ᓴᐃᒪᓐ ᐅᖃᖅᑐᖅ ‘ᐊᔪᐃᓐᓇᖅᑕ – ᐱᓇᓱᐃᓐᓇᖅᑕ – 2022-ᒥ

ᒐᕙᓇ ᔭᓄᕈᓪ ᐅᖃᓚᐅᕐᑐᖅ ᑲᓇᑕᒥᐅᑕ “ᐱᓇᓱᐃᓐᓇᖅᐳᑦ, ᐃᓱᒪᒋᔭᖃᑦᑎᐊᖅᖢᑎᒃ ᐊᒻᒪᓗ ᐊᑐᕈᓐᓇᖅᓯᓂᕐᒥᒃ’ ‘ᐊᒃᓱᕈᕐᓇᖅᑐᒥᒃ ᐊᕐᕌᒍᒥ’ ᐊᑐᓚᐅᖅᖢᑕ

ᑲᓇᑕᒥᐅᑕᐃᑦ ᓵᙵᔪᑦ ᓄᑖᖅ ᐊᕐᕌᒍᒥ ᓂᕆᐅᓇᖅᑐᓂᒃ ᖃᓄᐃᓕᐅᕈᑎᒃᓴᓂᒃ, ᒪᑯᓂᖓ ᐃᓚᖃᖅᖢᑎᒃ ᓄᕙᒡᔪᐊᕐᓇᖅ-19 ᐋᓐᓂᐊᕕᒡᔪᐊᕐᓇᖅ, ᓯᓚᐅᑉ ᐊᓯᙳᖅᐸᓪᓕᐊᓂᖓ ᐊᒻᒪᓗ ᒪᒥᓴᕋᓱᖕᓂᖅ, ᐅᖃᓚᐅᕐᑐᖅ ᒐᕙᓇ ᔭᓄᕈ ᐅᖃᓪᓚᒃᑎᓪᓗᒍ ᐊᕐᕋᒍ ᓄᑖᒧᑦ. (ᐊᔾᔨᙳᐊᖅ ᐅᕙᙵᑦ ᒐᕙᓇ ᔭᓄᕉᑉ ᖃᕋᓴᐅᔭᒃᑯᑦ ᓴᖅᑭᔮᒐᖓᓂ gg.ca)

By ᑰᕆ ᓚᐅᕌᒃ

For an English version of this story, see Simon calls for ajuinnata — or commitment — in 2022

ᒐᕙᓇ ᔭᓄᕈ ᒥᐊᓕ ᓴᐃᒪᓐ ᐅᖃᓚᐅᕐᑐᖅ ᐃᓄᖕᓄᑦ ᐅᖃᐅᓯᐅᕙᒃᑐᒥᒃ ‘ᐊᔪᐃᓐᓇᖅᑕ’ ᓯᕗᓪᓕᖅᐹᒥ ᐊᕐᕌᒍᒧᑦ ᑐᓴᒐᒃᓴᓕᐅᕐᑎᓪᓗᒍ ᐅᖃᖅᖢᓂ ᑲᓇᑕᒥᐅᑕᐃ ᑲᔪᓯᔭᕆᐊᖃᕐᓂᖏᓐᓂᒃ ᐊᓂᒍᖅᑎᑦᑎᓇᓱᖕᓂᕐᒥᒃ ᐊᕐᕌᒍ ᓄᑖᖅ ᑎᑭᓕᕐᑎᓪᓗᒍ.

“ᑕᒪᓐᓇ ᐱᓇᓱᐃᓐᓇᕐᓂᐅᒐᓗᐊᖅᑎᓪᓗᒍ, ᐱᓂᐊᕐᓂᕋᕐᓯᒪᓪᓗᓂ ᓱᓕ ᐅᖓᑖᓄᑦ ᑐᑭᖃᕐᒥᔪᖅ – ᑐᑭᖓ ᑐᑭᓯᓇᖅᑐᖅ ᖃᓄᐃᓕᐅᕈᑎᐅᓂᒃᑯᑦ,” ᓴᐃᒪᓐ ᐅᖃᓚᐅᕐᑐᖅ 2 ᒥᓂᑦ ᓇᑉᐸᕐᓗ ᐊᔾᔨᓕᐅᒐᑎᒍᑦ ᓴᖅᑭᔮᖅᑎᓪᓗᒍ ᖃᕋᓴᐅᔭᒃᑯᑦ ᓴᖅᑭᔮᒐᖓᓂᒃ ᑎᓯᐱᕆ 30-ᐅᑎᓪᓗᒍ.

ᐅᖃᐅᓯᖃᓚᐅᕐᑐᖅ ᓄᕙᒡᔪᐊᕐᓇᖅ-19 ᐋᓐᓂᐊᕕᒡᔪᐊᕐᓇᖅ, ᓯᓚᐅ ᐊᓯᔾᔨᖅᐸᓪᓕᐊᓂᖓ ᐊᒻᒪᓗ ᓄᓇᖃᖅᑳᖅᑐᑦ ᒪᒥᓴᕋᓱᖕᓂᖏᑦ ᐱᓕᕆᐊᒃᓴᒻᒪᕆᐅᓚᐅᕐᓂᖏᓐᓂᒃ ᑲᓇᑕᒥᐅᑕᓄᑦ 2021-ᖑᑎᓪᓗᒍ.

“ᐊᕐᕌᒍᖃᓵᖅᖢᑎᒃ ᐊᒃᓱᕈᕐᓇᖅᑐᒥᒃ ᓱᓕ ᑲᓇᑕᒥᐅᑕᑦ ᐱᓇᓱᐃᓐᓇᖅᑐᑦ, ᐃᓱᒪᒋᔭᖃᑦᑎᐊᖅᖢᑎᒃ ᐊᒻᒪᓗ ᐊᑐᕈᓐᓇᖅᓯᓂᕐᒥᒃ,” ᓴᐃᒪᓐ ᐅᖃᖅᑐᖅ.

ᐊᕐᕌᒍ ᓄᑖᖅ ᐃᓄᖕᓂ ᓄᕙᒡᔪᐊᕐᓇᖅ-19-ᒥ ᐱᓕᕆᐊᖃᐃᓐᓇᕈᑎᐅᔭᕆᐊᓕᒃ ᒪᐅᓇ ᑲᐱᔭᐅᑲᑕᖕᓂᒃᑯᑦ ᐊᒻᒪᓗ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᖃᓄᐃᓕᐅᕈᑎᑎᒍᑦ, ᐅᖃᓚᐅᕐᑐᖅ.

ᕿᓂᕋᓱᖕᒪᑕ “ᖃᓄᐃᓕᐅᕈᑎᐅᔪᓐᓇᕐᓂᐊᖅᑐᓂᒃ ᐋᖅᑭᒋᐊᕈᑎᐅᔪᓐᓇᖅᑐᓂᒃ” ᑕᒪᓐᓇ ᓯᓚ ᐊᓯᙳᖅᐸᓪᓕᐊᓂᖓ ᐱᓕᕆᐊᖑᓇᓱᒃᑎᓪᓗᒍ.

ᐊᒻᒪᓗ ᑲᓇᑕᒥᐅᑕᑦ ᐱᓇᓱᒋᐊᖃᓕᖅᖢᑎᒃ “ᒪᒥᓴᖅᐸᓪᓕᐊᔾᔪᑎᓂᒃ” ᐊᒻᒪᓗ “ᒪᒥᓴᖅᐸᓪᓕᐊᓂᐊᕐᓗᑎᒃ, ᐃᓱᒪᒋᔭᖃᑦᑎᐊᕈᓐᓇᕐᓗᑎᒃ ᐊᒻᒪᓗ ᑐᑭᓯᓯᒪᔪᓐᓇᕐᓗᑎᒃ,” ᓴᐃᒪᓐ ᐅᖃᖅᑐᖅ.

ᒐᕙᓇ ᔭᓄᕉᑉ ᓄᑖᒧᑦ ᐊᕐᕌᒍᒧᑦ ᐅᖃᐅᓯᖃᕐᓂᖓ ᐃᓕᖅᑯᓯᕆᔭᐅᔪᖅ ᐊᕐᕌᒍᑕᒫᑦ. ᐅᓇᓕ ᓯᕗᓪᓕᖅᐹᖑᔪᖅ ᓴᐃᒪᓐᒧᑦ, ᐃᓄᒃ ᑯᐃᓐᒥ ᑭᒡᒐᖅᑐᐃᔨᐅᓕᓚᐅᕐᓯᒪᔪᖅ ᑲᓇᑕᒥ ᔪᓚᐃᖑᓚᐅᕐᑐᒥᓐ.

ᐃᓇᖏᕐᓯᓚᐅᕐᑐᖅ ᔫᓕ ᐸᐃᔭᑦᒥᒃ, ᓯᓚᐃᓐᓇᕐᒧᙵᐅᓯᒪᓂᑯ ᓄᖅᑲᓚᐅᕐᓯᒪᔪᖅ ᐃᖅᑲᓇᐃᔭᖅᑎᖏᓐᓄᑦ ᐱᑦᑎᐊᖃᑦᑕᙱᓗᐊᕐᓂᕋᖅᑕᐅᑎᓪᓗᒍ.

ᓴᐃᒪᓐ ᓯᕗᓂᐊᓂ ᑖᔅᓱᒧᖓ ᐃᓱᒪᒋᔭᐅᓚᐅᕐᓯᒪᖕᒥᔪᖅ, ᑭᓯᐊᓂᓕ ᓂᕈᐊᕆᔭᐅᓚᐅᕐᓯᒪᙱᑦᑐᖅ ᓂᕈᐊᖔᖅᖢᑎᒃ ᒪᕐᕈᐃᓂᒃ ᑲᓇᑕᐅᑉ ᐅᖃᐅᓯᓪᓚᕆᖏᓐᓂᒃ ᐅᖃᕈᓐᓇᖅᑐᓂᒃ — ᖃᓪᓗᓈᑐᑦ ᐊᒻᒪ ᐅᐃᕖᑐᑦ. ᓴᐃᒪᓐ, ᓄᓇᕕᒻᒥ ᐱᕈᕐᓴᓂᑯᕕᓂᖅ, ᐃᓄᒃᑎᑐᑦ ᐊᒻᒪ ᖃᓪᓗᓈᑐᑦ ᐅᖃᕈᓐᓇᑦᑎᐊᖅᑐᖅ ᐊᒻᒪᓗ ᐅᐃᕖᑐᑦ ᐃᓕᓐᓂᐊᓚᐅᕐᓯᒪᙱᖢᓂ ᐱᕈᖅᓴᑎᓪᓗᒍ.

ᒐᕙᓇ ᔭᓄᕈᙳᖅᑎᓪᓗᒍ ᓴᐃᒪᓐ ᐅᖃᓚᐅᕐᓯᒪᔪᖅ ᐅᐃᕖᑐᑦ ᐊᔪᕈᓐᓃᕐᓴᕐᓂᐊᕐᓂᕋᖅᖢᓂ ᐊᒻᒪ ᐊᑐᕐᐸᒡᓗᓂᐅᒃ ᐱᓕᕆᐊᖏᑦᑎᒍᑦ. ᓴᐃᒪᓐ ᓄᑖᒧᑦ ᐊᕐᕌᒍᒧᑦ ᐅᖃᓪᓚᓚᐅᕐᓯᒪᔪᖅ ᐃᓄᒃᑎᑐᑦ, ᖃᓪᓗᓈᑐᑦ ᐊᒻᒪ ᐅᐃᕖᑐᑦ.

ᓴᐃᒪᓐ ᑎᒃᑯᐊᖅᑕᐅᓚᐅᕐᓯᒪᔪᖅ ᐊᒥᓱᑦ ᑲᓇᑕᒥᐅᑕᑦ ᐱᓕᕆᐊᖃᖅᐸᓪᓕᐊᓕᖅᑎᓪᓗᒋᑦ ᑐᓴᓚᐅᖅᖢᑎᒃ ᐃᓗᕕᖕᓂ ᐊᑎᖃᐅᙱᑦᑐᓂᒃ ᓇᓂᓯᑲᑕᓕᖅᑎᓪᓗᒋᑦ ᐃᓕᓐᓂᐊᕆᐊᕕᕕᓂᕐᓂᒃ ᐊᓪᓚᓄᑦ. ᑕᒪᓐᓇ ᖃᓄᐃᓕᐅᕈᑎᕕᓂᕐᓂᒃ ᓴᖅᑭᑎᑦᑎᒃᑲᓐᓂᕈᑎᐅᓕᓚᐅᕐᑐᖅ ᑲᓇᑕᒥ ᓄᓇᖃᖅᑳᖅᑐᓂᒃ ᖃᓄᐃᓕᐅᖃᑦᑕᖅᓯᒪᓂᖏᓐᓂᒃ ᐊᒻᒪᓗ ᒪᒥᓴᖅᐸᓪᓕᐊᓂᕐᒥᒃ ᐱᓕᕆᐊᖃᒃᑲᓐᓂᕈᑎᐅᓕᖅᖢᓂ.

ᔪᓚᐃᖑᑎᓪᓗᒍ ᓇᐃᑕᓐ ᐅᐱᐊᑦ, ᐊᖓᔪᖅᑳᖅ ᑲᓇᑕᒥ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ ᐃᓄᐃᑦ ᑕᐱᕇᑦ ᑲᓇᑕᒥ, ᐅᖃᓚᐅᕐᓯᒪᔪᖅ ᓴᐃᒪᓐ “ᓂᕈᐊᒐᒃᓴᑦᑎᐊᕙᐅᓂᖓᓂᒃ ᒐᕙᓇ ᔭᓄᕈᒧᑦ ᒫᓐᓇᐅᔪᖅ.”

ᓴᐃᒪᓐ ᐊᔾᔨᒋᓚᐅᙱᑕᖓ ᑐᓴᒐᒃᓴᓕᐊᖓ ᐊᕐᕌᓂᐅᓚᐅᕐᑐᒥᓪᓗ. 2020 ᐃᓱᓕᑎᓪᓗᒍ ᐅᓇ ᐸᐃᔭᑦ ᑐᙵᓱᒃᑎᑦᑎᓚᐅᕐᓯᒪᖕᒪᑕ ᐳᕌᕕᓐᓯᓄᑦ ᒐᕙᓇᒋᔭᐅᔪᑦ ᐊᒻᒪ ᑎᐅᕆᑑᕆᓄᑦ ᑲᒥᓯᓇᒋᔭᐅᔪᑦ ᐃᓱᒪᒋᔭᖏᓐᓂᒃ ᓂᕆᐅᒋᔭᖏᓐᓂᒡᓗ ᐅᖃᓪᓚᖁᓪᓗᓂᒋ 2021-ᒧᑦ.

ᐅᓇ ᓄᕙᒡᔪᐊᕐᓇᖅ-19 ᐋᓐᓂᐊᕕᒡᔪᐊᕐᓇᖅ — ᑖᓐᓇᓗ ᐊᕐᕌᒍᒥ ᐊᑐᙱᓱᖓᖅᖢᓂ ᑕᐃᔅᓱᒪᓂ — ᐸᐃᔭᑦ ᐅᖃᐅᓯᕆᓂᕐᓴᕆᓚᐅᕐᓯᒪᔭᖓ.

“ᑭᓱᓕᒫᑦ ᐊᔾᔨᒋᔪᓐᓃᕐᒪᒋᑦ” ᓲᖃᐃᒻᒪ ᐋᓐᓂᕕᒡᔪᐊᕐᓇᒧᑦ, ᐸᐃᑦ ᐅᖃᖅᑐᖅ. “ᑭᓇᑐᐃᓐᓇ ᐃᓱᒪᓚᐅᕐᓯᒪᙱᑦᑐᖅ 2020 ᖃᓄᐃᓕᖓᓛᕐᓂᖓᓂᒃ.”

ᓄᓇᕗᑦ ᑲᒥᓯᓇᖃᓚᐅᕐᓯᒪᙱᓐᓂᖓᓄᑦ, ᐊᕐᕕᐊᕐᒥᐅᑕᖅ ᔫ ᖃᕆᑕᖅ, ᑖᔅᓱᒪᓗ ᓇᔭᖓ ᓇᓕ ᑕᑉᑕᖁᑦ ᑯᓱᒐᖅ ᑲᒥᓯᓇᐅᓚᐅᕐᓯᒪᓪᓗᓂ ᓯᕗᓂᑦᑎᐊᖓᓂᒃ, ᑭᒡᒐᖅᑐᐃᓚᐅᕐᓯᒪᔪᖅ ᓄᓇᕗᒥᒃ ᑕᕐᕆᔭᒐᑎᒍᑦ.

2020 ᐃᓱᓕᓕᖅᑎᓪᓗᒍ ᖃᕆᑕ ᐅᖃᓚᐅᕐᓯᒪᔪᖅ 2021 “ᐃᓕᖁᓯᑐᖃᑦᑎᓐᓂᒃ” ᐊᑐᒃᑲᓐᓂᕈᓐᓇᓛᕈᒪᓪᓗᓂᐅ ᐊᒻᒪᓗ ᒪᒥᓵᓕᖁᔨᓪᓗᓂ ᐋᓐᓂᐊᕕᒡᔪᐊᕐᓇᒥᒃ.”

Share This Story

(0) Comments

Join the Conversation

Your email address will not be published. Required fields are marked *

*