ᕌᑦ ᕼᐋᑦ, ᐊᖓᔪᖅᑳᕆᔭᐅᔪᖅ ᓂᐅᕕᖅᐸᒃᑐᓂ ᐊᒻᒪ ᓂᐅᕕᐊᒃᓴᖃᕐᓂᕐᒥ ᑲᓇᑕᒥ ᑎᑎᖅᑲᕐᓂᐊᕕᖕᒥ (ᓴᐅᒥᖕᒥ), ᐊᒻᒪᓗ ᓇᓕ ᑯᓱᒐᖅ, ᐅᐃᒡᒐᓱᒃ ᔫᓯ ᑯᓱᒐᕐᒥ (ᑕᓕᖅᐱᖕᒥ), ᐅᖃᓪᓚᓚᐅᖅᐳᖅ ᑎᑎᖅᑲᕐᓂᐊᕐᕕᖕᒥ ᓂᐱᙵᑕᕐᒥ ᓴᖅᑭᑕᐅᓂᖓᓂ ᑲᖏᖅᖠᓂᕐᒥ ᔫᓂ 14−ᒥ. (ᐊᔾᔨᓕᐅᖅᑕᐅᔪᖅ ᐳᑐᓕᖕᒧᑦ, ᑐᓂᔭᐅᔪᖅ ᑲᓇᑕᒥ ᑎᑎᖅᑲᕐᓂᐊᕕᖕᒥ)

ᑲᓇᑕᒥ ᑎᑎᖅᑲᕐᓂᐊᕕᖓ ᐅᐱᒍᓱᒃᐳᑦ ᔫᓯ ᑯᓱᒐᕐᒥ

ᓄᑖᖅ ᑎᑎᖅᑲᕐᓂᐊᕐᕕᖕᒥ ᓂᐱᙵᑕᖅ 1−ᒥ 3−ᖑᔪᓂ ᓴᖅᑭᑕᐅᓚᐅᖅᐳᑦ ᑲᓇᑕᒥ ᓄᓇᖃᖅᑳᖅᓯᒪᔪᓄᑦ ᐊᑐᖅᑕᐅᕙᓚᐅᖅᑐᓂ ᑕᖅᑭᖓᓂ

By ᒥᓚᓂ ᕆᑦᓱᑦᒧᑦ

For English version, see Canada Post honours Jose Kusugak

ᐱᖃᓐᓇᕆᔭᐅᔪᑦ ᐊᒻᒪ ᐱᖓᓱᓂ ᐱᐅᓯᖃᑎᒌᖑᔪᓂ ᔫᓯ ᑯᓱᒐᐅᑉ ᐃᓚᖏᓐᓂ ᑲᑎᓚᐅᖅᐳᑦ ᑲᖏᖅᖠᓂᕐᒥ ᔫᓂ 14−ᒥ ᓯᕗᓪᓕᖅᐹᒥ ᑕᑯᓂᕐᒧᑦ ᑎᑎᖅᑲᕐᓂᐊᕕᖕᒥ ᓂᐱᙵᑕᕐᒥ ᐅᐱᒋᔭᖃᕐᓂᕐᒧᑦ ᐊᖑᒻᒥ ᐱᓕᕆᓂᖃᕐᔪᐊᓚᐅᖅᑐᒥ ᓴᖑᑎᑦᑎᓂᐅᔪᒥ ᐊᑐᕐᓂᖃᐅᑎᖓᓐᓂ ᓄᓇᕘᑉ ᓴᓇᔭᐅᓂᖓᓂ.

ᑎᑎᖅᑲᕐᓂᐊᕕᖕᒥ ᓂᐱᙵᑕᖅ, ᑕᑯᒃᓴᐅᑎᑦᑎᔪᒥ ᐊᔾᔨᙳᐊᖑᔪᒥ ᑯᓱᒐᕐᒥ ᐊᒻᒪᓗ ᐊᑎᖓᓂ ᑎᑎᕋᖅᓯᒪᔪᒥ ᐃᓄᒃᑎᑐᑦ, ᓴᖅᑭᑕᐅᓚᐅᖅᐳᖅ 100−ᐸᓗᖕᓄᑦ ᐃᓄᖕᓄᑦ ᓄᓇᓕᖕᓂ ᐊᓐᓂᑭᑕᕐᕕᖕᒥ.

“ᐅᐱᒍᓱᓛᖑᓪᓗᓂ ᐃᓄᖕᒥ ᖃᐅᔨᒪᓚᐅᖅᑕᑦᑎᓐᓂ,” ᐅᖃᓚᐅᖅᐳᖅ ᐊᓖᓴ ᐊᐅᑐᑦ, ᑯᓱᒐᐅᑉ ᐸᓂᖓ.

“ᐃᖅᑲᐅᒪᔪᓐᓇᕐᓂᓕᒫᓐᓂ, ᐱᓕᕆᐊᕆᓚᐅᖅᑕᖓ ᐱᐅᓯᒋᐊᖅᑎᑦᑎᓂᕐᒥ ᐃᓄᖕᓂ ᐃᓅᓯᖏᓐᓂ.”

ᑭᓇᑐᐃᓐᓇᒧᑦ ᑕᑯᓯᒪᙱᓚᑦ ᑎᑎᖅᑲᕐᓂᐊᕕᖕᒥ ᓂᐱᙵᑕᕐᒥ ᑭᓯᐊᓂ ᖃᓄᐃᓐᓂᐅᔪᒥ, ᐃᓚᖃᖅᑐᒥ ᐊᓖᓴᐅᑉ 7−ᓂ−ᐅᑭᐅᓕᒃ ᐃᕐᙳᑕᖓ, ᐊᐱᕇᓐᓇᐅᔭᖅᑐᒥ ᐊᒪᐅᖓᑕ ᒥᒃᓵᓄᑦ.

“ᓴᖅᑭᑎᑦᑎᖕᒪᑕ ᑎᑎᖅᑲᕐᓂᐊᕕᖕᒥ ᓂᐱᙵᑕᕐᒥ, ᐅᕙᓐᓄᑦ ᕿᕕᐊᖅᖢᓂ ᐊᒻᒪ ᐊᐱᕆᕗᖅ, ‘ᐊᑖᑕᐃᑦ ᑭᖕ−ᖑᓚᐅᕐᒫᑦ?’” ᐊᓖᓴ ᐅᖃᓚᐅᖅᐳᖅ ᐃᒡᓚᖅᖢᓂ.

ᒪᕐᕉᒃ ᐸᓂᖏᑦ, ᐳᕆᓐᓴᔅ ᐊᐅᑐᑦ ᐊᒻᒪ ᓚᐃᓚ ᐊᐅᑐᑦ, ᑲᑕᔾᔭᓚᐅᖅᐳᑦ ᖃᓄᐃᓐᓂᐅᔪᒥ ᐊᒻᒪ ᐳᕆᓐᓴᔅ, 16, ᐃᙱᓚᐅᕆᕗᖅ Hey Jude−ᒥ, ᑯᓱᒐᖅ “Beatles−ᑯᓐᓂ ᑐᓴᕐᓂᕆᔭᖃᕐᔪᐊᓚᐅᕐᒪᑦ,” ᐊᓖᓴ ᐅᖃᓚᐅᖅᐳᖅ.

“ᐆᒻᒪᑎᒧᑦ ᐊᒃᑐᐃᓐᓇᕐᔪᐊᓚᐅᖅᐳᖅ, ᑕᐃᑲᓂ ᕿᐊᓱᙳᓇᖅᓯᓚᐅᖅᐳᖅ.”

ᐊᓖᓴᐅᑉ ᐊᑦᑕᖓ ᖁᓪᓕᕐᒥ ᑲᒪᒋᔭᖃᓚᐅᖅᐳᖅ ᖁᕕᐊᓱᖕᓇᐅᑎᓪᓗᒍ ᐊᒻᒪ ᐊᑕᐅᓯᐊᖅᑐᒥ, ᑕᓪᓕᒪᓂ ᑯᓱᒐᐅᑉ ᑭᖑᕚᖏᓐᓂ ᐊᑎᖃᖅᑐᓂ ᑯᓱᒐᕐᒥ ᐅᐱᐅᖅᑲᓪᓗᑎᒃ ᓇᖏᖅᐳᑦ ᐊᔾᔨᓕᐅᖅᑕᐅᓂᕐᒧᑦ ᐊᑎᑯᓗᖕᒥᓂ ᑎᑎᖅᑲᕐᓂᐊᕕᖕᒥ ᓂᐱᙵᑕᖓᓂ.

ᑯᓱᒐᐅᑉ ᐅᐃᒡᒐᓱᖓ, ᓇᓕ ᑯᓱᒐᖅ, ᑲᒥᑕᓇᐅᓚᐅᖅᓯᒪᔪᒥ ᓄᓇᕗᒻᒥ, ᐅᖃᓪᓚᓚᐅᕆᕗᖅᑕᐅᖅ ᖃᓄᐃᓐᓂᐅᔪᒥ.

ᐊᓖᓴ ᐅᖃᓚᐅᖅᐳᖅ ᑯᓱᒐᐅᑉ ᐱᓕᕆᓂᖓ ᐱᔪᓐᓇᕋᔭᓚᐅᙱᓚᖓ ᓇᓕᖃᓚᐅᙱᑉᐸᑦ, ᓇᖕᒥᓂᖅ ᐃᖅᑲᓇᐃᔮᕆᔪᒪᔭᒥᓂ ᐱᔪᒪᓂᕆᔭᖏᓐᓂ ᓄᖅᑲᖓᑎᓚᐅᑲᒃᐸᒃᖢᓂᐅᒃ ᐸᖅᑭᓂᕐᒥ ᕿᑐᕐᙵᖏᓐᓄᑦ, ᐊᐅᓪᓛᒐᔪᓚᐅᕐᒪᑦ ᐱᓕᕆᐊᒥᓄᑦ.

“ᒫᓐᓇ ᑐᑭᓯᓕᖅᐳᖓ ᖃᓄᐃᒻᒪᑦ ᐊᒃᓱᕈᖅᖢᓂ ᐅᓇᑕᓚᐅᕐᓂᖓᓂ, ᖃᓄᐃᒻᒪᑦ ᓴᒃᑯᐃᑦᑎᓯᒪᓚᐅᕐᓂᖓᓂ ᑖᒃᑯᓂᖓᓗᒃᑖᖅ [ᐃᓚᖏᓐᓂ] ᐅᐸᒃᓯᒪᓇᔭᕐᓂᖓᓂ ᐱᐅᓂᖅᓴᒥ ᓯᕗᓂᒃᓴᖃᕈᓐᓇᕐᓂᑦᑎᓐᓄᑦ ,” ᐅᖃᓚᐅᖅᐳᖅ.

ᔫᓯ ᑯᓱᒐᖅ ᓯᕗᓪᓕᖅᐹᒥ ᐃᖅᑲᓇᐃᔭᓚᐅᖅᐳᖅ ᐃᓄᒃᑎᑐᒻᒥ ᐊᒻᒪ ᐃᓄᐃᑦ ᐊᑐᖅᐸᓚᐅᖅᑕᖏᓐᓂ ᐃᓕᓴᐃᔨᐅᓂᕐᒧᑦ ᓯᓚᑦᑐᖅᓴᕐᕕᒡᔪᐊᖅ ᓴᔅᑳᑦᓱᐊᓐ ᐃᓄᒃᑎᑐᑦ ᐅᖃᐅᓯᕐᒥ ᐃᓕᓐᓂᐊᕐᕕᖕᒥ ᐊᒻᒪ ᑭᖑᓂᐊᒍᑦ ᑰᒡᔪᐊᕌᓗᒃ ᐃᓕᓐᓂᐊᕐᕕᖓᓂ ᒫᓂᑑᐸᒥ.

ᐱᓕᕆᓂᖓᓂ ᐃᓄᐃᑦ ᐃᓕᖅᑯᓯᒧᑦ ᐱᓕᕆᕝᕕᖕᒥ 1970−ᖏᓐᓂ ᑐᕌᖅᑎᑦᑎᓚᐅᖅᐳᖅ ᓴᖅᑭᑎᑕᐅᓂᖓᓂ ᒪᕐᕈᐃᓕᖓᔪᒥ ᑎᑎᕋᕐᓂᕐᒧᑦ ᐱᓕᕆᔾᔪᓯᐅᔪᒥ ᑕᑯᔭᐅᒐᔪᒃᑐᒥ ᑕᒪᒃᑭᒐᓚᖕᓂ ᓄᓇᕗᒻᒥ ᐅᓪᓗᒥᒥ — ᑲᑎᙵᓂᐅᔪᒥ ᐃᓄᒃᑎᑐᑦ ᐊᒻᒪ ᐃᓅᔨᖓᔪᓂ.

ᑯᓱᒐᖅ ᐃᖅᑲᓇᐃᔭᓚᐅᖅᐳᖅ CBC ᐅᐊᖕᓇᖓᓂ ᐊᕐᕌᒍᐸᓗᖕᓄᑦ ᖁᓕᓄᑦ ᐊᒻᒪ ᑭᖑᓂᐊᒍᑦ ᐃᖅᑲᓇᐃᔭᖅᖢᓂ ᐃᓄᐃᑦ ᑕᑯᓐᓇᒐᒃᓴᓕᕆᔨᒃᑯᓐᓂ.

ᐊᖓᔪᖅᑳᖑᓪᓗᓂ ᓄᓇᕗᒻᒥ ᑐᙵᕕᒃᑯᓐᓂ 1990 ᓄᙳᐊᓂ, ᑯᓱᒐᖅ ᐱᓕᕆᖃᑕᐅᕐᔪᐊᓚᐅᖅᐳᖅ ᓴᖅᑭᑎᑦᑎᓂᐅᔪᒥ ᓄᓇᕗᒻᒥ ᐊᒻᒪ ᑲᒪᒋᔭᖃᓚᐅᖅᐳᖅ ᓄᓇᒥ ᐋᔩᖃᑎᒌᖕᓂᐅᔪᒥ ᒐᕙᒪᑐᖃᒃᑯᓐᓂ ᐊᒻᒪ ᓄᓇᑦᓯᐊᕐᒥ.

ᐃᓅᔪᓐᓃᖅᑎᓪᓗᒍ 2011−ᒥ ᐅᑭᐅᖃᖅᖢᓂ 60−ᓂ, ᐋᔩᖃᑎᖃᖅᐸᓪᓕᐊᓚᐅᖅᐳᖅ ᐅᔭᕋᖕᓂᐊᕐᕕᖕᓂ ᑲᒻᐸᓂᐅᔪᓂ ᓇᓗᓇᐃᔭᐃᓂᕐᒧᑦ ᐃᓄᐃᑦ ᐱᕚᓪᓕᕈᑎᖃᕈᓐᓇᕐᓂᖏᓐᓂ ᐃᑲᔪᕈᑎᒃᓴᓂ ᐱᕙᓪᓕᐊᑎᑕᐅᓂᖓᓂ ᓄᓇᕗᒻᒥ.

ᑯᓱᒐᖅ ᑭᖑᓂᐊᒍᑦ ᓯᕗᓪᓕᖅᐸᐅᓪᓗᓂ ᐱᓂᖃᓚᐅᖅᐳᖅ ᓄᓇᕗᒻᒥ ᐃᑲᔪᕐᓂᕐᒧᑦ ᐃᓕᓴᕆᔭᐅᓂᐅᔪᒥ 2011−ᒥ ᐱᑎᓪᓗᒍ ᓇᓗᓇᐃᖅᑕᐅᓂᐅᔪᒥ ᐃᓅᔪᓐᓃᖅᓯᒪᓕᖅᑎᓪᓗᒍ.

ᑲᓇᑕᒥ ᑎᑎᖅᑲᕐᓂᐊᕕᖕᒥ ᓂᐱᙵᑕᖅ ᐊᑕᐅᓯᐅᕗᖅ ᐱᖓᓱᓂ ᓴᖅᑭᑕᐅᔪᓂ ᔫᓂᒥ ᑲᓇᑕᒥ ᓄᓇᖃᖅᑳᖅᓯᒪᔪᓄᑦ ᐊᑐᖅᐸᓚᐅᖅᑕᖏᓐᓂ ᑕᖅᑭᖓᓄᑦ.

ᐊᑕᐅᓯᐅᔪᒥ ᑎᑎᖅᑲᕐᓂᐊᕕᖕᒥ ᓂᐱᙵᑕᓄᑦ ᐅᐱᒋᔭᖃᕆᕗᖅ ᕼᐃᐊᕆ ᑖᓂᐅᓪᔅᒥ, ᐃᑲᔪᖅᓱᐃᓚᐅᖅᑐᒥ ᐊᓪᓚᖓᔪᓂ ᐊᒻᒪ ᓇᓗᓇᐃᒃᑯᑕᖃᙱᑦᑐᓄᑦ ᐊᓪᓚᓂ ᐃᓱᒪᒋᔭᐅᓂᖏᓐᓂ ᓄᓇᖃᖅᑳᖅᓯᒪᔪᓂ ᐃᓅᓂᖏᓐᓂ ᑲᓇᑕᐅᑉ ᒪᓕᒐᕐᔪᐊᖓᓂ.

ᐊᓯᖓ ᑕᑯᒃᓴᐅᑎᑦᑎᕗᖅ ᐊᖓᔪᖅᑳᖅ ᒧᕇ−ᐋᓐ ᑕᐃ ᐅᐊᑯ−ᐱᓕᑦᑎᐊᐃᒥ, ᑐᕌᖅᑎᑦᑎᓚᐅᖅᑐᒥ ᐅᑲᓃᔅ ᐊᓪᓚᓂ ᓴᔅᑳᑦᓱᐊᓐᒥ ᐊᕐᕌᒍᑲᓴᓄᑦ 40−ᓄᑦ.

Share This Story

(0) Comments

Join the Conversation

Your email address will not be published. Required fields are marked *

*