂᑦ.

ᒪᒥᐊᓐᓂᕐᒥᑦ ᐃᖃᓗᖕᓂᑦ ᐃᙱᖅᑐᖃᓚᐅᕐᑐᖅ ᐃᓄᒃᓱᒃ ᐃᓕᓐᓂᐊᕐᕕᐊᓗᒃᒥᑦ ᐃᙱᖅᑎᓂᒃ ᐱᒋᐊᕈᑎᖃᖅᖢᑎᒃ “ᐆ ᑳᓇᑖᒥᑦ” ᐃᓄᒃᑎᑐᑦ ᐊᒻᒪ ᖃᓪᓗᓈᑐᑦ.

”ᖁᕝᕕᐅᕐᑐᐃᓐᓇᐅᓚᐅᕐᑐᑦ ᑕᕝᕙᓂ”

ᑐᙵᓱᒃᑎᑦᑎᔨᐅᓪᓗᓂ ᓄᓇᕗᑦ ᑐᙵᕕᒃ ᐊᖓᔪᖅᑳᖓ ᐊᓗᑭ ᑰᑦᑎᖅ, ᐃᓄᒃᑎᑐᑦ ᐅᖃᓪᓚᒃᖢᓂ, ᑖᓐᓇ ᖃᓄᐃᓕᐅᕐᓂᖅ ᐃᓄᐃᑦ ᓯᕗᓕᐅᕐᑎᖏᓐᓂᒃ ᑎᑭᒍᑎᐅᓚᐅᕐᑐᖅ ᑎᓴᒪᓂᑦ ᐊᕕᒃᑐᖅᓯᒪᓂᒃᑯᑦ ᐃᓄᐃᑦ ᓄᓇᖏᓐᓂᒃ.

ᐃᓕᓴᐱ ᑕᐃᕕᑎ ᐊᓂᖕᒥᐅᖅ ᐃᖃᓗᖕᓂᕐᒥᐅᑕᖅ, ᖁᓪᓕᕐᒥᑦ ᑲᒪᒋᔭᖃᐃᓐᓇᓚᐅᕐᑐᖅ ᖃᓄᐃᓕᐅᕐᓇᒥᒃ, ᐃᓱᓕᑎᑦᑎᓚᐅᕐᑐᖅ ᐃᔾᔪᔪᓂᒃ ᐃᙱᐅᑎᒥᒃ, ᑐᙵᓱᒃᑎᑦᑎᓪᓗᓂ ᑭᒃᑯᓕᒫᓂᒃ ᐃᙱᖁᔨᓪᓗᓂ “What a day that will be.”

ᐅᖃᓚᐅᕐᑐᖅ ᖃᓄᐃᒻᒪᑦ ᑖᔅᓱᒥᖓ ᓂᕈᐊᕐᓂᖓᓂ ᐱᓯᕐᒥᒃ, ᓂᕆᐅᖕᓂᕐᒨᕐᓂᕋᖅᖢᓂᐅᒃ, ᐃᖅᑲᐅᒪᓪᓗᓂ ᑰᑦᑎᐅᑉ ᑭᖑᓕᖅᐹᖏ ᐅᖃᐅᓯᕆᓚᐅᕐᑕᖏᑦ ᐅᐸᒍᑎᓯᒪᔪᓄᑦ: “ᓂᕆᐅᓚᐅᕐᑕ.”

ᒪᒥᐊᕌᓪᓚᓚᐅᕐᑎᓪᓗᒍ, ᑐᕉᑑ ᐅᖃᓪᓚᖃᑎᖃᑲᑕᓚᐅᕐᑐᖅ ᐅᑕᕿᔪᕕᓂᕐᓂ ᐃᑲᕐᕋᓂᒃ 24-ᒥ ᑎᑭᓐᓂᐊᕐᓂᖓᓂᒃ.

“ᐊᑯᓂᐊᓗᒃ ᑕᐃᒪᐃᑦᑕᕆᐊᖃᕐᓯᒪᔪᖅ,” ᓄᓇᕗᒧᑦ ᓯᕗᓕᐅᕐᑎᕕᓂᖅ, ᐄᕙ ᐋᕆᐊᒃ ᐅᖃᓚᐅᕐᑐᖅ ᐱᐊᓂᒃᑎᓪᓗᒋᑦ. “ᖁᕝᕕᐅᕐᑐᐃᓐᓇᐅᓚᐅᕐᑐᑦ ᑕᕝᕙᓂ, ᑕᒪᓐᓇᓗ ᓇᓗᓇᙱᓚᖅ ᓄᓇᕗᒥᑦ ᐃᓄᖕᓄᑦ ᐱᒻᒪᕆᐅᓂᖓᓂᒃ ᐅᖓᑖᓄᓪᓗ.”

ᐋᕆᐊᒃ ᐊᓈᓇᖓ ᒪᕐᕈᐃᖅᖢᓂ ᐳᕙᒡᓗᒃᖢᓂ ᐊᐅᓪᓚᖅᓯᒪᔪᖅ.

“ᐅᑎᒪᐅᕐᓯᒪᔪᖅ, ᑭᓯᐊᓂᓕ ᐊᓈᓇᖓ ᐊᒻᒪ ᓂᖏᐅᖓ ᐅᑎᓚᐅᕐᓯᒪᙱᑦᑐᑦ. ᒫᓐᓇ ᓱᓕ ᕿᓂᑲᑕᒃᑕᕗᑦ ᐃᓗᕕᖏ,” ᐋᕆᐊᒃ ᐅᖃᖅᑐᖅ.

“ᐅᓇ ᖃᓄᐃᓕᐅᕐᓂᖅ ᐃᖢᐊᕐᓯᕚᓪᓕᕈᑎᐅᓂᐊᕐᑐᖅ ᐊᒥᓱᓄ.”

“ᒪᒥᓴᕐᐸᓪᓕᐊᔪᓐᓇᕐᓂᐊᓕᕐᑐᑦ,” ᓄᓇᕗᑦ ᓯᕗᓕᐅᕐᑎᖓ ᔫ ᓴᕕᑲᑖᖅ ᐅᖃᓚᐅᕐᑐᖅ. “ᒪᒥᐊᓐᓂᐅᔪᖅ ᐅᖃᕐᓯᒪᑦᑎᐊᖅᑐᖅ ᐊᒻᒪ ᐱᒻᒪᕆᐅᓪᓗᓂ. ᖁᔭᓕᔪᖓ ᑎᑭᑦᑐᓐᓇᓚᐅᕐᒪᑦ ᐅᖃᕆᐊᖅᑐᖅᖢᓂ ᓇᖕᒥᓂᖅ.”

ᑲᓇᑕᒥ ᒪᓕᒐᓕᕆᔨᕕᓂᖅ ᔮᒃ ᐊᓇᕈᐊᖅ, ᐊᓈᓇᖓ ᑎᒍᐊᕐᓯᖓ ᐊᒻᒪᓗ ᐊᓈᓇᒃᓴᖓ ᐳᕙᒡᓗᖕᓴᒧᑦ ᐃᓅᔪᓐᓃᓚᐅᕐᓯᒪᔫᒃ ᖃᓪᓗᓈᓂ 1950-ᖏᓐᓂᒃ, ᐅᖃᖅᑐᖅ ᑐᕌᑑ ᒪᒥᐊᓐᓂᕆᔭᖓ “ᐱᓪᓚᕆᐅᖂᔨᖕᒪᑦ” ᐊᒻᒪᓗ ᐃᒻᒥᓄ ᐃᖢᐊᖅᓯᕚᓪᓕᕈᑎᐅᓂᐊᖅᖢᓂ.

ᐃᑲᔫᑎᒃᓴᖅᑕᖃᙱᑦᑐᖅ ᓄᑖᓂᒃ ᐊᑐᐊᒐᕐᓂᒡᓘᓐᓃᑦ

ᑭᓯᐊᓂᓕ ᐃᓚᖏᑦ ᓈᒻᒪᒃᓴᓚᐅᙱᑦᑐᑦ ᑕᒪᓐᓇ ᑭᖑᕙᓗᐊᓚᐅᕐᓂᕋᖅᖢᒍ.

ᑎᐅᕆ ᐊᐅᑦᓚ ᐅᖃᓚᐅᕐᑐᖅ ᑐᓴᐅᒪᔾᔪᑎᓕᕆᓂᒃᑯᑦ ᐃᒪᓐᓇ, ᑖᓐᓇ ᒪᒥᐊᓐᓂᖅ ᐊᑖᑕᖓᓄᑦ ᑐᕌᖓᒋᐊᖃᓚᐅᕐᓂᕋᖅᑕᖓ, ᒪᕐᕉᖕᓂ ᒥᑭᑦᑑᖕᓂ ᕿᑐᕐᖓᖃᖅᖢᓂ, ᓄᓇᐊᖓ ᓯᕗᓪᓕ ᐃᓅᔪᓐᓃᓚᐅᕐᓯᒪᖕᒪᑦ, ᐊᒻᒪᓗ ᐃᑦᑐᕆᔭᐅᓚᐅᕐᓯᒪᔪᖅ, ᐊᒃᑲᖓᓗ ᐊᒻᒪ ᐊᑦᑕᖏ, “ᐅᓇ ᒪᒥᐊᓐᓂᖅ ᐃᓚᖃᙱᓪᓗᓂ ᐊᑐᐊᒐᓂᒃ ᐊᓯᙳᖅᑐᖃᙱᖢᓂ ᐅᕝᕙᓘᓐᓃᑦ ᑮᓇᐅᔭᓕᕆᓂᖅᑕᖃᕋᓂ ᑖᓐᓇ ᐅᖃᐅᓯᑐᐃᓐᓇᐅᖂᔨᔪᖅ. ᐃᓅᓪᓗᖓ ᐅᑕᕿᒐᒪ ᓱᓕ ᐋᕿᒋᐊᕈᑎᐅᔪᓐᓇᕈᑎᐅᓂᐊᕐᑐᓂᒃ.”

ᐅᖃᓪᓛᓂᒃᑎᓪᓗᒍ ᒪᒥᐊᓐᓂᕐᒥᑦ ᐅᖃᓚᐅᕐᑐᖅ ᑐᓴᒐᒃᓴᓕᕆᔨᓄᑦ ᐋᑐᕚ ᑲᔪᓯᓂᐊᕐᓂᕋᖅᖢᓂᐅᑦ ᐱᖁᑎᑖᖅᑎᑦᑎᒃᑲᓐᓂᕐᓂᕐᒥᒃ ᐊᒻᒪ ᐃᒡᓗᒃᓴᓂᒃ ᐃᓄᖕᓄᑦ. ᑭᓯᐊᓂᓕ ᐅᖃᕆᓪᓗᓂ ᒪᒥᐊᓐᓂᖓ ᑐᕌᖓᓗᐊᕐᓂᕋᖅᖢᓂᐅᒃ ᐅᓪᓗᒥᒧ.

ᑐᓴᒐᒃᓴᓕᕆᓂᕐᒥᒃ, ᐊᐱᖁᑎᑕᖃᓚᐅᕐᒥᔪᖅ ᖃᓪᓗᓈᓂᑦ ᑐᓴᒐᒃᓴᓕᐅᕐᑎᓂᒃ ᑐᕌᑑᑉ ᒪᓕᒐᓕᕆᓂᒃᑯᑦ ᐱᓕᕆᐊᒃᑦᓴᖏᓐᓂᒃ ᖃᓪᓗᓈᓂᑦ: ᓄᖃᕐᓂᑰᒃ ᒪᕐᕉᒃ ᒥᓂᔅᑕᐅᕝᕕᖏᓐᓂᒃ ᐊᒻᒪᓗ ᐅᓇ SNS-Lavalin ᖃᓄᐃᓕᐅᕈᓘᔭᕈᑎ.

ᐃᓄᐃᑦ ᑕᐱᕇᑦ ᑲᓇᑕᒥ ᐊᖓᔪᖅᑳᖓ ᓇᐃᑕᓐ ᐅᐱᐊᑦ, ᐅᖃᐅᓯᖃᕐᓯᒪᔪᖅ ᒪᒥᐊᓐᓂᖅ ᐱᒋᐊᕈᑎᐅᓂᖓᓂᒃ ᐱᓕᕆᖃᑎᒌᖕᓂᒃᓴᒧᑦ, ᐊᒻᒪᓗ ᓱᑯᓪᓗᓂᒋᑦ ᑐᓴᒐᒃᓴᓕᐅᕐᑎᑦ ᐱᔭᒃᓴᖏᓐᓄᑦ ᑕᐅᑐᖕᓂᕐᓴᐅᖁᓪᓗᒋᑦ.

ᐅᐱᐊᑦ ᐅᖃᓚᐅᕐᑐᖅ ᐅᓂᒃᑳᒃᓴᖅᑕᖃᐃᓐᓇᐅᔭᖅᑰᔨᖕᒪᑦ ᐱᒻᒪᕆᐅᓂᒃᓴᓂᒃ ᐃᓄᖕᓂᑦ, ᐅᖃᖅᖢᓂ ᐃᓱᒪᒋᔭᖃᕐᓂᕐᓴᐅᖁᔭᐅᓪᓗᑎᒃ ᓇᓃᓐᓂᖏᓐᓂᒃ ᐊᒻᒪ ᐃᓄᖕᓂᑦ ᑖᒃᑯᐊᓗ ᐅᓂᒃᑲᐅᓯᒃᓴᖃᖅᖢᑎᒃ.

ᑎᑎᕋᖅᑕᐅᓯᒪᔪᓂᒃ ᐱᐊᑦ ᐳᕋᐅᓐᒧᑦ

Share This Story

(0) Comments

Join the Conversation

Your email address will not be published. Required fields are marked *

*