ᐅᓇ ᓄᓇᙳᐊᖅ ᐅᕙᙶᕐᑐᖅ ᒍᕇᔅ ᐸᐃ ᒥᒃᓵᓄᑦ ᑎᑎᕋᐅᓯᐅᓯᒪᔪᓂᒃ ᑕᕝᕙᓂᓗ ᐃᑎᔪᒥ ᑐᓚᒃᑕᕐᕕᖃᕐᕕᒃᓴᒥᑦ ᐊᒻᒪ ᐊᖅᑯᑎᒃᓴᖅ ᓇᓃᓐᓇᔭᕐᓂᖏᓐᓂᒃ ᓇᓗᓇᐃᕐᓯᓯᒪᓪᓗᑎᒃ ᓄᓇᕗᑦ ᐅᐊᖕᓇᖓᓂᒃ. ᑖᓐᓇ ᐸᕐᓇᐅᑎᓪᓗᐊᖑᓇᓱᒃᑐᖅ ᒫᓐᓇ “ᓄᖅᑲᖓᓚᐅᑲᒃᑐᖅ,” ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᑦ ᐅᖃᓚᐅᕐᑐᑦ ᐊᐃᑉᐹᓂ, ᐅᒃᑑᐱᕆ 6-ᒥ. (ᐊᔾᔨᙳᐊᖅ ᐊᔾᔨᓕᐅᕐᓯᒪᔪᖅ)

ᒍᕇᔅ ᐸᐃ ᐊᖅᑯᑎ ᐊᒻᒪ ᑐᓚᒃᑕᕐᕕᒃᓴᖅ “ᓄᖅᑲᖓᓚᐅᑲᒃᑐᑦ,” ᐅᖃᖅᑐᑦ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖏᑦ

$550 ᒥᓕᐊᓐᑖᓚᑐᕐᑐᖅ ᐱᓕᕆᐊᒃᓴᖅ ᑐᓗᕐᐳᖅ

By ᔭᐃᓐ ᔪᐊᔾ

For an English version of this story, see Grays Bay Road and Port Project “stalled,” says Kitikmeot Inuit Association

ᐅᓇ ᒍᕇᔅ ᐸᐃ ᐊᖅᑯᑎ ᐊᒻᒪᓗ ᑐᓚᒃᑕᕐᕕᒃᓴᖅ ᓄᖅᑲᖓᓚᐅᑲᒃᑐᑦ, ᐅᖃᕐᑐᑦ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌ ᐊᐅᓚᑦᑎᔨ ᑐᑭᒧᐊᖅᑎᑦᑎᔨᖓ, ᐹᓪ ᐃᒥᙵᒃ.

ᐋᒐᓯ 2019-ᒥᑦ, ᐅᓇ ᐅᐊᓕᓂᕐᒥᑦ ᐅᑭᐅᕐᑕᖅᑐᕐᒥ ᐊᖅᑯᑎᒃᓴᖅ ᐊᒻᒪᓗ ᐃᑎᔪᒥ ᑐᓚᒃᑕᕐᕕᒃᓴᒧᑦ ᐱᓕᕆᐊᒃᓴᖅ ᑐᓂᔭᐅᓚᐅᕐᓯᒪᖕᒪᑦ $21.5 ᒥᓕᐊᓐ ᑖᓚᓂᒃ ᒐᕙᒪᑐᖃᒃᑯᓐᓂᒃ ᐸᕐᓇᒃᐸᓪᓕᐊᒍᑎᐅᓂᐊᕐᓗᓂ ᐆᒥᖓ $550 ᒥᓕᐊᓐ ᑖᓚᑐᕐᑐᖅ ᐱᓕᕆᐊᒃᓴᖅ “ᐳᐊᕐᕆᔭᑐᐃᓐᓇᕆᐊᖃᓕᕐᓗᓂ” ᐅᑯᓄᖓ ᐱᖁᔭᓕᕆᔨᓄᑦ ᐊᒻᒪ ᑮᓇᐅᔭᖃᖅᑎᑦᑎᔨᐅᔪᓄᑦ.

ᐸᕐᓇᒃᓯᒪᓚᐅᕐᓯᒪᔪᑦ ᑖᓐᓇ ᐱᓕᕆᐊᒃᓴᖅ ᐳᐊᕐᕆᔭᑐᐃᓐᓇᕆᐊᖃᓕᕐᓗᓂ ᐊᒻᒪᓗ ᐃᑲᔫᑎᒃᓴᓂᑦ ᕿᓂᕈᑎᐅᒃᑲᓐᓂᕐᓂᐊᕐᓗᓂ ᒐᕙᒪᑐᖃᒃᑯᓐᓂᑦ ᓴᓇᓯᒋᐊᕐᓂᐊᕐᒪᑕ, ᐅᖃᖅᑐᖅ ᐃᒥᙵᒃ, ᐅᖃᓪᓚᒃᑎᓪᓗᒍ ᓘᕐ ᓄᕗᓕᒐᒃ ᐱᙳᐊᕐᕕᖕᒥᑦ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᑦ ᐊᕐᕌᒍᓕᒫᕐᓯᐅᑎᓄᑦ ᑲᑎᒪᕕᒡᔪᐊᖅᑎᓪᓗᒋᑦ ᐃᖃᓗᒃᑑᑦᑎᐊᒥ ᐊᐃᑉᐹᓂᑦ, ᐅᒃᑑᐱᕆ 6.

ᐋᑐᕚᒥ ᑮᓇᐅᔭᖅᑖᕋᓱᒋᐊᒃᓴᖅ “ᓄᕙᒡᔪᐊᕐᓇᖅ-19 ᐱᑕᖃᓗᐊᖅᑎᓪᓗᒍ ᐊᔪᕐᓇᖅᑰᔨᖏᒻᒪᕆᓚᐅᕐᑐᖅ ᑮᓇᐅᔭᓕᐅᕋᓱᖕᓂᕐᒧᑦ ᐱᓇᓱᒍᑎᐅᓂᖓᓄᑦ,” ᐃᒥᙵᒃ ᐅᖃᕐᓯᒪᔪᖅ ᐅᓂᒃᑳᓕᐊᖏᓐᓂᒃ.

ᑕᕙᙵᑦᑕᐃᓐᓇᕐᓕ, ᐅᑯᐊ ᐱᓕᕆᐊᒃᓴᒥ ᓴᖅᑭᑎᑦᑎᔨᐅᔪᑦ ᐸᕐᓇᐅᓯᐅᓕᓚᐅᕐᓯᒪᔪᑦ ᐱᖓᔪᒋᔭᐅᔪᒃᑯᑦ ᑮᓇᐅᔭᓕᐅᕈᒪᓪᓗᑎᒃ ᐊᒻᒪ ᐃᓚᖓ ᐃᑲᔫᑎᑎᒎᖓᓗᓂ ᓴᓇᕙᓪᓕᐊᓂᖅ ᐊᐅᓚᑕᐅᓕᕐᓂᐊᕐᒪᑦ, ᐅᖃᖅᑐᖅ.

“ᑖᓐᓇ ᐊᐅᓚᑕᐅᓕᕐᐸᑦ ᐊᒻᒪᓗ ᐊᑐᖅᑕᐅᓂᖓᓄᑦ ᐊᑭᓕᐅᑎᒃᓴᑦ ᐋᖅᑭᒃᓯᒪᓕᕐᐸᑕ ᑕᐃᒪᓕ ᑮᓇᐅᔭᓂ ᐃᓯᖅᑐᖃᖅᐸᓪᓕᐊᓕᕋᔭᕐᑐᖅ,” ᐅᖃᖅᑐᖅ.

ᐊᕐᕌᓂᓕ, ᒍᕇᔅ ᐸᐃ ᓯᕗᓪᓕᖅᐹᖑᒋᐊᖃᕆᔭᐅᓚᐅᕐᑐᖅ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᑦ ᐱᓕᕆᐊᕆᔭᒃᓴᖏᓐᓂ ᐊᕐᕌᒍᒥ ᐊᒡᒋᖅᑐᒥᓐ.

ᑭᓯᐊᓂᓕ ᒫᓐᓇ “ᐱᓕᕆᐊᒃᓴᖅ ᓄᖃᖓᓚᐅᑲᖕᒪᑦ,” ᐃᒥᙵᒃ ᐅᖃᖅᑐᖅ, ᐅᖃᖅᖢᓂ ᓄᓇᕗᑦᒥ ᐊᑐᐃᓐᓇᕐᓂᒃ ᑯᐊᐳᕇᓴᓐᑯᑦ, ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᑦ ᓇᖕᒥᓂᖅ ᐱᖁᑎᖓ ᐊᒻᒪᓗ ᐱᓕᕆᐊᒧᑦ ᐱᖃᖅᑎᑦᑎᔨᐅᓪᓗᓂ ᒫᓐᓇ ᐃᓚᐅᑎᑕᐅᔪᓐᓃᕐᓂᖓᓂᒃ.

ᕕᕝᕗᐊᕆᐅᑎᓪᓗᒍ ᐅᓇ ᓄᓇᕗᑦᒥ ᐊᑐᐃᓐᓇᕐᓂᒃ ᑯᐊᐳᕇᓴᓐᑯᑦ ᐊᖓᔪᖅᑳᖓ, ᓵᓕ ᐃᕙᓕᒃ ᓄᖅᑲᓚᐅᕐᓯᒪᖕᒪᑦ. ᐊᒻᒪ ᒫᔅᓯᒥ, ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᑦ ᑲᑎᒪᔨᖏᑦ ᐊᐅᓚᑦᑎᔪᒪᓕᓚᐅᕐᓯᒪᓪᓗᑎᒃ ᐅᑯᓇᙵᑦ ᓄᓇᕗᑦᒥ ᐊᑐᐃᓐᓇᕐᓂᒃ ᑯᐊᐳᕇᓴᓐᑯᓐᓂᒃ ᑖᒃᑯᐊ ᐱᓕᕆᔨᓪᓚᕆᐅᓂᐊᕐᒪᑕ ᒍᕇᔅ ᐸᐃᒥ ᐱᓕᕆᐊᒃᓴᒥᑦ.

“ᑕᐃᒪᓐᓇ ᐃᓱᒪᓕᐅᕆᓇᓱᒃᑎᓪᓗᒋ ᐊᔪᕐᓇᕈᓘᔭᓚᐅᕐᑐᖅ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᓄᑦ,” ᐃᒥᙵᒃ ᐅᖃᖅᑐᖅ.

ᐃᓱᒪᓕᐅᕆᓚᐅᕐᓯᒪᔪᑦ ᐃᒪᓐᓇ ᐃᓚᓯᒋᐊᕐᓂᐊᕐᓗᑎᒃ “ᓴᖅᑭᔮᕐᓂᕐᓴᐅᓗᑎᒃ ᐊᒻᒪᓗ ᑭᐅᔨᐅᔪᓐᓇᕐᓗᑎᒃ ᑖᓐᓇ ᐱᓕᕆᐊᒃᓴᖅ ᑲᔪᓯᑎᑦᑐᓐᓇᖁᓪᓗᒍ.”

ᒫᓐᓇᐅᔪᕐᓕ, ᐅᑯᐊ “ᓄᓇᕗᑦᒥ ᐊᑐᐃᓐᓇᕐᓂᒃ ᑯᐊᐳᕇᓴᓐᑯᑦ ᑮᓇᐅᔭᓂ ᐱᕈᕐᓴᐃᔪᓐᓇᕐᓂᖏᑦ ᐲᖅᑎᑕᐅᖕᒪᑦ ᐊᒻᒪᓗ ᑮᓇᐅᔭᑦ ᐊᑐᐃᓐᓇᐅᑎᑕᐅᔪᑦ ᓄᖑᑉᐹᓪᓕᕐᓯᒪᓪᓗᑎᒃ,” ᐃᒥᙵᒃ ᐅᖃᓚᐅᕐᑐᖅ, ᐅᖃᒃᑲᓐᓂᕐᖢᓂ ᑖᒃᑯᐊ ᐅᓂᒃᑳᑦ ᑭᖑᓪᓕᖅᐹᖑᓂᐊᕐᓂᖏᓐᓂᒃ ᐅᑯᓇᙶᖅᑐᑦ ᓄᓇᕗᑦᒥ ᐊᑐᐃᓐᓇᕐᓂᒃ ᑯᐊᐳᕇᓴᓐᑯᓐᓂᒃ “ᑕᐃᒪᐃᓚᐅᑲᖕᓂᐊᖅᖢᑎᒃ.”

ᑲᑎᒪᔭᖅᑐᖅᓯᒪᔪᑦ ᐃᓄᑑᓚᐅᑲᒡᓗᑎᒃ ᐊᕐᕌᒍᒧᑦ ᑲᑎᒪᕕᒡᔪᐊᕐᓇᒥ ᐅᓂᒃᑳᕐᕕᐅᓂᐊᓚᐅᕐᑐᑦ ᑲᑎᒪᓕᖅᐸᑕ, ᐅᖃᖅᑐᖅ.

2020-ᖑᑎᓪᓗᒍᓕ, ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖏᑦ ᑕᑯᔪᒪᓚᐅᕐᓯᒪᔪᑦ ᐃᓄᐃᑦ ᐃᑲᔫᑎᑖᕐᓯᒪᓗᑎᒃ “ᐱᕙᓪᓕᐊᓂᖓᒍᑦ” ᒪᑯᓂᖓ ᐊᑐᒃᑲᓐᓂᕈᓐᓇᕋᔭᙱᑦᑐᓂᒃ ᐱᕙᓪᓕᐊᒍᑎᓂᒃ ᐅᑯᑎᒎᓇᖅ ᓄᓇᕗᑦᒥ ᐊᑐᐃᓐᓇᕐᓂᒃ ᑯᐊᐳᕇᓴᓐᑯᑎᒍᑦ.

ᑯᐊᐳᕇᓴᐅᔪᑦ ᐸᕐᓇᒃᓯᒪᓚᐅᕐᓯᒪᔪᑦ ᐅᕐᓱᐊᓗᖕᒧᑦ, ᐅᕐᓱᒧᑦ ᐅᕝᕙᓘᓐᓃᑦ ᐅᔭᕋᐅᔭᕆᓕᕐᒧᑦ ᐱᓕᕆᐊᓂᒃ ᑮᓇᐅᔭᓂᒃ ᐊᑐᕈᒪᓪᓗᑎᒃ ᐊᒻᒪ ᑖᒃᑯᐊ ᓂᐅᕕᖅᑕᐅᕙᒡᓗᑎᒃ, ᑭᓯᐊᓂᓕ ᑕᐃᒪᐃᓕᐅᓚᐅᕐᓯᒪᙱᑦᑐᑦ ᐊᖏᖃᑎᒌᒍᑎᕈᓘᔭᕐᓂᒃ ᐊᑎᓕᐅᕐᓯᒪᓕᕋᓗᐊᕐᑎᓪᓗᒋᑦ.

ᐊᒻᒪᓗ 2018-ᒥᑦ ᖃᕋᓴᐅᔭᒃᑯᑦ ᐱᕋᔭᒃᑐᓂᒃ ᑎᒡᓕᒡᕕᐅᓪᓗᑎᒃ $300,000-ᓂ ᐅᑯᐊ ᓄᓇᕗᑦᒥ ᐊᑐᐃᓐᓇᕐᓂᒃ ᑯᐊᐳᕇᓴᓐᑯᑦ.

ᑖᒃᑯᓂᖓᓕ ᐅᓂᒃᑳᓕᐅᕐᑎᓪᓗᒍ ᐊᕐᕌᒍᒧᑦ ᑲᑎᒪᕕᒡᔪᐊᕐᓇᒥᑦ, ᐃᒥᙵᒃ ᐅᖃᓚᐅᕐᓯᒪᔪᖅ ᓄᓇᕗᑦᒥ ᐊᑐᐃᓐᓇᕐᓂᒃ ᑯᐊᐳᕇᓴᓐᑯᑦ ᐃᖏᕐᕋᓯᒪᓂᖏᓐᓂᒃ $3 ᒥᓕᐊᓐ ᑖᓚᓂ ᐊᑐᖅᖢᑎᒃ ᒐᕙᒪᑐᖃᒃᑯᓐᓂ ᑐᓐᓂᖁᓯᐊᕕᓂᖏᓐᓂᒃ 2012-ᖑᑎᓪᓗᒍ.

ᐅᖃᓚᐅᕐᑐᖅ ᕿᑎᕐᒥᐅᑦ ᐃᓄᐃᑦ ᑲᑎᔾᔨᖃᑎᒌᑦ ᑐᓂᓯᓚᐅᙱᓐᓂᖏᓐᓂᒃ ᓄᓇᕗᑦᒥ ᐊᑐᐃᓐᓇᕐᓂᒃ ᑯᐊᐳᕇᓴᓐᑯᓐᓄᑦ ᐊᕐᕌᒎᓕᕐᑐᓂᒃ ᐱᖓᓱᓂᒃ.

ᐅᖃᓚᐅᕐᒥᔪᖅ ᐅᑯᐊ “ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖏᑦ ᑐᓂᕙᒌᕆᐊᖃᖅᑕᖏᓐᓂᒃ ᑮᓇᐅᔭᓂ ᑐᓂᓯᓚᐅᕐᓂᖏᓐᓂᒃ ᐃᓚᐃᓐᓇᑯᓗᒋᓐᓂᒃ” ᐱᔭᐅᔪᕕᓂᕐᓂᒃ ᒐᕙᒪᑐᖃᒃᑯᓐᓂᒃ. ᑭᓯᐊᓂᓕ, ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖏᑦ ᓴᓂᕐᕙᐃᓚᐅᕐᓯᒪᖕᒪᑕ $21.5 ᒥᓕᐊᓐ ᑖᓚᓂᒃ ᐃᖕᒥᖕᓄᑦ ᐅᑎᖅᑎᒍᑎᒋᔭᖏᓐᓂᒃ ᒪᑯᓄᖓ “ᐊᑭᓕᐅᑎᒋᕙᓪᓕᐊᓯᒪᔭᖏᓐᓄᑦ ᐱᓕᕆᐊᒨᖓᔪᓄᑦ.”

ᐅᓇ $550 ᒥᓕᐊᓐ ᑖᓚᑐᕐᑐᖅ ᒍᕇᔅ ᐸᐃᒥ ᐱᓕᕆᐊᕆᔭᐅᓇᔭᖅᑐᖅ ᐃᒪᓐᓇ ᓴᓇᓗᑎᒃ 227 ᑭᓛᒥᑕᓂ ᖃᖓᑐᐃᓐᓇᒃᑯᑦ ᐊᑐᖅᑕᐅᔪᓐᓇᖅᑐᒥ ᐊᖅᑯᑎᒥ ᑕᕝᕙᙵᑦ ᐱᓕᕆᕝᕕᐅᓂᑯᒥ ᔨᐅᕆᑯ ᐅᔭᕋᒃᓯᐅᕐᕕᕕᓂᕐᒥᒃ, ᑖᓐᓇᓕ ᒫᓃᑦᑐᖅ ᐅᐊᖕᓇᐸᓯᐊᓂᒃ ᑎᐱᑦ-ᑳᓐᑐᐃᑐ ᐅᑭᐅᒃᑯᑦ ᐊᖅᑯᑎᐅᕙᒃᑑ ᐃᓱᕐᐸᓯᐊᓂᒃ ᒪᐅᖓ ᐃᑎᔪᒥᒃ ᑐᓚᒃᑕᖅᕕᒃᓴᒧᑦ ᒍᕇᔅ ᐸᐃᒥ ᐅᕙᓂ ᑰᕈᓃᓴᓐ ᑲᖏᕐᖢᖕᒥᑦ (Coronation Gulf).

ᐅᓇ ᒍᕇᔅ ᐸᐃ ᐊᖅᑯᑎᖓ ᐊᖅᑯᓵᕐᓯᒪᓇᔭᖅᑐᖅ ᐊᖅᑯᑎᒥ ᓴᓇᔭᐅᔪᒪᔪᒥᒃ ᐃᓚᒋᔭᐅᓗᓂ ᐆᒧᖓ moribund Izok corridor ᓴᕕᕋᔭᒃᓴᓂᒃ zinc-lead ᐅᔭᕋᒃᓯᕐᕕᖕᒥᑦ ᑖᓐᓇᓗ ᓴᖅᑭᑎᑕᐅᓚᐅᕐᓯᒪᓪᓗᓂ ᓴᐃᓃᓯᓄᑦ ᓇᖕᒥᓂᕆᔭᐅᔪᒥᒃ MMG Ltd., ᑭᓯᐊᓂᓕ ᓄᖃᖅᑎᑕᐅᓯᒪᔪᖅ ᑕᐃᒪᙵ ᐄᐳᕈᓪ 2013-ᖑᓚᐅᕐᑎᓪᓗᒍ.

ᐅᒃᑑᐱᕆ 6-ᒥᑦ ᐊᕐᕌᒍᓕᒫᕐᓯᐅᑎᓂᒃ ᑲᑎᒪᕕᒡᔪᐊᕐᓇᒥ, ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖏᑦ ᓴᖅᑭᑎᑦᑎᓚᐅᕐᑐᑦ ᑮᓇᐅᔭᓕᕆᓂᒃᑯᑦ ᐅᓂᒃᑳᓂᒃ, ᑖᓐᓇ ᓴᖅᑭᑎᑦᑎᓯᒪᓪᓗᓂ ᐊᐅᓚᔾᔪᑎᒃᓴᓂᒃ ᒫᓂ $15 ᒥᓕᐊᓐ ᑖᓚᓂ ᐊᒻᒪᓗ ᒫᓂᐸᓗᒃ $56 ᒥᓕᐊᓐ ᑖᓚᓂᒃ ᐱᖁᑎᑎᒍᑦ.

ᑮᓇᐅᔭᓕᕆᔾᔪᑎᕕᓃᑦ ᓴᖅᑭᑎᑕᐅᑎᓪᓗᒋᑦ ᐆᒧᖓ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᑦ ᐊᖓᔪᖅᑳᖓᓄᑦ ᓯᑖᓐᓕ ᐊᓇᑉᓚᒃᒧᑦ ᑖᓐᓇ ᓴᖅᑭᔮᑲᐅᑎᒋᑎᑕᐅᓚᐅᕐᓯᒪᔪᖅ ᕙᐃᔅᐳᒃᑯᑦ ᑭᓯᐊᓂᓕ ᓴᖅᑭᔮᑦᑎᐊᕈᓐᓇᙱᓐᓂᖓᓄᑦ ᐊᔪᕐᓇᕈᔪᓚᐅᕐᑐᖅ ᒪᓕᑦᑎᐊᕆᐊᒃᓴᖅ.

ᑮᓇᐅᔭᓕᕆᓂᕐᒧᑦ ᐅᓂᒃᑳᑦ ᓴᖅᑭᑎᑕᐅᓯᒪᙱᑦᑐᑦ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᑦ ᕙᐃᔅᐳᒃᑯᑦ ᓴᖅᑭᔮᒐᖏᑦᑎᒍᑦ.

ᐊᓯᖏᓐᓂᒡᓕ ᑎᑎᖃᓂᒃ ᓴᖅᑭᑎᑕᐅᓯᒪᔪᓂᒃ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᑦ ᕙᐃᔅᐳᒃᑯᑦ ᒪᒃᐱᒐᖓᓂᒃ, ᓇᓗᓇᙱᓚᖅ ᓄᕙᒡᔪᐊᕐᓇᖅ-19 ᐊᖏᔪᕈᓗᖕᒥ ᐊᒃᑐᐃᒍᑎᖃᕐᓯᒪᓂᖓᓂᒃ ᐊᐅᓚᑦᑎᒍᑎᓂᒃ ᑮᓇᐅᔭᑎᒍᑦ: ᕿᑐᕐᖏᐅᕈᑎᓂᒃ ᐱᑕᖃᙱᓐᓂᕐᓴᐅᓯᒪᔪᖅ ᐅᑯᓇᙵᑦ TMAC ᐊᑐᒃᑲᓐᓂᕈᓐᓇᖅᑐᑦ ᐃᖕᑰᐳᕇᑕᑦᑯᑦ ᕼᐆᑉ ᐸᐃ ᒎᓗᒥ ᐅᔭᕋᒃᓯᐅᕐᕕᖓᓂᒃ, ᑕᐃᒪᓐᓇᓗ ᓱᒃᑲᐃᒡᓕᕚᓪᓕᕈᑎᐅᓕᓚᐅᕐᑐᖅ ᓴᖅᑭᑎᑦᑎᕙᓪᓕᐊᓂᕐᒥᒃ ᒫᔅᓯᐅᑎᓪᓗᒍ, ᐊᒻᒪᓗ ᓄᖅᑲᖅᑎᑦᑎᒍᑎᐅᓪᓗᓂ ᐋᔩᖃᑎᒌᒍᑎᓂᒃ ᐆᒧᖓ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓄᑦ ᐃᑲᔫᓯᐊᖅᑖᕈᓐᓇᐅᑎᖏᓐᓄᓪᓗ ᐊᖏᕈᑎᓂ ᒐᕙᒪᑐᖃᒃᑯᓐᓂ ᐱᔾᔪᑎᒋᓪᓗᒍ ᕗᕌᖕᓕᓐ ᐅᒥᐊᕐᔪᐊᕕᓂᖏᑦᑕ ᐃᓂᖏᓐᓅᖓᔪᓂᒃ.

ᐱᔾᔪᑎᒋᔭᐅᓪᓗᓂ ᓄᕙᒡᔪᐊᕐᓇᖅ-19, ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᑦ ᐊᕐᕌᒍᓕᒫᕐᓯᐅᑎᓄᑦ ᑲᑎᒪᕕᒡᔪᐊᕐᓂᖓ, ᓴᖅᑭᔮᑲᐅᑎᒋᓪᓗᓂ ᖃᕋᓴᐅᔭᒃᑯᑦ, ᒪᑐᐃᖓᓚᐅᕐᓯᒪᙱᑦᑐᑦ ᐃᓄᖕᓄᑦ—ᐅᑯᓄᖓᑐᐊᖅ ᑭᓯᐊᓂ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᑦ ᑲᑎᒪᔨᖏᓐᓄᑦ, ᓄᓇᓕᖕᓂ ᑭᒡᒐᖅᑐᖅᑐᓂᒃ ᐊᒻᒪᓗ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌ ᐃᖅᑲᓇᐃᔭᖅᑎᖏᑦ.

ᐊᒻᒪᓗ, ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖏᑦ ᐃᓱᒪᓕᐅᕆᓚᐅᕐᓯᒪᔪᑦ ᓄᓇᓕᖕᓂ ᓂᕆᕕᒡᔪᐊᖅᑎᑦᑎᔾᔮᖏᓪᓗᑎᒃ ᐊᒻᒪᓗ ᓴᓇᐅᒐᓂᒃ ᓂᐅᕕᐊᒃᓴᖃᖅᑎᑦᑎᙱᓪᓗᑎᒃ ᑕᒪᑐᒪᓂ ᐊᕐᕌᒍᒥ ᐱᔾᔪᑎᒋᔭᐅᓪᓗᓂ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐋᖅᑭᒃᓯᒪᔭᖏᓐᓂᒃ ᓄᕙᒡᔪᐊᕐᓇᖅ-19 ᐊᐃᑦᑑᑎᐅᑲᑕᖁᓇᒍ.

Share This Story

(0) Comments

Join the Conversation

Your email address will not be published. Required fields are marked *

*