ᓄᓘᔮᑦ: ᑮᓇᐅᔭᓕᐅᕈᓐᓇᕐᓂᖓ ᐱᔾᔪᑎᐅᒍᓂ, ᐊᑏ ᓴᖅᑭᑕᐅᒻᒪᕆᓚᐅᕐᓕ

ᐱᖁᔭᓕᐅᕐᑎᐅᔪᑦ ᐱᔪᒪᒻᒪᕆᓪᓗᐊᖅᑐᑦ ᐹᕕᓐᓛᓐᑯᓐᓂᑦ ᑮᓇᐅᔭᓕᐅᕐᓂᖏᓐᓂᒃ ᓴᖅᑭᑦᑎᒍᑎᓂᒃ

ᐃᓚᐅᔪᑦ ᐃᒃᓯᕚᕐᑐᑦ ᐃᖃᓗᖕᓂᑦ ᑲᑕᑦ ᕼᐋᓪᒥᑦ ᑎᓴᒪᒋᓕᖅᑕᖓᓂ ᐅᓪᓗᕐᒥ ᐅᑯᐊ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᑭᒃᑯᓕᒫᓂᒃ ᑲᑎᒪᑎᑦᑎᑎᓪᓗᒋᑦ ᐹᕕᓐᓛᓐ ᓴᕕᕋᔭᒃᓴᒥᑦ ᐅᔭᕋᒃᓯᐅᕐᕕᐅᑉ ᓄᓇᓯᐅᑎᑯᑖᒧᑦ ᐊᖅᑯᑎᒥ ᐊᖏᒡᓕᒋᐊᖅᑎᑦᑎᔪᒪᓂᕐᒧᑦ ᑐᒃᓯᕋᐅᑎᖏᓐᓂᒃ ᓄᓘᔮᓂᑦ. (ᐊᔾᔨᓕᐅᕆᔨ ᐃᐊᒪ ᑐᕌᓐᑐ)

By ᔨᒻ ᐱᐊᓪ

For an English version of this editorial, see Mary River: if financial viability is a factor, then prove it

ᓄᓇᕗᑦ ᐱᓕᕆᔾᔪᓯᖏᑦ ᐱᖁᔭᓂᒃ ᒪᓕᒍᓐᓇᖅᑎᑦᑎᓂᖅ ᓴᓇᕝᕕᐅᔪᓄᑦ ᐱᕙᓪᓕᐊᓂᕐᒧᑦ, ᐱᒋᐊᕐᓂᑯ 1993-ᒥᑦ ᓄᓇᕗᒥᑦ ᓄᓇᑖᕐᓂᕐᒧᑦ ᐊᖏᕈᑎᓂᒃ, ᐱᓕᕆᓂᖃᕈᑎᐅᓯᒪᙱᓚᖅ ᑭᓯᐊᓂ ᒪᑯᓂᖓ ᓇᐅᒃᑰᕈᓘᔭᓕᔭᑦᑐᓄᑦ, ᐊᔾᔨᒋᔪᓐᓃᕈᑎᐅᕙᒃᑐᓂᒃ ᐊᕙᑎᓕᕆᓂᕐᒧᑦ ᐊᒻᒪ ᐃᓅᖃᑎᒌᖕᓂᒃᑯᑦ ᑮᓇᐅᔭᓕᐅᕋᓱᖕᓂᕐᒥ ᖃᐅᔨᓴᕐᓂᐅᔪᓂᒃ ᓄᓘᔮᖕᓂ ᓴᕕᕋᔭᒃᓴᒥᑦ ᐅᔭᕋᒃᓯᐅᕐᕕᖕᒥᓪᓕ ᐊᕐᕌᒍᑦ ᖁᓕᑦ ᐃᓗᐊᓂ.

ᐅᓇ ᓴᖅᑭᔮᖅᑎᑕᐅᓚᐅᕐᑐᖅ ᐃᖃᓗᖕᓂ ᑕᕿᖅ ᐱᒋᐊᓕᓵᕐᓯᒪᑎᓪᓗᒍ, ᐅᑯᐊ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᑭᖑᓪᓕᖅᐹᒥᑦ ᑭᒃᑯᓕᒫᓂᒃ ᑲᑎᒪᑎᑦᑎᑎᓪᓗᒋ ᐆᒧᖓ $900-ᒥᓕᐊᓐ ᑖᓚᑐᖅᑐᖅ ᓄᓇᓯᐅᑎᑯᑖᒧᑦ ᐊᖅᑯᑎᒥᑦ ᐊᖏᒡᓕᒋᐊᖅᑎᑦᑎᔪᒪᓂᕐᒧᑦ ᑐᒃᓯᕋᐅᑎᓂᒃ ᐅᑯᓇᙵᑦ ᐹᕕᓐᓛᓐ ᓴᕕᕋᔭᒃᓴᒥ ᐅᔭᕋᒃᓯᐅᕐᕕᒃ ᑯᐊᐳᕇᓴᑯᓐᓂᒃ ᓄᖃᑳᓪᓚᒃᑎᓪᓗᒋᑦ ᐅᐃᒪᓂᒃᑯᑦ ᐊᒻᒪ ᑐᑭᓯᐊᓂᙱᓐᓂᒃᑯᑦ.

ᑭᖑᓪᓕᖅᐹᒃ ᐅᓪᓘᒃ ᑲᑎᒪᓂᐅᓂᐊᖅᑑᒃ ᐅᓪᓗᓂ 7-ᓂᒃ ᐋᖅᑭᒃᑕᐅᓯᒪᔪᖅ ᒥᑦᑎᒪᑕᓕᒃᒧᑦ ᓄᖃᖅᑎᑕᐅᓚᐅᕐᐳᖅ.

ᑕᒪᐅᓇᑦᑕᐃᓐᓇᖅ, ᐹᕕᓐᓛᓐᑯᑦ ᐱᓕᐊᓐᑲᓪᓛᓗᖕᓂ ᐊᑭᓕᒃ, ᐊᔾᔨᒌᙱᑦᑑᑎᓄᑦ ᓴᕕᕋᔭᒃᓴᓄᑦ ᐅᔭᕋᒃᓯᐅᕐᕕᒃ ᓇᓗᓈᕿᓐᓇᖅᑐᒦᓕᕐᐳᖅ. ᐅᓇ ᑎᑎᕋᖅᑕᐅᑎᓪᓗᒍ, ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᓱᓕ ᐃᓱᒪᓕᐅᕆᐊᖃᓚᐅᕐᑐᑦ ᐱᖁᔨᕗᖔᕈᑎᒋᔭᐅᔪᒥᑦ ᓄᓇᕗᑦ ᑐᙵᕕᒃᑯᓐᓂᑦ ᐃᒪᓐᓇ, ᐊᖏᖅᑕᐅᒍᓂ, ᑭᖑᕙᕆᐊᖅᑎᑦᑎᒍᑎᐅᓗᓂ ᑕᕿᓂᒃ 8-ᓂᒃ 12-ᓄᑦ.

ᐊᒻᒪᓗ ᐹᕕᓐᓛᓐᑯᑦ ᓄᓇᒥ ᐊᑐᖅᑐᐊᕐᕕᖏᑦ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ, ᐅᖃᓚᐅᕐᖢᑎᒃ ᓯᕗᓂᑦᑎᐊᖓᓂᒃ ᐃᑲᔪᖅᑐᐃᒍᓐᓇᙱᓐᓂᕋᖅᖢᑎᒃ ᐊᖏᕐᓗᑎᒡᓘᓐᓃᑦ ᓄᓇᓯᐅᑎᑯᑖᒧᑦ ᐊᖅᑯᑎᒥ ᐊᖏᒡᓕᒋᐊᖅᑎᑦᑎᓂᕐᒥᑦ. ᑭᓯᐊᓂᓕ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᑦ ᐱᓕᕆᐊᖃᖅᑐᓕᕆᔨᖏᑦ, ᕿᑭᖅᑖᓗᒃ ᑯᐊᐳᕇᓴᒃᑯᑦ ᐅᖃᕐᓯᒪᔪᑦ ᐃᑲᔪᖅᑐᐃᑦᑎᐊᕐᓂᖏᓐᓂᒃ ᑖᔅᓱᒥᖓ. ᐅᑯᐊᑦᑕᐅᖅ ᐃᓚᒌᓴᒃᑯᑦ. ᐅᓇ ᐱᑐᐃᓐᓇᐅᙱᑦᑐᕈᓘᖕᒪᑦ ᐱᓕᕆᓂᐅᔪᖅ.

ᐅᑯᓄᖓᓕ ᐹᕕᓐᓛᓐᑯᓐᓄᑦ, ᐊᖓᔪᖅᑳᒧᑦ ᑐᒡᓕᕆᔭᐅᒧᖅ ᐊᑐᒃᑲᓐᓂᕈᓐᓇᖅᑐᓕᕆᓂᕐᒧᑦ, ᒦᒐᓐ ᓗᐊᑦ-ᕼᐅᐊᐃᐅᓪ, ᑕᒪᑐᒧᖓ ᐅᖃᓕᓚᐅᕐᑐᖅ ᑖᒃᑯᐊ ᑲᒻᐸᓂᐅᔪᑦ ᐃᓱᒫᓘᑎᖃᑐᐃᓐᓇᓕᕐᓂᖏᓐᓂᒃ ᐱᓕᕆᐊᖑᔪᖅ ᑲᔪᓯᔪᓐᓇᕐᓂᐊᕋᓗᐊᕆᐊᒃᓴᖓᓂᒃ, ᐅᖃᖅᖢᓂ, “ᖃᓄᐃᓕᐅᕋᓱᒻᒪᕆᖕᓂᐊᖅᑐᒍᑦ ᒪᑭᑕᒐᓱᖕᓂᒃᑯᑦ ᐊᒻᒪ ᓴᐳᔾᔨᓯᒪᒐᓱᖕᓂᕐᒥᒃ ᑲᓇᑕᒥᐅᑕᓂᒃ 3,000-ᓂ ᐃᖅᑲᓇᐃᔮᓕᖕᓂᒃ, 476 ᐃᓅᓪᓗᑎᒃ.”

ᐱᓇᓱᐊᕈᓯᐅᓚᐅᕐᑐᒥ, ᐹᕕᓐᓛᓐᑯ ᐅᖃᓚᐅᕐᑐᑦ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᐃᖅᑲᓇᐃᔭᕈᓐᓃᖅᑎᑦᑎᓂᖏᓐᓂᒃ 490 ᖃᓪᓗᓈᓂ ᑳᓐᑐᕌᑎᒍᑦ ᐱᓕᕆᑎᑉᐸᒃᑕᖏᓐᓂᒃ ᐊᒻᒪ 96-ᓂ ᑳᓐᑐᕌᒃᑎᓂᒃ ᐃᓄᖕᓂᒃ ᓴᓇᔨᓂᒃ.

ᑕᐃᒪᐃᓐᓂᖓᓄᑦ ᐅᕗᖓ ᑎᑭᐅᑎᕗᒍᑦ ᐊᖏᓂᖅᐹᒧᑦ ᑭᐅᔭᐅᓯᒪᙱᑦᑐᓂᒃ ᐊᐱᖁᑎᓄᑦ ᐱᓕᕆᐊᒨᖓᔪᓂᒃ: ᓄᓘᔮᑦ ᑮᓇᐅᔭᖃᕐᓂᖓ.

ᐹᕕᓐᓛᓐᑯᑦ ᐅᖃᕐᓯᒪᔪᑦ ᐅᔭᕋᒃᓯᐅᕐᕕᐅᑉ ᑮᓇᐅᔭᓕᐅᕈᓐᓇᕐᓂᖓ ᓇᓗᓇᕐᓂᕋᖅᖢᒍ ᑭᓯᐊᓂ ᐱᖁᔭᓕᕆᔨᐅᔪᑦ ᐱᔪᓐᓇᖅᑎᑦᑎᒍᑎᒃ ᓴᓇᓂᕐᒥᒃ 110 ᑭᓛᒥᑕ ᑕᑭᓂᓕᖕᒥᑦ ᓄᓇᓯᐅᑎᑯᑖᒧᑦ ᐊᖅᑯᑎᒃᓴᒥᑦ ᓄᓘᔮᑦ ᑭᙳᐊᓄᑦ ᐊᒻᒪᓗ ᓴᖅᑭᑎᑦᑎᕙᓪᓕᐊᓂᖓ ᖁᕝᕙᖅᐹᓪᓕᕐᓗᓂ ᒪᐅᖓ 12 ᒥᓕᐊᓐ ᑕᓐᔅᓄᑦ ᐊᕐᕌᒍᒧᑦ, ᑕᐃᒪᐃᑦᑐᓐᓇᕋᔭᖅᖢᑎᒡᓗ 176-ᖏᕐᓱᕐᓗᑎᒃ ᐃᖏᕐᕋᒍᓐᓇᕐᓗᑎᒃ ᒪᐅᓇ ᐅᔾᔨᕈᓱᕆᐊᖃᕐᓇᖅᑐᒃᑯᑦ Eclipse Sound-ᑯᑦ.

ᓈᒻᒪᙱᓕᐅᕈᑎᐅᔪᕐᓕ ᐅᓇ, ᓴᖅᑭᑦᑎᓚᐅᙱᒻᒪᑕ ᑭᒃᑯᓕᒫᓄᑦ ᐅᓂᒃᑳᑎᒍᑦ ᑕᒪᑐᒥᖓ ᐃᑲᔫᑎᐅᓇᔭᖅᑐᓂᒃ. ᐊᒻᒪᓗ ᖃᖓᑦᑎᓂᑦ, ᐅᓄᕐᓂᕐᓴᐃᑦ ᐱᓕᕆᔨᕐᔪᐊᒻᒪᕇᑦ ᐊᐱᕆᑲᑕᒍᓐᓃᓚᐅᕐᒥᔪᑦ ᑕᒪᑐᒥᖓ.

ᐊᕐᕌᓂᐅᓚᐅᕐᓯᒪᔪᕐᓕ, ᓴᕿᑐᒃᓴᖃᙱᒃᑲᓗᐊᖅᑎᓪᓗᒋᑦ ᑕᒪᓐᓇ ᓄᖃᕈᑎᐅᓚᐅᙱᑦᑐᖅ ᑎᒍᒥᐊᖅᑎᓂᒃ ᐅᖃᖅᑕᖏᓐᓂᒃ ᐅᒃᐱᕈᓱᖕᓂᕐᒧᑦ.

ᓲᕐᓗ ᐃᒪᓐᓇ, ᐊᐅᔭᖓᓂ ᐊᒻᒪ ᐅᑭᐊᕐᓵᖓᓂ 2018-ᒥᑦ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᓇᕿᖃᑎᖃᓚᐅᕐᓯᒪᔪᑦ ᐹᕕᓐᓛᓐᑯᓐᓂᒃ, ᓴᐳᑎᓯᒪᓪᓗᒋᑦ ᐅᑯᓇᙵᑦ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓂᒃ.

ᐋᒐᓯ 31-ᒥ ᑕᐃᑲᓂ ᐊᕐᕌᒍᒥ, ᓄᓇᕗᒻᒥ ᐊᕙᑎᓕᕆᔨᒃᑯᑦ ᐃᓱᒪᓕᐅᕆᓚᐅᕐᑐᑦ ᐅᑯᐊ ᒐᕙᒪᑐᖃᒃᑯᑦ ᐊᖏᖁᔭᐅᙱᖢᑎᒃ ᓯᕗᓂᐊᓂᒃ ᐊᒻᒪ ᒥᑭᓐᓂᕐᓴᒥ ᐊᕐᕌᒍᒥ ᓴᖅᑭᑎᑦᑎᕙᓪᓕᐊᒍᒪᓂᖏᓐᓂᒃ—ᐅᕙᙵᑦ 4.2 ᒥᓕᐊᓐ ᑕᓐᔅᓂ ᓴᕕᕋᔭᒃᓴᒥᑦ ᒪᐅᖓ 6 ᒥᓕᐊᓐ ᑕᓐᔅᓄᑦ.

ᑕᐃᒪᓕ ᐹᕕᓐᓛᓐ ᐊᒻᒪ ᐱᓕᕆᖃᑎᖓ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ, ᐱᓕᕆᒻᒪᕆᓕᕆᐊᓚᐅᕐᐳᑦ. ᐱᓇᓱᐊᕈᓯᑦ ᐅᓄᓗᐊᙱᑦᑐᓂᒃ, ᑎᑎᕋᑲᑕᓕᓚᐅᕐᑐᑦ ᐃᓱᒪᓕᐅᕆᔨᒻᒪᕆᖕᓄᑦ ᑕᒪᐅᙶᖅᑐᑐᓄᑦ, ᑖᒥᓂᒃ ᓚᐸᓛᖕᒃ, ᑕᐃᔅᓱᒪᓂ ᒐᕙᒪᑐᖃᒃᑯᓐᓂᑦ ᐅᑭᐅᕐᑕᖅᑐᕐᒥᐅᓄᑦ ᒥᓂᔅᑕᐅᓂᑯ, ᑲᑎᒪᔩᑦ ᐃᓱᒪᓕᐊᕆᔭᖏᓐᓂᒃ ᐃᒡᓗᐊᓄᖔᖅ ᐋᖅᑭᒋᐊᖅᑕᐅᖁᓪᓗᓂᔾᔪᒃ..

ᖃᓄᐃᒻᒪ? ᑮᓇᐅᔭᒧᑦ. ᐃᓄᐃᑦ ᑲᑐᔾᔨᖃᑎᒌᖏᑦ ᐅᖃᓚᐅᕐᑐᖅ ᖁᐊᕐᓵᕐᓂᕋᖅᖢᑎᒃ ᓄᓘᔮᓂᑦ ᐅᔭᕋᒃᓯᐅᕐᕕᐅᑉ ᐱᔪᓐᓇᕐᓂᖓᓂᒃ, ᑐᓂᓯᒋᐊᖃᕐᓂᐊᕐᓂᖏᓐᓄᑦ ᐅᓄᒻᒪᕆᒃᑐᓂᒃ ᑮᓇᐅᔭᓂᒃ ᐊᒻᒪ ᐃᑲᔫᑎᒃᓴᓂᒃ, ᐊᑭᖃᓪᓗᐊᖅᑐᓂᒃ ᐅᖓᑖᓂᒃ $20 ᒥᓕᐊᓐ ᐅᕙᓃᑦᑐᓄᑦ ᓄᑖᒥ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓄᑦ ᐃᑲᔫᓯᐊᖅᑖᕈᓐᓇᐅᑎᖏᓐᓄᓪᓗᑦ ᐊᖏᕈᑎᓂᒃ.

ᐋᑐᕚᒥ ᐊᖏᓚᐅᕐᑐᑦ. ᐃᓱᒪᒋᔭᐅᓗᐊᖅᖢᓂ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᐃᓱᒫᓘᑎᖏᑦ ᑮᓇᐅᔭᖃᕈᓐᓇᕐᓂᐊᕋᓗᐊᕆᐊᒃᓴᖓᓂᒃ ᐅᔭᕋᒃᓯᐅᕐᕕᒃ, ᒐᕙᒪᑐᖃᒃᑯᑦ ᐊᖏᓕᓚᐅᕐᓯᒪᔪᑦ ᐹᕕᓐᓛᓐᑯᑦ ᑐᒃᓯᕋᐅᑎᖓᓂᒃ ᐊᕐᕌᓂ.

“ᐃᓱᒫᓘᑎᖃᕐᒥᒐᑦᑕ ᐊᑯᓂᕈᓗᒃ ᐊᑐᕈᓐᓇᕋᔭᕆᐊᒃᓴᖓᓂᒃ ᓄᓘᔮᖕᓂᑦ ᐅᔭᕋᒃᓯᐅᕐᕕᒃ ᐊᒻᒪᓗ ᖃᐅᔨᒪᓂᖃᕐᓗᑕ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᐃᓱᒫᓘᑎᖏᓐᓂᒃ ᑮᓇᐅᔭᓕᐅᕋᓱᖕᓂᖅ ᐱᓕᕆᐊᒧᑦ ᒪᓕᒐᔭᕐᓂᖓᓂᒃ ᓴᕿᑎᑦᑎᕚᓪᓕᕐᓂᕐᒧᑦ ᑐᒃᓯᕋᐅᑎᓂᒃ,” ᓚᐸᓛᖕᒃ ᑎᑎᕋᕐᓯᒪᔪᖅ ᓯᑎᐱᕆ 30, 2018-ᒥᑦ ᑎᑎᖃᑎᒍᑦ ᐊᑎᓕᐅᖅᑕᐅᓯᒪᖃᑕᐅᔪᒥᑦ ᒐᕙᒪᑐᖃᒃᑯᑦ-ᓄᓇᖃᖅᑳᖅᑐᓄᓪᓗ ᒥᓂᔅᑕᒧᑦ ᑭᐅᕈᓕᓐ ᐸᓇᑦᒧᑦ.

ᐃᒪᓐᓇᖔᖃᐃ, ᐱᒻᒪᕆᐅᓛᖅ ᐱᖁᔭᓕᐅᕐᑎ ᑭᒃᑯᓕᒫᓂ—ᒐᕙᒪᑐᖃᒃᑯᑦ—ᐊᖏᕐᓯᒪᔪᑦ ᑮᓇᐅᔭᓕᐅᕈᓐᓇᑦᑎᐊᕐᓂᖅ ᐱᒻᒪᕆᐅᓂᖓᓄᒃ ᐊᑐᒻᒪᕆᖕᓂᖓᓂᒡᓗ ᑕᒪᑐᒧᖓ. ᐊᒻᒪᓗ ᑕᐃᒪᐃᑎᑦᑎᓚᐅᕐᓯᒪᓪᓗᑎᒃ ᑮᓇᐅᔭᓕᕆᔾᔪᑎᑎᒍᑦ ᓴᕿᔮᖅᑐᖃᙱᒃᑲᓗᐊᖅᑎᓪᓗᒍ ᑕᕝᕗᖓ.

ᐅᓇ ᓈᒻᒪᙱᓕᐅᕈᑎᒻᒪᕆᐊᓗᒃ. ᓲᖃᐃᒻᒪ ᓱᓕᒍᓂ ᑖᓐᓇ ᐱᓕᕆᐊᖑᔪᖅ ᑮᓇᐅᔭᓕᐅᕈᓇᙱᓐᓂᖓᓂᒃ, ᐱᖁᔭᓕᐅᖅᑐᐅᔪᖅ ᐱᖃᖅᑎᐅᑉ ᐅᖃᖅᑕᖓᑦᓄ ᑕᑯᔪᒪᓇᔭᕆᐊᖃᓪᓗᐊᖅᑐᖅ ᐅᖃᖅᑕᖏᑦ ᓱᓕᔭᕆᐊᒃᓴᖏᓐᓂᒃ.

ᓇᐅᒃᑯᓕᒫᑎᒍᓪᓕ ᓄᓘᔮᖕᓂ ᐱᓕᕆᐊᒧᑦ, ᐹᕕᓐᓛᓐᑯᑦ ᐃᖅᑲᓇᐃᔭᖅᑎᖏᑦ—ᑕᐃᒪᐃᑦᑕᕆᐊᖃᕐᓂᖏᓐᓄᑦ—ᓴᖅᑭᑎᑦᑎᔭᕆᐊᖃᓪᓗᐊᖅᑐᑦ ᖃᔅᓯᒐᓴᒻᒪᕆᖕᓂᒃ ᐃᑲᔫᑎᐅᔪᓐᓇᖅᑐᓂᒃ ᐆᒧᖓ ᑖᒃᑯᐊ ᐊᕙᑎᒋᔭᒧᑦ ᐊᒃᑐᐃᒍᑎᓂᒃ ᐅᖃᐅᓯᕐᓄᑦ.

ᑭᓯᐊᓂᓕ ᐱᓕᕆᐊᒧᑦ ᑮᓇᐅᔭᓕᕆᓂᒃᑯᑦ ᐊᓂᒍᐃᒍᓐᓇᕐᓂᖏᑦᑎᒍᑦ, ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᓴᕿᑎᑦᑎᔪᒪᓗᐊᖂᙱᒻᒪᑕ ᑭᒃᑯᓕᒫᓄᑦ ᓇᓗᓇᐃᒃᑯᑎᓂᒃ. ᓲᕐᓗ, ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᑦ ᐱᖁᔨᓯᒪᖕᒪᑕ ᑕᑭᐸᓗᒃᑐᕈᓗᖕᒥ ᑮᓇᐅᔭᓕᕆᓂᕐᒧᑦ ᑎᑎᖃᓂᒃ ᐱᔭᐅᓂᑯᓂᒃ ᑕᕆᐅᕐᔪᐊᓕᕆᔨᒃᑯᑦ ᐅᑭᐅᕐᑕᖅᑐᕐᒥᑦ “ᐊᑐᙱᒻᒪᑦ” ᐊᒻᒪᓗ ᓴᕿᑎᑕᐅᓪᓗᐊᙱᖢᓂ ᑲᑎᒪᔨᓄᑦ ᑭᒃᑯᓕᒫᓄᑦ ᐊᑎᓕᐅᕐᕕᖓᓂᒃ. (ᑎᑎᖃᑦ ᖃᕋᓴᐅᔭᒃᑯᑦ ᓴᖅᑭᔮᒐᑦᑎᓐᓂ ᓱᓕ ᓴᖅᑭᔮᖅᑐᖅ).

ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᑖᔅᓱᒥᖓ ᐊᑐᖁᔨᓚᐅᕐᓯᒪᔪᑦ ᑖᒃᑯᓂᖓ ᑎᑎᖃᓂᒃ ᓴᖅᑭᑎᑦᑎᓚᐅᖅᑎᓪᓗᒋᑦ—ᐊᒻᒪᓗ ᐲᖅᑕᐅᒋᓪᓗᓂ ᐹᕕᓐᓛᓐᑯᑦ ᑕᐃᒪᐃᖁᔨᓂᖏᓐᓄᑦ.

ᐅᑯᑎᒎᓇᕐᓕ, ᐹᕕᓐᓛᓐ ᑐᓂᓯᔪᒪᓚᐅᕐᓯᒪᔪᑦ, ᐃᒻᒥᒃᑯᑐᐃᓐᓇᖅ, ᓇᐃᓐᓂᕐᓴᓂᒃ ᑮᓇᐅᔭᓕᕆᔾᔪᑎᓄᑦ ᐅᓂᒃᑳᓂ ᐅᖃᕐᓯᒪᓗᑎᒃ ᖃᓄᐃᒻᒪ ᓄᓘᔮᑦ ᑮᓇᐅᔭᓕᐅᒃᑲᓐᓂᕈᓐᓇᕐᓂᖓᓂᒃ ᐊᖏᓂᕐᓴᒥᑦ ᓴᕿᑎᑦᑎᕙᓪᓕᐊᓂᒃᑯᑦ.

ᐅᓇ ᐃᒻᒥᒃᑯᑐᐊᑯᓘᒍᒪᓂᖅ ᓈᒻᒪᙱᔾᔪᑎᐅᑐᐃᓐᓇᕆᐊᓕᒃ. ᐊᒃᓱᓪᓘᓐᓃᑦ ᐹᕕᓐᓛᓐᑯᑦ ᑕᒪᑐᒥᖓ ᐋᖅᑭᒋᐊᕐᓯᒐᓗᐊᖅᖢᑎᒃ.

ᑕᒪᑐᒧᖓᓕ ᑭᐅᓪᓗᑎᒃ, ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏ ᐊᔾᔨᒋᙱᑕᖓᓂ ᐃᓱᒪᓕᐅᕆᓚᐅᕐᑐᑦ, ᑕᒪᓐᓇᓗ ᑐᑭᖃᙱᖢᓂ. ᒐᕙᒪᑐᖃᒃᑯᑦ ᑮᓇᐅᔭᓕᐅᕈᓐᓇᕐᓂᐊᕐᓂᖅ ᐊᑐᕈᑎᒋᓂᐊᕈᓂᐅᒃ, ᑕᐃᒪᓕ ᐅᑯᐊ ᒐᕙᒪᑐᖃᒃᑯᓐᓂᑦ ᐃᑲᔫᓯᐊᖅᑖᖅᐸᒃᑐᑦ ᑲᑎᒪᔨᑦ ᑕᐃᒪᐃᑦᑕᕆᐊᖃᕆᕗᑦ.

ᐄᖑᒐᓗᐊᖅ, ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᐊᒻᒪ ᐊᓯᖏᑦ ᐱᖁᔭᓕᕆᔨᐅᔪᑦ ᐊᓯᒃᑲᓐᓂᐊᓂᒃ ᐱᓇᓱᒋᐊᖃᓪᓗᐊᖅᑐᑦ ᑕᐃᒪᓐᓇ ᑕᑯᑎᑦᑎᒍᑎᓂᒃ. ᐱᔪᒪᒻᒪᕆᒋᐊᖃᖅᑐᑦ. ᐊᒻᒪᑦᑕᐅᖅ ᐹᕕᓐᓛᓐᑯᑦ ᐊᑐᖅᑐᐊᕐᕕᒋᔭᖏᑦ ᓄᓇᒥ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ.

ᐊᒻᒪᓗ ᑕᐃᒪᐃᑦᑐᓂᒃ ᐃᓱᒫᓘᑎᓂᒃ ᐊᓯᐊᒍᑦ ᓴᖅᑭᑦᑐᖃᒃᑲᓐᓂᑐᐃᓐᓇᕆᐊᖃᕐᓂᖓᓄᑦ, ᒐᕙᒪᑐᖃᒃᑯᑦ ᐋᖅᑭᒋᐊᕐᓯᓪᓗᐊᖅᑐᑦ ᒐᕙᒪᑐᖃᒃᑯᑦ ᒪᓕᒐᖓᓂᒃ ᐊᐅᓚᑦᑎᒍᑎᐅᔪᒥᑦ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔩᑦ ᐱᓕᕆᔾᔪᓯᖏᓐᓄᑦ, ᓄᓇᕗᒻᒥ ᐸᕐᓇᐃᔨᒃᑯᓐᓂᑦ ᐊᒻᒪᓗ ᐱᓕᕆᐊᒥ ᖃᐅᔨᓴᕐᓂᕐᒧᑦ ᒪᓕᒐᕐᔪᐊᖅ, ᓱᖅᑯᐃᓇᖁᓪᓗᒋ ᖃᓄᖅ ᑮᓇᐅᔭᓕᕆᓂᕐᒧᑦ ᑐᓴᐅᒪᑎᑦᑎᒍᑎᐅᔪᑦ ᐱᓕᕆᐊᖑᖃᑦᑕᕆᐊᖃᕐᓂᖏᓐᓂᒃ ᓯᕗᓂᒃᓴᒥᑦ.

ᐄᖑᒐᓗᐊᖅ ᐅᖃᕈᓐᓇᕐᕕᖃᕈᒪᓯᓚᒧᑦ ᐅᖃᖃᑦᑕᖅᓯᒪᑎᓪᓗᒋᑦ, ᓱᓕ ᐊᒥᓱᒻᒪᕆᖕᓂ ᐊᐱᖁᑎᑕᖃᕐᒪᑦ ᑭᐅᔭᐅᓯᒪᙱᑦᑐᓂᒃ ᐹᕕᓐᓛᓐᑯᑦ ᑭᖑᓪᓕᖅᐹᖓᓂᒃ ᐊᖏᒡᓕᒋᐊᖅᑎᑦᑎᔪᒪᓂᕐᒧᑦ ᑐᒃᓯᕋᐅᑎᖏᓐᓂᒃ, ᐊᒃᑐᐊᔪᓂᒃ ᓄᓇᓯᐅᑎᑯᑖᑉ ᐊᖅᑯᑎᐅᑉ ᐊᒃᑐᐃᒍᑎᖓᓂᒃ ᑐᒃᑐᓂᒃ, ᐊᒃᑐᐃᒍᑎᖏᑦ ᐅᒥᐊᕐᔪᐊᑦ ᕿᓚᓗᒐᕐᓂᒃ, ᐱᓕᕆᐊᖑᔪᖅ ᐃᓄᖕᓂᑦ ᐃᖅᑲᓇᐃᔭᖅᑎᑦᑎᙱᓗᐊᕐᓂᖓ, ᐊᒻᒪ ᐊᒥᓱᒃᑲᓐᓂᒻᒪᕆᖕᓂᒃ. ᐊᒥᓱ ᐊᐱᖁᑎᒃᓴ ᒪᐊᖔᖓᖕᒪᑕ ᐃᒃᐱᑭᑦᑐᖅᔪᐊᕐᒥᑦ ᓂᒋᕐᒧᙵᐅᔪᒥᒃ ᓄᓇᓯᐅᑎᑯᑖᒃᑯᑦ ᑐᓚᒃᑕᕐᕕᒃᓴᒧᑦ ᑐᒃᓯᕋᐅᑎ, ᑖᒃᑯᐊᓗ ᐹᕕᓐᓛᓐᑯᑦ ᐊᖏᖅᑕᐅᓯᒪᓕᓚᐅᕐᓯᒪᓪᓗᑎᒃ 2013-ᒥᑦ ᓴᓇᔪᓐᓇᕐᓂᖏᓐᓂᒃ, ᐊᒻᒪᓗ 18 ᒥᓕᐊᓐ ᑕᓐᔅᓂᒃ ᓴᖅᑭᑎᑦᑎᔪᓐᓇᕐᓂᕐᒥᑦ ᐊᕐᕌᒍᒧᑦ. ᓱᓕ ᓱᖅᑯᐃᓇᓗᐊᙱᑦᑐᖅ ᖃᓄᐃᒻᒪ ᐹᕕᓐᓛᓐᑯᑦ ᓴᓇᖁᔭᐅᓚᐅᕐᓯᒪᓂᖏᓐᓂᒃ 2013-ᒥᑦ ᓴᖅᑭᑎᑦᑎᔪᓐᓇᖅᑎᑕᐅᑎᓪᓗᒋᑦ 18 ᒥᓕᐊᓐ ᑕᓐᔅᓂᒃ ᐊᕐᕌᒍᒥᑦ. ᓱᓕ ᓱᖅᑯᐃᓇᙱᑦᑐᖅ ᖃᓄᐃᒻᒪᑦ ᐹᕕᓐᓛᓐᑯᑦ ᑲᔪᓯᓯᒪᙱᑦᑕᕆᐊᒃᓴᖏᓐᓂᑦ ᑖᔅᓱᒥᖓ ᐸᕐᓇᐅᑎᒥᑦ.

ᑭᓯᐊᓂᓕ ᐊᖏᓂᖅᐹᖅ ᐊᐱᖁᑎ ᖃᓄᐊᓗᒃ ᑖᓐᓇ ᐱᓕᕆᐊᖑᔪᖅ ᐱᑕᖃᐃᓐᓇᕈᓐᓇᕐᓂᐊᕆᐊᒃᓴᖓᓂᒃ.

ᑕᒪᑯᒧᖔᖅᑐᓂᒃ ᑕᑯᒃᑲᓐᓂᕈᓐᓇᖅᑐᓯ ᐅᕙᓂ www.nunatsiaq.com

Share This Story

(0) Comments

Join the Conversation

Your email address will not be published. Required fields are marked *

*


Protected with IP Blacklist CloudIP Blacklist Cloud