ᓄᑖᑦ ᐊᖏᕐᕋᖃᙱᑦᑐᒃᑯᕕᒃᓴᑦ ᓴᓂᑭᓗᐊᖅᒥ ᐊᒻᒪ ᐳᕕᕐᓂᑐᕐᒥ

For English version, see New shelters to go up in Sanikiluaq, Puvirnituq

ᐳᕕᕐᓂᑐᖅ ᐊᒻᒪ ᓴᓂᑭᓗᐊᖅ ᐃᓚᒋᔭᐅᔪᑦ 21-ᓂ ᓄᓇᓕᖕᓂ ᐃᑲᔫᑎᑖᕐᓂᐊᖅᑐᓂᒃ ᓄᑖᓂ ᐊᖏᕐᕋᖃᙱᑦᑐᒃᑯᕕᒃᓴᓄᑦ ᐊᒻᒪ ᐊᓯᐊᓂᒡᓗ ᐃᒡᓗᖃᓕᕋᓱᖕᓂᕐᒥᒃ ᐃᒡᓗᒋᔭᐅᓚᐅᑲᖕᓂᐊᖅᑐᓄᑦ, ᑐᓴᒐᒃᓴᓕᐅᓚᐅᕐᑐᑦ ᒐᕙᒪᑐᖃᒃᑯᑦ ᒪᐃ 8-ᖑᑎᓪᓗᒍ.

ᑲᑎᓯᒪᓪᓗᑎᒃ ᐃᒪᓐᓇ $103.8 ᒥᓕᐊᓐ ᑖᓚᐃ ᒪᑯᓄᖓ ᑐᕌᖓᓂᐊᖅᑐᑦ ᓴᓇᓂᕐᒧᑦ ᐊᒻᒪ ᐊᐅᓚᑦᑎᓂᕐᒧᑦ 178-ᓂ ᐊᖏᕐᕋᖃᙱᑦᑐᒃᑯᕕᒃᓴᓂᒃ ᐊᒻᒪ ᐊᓯᐊᓂᒡᓗ ᐃᒡᓗᖃᓕᕋᓱᖕᓂᕐᒥ ᐃᒡᓗᒋᔭᐅᓚᐅᑲᖕᓂᐊᖅᑐᓂᒃ ᑲᓇᑕᓕᒫᒥ.

ᐊᖏᕐᕋᖃᙱᑦᑐᒃᑯᕕᒃᓴᑦ ᐋᖅᑭᒃᑕᐅᓯᒪᔪᑦ ᐅᓗᕆᐊᓇᙱᑦᑐᒥᑦ ᐅᐸᒃᑕᐅᔪᓐᓇᕐᓗᑎᒃ ᕿᒫᔪᓄᑦ ᐋᓐᓂᖅᓱᖅᑕᐅᓂᕐᒧᑦ ᐊᒻᒪ ᐊᕐᓇᐅᓂᕐᒧᑦ ᐋᓐᓂᖅᓱᐃᔾᔪᑎᐅᕙᒃᑐᓂᒃ, ᑕᒪᒃᑯᐊᓕ ᐃᒡᓗᒋᔭᐅᓚᐅᑲᖕᓂᐊᖅᑐᑦ ᐊᑯᓂᐅᓂᕐᓴᖅ ᐊᖏᕐᕋᖃᕐᕕᐅᔪᓐᓇᕐᓗᑎᒃ ᕿᒫᔪᓄᑦ ᐋᓐᓂᖅᓱᖅᑕᐅᖃᑦᑕᓗᐊᕐᓂᕐᒥᒃ, ᐅᖃᓚᐅᕐᑐᖅ ᑲᓇᑕᒥ ᐃᒡᓗᓕᕆᔨᕐᔪᐊᒃᑯᑦ (CMHC) ᖃᕋᓴᐅᔭᒃᑯᑦ ᑎᑎᕋᖅᖢᑎᒃ.

ᐳᕕᕐᓂᑐᖅ ᑕᒪᐃᓐᓂ ᐊᖏᕐᕋᖃᙱᑦᑐᒃᑯᕕᒃᓴᒥᒃ ᐊᒻᒪ ᐃᒡᓗᖃᓕᕋᓱᖕᓂᕐᒥ ᐃᒡᓗᒋᔭᐅᓚᐅᑲᖕᓂᐊᖅᑐᓂᒃ, ᓴᓂᑭᓗᐊᕐᒥᓪᓕ ᓄᑖᒥᒃ ᐊᖏᕐᕋᖃᙱᑦᑐᒃᑯᕕᒃᓴᒥᑦ ᐱᓂᐊᖅᑐᑦ.

ᐅᑯᐊ ᐱᓕᕆᐊᒃᓴᐃᑦ ᐊᐅᓚᑕᐅᓂᐊᕐᑐᑦ ᓄᓇᖃᖅᑳᖅᑐᓄᑦ ᐊᒻᒪᓗ ᐃᑲᔪᕈᑎᖃᕐᓗᑎᒃ ᐱᓕᕆᐊᑎᒍᑦ ᐊᒻᒪᓗ ᐃᓕᖅᑯᓯᓕᕆᓂᕐᒥᒃ ᐊᑐᕆᐊᓕᖕᓂ ᐱᔨᑦᑎᕋᐅᑎᖃᕐᓗᑎᒃ, ᐅᖃᓚᐅᕐᑐᖅ ᓄᓇᖃᖅᑳᖅᑐᓕᕆᓂᕐᒧᑦ ᒥᓂᔅᑕ ᐹᑎ ᕼᐊᐃᑐ.

ᐃᑲᔫᑎᒃᓴᑦ ᐃᒪᓐᓇ ᐊᕕᒃᑐᕐᓯᒪᔪᑦ:

$81 ᒥᓕᐊᓐ ᑲᓇᑕᒥ ᐃᒡᓗᓕᕆᔨᕐᔪᐊᒃᑯᓐᓂᒃ ᓴᓇᔭᐅᔪᒃᓴᓄᑦ 178 ᐊᖏᕐᕋᖃᙱᑦᑐᒃᑯᕕᒃᓴᓄᑦ ᐊᒻᒪ ᐃᒡᓗᒋᔭᐅᓚᐅᑲᖕᓂᐊᖅᑐᓄᑦ

$15 ᒥᓕᐊᓐ ᐅᑯᓇᙵᑦ ᓄᓇᖃᖅᑳᖅᑐᓕᕆᔨᒃᑯᓐᓂᒃ ᑲᓇᑕᒥ ᐊᐅᓚᑦᑎᓂᕐᒧᑦ ᐃᑲᔫᑎᒃᓴᓄᑦ ᐅᑯᓄᖓ 178-ᓂ ᓄᑖᓂᒃ ᐊᖏᕐᕋᖃᙱᑦᑐᒃᑯᕕᒃᓴᓂᒃ ᐊᒻᒪ ᐃᒡᓗᒋᔭᐅᓚᐅᑲᖕᓂᐊᖅᑐᓂᒃ.

$7.8 ᒥᓕᐊᓐ ᓄᓇᖃᖅᑳᖅᑐᓕᕆᔨᒃᑯᓐᓂᒃ ᐃᑲᔪᕈᑎᒃᓴᐃᑦ ᐱᒋᐊᓕᕈᑎᒃᓴᓂᒃ ᐊᐅᓚᑦᑎᔾᔪᑎᓂᒃ

ᐃᑲᔫᑎᒃᓴᑦ ᐃᓚᒋᔭᐅᔪᑦ ᐆᒧᖓ $724.1-ᒥᓕᐊᓐᓂ ᐋᖅᑭᒃᑕᐅᓯᒪᔪᓂᒃ ᐋᓐᓂᖅᓱᐃᕙᒃᑐᓕᕆᓂᕐᒧᑦ ᖃᓄᐃᓕᐅᕈᑎᓂᒃ, ᑖᓐᓇᓗ ᑐᓴᒐᒃᓴᕆᔭᐅᓚᐅᕐᓯᒪᓪᓗᓂ 2020 ᐅᑭᐊᒃᓵᒃᑯᑦ ᐱᕙᓪᓕᐊᔪᓕᕆᓂᕐᒧᑦ ᐅᖃᐅᓯᒃᓴᓂᒃ.