ᑲᓇᑕ ᐅᐱᒍᓲᑎᖃᖅᐳᖅ ᖄᐱᒃ ᐊᑕᒍᑦᑎᐊᕐᒥ, 99, ᐅᓇᑕᕕᒡᔪᐊᕐᓇᒥᑦ ᓴᐅᓂᕐᓂᒃ ᑲᑎᕐᓱᐃᔨᐅᓂᑯ

ᐃᓐᓇᑐᖃᖅ ᐃᒃᐱᐊᕐᔪᖕᒥᐅᑕᖅ ᐃᓚᐅᓂᑰᕗᖅ ᓄᓇᕐᔪᐊᒥ ᐅᓇᑕᕕᒡᔪᐊᕐᓇᖅ II-ᒥᑦ ᑲᑎᕐᓱᐃᑲᑕᖕᓂᕐᒥᑦ

ᖄᐱᒃ ᐊᑕᒍᑦᑎᐊᖅ ᐃᒃᐱᐊᕐᔪᒃᒥᐅᑕᖅ, 99, ᐸᓂᖓᓗᑦ ᑲᑕᐃᓯ ᐊᑕᒍᑦᑎᐊᖅ ᐅᕙᓃᑦᑑᒃ ᑲᓇᑕᒥ ᑕᑯᔭᒐᖃᕐᕕᖕᒥᑦ Canadian Museum of Civilization ᓇᒡᒐᔾᔭᐅᑎᓪᓗᒍ, ᔭᓄᐊᕆ 27-ᒥᑦ, ᑕᕝᕙᓂ ᒥᕐᖑᐃᕐᓯᕐᕕᓕᕆᔨᒃᑯᑦ ᑲᓇᑕᒥ ᐅᐱᒍᓲᑎᖃᓚᐅᕐᑐ ᐃᑲᔪᖃᑦᑕᓚᐅᕐᓯᒪᓂᖓᓂᒃ ᐊᐃᑉᐸᖓᓂ ᓄᓇᕐᔪᐊᒥ ᐅᓇᑕᕕᓄᒡᓄᔪᐊᖅᑎᓪᓗᒋᑦ. ᑐᓄᑦᑎᐊᖓᓂᒃ, ᑕᓕᖅᐱᐊᓂᒃ ᐊᔾᔨᙳᐊᒥ, ᐊᖏᔪᕈᓗᖕᒥ ᐃᓄᒃᓱᒐᙳᐊᖅᑕᖃᖅᑐᖅ ᑎᑎᕋᐅᔭᖅᑕᐅᓯᒪᔪᓂᒃ ᐃᒃᐱᐊᕐᔪᒃᒥᑦ ᐃᓕᓐᓂᐊᖅᑎᓄᑦ. (ᐊᔾᔨᙳᐊᖅ ᐅᑯᓇᙵᑦ ᒥᕐᖑᐃᕐᓯᕐᕕᓕᕆᔨᒃᑯᑦ ᑲᓇᑕᒥ)

By ᔨᒻ ᐱᐊᓪ

For an English version of this story, see Canada honours Qapik Attagutsiak, 99, wartime Inuit bone collector

ᐅᓇᑕᕕᖕᔪᐊᕐᓇᖅ ᐊᐃᑉᐸᖓᓂ ᓄᓇᕐᔪᐊᕐᒥᑦ ᐱᒋᐊᕐᓯᒪᓕᓚᐅᕐᓯᒪᔪᖅ 1940-ᒥᑦ ᐅᓇ ᖄᐱᒃ ᐊᑕᒍᑦᑎᐊᖅ ᑕᐃᔅᓱᒪᓂ ᐊᕙᑎᑦ (20) ᒥᒃᓵᓂ ᐅᑭᐅᖃᖅᑎᓪᓗᒍ, ᐊᒻᒪᓗ ᐃᒡᓗᓕᐅᑉ ᒥᒃᓵᓂᑦ ᓄᓇᓕᕋᓛᒦᖢᑎᒃ ᓯᕗᓪᓕᖅᐹᒥᑦ ᑐᓴᕆᐅᓚᐅᕐᓯᒪᔪᖅ ᑳᑐᓕᒃᒥᐅᑦ ᐃᒃᓯᕋᕐᔪᐊᖓᓂ ᑕᒪᑐᒥᖓ.

“ᖁᐊᕐᓵᖃᑦᑕᓚᐅᕐᓯᒪᔪᒍᑦ ᐅᐃᕗᑦ ᑐᖁᑕᐅᓇᔭᕆᐊᒃᓴᖏᓐᓂᒃ ᐊᐴᑎᖃᑎᖃᕈᑎᒃ ᖃᖓᑕᓲᒥᑦ ᑲᑕᐅᑎᖃᖅᑐᓂᒃ ᕿᒡᒋᖅᑐᓂᒃ. ᐃᓱᒪᖃᑦᑕᓚᐅᕐᓯᒪᔪᒍᑦ ᐅᑎᓚᐅᕐᓯᒪᔾᔮᔪᓐᓃᕆᐊᒃᓴᖏᓐᓂᒃ,” ᐅᖃᖅᑐᖅ. ᑎᑎᕋᖅᑕᐅᓯᒪᔪᓂᒃ ᐊᐱᖅᓱᖅᑕᐅᑎᓪᓗᒍ ᖃᓪᓗᓈᑎᑑᖓᓕᕐᓯᒪᔪᓂᒃ ᒥᕐᖑᐃᕐᓯᕐᕕᓕᕆᔨᒃᑯᓐᓂᑦ ᑲᓇᑕᒥ 2018-ᖑᑎᓪᓗᒍ.

1940-ᒥᑦ, ᒐᕙᒪᑐᖃᒃᑯᑦ ᐱᖁᔨᓚᐅᕐᓯᒪᖕᒪᑕ ᐃᓄᖕᓂ ᐅᑭᐅᕐᑕᖅᑑᑉ ᑲᓇᖕᓇᖓᓃᑦᑐᓂᒃ ᑲᑎᕐᓱᐃᖁᔭᐅᓪᓗᑎᒃ ᓴᐅᓂᕕᓂᕐᓂᒃ ᐅᓇᑕᖅᑐᓂᒃ ᐊᒃᑐᐊᔪᓂᒃ ᓴᓇᕝᕕᖕᓄᑦ, ᐃᓚᒋᔭᐅᓪᓗᓂ ᑲᓇᑕᒥ ᐱᓕᕆᓂᐅᔪᖅ ᐱᒋᐊᖅᖢᓂ ᐊᓂᒍᐃᑎᑦᑎᓚᐅᕐᑎᓪᓗᒋᑦ ᐱᓕᕆᕝᕕᖕᒥᑦ ᐅᓇᑕᖅᑐᒃᓴᑦ ᓱᓇᒃᑯᑎᒃᓴᖏᓐᓄᑦ ᐊᒻᒪ ᐱᖁᑎᖃᖅᑎᑦᑎᓂᕐᒧᑦ ᒪᓕᒐᕐᔪᐊᖅ ᓯᑎᐱᕆ 10, 1939-ᖑᑎᓪᓗᒍ, ᒥᕐᖑᐃᕐᓯᕐᕕᓕᕆᔨᒃᑯᑦ ᑲᓇᑕᒥ ᐅᖃᓚᐅᕐᑐᑦ ᐱᒋᐊᕈᑎᕕᓂᖓᓂᒃ.

ᑕᐃᒪᐃᓕᐅᕐᑎᑕᐅᑎᓪᓗᒋᑦ, ᑲᓇᑕᒥᐅᑕᑦ ᓴᐅᓂᕐᓂᒃ, ᐅᕐᓱᓂᒃ, ᓴᕕᕋᔭᖕᓂᒃ, ᐃᓕᕐᓂᑯᓂᒃ, ᐸᐃᑉᐹᓂ ᐊᒻᒪ ᐅᕋᐳᓂᒃ ᐊᕝᕗᖃᑦᑕᓚᐅᕐᓯᒪᔪᑦ ᑭᓇᑐᐃᓐᓇᕐᓂᒃ ᖃᓄᐃᓕᐅᖁᔭᐅᓂᕐᒧᑦ ᐅᑯᓇᙵᑦ ᐊᐅᓚᑕᐅᓪᓗᓂ ᒐᕙᒪᒃᑯᑦ ᐅᓇᑕᖅᑐᓂᒃ ᐱᔨᑦᑎᕋᐅᑎᓕᕆᔨᓄᑦ ᐱᓕᕆᕝᕕᖓᓂᒃ.

ᓴᐅᓃᑦ ᐃᓚᒃᓴᕆᔭᐅᑎᑕᐅᓚᕐᓯᒪᔪᑦ ᓴᓇᔭᖏᓐᓂᒃ ᐃᒪᐃᑦᑐᒥᑦ cordite, ᖄᖅᑕᔫᖃᕈᑎ ᐅᓇᑕᖅᑐᒃᓴᑦ ᓱᓇᒐᕆᔭᖏᓐᓂᒃ, ᐊᒻᒪᓗ ᐊᑐᖅᑕᐅᔪᒃᓴᐅᓪᓗᑎᒃ ᖃᖓᑕᓲᓄᑦ ᓂᐱᐅᑎᒃᓴᓄᑦ ᐊᒻᒪ ᓄᓇᓄᑦ ᐱᕈᕐᕕᐅᔪᒃᓴᓄᑦ.

ᐊᑕᒍᑦᑎᐊᖅ, ᒫᓐᓇ ᓄᓇᖃᕐᑐᖅ ᐃᒃᐱᐊᕐᔪᒃᒥᑦ, 100-ᓂ ᐅᑭᐅᖃᓕᕐᓂᐊᖅᑐᖅ ᔫᓂᒥ. ᖃᐅᔨᒪᔭᐅᓂᑯᓂ ᑭᖑᓪᓕᖅᐹᖑᔪ ᐃᓚᒋᔭᐅᔪᓂᒃ ᐅᑭᐅᕐᑕᖅᑐᕐᒥᑦ ᓴᐅᓂᕐᓂ ᑲᑎᕐᓱᐃᓇᓱᖕᓂᕐᒥᑦ, ᒥᕐᖑᐃᕐᓯᕐᕕᓕᕆᔨᒃᑯᑦ ᑲᓇᑕᒥ ᐅᖃᕐᓯᒪᔪᑦ.

ᖄᐱᒃ ᐊᑕᒍᑦᑎᐊᖅ ᐊᖏᕐᕋᖓᑕ ᐃᒃᐱᐊᕐᔫᑉ ᖃᓂᒋᔭᖓᓂ. (ᐊᔾᔨᙳᐊᖅ ᐅᑯᓇᙵᑦ ᒥᕐᖑᐃᕐᓯᕐᕕᓕᕆᔨᒃᑯᑦ ᑲᓇᑕᒥ)

ᑕᐃᒪᓕ ᒥᕐᖑᐃᕐᓯᕐᕕᓕᕆᔨᒃᑯᑦ ᑲᓇᑕᒥ ᐊᒻᒪᓗ ᑲᓇᑕᒥ ᐅᓇᑕᖅᑐᒃᓴᑦ, ᐱᓕᕆᐊᖃᖅᖢᑎᒃ ᐅᑯᑎᒎᓇᖅ Hometown Heroes (ᐊᖏᕐᕋᖏᓐᓂᒃ ᐃᑲᔪᖅᑎᒻᒪᕆᐊᓗᖕᓄᑦ) ᐱᓕᕆᐊᒧᑦ, ᖁᕕᐊᓲᑎᖃᕈᑎᖃᓚᐅᕐᑐᑦ ᐅᕙᓂ ᑲᓇᑕᒥ ᑕᑯᔭᒐᖃᕐᕕᒃᒥᑦ (Canadian Museum of Civilization) ᓇᒡᒐᔾᔭᐅᒥ, ᔭᓄᐊᕆ 27, ᐊᑕᒍᑦᑎᐊᕐᒥᓐ ᐃᓕᓴᖅᓯᓯᒪᓂᕐᒧᑦ ᐊᒻᒪ ᐊᓯᖏᓐᓂᒃ ᐃᓄᖕᓂ ᐃᑲᔪᖃᑕᐅᓚᐅᕐᓯᒪᔪᓂᒃ ᐅᓇᑕᕐᓇᐅᑎᓪᓗᒍ.

ᐊᒥᓱᒻᒪᕇᑦ ᖃᐃᖁᔭᐅᓯᒪᔪᑦ, ᑲᑕᔾᔭᖅᑎᐅᔪᑦ ᐊᒻᒪ ᕿᓚᐅᔾᔭᖃᑦᑕᖅᑐᑦ ᐅᕙᙵ ᓄᓇᕗᑦ ᓯᕗᓂᒃᓴᕗᒥᑦ, ᓄᓇᖃᖅᑳᖅᑐᑦ ᐃᓐᓇᑐᖃᖓ ᓴᐃᒪᓐ ᐳᕋᔅᑯᐱ ᐊᒻᒪᓗ ᒥᓂᔅᑕᐅᔪᖅ ᑲᒪᒋᔭᓕᒃ ᒥᕐᖑᐃᕐᓯᕐᕕᓕᕆᔨᒃᑯᑦ ᑲᓇᑕᒥ, ᔮᓇᑕᓐ ᕗᐃᐊᑭᓐᓴᓐ, ᐅᐸᓚᐅᕐᒥᔪᑦ ᖁᕕᐊᓲᑎᖃᕐᓂᕐᒧᑦ.

ᐊᐱᕐᓱᖅᑕᐅᓪᓗᓂ ᒥᕐᖑᐃᕐᓯᕐᕕᓕᕆᔨᒃᑯᓐᓂᒃ ᑲᓇᑕᒥ, ᐊᑕᒍᑦᑎᐊᖅ ᐅᖃᓚᐅᕐᑐᖅ ᓯᕗᓪᓕᖅᐹᑦ ᓴᐅᓂᕐᓂ ᑲᑎᕐᓱᐃᖃᑕᐅᑎᓪᓗᒍ ᐅᑯᓂᖓᐅᓚᐅᕐᓯᒪᔪᑦ ᑖᒃᑯᐊ ᐃᓚᒌᑦ ᕿᒻᒥᕕᓂᖏᑦᑕ ᓴᐅᓂᖏᓐᓂᒃ, ᑖᒃᑯᐊ ᕿᒻᒦᑦ ᑐᖁᕋᓚᐅᕐᓯᒪᓐᓂᕐᖢᑎᒃ ᐋᓐᓂᐊᖃᕐᓂᕐᒧᑦ ᑖᒃᑯᐊ ᐃᓚᒌᑦ ᐊᐅᓪᓛᕐᓯᒪᓪᓗᑎ ᐊᐃᕝᕙᒐᓱᒋᐊᖅᓗᓂ ᖃᐃᕐᓱᓂ, ᒫᓂ ᐊᒥᑦᑑᑉ ᐃᒪᖓᑕ ᐃᓚᖓᓂᒃ.

ᐅᖃᓚᐅᕐᑐᖅ ᐃᑦᑐᕆᓚᐅᕐᓯᒪᔭᖓ, ᐅᓪᓚᓛᕐᒥ ᐊᑎᖃᖅᑐᖅ, ᐊᖓᔪᖅᑳᖑᓚᐅᕐᓯᒪᖕᒪᑦ ᐃᒡᓗᓕᐅᑉ ᒥᒃᓵᓂ ᐊᒻᒪᓗ ᓴᐅᓂᕐᓂ ᐴᖃᐃᔨᐅᖃᑦᑕᓚᐅᕐᓯᒪᓪᓗᓂ.

“ᐅᕙᒍᑦ ᒪᒃᑯᖕᓂᕐᓴᐅᔪᒍᑦ ᓴᐅᓂᕐᓂ ᐊᒡᔭᕐᓯᕝᕕᒋᖃᑦᑕᓚᐅᕐᓯᒪᔭᕗᑦ; ᐃᑦᑐᕐᐳᑦ ᐴᖃᐃᕙᒃᖢᓂ ᐳᑐᓛᓕᖕᓄᑦ ᐴᒃᓴᓄᑦ,” ᐅᖃᕐᓯᒪᔪᖅ ᒥᕐᖑᐃᕐᓯᕐᕕᓕᕆᔨᒃᑯᑦ ᑲᓇᑕᒥ ᐊᐱᕐᓱᕈᑎᕕᓂᖏᓐᓂᒃ.

ᐊᐱᖅᓱᖅᑕᐅᑎᓪᓗᒍ, ᐅᖃᓚᐅᕐᓯᒪᔪᖅ ᐃᖅᑲᐅᒪᓂᕋᖅᖢᓂ ᑕᑕᑦᑎᖃᑦᑕᓚᐅᕐᓯᒪᓂᖓᓂ ᐱᖓᓱᓂ 125 ᐸᐅᑎᓐᔅᓂᒃ ᐃᓗᓕᖃᕈᓐᓇᖅᑐᓂᒃ ᐅᓪᓗᕐᒥᑦ ᐊᒻᒪᓗ ᑕᐃᒪᐃᓕᐅᕐᖢᓂ ᐱᓇᓱᐊᕈᓯᓕᒫᒥᓐ.

ᑖᒃᑯᐊ ᐴᒃᓴᐃᑦ ᒥᑭᑦᑐᓄᑦ ᐅᒥᐊᓄᑦ ᐅᓯᓕᕐᓱᖅᑕᐅᖃᑦᑕᓚᐅᕐᑐᑦ ᐊᒡᔭᖅᑕᐅᓪᓗᑎᒃ RMS ᓇᔅᑰᐱᒧᑦ, ᖃᐅᔨᒪᔭᐅᑦᑎᐊᓚᐅᕐᑐᖅ ᐅᒥᐊᕐᔪᐊᖅ ᓂᐅᕕᖅᑎᒃᑯᑦ ᕼᐊᑦᓴᓐ ᐸᐃ ᑲᒻᐸᓂᒃᑯ ᐊᑐᖃᑦᑕᕐᓂᑯᖓᑦ ᐱᖁᑎᒃᓴᓂ ᓂᐅᕕᕐᕕᖕᓄᑦ ᐊᔾᔭᖅᑐᐃᕙᒃᖢᓂ ᐅᑭᐅᕐᑕᖅᑑᑉ ᑲᓇᖕᓇᖓᓄᑦ.

ᑕᐃᒪᐃᓕᐅᖃᑦᑕᕐᓂᖓᑦ ᓄᖅᑲᓚᐅᕐᓯᒪᔪᖅ ᐅᓇᑕᕐᔪᐊᕐᓂᖅ ᐱᐊᓂᒃᑎᓪᓗᒍ 1945-ᒥᑦ. “ᐃᓱᒪᒋᔪᓐᓃᑲᐅᑎᒋᓚᐅᕐᓯᒪᔭᕗᑦ,” ᐊᑕᒍᑦᑎᐊᖅ ᐅᖃᓚᐅᕐᑐᖅ ᒥᕐᖑᐃᕐᓯᕐᕕᓕᕆᔨᒃᑯᓐᓄᑦ ᑲᓇᑕᒥ.

ᐊᑕᒍᑦᑎᐊᖅ ᐊᓯᖏᓐᓂᒃ ᐊᒥᓱᓂᒃ ᐃᑲᔪᖃᑦᑕᕐᓯᒪᔪᖅ, ᐱᓗᐊᕐᑐᒥᓐ ᐃᕐᓂᓱᒃᓰᔨᐅᓪᓗᓂ ᐊᒻᒪᓗ ᐃᓚᒋᔭᐅᓂᑰᓪᓗᓂ ᑲᓇᑕᒥ ᐅᓇᑕᖅᑐᒃᓴᙳᖓᓂᒃ, ᐃᓚᐅᓕᕐᓂᑰᓪᓗᓂ 1947-ᒥᑦ ᑖᒃᑯᐊ ᐅᓇᑕᕐᑐᒃᓴᙳᐊᑦ ᐱᒋᐊᖅᑕᐅᑎᓪᓗᒋᑦ.

ᐃᓅᓚᐅᕐᓯᒪᔪᖅ ᔫᓂ 11, 1920-ᒥᑦ, ᓯᐅᕋᕐᒥ, ᒫᓃᖢᓂ ᐃᒡᓗᓕᒑᕐᔫᓪᓗ ᓴᓪᓕᐅᓪᓗ ᐊᑯᓐᓂᖓᓂᒃ ᑭᕙᓪᓕᕐᒥᓐ.

“ᐊᑖᑕᖓ, ᖁᓕᒃᑕᓕᒃ, ᐊᖑᓇᓱᒃᑳᓘᓚᐅᕐᓯᒪᔪᖅ ᐊᒻᒪ ᐊᓈᓇᖓ, ᐸᑲᒃ, ᒥᕐᓱᖅᑎᐅᓪᓗᓂ; ᑕᒪᕐᒥᒃ ᐊᖓᔪᖅᑳᕆᔭᐅᓪᓗᑎᒃ ᓄᓇᖓᓐᓂ,” ᒥᕐᖑᐃᕐᓯᕐᕕᓕᕆᔨᒃᑯᑦ ᑲᓇᑕᒥ ᐅᖃᓚᐅᕐᑐᑦ.

ᐅᑭᐅᖃᖅᖢᓂ ᒫᓂ 18-ᓂᒃ, ᖄᐱᒃ ᐅᐃᑖᓚᐅᕐᓯᒪᔪᖅ ᐊᑕᒍᑦᑎᐊᕐᒥ, ᑖᓐᓇ ᓇᑦᑎᓕᒃᒥᐅᑕᐅᓪᓗᓂ, ᐊᒻᒪ ᕿᑐᕐᖓᖅᑖᓚᐅᕐᓯᒪᔫᒃ 14-ᓂᒃ, ᐊᒻᒪᓗ ᒪᕐᕉᖕᓂ ᑎᒍᐊᖅᖢᓂ ᐅᐃᖓ ᐃᓅᔪᓐᓃᓚᐅᕐᓯᒪᑎᓪᓗᒍ 1984-ᒥᑦ.

ᐃᕐᓂᓱᒃᓰᔨᐅᓪᓗᓂ, ᐅᓄᕐᑐᒻᒪᕆᐊᓗᖕᓂ ᓄᑕᕋᓛᓂ ᐃᓅᓵᖅᑐᓂᒃ ᐃᑲᔪᖅᑐᐃᓯᒪᕗᖅ ᐊᒻᒪᓗ ᐃᑲᔪᓚᐅᕐᓯᒪᓪᓗᓂ ᐋᖅᑭᒃᓱᖅᑕᐅᕙᓪᓕᐊᓕᖅᑎᓪᓗᒍ ᐊᑲᐅᓯᕕᒃ ᐃᓄᐃᑦ ᐋᓐᓂᐊᕕᓕᐊᕐᕕᖓᓂᒃ ᐋᑕᕚᒥᑦ, ᐊᒻᒪᓗ ᑐᓂᔭᐅᓯᒪᒋᓪᓗᓂ ᐆᒥᖓ Queen Elizabeth II Diamond Jubilee Medal ᖃᑭᖅᑯᐊᕐᒥᑦ.

ᐅᓇ Hometown Heroes (ᐊᖏᕐᕋᖏᓐᓂᒃ ᐃᑲᔪᖅᑎᒻᒪᕆᐊᓗᖕᓄᑦ) ᐱᓕᕆᓂᐅᔪᖅ, ᐱᒋᐊᖅᑕᐅᓂᑰᓪᓗᓂ 2015-ᒥᑦ, ᐃᖅᑲᐅᒪᔾᔪᑎᐅᕗᖅ ᐃᑲᔪᖃᑦᑕᖅᓯᒪᔪᓂᒃ ᑲᓇᑕᒥ ᓯᕗᓪᓕᕐᒥ ᓄᓇᕐᔪᐊᒥ ᐅᓇᑕᕕᒡᔪᐊᕐᓇᒥᑦ ᐊᒻᒪ ᐊᐃᑉᐸᖓᓂ ᓄᓇᕐᔪᐊᒥ ᐅᓇᑕᕕᒡᔪᐊᕐᓇᒥᑦ.

140 ᐅᖓᑖᓂᒃ ᑲᓇᑕᒥᐅᑕᑦ ᑖᔅᓱᒥᖓ ᐃᓕᓴᕆᔭᐅᔾᔪᑎᖃᕐᓯᒪᕗᑦ, ᒥᕐᖑᐃᕐᓯᕐᕕᓕᕆᔨᒃᑯᑦ ᑲᓇᑕᒥ ᐅᖃᕐᓯᒪᔪᑦ.

Share This Story

(0) Comments

Join the Conversation

Your email address will not be published. Required fields are marked *

*