ᒫᓐᓇ ᒪᓕᒐᓕᐅᕈᑎᔭᕆᐊᖃᓕᕐᐳᑦ ᐅᑭᐅᕐᑕᖅᑐᕐᒥᑦ ᖃᖓᑕᓲᓕᕆᓂᕐᒧᑦ ᐱᓕᕆᓂᐅᔪᖅ

ᐃᒪᐃᓐᓂᐊᕋᓗᐊᕈᑎᓪᓗᒍᓘᓐᓃᑦ ᐸᕐᓇᒃᑕᐅᓯᒪᔪᒥᒃ ᐱᓕᕆᖃᑎᒌᓕᕐᓂᕐᒧᑦ ᐅᑯᓄᖓ ᑲᓃᑎᐊᓐ ᓄᐊᑦ ᐊᒻᒪ ᕘᔅᑦ ᐃᐅᑯᓄᑦ ᐅᕝᕙᓘᓐᓃᑦ ᑕᐃᒪᐃᑦᑕᕆᐊᖃᕈᑎᒃ ᑕᐃᒪᐃᑦᑐᒥᓇᕈᑎᒡᓘᓐᓃᒃ, ᐃᒪᓐᓇ ᖃᐅᔨᒪᓇᓪᓚᕆᒃᑐᖅ: ᑭᒃᑯᓕᒫᑦ ᑲᓇᑕᐅᑉ ᐅᑭᐅᕐᑕᖅᑐᖓᓂᒃ ᐊᖏᕋᔭᙱᑦᑐᑦ ᐱᑕᖃᓗᓂ ᒪᓕᒐᖃᙱᑦᑐᒥᒃ ᖃᖓᑕᓲᓕᕆᓂᕐᒥᒃ.

ᖃᐅᔨᒪᓇᑦᑎᐊᕐᒥᔪᖅ ᐅᑭᐅᕐᑕᖅᑐᕐᒥᑦ ᐊᑐᖅᑎᐅᕙᒃᑐᑦ ᐅᒃᐱᕈᓱᓕᖅᑎᑕᐅᓇᔭᙱᓐᓂᖏᓐᓂᒃ ᐃᒻᒥᒃᑰᖓᔪᑦ ᑯᐊᐳᕇᓴᓐ ᓇᖕᒥᓂᖃᖅᑐᑦ ᑖᒃᑯᓂᖓ ᖃᖓᑕᓲᓂᒃ ᑭᒃᑯᑐᐃᓐᓇᕐᓄᑦ ᐱᔭᐅᔪᒪᔪᓂᒃ ᓯᕗᓪᓕᐅᔾᔨᓇᔭᙱᓐᓂᖏᓐᓂᒃ ᑮᓇᐅᔭᓕᐅᕋᓱᖕᓂᕐᒧᑦ.

ᑕᐃᒪᐃᓐᓂᖓᓄᑦ, ᒐᕙᒪᑐᖃᒃᑯᑦ, ᐊᐅᓚᑕᐅᔪᒃᓴᐅᓪᓗᑎᒃ ᐃᖏᕐᕋᔾᔪᑎᓕᕆᔨᑦ ᑲᓇᑕᒥ, ᐃᓱᒪᒃᓴᖅᓯᐅᕈᑎᖃᒻᒪᕆᒋᐊᖃᕐᒪᑕ ᐱᒋᐊᒃᑲᓐᓂᕈᑎᐅᔪᓂᒃ ᐊᑭᒃᓴᓂᒃ ᐊᒻᒪ ᐊᖅᑯᑎᒃᓴᓄᑦ ᐱᖁᔭᓂᒃ ᖃᖓᑕᓲᓂᒃ ᐊᐅᓚᑕᐅᕙᒃᑐᓂᒃ ᐃᓄᑭᑦᑑᑎᓂᒃ ᐅᑭᐅᕐᑕᖅᑑᑉ ᓄᓇᖏᓐᓂᒃ.

ᑕᒪᐅᓇᑦᑕᐃᓐᓇᖅ, ᑕᐅᑐᒋᐊᖃᕐᒥᔪᑦ ᐋᕿᒃᓱᖅᑕᐅᕙᓪᓕᐊᓂᖏᑦ ᐊᕕᒃᑐᕐᓯᒪᓂᒃᑯᑦ ᑮᓇᐅᔭᖅᑖᕆᔭᐅᕙᓪᓕᐊᔪᑦ—ᐃᑲᔫᑎᒃᓴᓂᒃ ᐱᔨᑦᑎᕋᖅᑕᐅᔪᓄᐊᕐᓗᑎᒃ ᐅᑯᓄᖓᐅᙱᑦᑐᖅ ᓄᑖᒥᑦ ᑲᑐᔾᔨᓂᒃᑯᑦ ᓇᖕᒥᓂᖃᖅᑐᓄᑦ—ᑐᕌᖓᓪᓗᓂ ᑮᓇᐅᔭᓕᐅᕈᑏᑦ ᐊᑭᓕᐅᑕᐅᓂᐊᕐᓗᑎᒃ ᖃᖓᑕᓲᒧᑦ ᐱᔨᑦᑎᕋᐅᑎᓄᑦ ᑖᒃᑯᓇᓂ ᓄᓇᓂᒃ.

ᐃᒻᒪᒃᑲᓐᓂᐅᓚᐅᕐᑐᖅ 1980 ᐊᑯᓐᓂᖏᓐᓂᒃ, ᐊᒥᓱᑦ ᑕᐅᑐᒃᓯᒪᔪᑦ ᐃᓱᒪᓚᐅᕐᓯᒪᔪᑦ ᑲᓇᑕᐅᑉ ᐅᑭᐅᕐᑕᖅᑐᖓ ᑮᓇᐅᔭᓕᐅᕈᑎᖃᙱᓗᐊᕐᓂᖓ ᐊᒻᒪ ᓴᙱᖏᓗᐊᕐᓂᖓᓄᑦ ᐊᐅᓚᑦᑎᓂᕐᒥᒃ ᐱᖁᔭᖃᕈᓐᓃᕐᓯᒪᔪᒥᒃ. ᑭᓯᐊᓂᓕ ᐊᑐᓕᖅᑎᑦᑎᑕᐅᙱᓚᐅᑲᒃᑎᓪᓗᒍ, 1990-ᖏᓐᓂᒃ, ᒐᕙᒪᑐᖃᒃᑯᑦ ᐊᑐᓕᖅᑎᑦᑎᓚᐅᕐᓯᒪᔪᑦ ᖃᖓᑕᓲᓕᕆᓂᕐᒧᑦ ᒪᓕᒐᖃᙱᓐᓂᕐᒥᒃ ᑲᓇᑕᐅᑉ ᐅᑭᐅᕐᑕᖅᑐᖓᓂ ᓱᓕ.

ᑖᓐᓇ ᑕᒻᒪᖅᑕᐅᓚᐅᕐᓯᒪᔪᖅ. ᒫᓐᓇᐅᔪᕐᓕ ᒐᕙᒪᑐᖃᐅᔪᑦ, ᐅᕝᕙᓘᓐᓃᑦ ᓄᑖᑦ ᒐᕙᒪᐅᓂᐊᕐᑐᑦ ᐅᒃᑑᐱᕆ 21 ᒐᕙᒪᑐᖃᒃᑯᑦ ᓂᕈᐊᕐᓂᖃᓚᐅᖅᑎᓪᓗᒋᑦ, ᑕᒪᑐᒥᖓ ᐋᕿᒃᓯᒋᐊᖃᓕᖅᐳᑦ ᑕᒻᒪᕐᓯᒪᔪᒥ.

ᖃᐅᔨᒫᓂᒃᑐᒍ ᐅᓇ ᐃᓱᒪᒋᔭᐅᔪᖅ ᐱᓕᕆᖃᑎᒌᖕᓂᒃᑯᑦ ᖃᖓᑕᓲᓕᕆᓂᖅ ᓄᓇᕗᒻᒥᐅᓂᒃ ᓈᒻᒪᒋᔭᐅᙱᒻᒪ ᐊᒻᒪ ᐊᓯᖏᓐᓂᒃ ᑲᓇᑕᐅᑉ ᐅᑭᐅᕐᑕᖅᑐᖓᓃᑦᑐᓂᒃ. ᑕᐃᒪᐃᒃᑲᓗᐊᖅᑎᓪᓗᒍ, ᓱᓕ ᓴᙱᔪᓂᒃ ᑭᐅᓘᑎᒍᑎᒃᓴᖅᑕᖃᖅᐳᖅ ᐃᑲᔪᕈᑎᓂᒃ ᑲᑎᓂᖏᓐᓄᑦ ᑲᓃᑎᐊᓐ ᓄᐊᑦ ᐊᒻᒪ ᕘᔅᑦ ᐃᐅ. ᓲᖃᐃᒻᒪ ᑲᓇᑕᐅᑉ ᐅᑭᐅᕐᑕᖅᑐᖓ ᐱᔪᒥᓇᓗᐊᙱᑦᑐᖅ, ᐊᑭᑐᔪᐊᓗᒃ ᑮᓇᐅᔭᑎᒍᑦ ᒥᑭᓗᐊᑐᐃᓐᓇᕆᐊᖃᕐᒪᑦ ᒪᕐᕈᐃᓂᒃ ᐃᑲᔪᕋᓱᒡᓗᑎᒃ ᐱᒡᒍᓴᐅᑎᖃᑎᒌᒃᑑᖕᓂᑦ ᖃᖓᑕᓲᓂᒃ.

ᐊᐃᑦᑖᖑᒐᓗᐊᖅ, ᓇᖕᒥᓂᖃᖅᑎᐅᔪᑦ ᑲᓃᑎᐊᓐ ᓄᐊᑦᒥᑦ ᐊᒻᒪ ᕘᔅᑦ ᐃᐅᒥ ᑕᒪᐅᓇ ᑐᓴᐅᒪᑎᑦᑎᓯᒪᙱᓗᐊᕐᒪᑕ.

ᓲᕐᓗ ᐃᒪᓐᓇ, ᐱᓇᓱᐊᕈᓯᐅᓚᐅᕐᑐᒥᑦ ᓲᕐᓗ ᑐᓴᙱᖢᑎᒃ ᑲᓇᑕᒥ ᓂᐅᕕᖅᑕᐅᕙᓪᓕᐊᔪᓂᒃ ᖃᐅᔨᓴᖅᑎᐅᕙᒃᑐᑦ, ᐱᒡᒍᓴᐅᑎᓕᕆᓂᕐᒧᑦ ᐱᓕᕆᕝᕕᒃ (Competition Bureau), ᑖᒃᑯᐊ ᐊᐱᕐᓱᕐᓂᕐᖢᑎᒃ 60-ᓂᒃ ᑎᒍᒥᐊᖅᑎᐅᖃᑕᐅᔪᓂᒃ, ᐊᒻᒪᓗ ᐅᖃᓪᓚᖃᑎᖃᕐᓯᒪᓪᓗᑎᒃ ᑮᓇᐅᔭᓕᐅᕋᓱᖕᓂᕐᒧᑦ ᖃᐅᔨᒪᒻᒪᕆᒃᑐᒥᑦ ᐊᒻᒪ ᑮᓇᐅᔭᓕᕆᓂᕐᒥᒃ ᖃᐅᔨᒪᔨᒥᑦ ᖃᐅᔨᓇᓱᒃᖢᑎᒃ ᐊᒃᑐᐃᒍᑎᐅᑐᐃᓐᓇᕆᐊᓕᖕᓂ ᑲᑐᓯᒪᓕᕈᑎ.

ᑭᓇᒧᑦ ᑲᒪᒋᔭᐅᓇᑎᒃ, ᑖᒃᑯᐊ ᐱᓕᕆᔨᐅᔪᑦ ᑲᑎᖃᑎᒌᖕᓂᖅ ᐊᑭᑦᑐᕆᐊᕈᑎᐅᓇᔭᕐᓂᖓᓂᒃ ᖃᖓᑦᑕᐅᑎᓂᒃ ᐊᒻᒪᓗ ᐱᔨᑦᑎᕋᐅᑎᓂᒃ ᒥᒃᖠᕚᓪᓕᖅᑎᑦᑎᓗᑎᒃ.

ᑭᓯᐊᓂᓕ ᑕᒪᑐᒧᖓ ᑭᐅᔾᔪᑎᖏᑦᑎᒍᑦ, ᑖᒃᑯᐊᒃ ᒪᕐᕉᒃ ᖃᖓᑕᓲᒃ ᑕᒪᑐᒥᖓ ᐃᓱᒫᓘᑎᖃᖅᑰᔨᓚᐅᙱᑦᑐ ᐊᑐᖅᑎᐅᕙᒃᑐᓂᒃ, ᐊᒥᓱᑦ ᐅᒃᐱᕈᓱᒃᖢᑎᒃ ᑲᑎᖃᑎᒌᖕᓂᖅ ᐃᓅᓇᓱᐊᕐᓂᕐᒧᑦ ᐊᑭᑐᐊᓂᒃᑐᐊᓗᖕᒥ ᐊᑭᑦᑐᕆᐊᖅᑎᑦᑎᒃᑲᓐᓂᕐᓂᐊᕆᐊᒃᓴᖓᓂᒃ. ᐃᓱᒪᒋᔭᐅᔪᕐᓕ ᐊᑐᖅᑎᐅᔪᓄᑦ ᐱᔪᓐᓇᐅᑎᓂ, ᑖᒃᑯᓄᐊ ᐱᑕᖃᕆᔭᐅᙱᒻᒪᓐ.

ᐅᓇ ᐃᓚᐅᕈᑎᖃᕐᒥᔪᖅ ᐊᔾᔨᒌᙱᑦᑑᑎᓂᒃ ᐅᖃᐅᓯᐅᓯᒪᔪᓂᒃ ᑕᒪᑐᒧᖓ ᓈᒻᒪᙱᓕᐅᕈᑎᒃᓴᓂᒃ ᐅᕝᕙᓘᓐᓃᑦ ᐱᒻᒪᕆᐅᔭᕆᐊᒃᓴᖓᓂᒃ ᓴᕿᑎᑕᒃᓴᐅᙱᑦᑐᓂᒃ.

ᓲᕐᓗ, ᕿᐱᓘᑎᖃᓚᐅᕐᒪᑕ ᐱᒡᒍᓴᐅᑎᓕᕆᔨᒃᑯᑦ ᐃᓱᒪᒋᔭᖃᓚᐅᙱᒻᒪᑕ ᐅᖃᐅᓯᐅᓯᒪᔪᓂᒃ “ᐃᑲᔫᑎᐅᓇᔭᖅᑐᓂᒃ” ᐅᖃᕐᓯᒪᔪᖏᑦ ᑲᑎᖃᑎᒌᖕᓂᒃᑯᑦ. ᐅᓇ ᐅᖃᐅᓯᕕᓂᖅ ᓱᓕᓗᐊᙱᑦᑐᖅ.

ᐱᒡᒍᓴᐅᑎᓕᕆᓂᕐᒧᑦ ᐱᓕᕆᔨᒃᑯᑦ ᕿᒥᕐᕈᐊᓚᐅᕐᓯᒪᔪᑦ ᑲᑎᒃᑯᑎᒃ ᑮᓇᐅᔭᓂ ᐊᑐᙱᓐᓂᕐᓴᐅᒍᑎᒃᓴᓂᒃ. ᑮᓇᐅᔭᓕᐅᕋᓱᖕᓂᕐᒧᑦ ᖃᐅᔨᓴᖅᑎᒋᔭᖓ ᑕᐃᒪᐃᓐᓇᔭᕐᓂᖓᓂᒃ ᓴᕿᑎᑦᑎᓚᐅᕐᑐᖅ ᐊᒻᒪ ᖃᐅᔨᒍᑎᐅᓪᓗᓂ ᐅᑯᐊ ᑮᓇᐅᔭᓂᒃ ᐊᑐᙱᓐᓂᕐᓴᐅᒍᑎᒃᓴᑦ ᓈᒻᒪᙱᓗᐊᕋᔭᕐᓂᖏᓐᓂᒃ ᖃᖓᑕᓲᓕᕆᓂᕐᒧᑦ ᐊᑭᓕᐅᑎᒃᓴᓄᑦ ᖁᕝᕙᕆᐊᕈᑎᐅᓂᐊᕋᓱᒋᔭᐅᔪᓄᑦ.

“ᑮᓇᐅᔭᓂᒃ ᐊᑐᙱᓐᓂᕐᓴᐅᔪᑎᒃᓴᐅᓂᕋᖅᑕᐅᔪᑦ ᑖᒃᑯᓇᙵ ᐅᑯᓄᖓᐅᔪᒃᓴᐅᓚᐅᕐᑐᖅ ᑐᒃᓯᕋᐅᑎᐅᓯᒪᔪᖅ ᐱᓕᕆᓂᐅᓇᔭᖅᑐᖅ ᐊᒃᑐᐃᒍᑎᖃᙱᑐᐃᓐᓇᕆᐊᖃᖅᑐᖅ ᑲᑎᖃᑎᒌᖕᓂᕐᒧᑦ ᖃᓄᐃᓕᐅᕐᓯᒪᔪᑦ ᐊᒻᒪ ᐃᓱᒪᒋᔭᐅᔪᑦ ᐊᑭᒃᓴᐃᑦ ᐊᒃᑐᐃᒍᑎᖏᓐᓂᒃ,” ᐱᒡᒍᓴᐅᑎᓕᕆᔨᒃᑯᑦ ᐅᓂᒃᑳᖏᑦ ᐅᖃᕐᓯᒪᔪᑦ.

ᑖᒃᑯᐊᒃ ᒪᕐᕉᒃ ᖃᖓᑕᓲᓕᕆᔩᑦ ᐅᖃᕐᓯᒪᖕᒪᑕ ᑲᑎᖃᑎᒌᒋᐊᖃᕐᓂᖏᓐᓂᒃ ᓲᖃᐃᒻᒪ “ᖁᐊᕐᓵᓇᖅᑐᒦᒻᒪᑕ ᐱᓕᕆᖃᕈᓐᓃᖅᑎᑕᐅᔭᕆᐊᒃᓴᖅ” ᐊᒻᒪᓗ ᑲᔪᓯᓗᑎᒃ ᐱᓕᕆᐊᖃᕐᓂᕐᒥᑦ “ᑮᓇᐅᔭᖃᕐᓂᖏᑦᑎᒍᑦ ᐃᓄᐃᑦ ᐃᓚᒋᔭᐅᖃᑕᐅᔪᑦ.”

ᑕᐃᒪᐃᑉᐹ? ᐅᒃᑑᐱᕆ 2017-ᒥᑦ, ᕘᔅᑦ ᐃᐅᒃᑯᑦ ᓇᖕᒥᓂᖃᖅᑎᖏᑦ, ᒪᑭᕝᕕᒃ ᑯᐊᐳᕇᓴᓐ, ᐅᖃᓚᐅᕐᓯᒪᔪᑦ ᕘᔅᑦ ᐃᐅ “ᐅᑎᖅᑎᑦᑎᕕᐅᑦᑎᐊᕐᓂᖏᓐᓂᒃ” ᐊᒻᒪᓗ ᐊᑭᓕᕐᓱᐅᓪᓗᑎᒃ $3 ᒥᓕᐊᓐ ᑖᓚᓂ ᐃᓚᒋᔭᐅᔾᔪᑎᓂᒃ. ᕕᕝᕗᐊᕆ 2017-ᒥᑦ, ᑲᓃᑎᐊᓐ ᓄᐊᑦᑯᑦ ᓇᖕᒥᓂᖃᖅᑎᖏᑦ ᐅᖃᓚᐅᕐᓯᒪᔪᑦ ᖃᖓᑕᓲᓕᕆᔨᒃᑯᑦ “ᐱᕈᖅᐸᓪᓕᐊᓂᐊᖅᑐᑦ ᐊᒻᒪ ᑮᓇᐅᔭᓕᐅᕈᑎᖃᕐᓗᑎᒃ.”

ᑕᐃᒪᓕ ᐅᖃᐅᓯᕆᔭᐅᓂᑯᓂᒃ ᓇᓕᐊᒃ ᓱᓕᕙ ᐊᒻᒪ ᓇᓕᐊᒃ ᓱᓕᙱᓚᖅ? ᐅᖃᕈᓐᓇᙱᑦᑐᒍᑦ ᐃᓕᔅᓯᑦᑕᐅᖅ.

ᐊᓯᐊᒍᑦᑕᐅᖅ ᑭᒃᑯᓕᒫᓄᑦ ᐅᒃᐱᕈᓱᓗᐊᖏᓐᓂᖅᑕᖃᕈᓐᓇᖅᑐᖅ ᖃᖓᑦᑎᐊᓕᓴᐸᓗᖕᒥᑦ, ᐱᓗᐊᕐᑐᒥᑦ, ᐊᓂᒍᕐᓂᙱᑦᑐᖅ ᑲᑎᖃᑎᒌᒐᓱᖕᓂᖅ 2014-ᒥᑦ, ᑭᖓᓂᐊᒍᓪᓗ ᐱᓕᕆᖃᑎᒌᖕᓂᐅᓚᐅᕐᑐᖅ, ᑭᖑᕙᖅᑎᑦᑎᕙᒃᖢᑎᒃ ᐅᓯᔭᐅᔪᓂᒃ ᐊᒻᒪᓗ ᐋᓐᓂᐊᕐᕕᓕᐊᖅᑐᑦ ᑕᑯᔭᐅᕝᕕᒃᓴᖏᓐᓂᒃ ᓈᒻᒪᙱᓕᐅᕈᑎᖃᓕᖅᐸᒃᖢᑎᒃ. ᐊᒻᒪᓗ 2016-ᒥᑦ ᐃᐅ ᓴᕐᕙᖅ ᓄᖃᓚᐅᕐᓯᒪᓪᓗᓂ  ᐊᒻᒪ ᐱᒋᐊᒃᑲᓐᓂᕐᓯᒪᓚᐅᙱᑦᑐᑦ ᐃᓄᖕᓄᑦ ᐅᒃᐱᕆᔭᐅᓇᓱᖕᓂᒃᑯᑦ.

ᑕᒪᐅᓇᑦᑕᐃᓐᓇᖅ, ᓇᓕᐊᒃ ᒪᑭᕝᕕᒃ ᑯᐊᐳᕇᓴᓐᑯᑦ ᐅᑯᐊᓘᓐᓃᑦ ᐃᓄᕕᐊᓗᐃᑦ ᐱᕙᓪᓕᐊᔪᓕᕆᔨᖏᑦ ᐅᖃᕈᓐᓇᙱᑦᑐᑦ ᓇᖕᒥᓂᖓᓂᒃ ᐊᐅᓚᑦᑎᓂᕐᒧᑦ ᐱᓕᕆᓯᒪᑦᑎᐊᕐᓯᒪᓂᖏᓐᓂᒃ—ᑕᒪᓐᓇᓗ ᑭᒃᑯᓕᒫᓄᑦ ᖃᐅᔨᒪᔭᐅᓪᓗᓂ.

2017-ᒥᑦ, ᑲᑎᒪᔨᕋᓛᖑᑎᑕᐅᔪᑦ ᐅᓂᒃᑳᓕᐅᓚᐅᕐᓯᒪᔪᑦ ᐊᒥᓱᑦ ᒪᑭᕝᕕᒃ ᐱᓕᕆᕝᕕᒋᔭᖏᑦ ᑮᓇᐅᔭᓂᒃ ᐊᓯᐅᔨᕙᓪᓕᐊᓂᖏᓐᓂᒃ ᐊᕐᕋᒍᓂᒃ ᐊᒥᓱᓂᒃ, ᐊᒻᒪᓗ ᑖᒃᑯᐊ ᑯᐊᐳᕇᓴᐅᔪᑦ ᐃᓚᒋᔭᐅᔪᓄᑦ ᑮᓇᐅᔭᖅᑖᕆᔭᐅᔭᕆᐊᓖᑦ $200 ᒥᓕᐊᓐᑖᓚᓂ ᐊᑦᑎᖕᓂᕐᓴᐅᓪᓗᓂ ᐃᓂᒋᓪᓗᐊᖅᑕᖓᓂᑦ. ᐃᓄᕕᐊᓗᐃᑦ ᐱᕙᓪᓕᐊᔪᓕᕆᓂᕐᒧᑦ ᑯᐊᐳᕇᓴᓐᑯ, ᓲᖃᐃᒻᒪ, ᑲᒪᔨᐅᓚᐅᕆᕗᑦ ᑲᓃᑎᐊᓐ ᓄᐊᑦᑯᑦ ᐱᓕᕆᐊᖑᖃᑎᖓ, NTCL-ᑯᑦ.

ᐅᓇᑦᑕᐅᖅ ᐅᖃᐅᓯᐅᒍᑎᐅᓯᒪᔪᖅ ᐃᒪᓐᓇ ᑲᑎᖃᑎᒌᖕᓂᖅ “ᐃᓄᖕᓄᑦ ᐱᒋᐊᖅᑕᐅᓂᑯ ᐋᕿᒍᑎ” ᐱᓕᕆᐊᖑᓂᑰᓪᓗᓂ “ᐃᑲᕐᕋᒐᓴᒻᒪᕆᐊᓗᖕᓂ ᐅᖃᖃᑎᒌᒃᖢᑎᒃ ᐃᓄᐃ ᐊᒻᒪ ᐅᑭᐅᕐᑕᖅᑐᕐᒥ ᓂᕈᐊᖅᑕᐅᓯᒪᔪᑦ ᓯᕗᓕᐅᕐᑎ.” ᐊᒻᒪᓗ ᑖᒃᑯᐊᑦᑕᐃᓐᓇᐃᑦ ᐃᓄᐃᑦ ᐃᓄᖕᓄᑦ ᓇᖕᒥᓂᕆᔭᐅᔪᖅ ᐃᐅ ᓴᕐᕙᖅ ᓴᓇᔪᓐᓃᖅᑎᑎᑐᓯᒪᒧ ᐅᖃᕐᓯᒪᕗᑦ ᐅᒃᐱᕈᓱᖕᓂᕋᖅᖢᑎᒃ ᐃᓄᐃᑦ “ᑐᑭᖃᖅᑐᒃᑯᑦ ᐃᓚᐅᔭᕆᐊᖃᕐᓂᖏᓐᓂᒃ ᐅᑭᐅᕐᑕᖅᑐᕐᒥᑦ ᑮᓇᐅᔭᓕᐅᕋᓱᖕᓂᒃᑯᑦ.”

ᓂᕈᐊᖅᑕᐅᓯᒪᔪᑦ ᓄᓇᕗᑦ ᒐᕙᒪᖓ, ᒫᓐᓇ ᓂᕈᐊᖅᑕᐅᓯᒪᔪᓂᒃ ᒥᓂᔅᑕᖃᐅᕐᖢᑎᒃ ᐃᓄᐃᓐᓇᕐᓂᒃ, ᑕᒪᑐᒥᖓ ᐅᒃᐱᕈᓱᓗᐊᙱᓚᑦ. ᐃᒪᓐᓇᓕ ᑕᐃᕕᑦ ᐊᕿᐊᕈᒃ, ᒥᓂᔅᑕ ᐱᕙᓪᓕᐊᔪᓕᕆᓂᕐᒧᑦ ᐊᒻᒪ ᐃᖏᕐᕋᔾᔪᑎᓕᕆᓂᕐᒧᑦ, ᐅᖃᐅᓯᖃᓚᐅᕐᑐᖅ ᕕᕝᕗᐊᕆ 28-ᒥᑦ, ᓄᓇᕗᑦ ᑕᒪᑐᒧᖓ ᖃᓄᐃᓕᖓᓕᕐᓂᖏᓐᓂᒃ, ᐃᒪᓐᓇ ᐱᒡᒍᓴᐅᑎᓕᕆᔨᒃᑯᑦ ᖃᐅᔨᔭᖏᓐᓂ ᖃᓄᐃᒃᓴᙱᖢᑎᒃ:

“ᐱᒡᒍᓴᐅᑎᓕᕆᔨᒃᑯᑦ ᓇᓗᓇᐃᕐᓯᓯᒪᓚᐅᕐᑐᑦ ᐃᓱᒫᓘᑎᒋᔭᐅᔪᓂᒃ ᐊᒥᓱᓄᑦ ᓄᓇᕗᒻᒥᐅᑦ ᐅᖃᐅᓯᕆᓯᒪᔭᖏᓐᓂ ᐅᕙᑦᑎᓐᓄ ᒪᓕᒐᓕᐅᕐᑎᐅᓪᓗᑕ: ᐅᓇ ᑲᑎᖃᑎᒌᖕᓂᖅ ᖁᕝᕙᖅᐹᓪᓕᕈᑎᐅᓇᔭᕐᓂᖓᓂᒃ ᖃᖓᑦᑕᐅᑎᓂᒃ ᐊᒻᒪ ᐱᒡᒍᓴᐅᑎᖃᑎᖃᙱᓐᓂᕐᓴᐅᓕᕐᓗᑎᒃ.”

ᐅᓇᓗ ᐅᖃᐅᓯᕆᓚᐅᕐᒥᔭᖓ ᒫᓐᓇ ᓄᓇᕗᑦ ᖃᓄᐃᓕᖓᓂᖏᓐᓂᒃ ᑲᑎᖃᑎᒌᖕᓂᕐᒥᒃ—ᐋᕿᒃᑕᐅᓯᒪᓂᒃᑯᑦ ᒪᕐᕉᖕᓄᑦ ᐊᐅᓚᑕᐅᔪᓄᑦ, ᓇᓕᐊᒡᓗ ᐊᒃᑐᐃᒍᑎᖃᒻᒪᕆᙱᖢᑎᒃ ᓄᓇᕗᑦ ᐃᓄᖏᓐᓄᑦ:

“ᐅᓇ ᑲᑎᖃᑎᒌᖕᓂᐅᓂᐊᕐᑐᖅ ᒪᕐᕉᖕᓄᑦ ᓄᓇᕗᒥᐅᑕᐅᙱᑦᑑᖕᓄ ᓇᖕᒥᓂᕆᔭᐅᔪᓄᑦ ᐃᓱᒪᒋᔭᐅᓯᒪᙱᑦᑐᓂᒃ ᐅᕘᓇ ᓄᓇᕗᑦ ᐊᖏᕈᑎᖓᒍᑦ.”

ᐅᓪᓘ ᐃᓚᖓᒍᑦ, ᐊᕿᐊᕈᒃ ᐅᖃᒃᑲᓐᓂᓚᐅᕐᑐᖅ, ᐅᑯᐊ ᓄᓇᕗᑦ ᒐᕙᒪᒃᑯᑦ ᓈᒻᒪᒃᓴᙱᓪᓚᕆᙱᒃᑲᓗᐊᖅᖢᑎᒃ ᐱᓕᕆᖃᑎᒌᖕᓂᕐᒥᒃ, ᒐᕙᒪᑐᖃᒃᑯ ᐋᕿᒃᓱᐃᔭᕆᐊᖃᖅᑐᑦ ᓴᐳᔾᔨᓯᒪᒍᑎᐅᔪᓐᓇᖅᑐᓂᒃ ᐊᒻᒪ ᒪᓕᒃᑕᐅᔭᕆᐊᓕᖕᓂᒃ ᓴᐳᔾᔨᓯᒪᓂᕐᒧᑦ ᓄᓇᕗᒻᒥᐅᓂᒃ.

ᑕᒪᓐᓇ ᐱᐅᔪᐃᓐᓇᖅ. ᑭᓯᐊᓂᓕ ᐅᖃᒃᑲᓐᓂᓪᓗᐊᓚᐅᕐᑐᖅ ᐊᒻᒪ ᑎᓕᐅᕆᒃᑲᓐᓂᕐᓗᓂ ᖃᓄᒃᑲᓐᓂᖅ ᓴᐳᔾᔨᓯᒪᒍᑎᐅᔪᓐᓇᖅᑐᓂᒃ ᓄᓇᕗᒥᒃ ᖃᖓᑕᓲᒃᑰᖃᑦᑕᖅᑐᓂᒃ ᑖᒃᑯᓇᙵᑦ ᒪᕐᕉᖕᓂ ᐱᓕᕆᕝᕕᐅᔫᖕᓂ ᐅᒃᐱᕐᓇᓗᐊᕐᓇᕈᓐᓃᖅᑐᓂᒃ.

ᐃᒪᐃᑐᐃᓐᓇᕆᐊᓕᒃ ᐅᑎᑐᐃᓐᓇᕐᓗᑎᒃ ᐱᖁᔭᓕᕆᓂᒃᑯᑦ ᒪᓕᒃᑕᐅᓂᑯᕕᓂᕐᓂᒃ 1970-ᖏᓐᓂᒃ. ᕘᔅᑦ ᐃᐅ ᐊᒻᒪ ᑲᓃᑎᐊᓐ ᓄᐊᑦ ᐱᔪᓐᓇᖅᑎᑕᐅᔪᓐᓇᓪᓗᐊᖅᑐᑦ ᑲᑎᖃᑎᒌᖕᓂᕐᒥᑦ ᖃᖓᑕᖏᑦ ᑭᒃᑯᓕᒫᓄᑦ ᐊᑐᖅᑕᐅᒐᒃᓴᐅᓗᓂ ᐊᒻᒪᓗ ᑐᑭᖃᕈᓐᓇᑐᒥᑦ ᖃᖓᑦᑕᐅᑎᒃᓴᓄᑦ ᐊᑭᓕᐅᑎᒃᓴᓄᑦ ᐱᖁᔭᖃᕐᓗᑎᒃ.

ᑕᐃᒪᐃᓕᐅᓚᐅᖅᖢᑕ, ᖃᖓᑕᓲᓕᕆᔾᔪᑎᒧᑦ ᐃᑲᔫᑎᒃᓴᖃᕐᓂᕐᒥ ᓴᕿᑎᑦᑎᓪᓗᐊᖅᑐᑦ ᐊᑐᖅᑕᐅᕙᒃᑐᑎᑐᑦ ᐃᐅᕈᑉᒥᑦ, ᐊᒥᐊᓕᑲᒥᑦ ᐊᒻᒪᓗ ᐊᔅᑐᕇᓕᐊᒥᑦ ᑭᖑᓪᓕᕐᒥᑦ ᐱᓕᕆᔭᒃᓴᕆᓂᐊᕐᓗᓂᐅᔾᔪᒃ.