ᕕᐄᓐᔅ ᑲᒥᓴᓐ ᒪᒥᐊᒍᑎᐅᕗᖅ ᑯᐸᐃᒃ ᓯᕗᓕᐅᖅᑎᖓᓄᑦ

ᑕᐃᒪᓐᓇ, ᑯᐸᐃᒃ ᒐᕙᒪᖓᑦ ᐱᔭᒃᓴᖏᓐᓂᒃ ᐊᑐᖅᓯᒪᙱᓚᑦ ᓄᓇᖃᖅᑳᖅᑐᓄᑦ, ᓕᒍ ᐅᖃᓚᐅᕐᑐᖅ.

ᓕᒍ ᒪᒥᐊᓚᐅᕐᑐᖅ—ᓯᕗᓪᓕᖅᐹᖑᓪᓗᓂ 142-ᓂ ᐃᓱᒪᓕᐊᕆᔭᐅᓯᒪᔪᓂᒃ ᐅᓂᒃᑳᓕᐊᓂᒃ—ᑲᓇᑕᒥ ᓄᓇᖃᖅᑳᖅᑐᑦ ᑲᑎᒪᕕᒡᔪᐊᕐᑎᓪᓗᒋ ᐱᖓᑦᓯᖅ, ᐅᒃᑑᐱᕆ 2-ᒥ, ᐅᓪᓘ ᒪᕐᕉᒃ ᐊᓂᒍᖅᑎᓪᓗᒋ ᐅᓇ ᐃᖃᖅᑐᐃᕕᒡᔪᐊᓄᑦ ᐃᖃᖅᑐᐃᔨᕕᓂᖅ ᔮᒃ ᕕᐄᓐᔅ, ᑲᒥᓴᓐᒥ ᐊᐅᓚᑦᑎᔨᐅᓚᐅᕐᑐᖅ ᐅᓂᒃᑳᖏᓐᓂᒃ ᓴᖅᑭᑎᑦᑎᐊᓪᓚᓚᐅᖅᑎᓪᓗᒍ.

ᐱᔾᔪᑎᖃᕋᓱᖕᓂᖅ ᓈᒻᒪᙱᒻᒪᒃ, ᓕᒍ ᐅᖃᖅᑐᖅ. ᐅᖃᓚᐅᕐᑐᖅ ᑕᒪᐃᓐᓂ ᐃᓱᒪᓕᐊᕆᔭᐅᔪᓂᒃ ᕿᒥᕐᕈᐊᕐᓂᐊᕐᓂᕋᖅᖢᓂ ᐊᒻᒪᓗ ᖃᐅᔨᓇᓱᒻᒪᕆᒡᓗᓂ ᖃᓄᐃᒻᒪ ᐊᔾᔨᒌᖏᑎᑦᑎᓂᖅᑕᖃᕐᒪᖔᑦ.

“ᐊᒥᓱᑦ ᒪᓕᒐᐃᑦ, ᐊᑐᐊᒐᐃᑦ, ᐊᑐᖅᑕᐅᕙᒃᑐ ᐅᕝᕙᓘᓐᓃᑦ ᐱᓕᕆᕝᕕᖕᒥᑦ ᐱᓕᕆᔾᔪᓯᐅᔪᑦ ᐊᑐᖅᑕᐅᕙᒃᑐᑦ ᐊᔾᔨᒌᙱᓐᓂᕐᒥ ᐊᒻᒪ ᓇᓕᒧᒌᙱᓐᓂᕐᒥᒃ ᐃᒪᐃᑉᐸᓵᓕᖅᖢᓂ ᓈᒻᒪᙱᓪᓚᕆᒃᑐᓂᒃ ᐱᔨᑦᑎᕋᐅᑎᓕᕆᓂᖏᓐᓂᒃ ᐅᑯᓄᖓ ᓄᓇᖃᖅᑳᖅᑐᓄᑦ ᐊᓪᓚᓄᑦ ᐊᒻᒪ ᐃᓄᖕᓄᑦ,” ᕕᐄᓐᔅ ᐅᖃᓚᐅᕐᑐᖅ ᓯᑎᐱᕆ 30-ᒥ ᐅᓂᒃᑳᓕᐊᖏᑦ ᓴᖅᑭᑕᐅᑎᓪᓗᒋᑦ.

ᖃᐅᔨᓇᓱᖕᓂᖓ ᑐᕌᖓᓗᐊᓚᐅᕐᑐᑦ ᓄᓇᖃᖅᑳᖅᑐᑦ ᐱᓕᕆᐊᕆᔭᐅᕙᖕᓂᖏᓐᓂᒃ ᐸᓖᓯᒃᑯᓐᓄᑦ, ᒪᓕᒐᓕᕆᓂᕐᒧᑦ ᐱᓕᕆᔾᔪᓯᕐᓂᒃ, ᐃᑲᔪᖅᑕᐅᕝᕕᓕᕆᓂᕐᒥᒃ, ᐋᓐᓂᐊᖃᕐᓇᙱᑦᑐᓕᕆᓂᖅ ᐊᒻᒪ ᐃᓄᓕᕆᓂᕐᒧᑦ ᐱᔨᑦᑎᕋᐅᑎᓂᒃ, ᐊᒻᒪ ᐃᓅᓱᒃᑐᓂ ᓴᐳᔾᔨᓯᒪᓂᕐᒥᒃ ᐱᔨᑦᑎᕋᐅᑎᓂᒃ.

ᓘᓯ ᒍᕇ ᐃᓅᓪᓗᓂ ᐅᖃᓪᓚᒃᑎᒋᔭᐅᓚᐅᕐᑐᖅ ᐅᑯᓄᖓ ᕕᐄᓐᔅ ᑲᒥᓴᓐᑯᓐᓄᑦ. ᐅᕙᓂ, ᓄᕕᐱᕆ 2018-ᖑᑎᓪᓗᒍ ᖃᐅᔨᓇᓱᖕᓂᕐᒥᑦ ᐅᖃᓪᓚᒃᑎᓪᓗᒍ. (ᐊᔾᔨᓕᐅᕆᔨ ᓴᐃᕋ ᕌᔾᔪᔅ)

ᑲᑎᕕᒃ ᓄᓇᓕᓕᒫᑦ ᒐᕙᒪᖓᑦ ᐅᓂᒃᑳᓕᐊᓄ ᑐᓴᒐᒃᓴᓕᐅᓕᓚᐅᕐᑐᑦ ᐅᖃᖅᖢᑎᒃ ᐱᒻᒪᕆᐅᓂᖏᓐᓂᒃ ᐃᓱᒪᓕᐊᕆᔭᐅᓯᒪᔪᑦ ᐅᑯᐊᓗ ᖃᓄᐃᓕᐅᕈᑎᐅᖁᔭᐅᓯᒪᔪᑦ, ᐱᐅᓯᕚᓪᓕᖅᑎᑦᑎᓇᓱᖕᓂᕐᒥᒃ ᐱᓕᕆᖃᑎᒌᖕᓂᕐᒥᒃ ᐅᑯᓄᖓ ᓄᓇᖃᖅᑳᖅᑐᑦ ᐃᓄᖏᓐᓂᒃ ᐊᒻᒪᓗ ᑯᐸᐃᒃ ᒐᕙᒪᑯᑦ.

ᐱᓗᐊᕐᑐᒥᒡᓕ, ᑲᑎᕕᒃ ᓄᓇᓕᓕᒫᑦ ᒐᕙᒪᖓᑦ ᐱᖁᔨᒻᒪᕆᓚᐅᕐᑐᑦ ᒐᕙᒪᒃᑯᓐᓂᒃ ᐆᒥᖓ ᐃᓱᒪᓕᐊᕆᔭᐅᔪᒥᒃ ᑕᕐᕆᔭᕈᓐᓇᐅᑎᒃᑯᑦ ᑲᑎᒪᑲᑕᒍᓐᓇᕐᓯᓗᑎᒃ ᐱᕋᔭᒃᑐᕕᓃᑦ ᐃᖃᖅᑐᖅᑕᐅᓂᐊᓵᕐᓂᖏᓐᓄᑦ ᓄᓇᓕᖕᓃᑦᑐᓂᒃ ᒥᑭᑦᑐᓂᒃ, ᑕᐃᒪᓐᓇᓗ ᑲᑎᕕᒃᑯᑦ ᒐᕙᒪᖓᑦ ᐅᖃᖃᑎᖃᕐᓯᒪᓪᓗᑎᒃ ᑯᐸᐃᒃ ᒐᕙᒪᖏᓐᓂᒃ.

“ᑲᑎᕕᒃ ᓄᓇᓕᓕᒫᑦ ᒐᕙᒪᖓ ᐱᓇᓱᐊᒐᖃᕐᒪᑕ ᐱᓕᕆᖃᑎᖃᓪᓚᕆᒡᓗᑎᒃ ᑕᒪᐃᓐᓂᓕᒫᖅ ᒐᕙᒪᓕᕆᔨᐅᔪᓂᒃ ᐊᒻᒪᓗ ᐊᓯᖏᓐᓂᒃ ᐊᕕᒃᑐᕐᓯᒪᓂᒃᑯᑦ ᑲᑐᔾᔨᖃᑎᒌᓂᒃ ᐊᑐᓕᖅᑎᑦᑎᓂᕐᒥᒃ ᑲᒥᓴᓐᑐ ᐊᑐᖅᑕᐅᖁᔭᖏᓐᓄᑦ ᐱᓕᕆᐊᖏᑦᑎᒎᖓᔪᓂᒃ,” ᐅᖃᓚᐅᕐᑐᖅ ᑲᑎᕕᒃ ᓄᓇᓕᓕᒫᑦ ᒐᕙᒪᒃᑯᑦ ᐃᒃᓯᕙᐅᑕᖓ ᔭᓂᕗ ᒥᐅᓂᒃ ᑐᓴᒐᒃᓴᓕᐊᑎᒍᑦ.

ᓄᓇᕕᒃᒥᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᒻᒪ ᐃᓄᓕᕆᔨᒃᑯᑦ ᑭᐅᓚᐅᕐᒥᔪᑦ ᐅᓂᒃᑳᑦ ᒥᒃᓵᓄᑦ ᐅᖃᖅᖢᑎᒃ ᑲᑎᒪᔩ ᐃᓱᒫᓘᑎᒌᓐᓇᖅᑕᖏᑦ ᑲᒥᓴᓐᑯᓐᓄᑦ ᐅᖃᐅᓯᐅᓂᑯᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᒻᒪ ᐃᓄᓕᕆᓂᕐᒧᑦ ᐊᒻᒪᓗ ᐃᓅᓱᒃᑐᓂ ᓴᐳᔾᔨᓯᒪᓂᕐᒥ ᐱᔨᑦᑎᕋᐅᑎᓂᒃ ᐅᖃᐅᓯᖃᓚᐅᕐᓂᖏᓐᓂᒃ.

ᐃᑲᔫᑎᒃᓴᖃᕆᐊᖃᕐᓂᖅ ᐊᒻᒪᓗ ᐊᐅᓚᑦᑎᓂᖅ ᐋᓐᓂᐊᖃᕐᓂᙱᑦᑐᓕᕆᓂᕐᒧᑦ ᐊᒻᒪ ᐃᓄᓕᕆᓂᕐᒧᑦ ᐱᔨᑦᑎᕋᐅᑎᓂᒃ ᓂᓪᓕᕈᑎᐅᓚᐅᕐᒥᔪᖅ ᑲᑎᒪᔨᓄᑦ ᖃᐅᔨᓴᕐᓂᖅᑕᖃᖅᑎᓪᓗᒍ.

“ᓂᕆᐅᖕᓂᐊᓕᖅᐳᒍ ᑯᐸᐃᒃ ᒐᕙᒪᖓ ᐅᓂᒃᑳᓕᐊᓂᒃ ᖃᓄᐃᓕᐅᕈᑎᐅᖁᔭᐅᔪᓂᒃ ᐱᓕᕆᐊᖃᕐᓂᐊᕐᓂᖏᓐᓂᒃ, ᐊᒻᒪᓗ ᐃᒪᓐᓇ ᐱᓕᕆᖃᑎᒌᖕᓂᒃᑯᑦ ᐋᖅᑭᒃᓯᒪᔭᖏᑦᑎᒍᑦ ᐊᒻᒪ ᐊᑐᖅᑕᐅᓂᖏᑦᑎᒍᑦ,” ᐅᖃᖅᑐᖅ ᐊᐅᓚᑦᑎᔨ ᑐᑭᒧᐊᖅᑎᑦᑎᔨ ᒥᓂ ᒍᕇ ᐅᒃᑑᐱᕆ 2-ᒥ ᑐᓴᒐᒃᓴᓕᐅᕐᓂᒃᑯᑦ.

ᑲᑎᒪᔩᑦ ᖁᔭᓕᓚᐅᕐᒥᔪᑦ ᑲᒥᓴᓐᑯᓂᒃ ᐆᒥᖓ ᑯᐸᐃᒃ ᐋᒻᐸᑦᔅᒪᓐᖓᑦ (ᖃᓄᐃᓕᐅᕈᑎᓄᑦ ᖃᐅᔨᓴᕐᑎ) ᑲᒪᒋᔭᖃᖅᑎᑕᐅᓂᐊᕐᓂᖓᓄᑦ ᐅᑯᓂᒃ 142-ᓂ ᐃᓱᒪᓕᐊᕆᔭᐅᔪᑦ ᐊᑐᖅᑕᐅᓕᖅᑎᑦᑎᓂᐊᕐᓂᖓᓄᑦ.

ᒪᑭᕕᒃ ᐊᖓᔪᖅᑳᖓᑦ ᓵᓕ ᕗᐊᑦ ᐅᖃᓪᓚᓚᐅᕐᒥᔪᖅ ᖃᐅᔨᓴᕐᓂᖅᑕᖃᖅᑎᓪᓗᒍ ᐆᒥᖓ ᓄᓇᕕᒃᒧᑦ ᖃᓄᐃᓕᐅᖅᐸᓪᓕᐊᒍᑎᖏᓐᓂᒃ ᐊᒻᒪ ᐅᖃᖅᖢᓂ ᐅᒃᑑᐱᕆ 1-ᒥ ᑐᓴᒐᒃᓴᓕᐅᕐᓂᒃᑯᑦ ᐃᓄᐃ ᐅᖃᓪᓚᒍᓐᓇᓚᐅᕐᓂᖏᓐᓂᒃ ᖃᐅᔨᓴᕈᑎᒋᔭᐅᔪᓅᖓᔪᓂᒃ.

“ᐊᒥᓱᐃᖅᖢᑎᒃ, ᖁᕝᕕᐅᕐᖢᑎᒃ, ᐃᓅᖃᑎᒃᑲ ᐅᖃᓪᓚᖃᑦᑕᓚᐅᕐᑐᑦ ᑲᒥᓴᓐᑯᓐᓄᑦ ᖃᓄᐃᓕᐅᕈᓯᕕᓂᖏᓐᓂᒃ ᐅᑯᑎᒎᓇᖅ ᐋᓐᓂᐊᖃᕐᓇᙱᑦᑐᓕᕆᓂᒃᑯᑦ, ᒪᓕᒐᓕᕆᓂᒃᑯᑦ, ᐃᓄᓕᕆᓂᒃᑯᑦ, ᐃᓅᓱᒃᑐᓂᒃ ᓴᐳᔾᔨᓯᓂᒃᑯᑦ, ᐃᒻᒪᑲᓪᓚᓕᓴᕐᓂᒃ ᓈᒻᒪᙱᓕᐅᕈᑎᕕᓂᕐᓂᒃ ᐊᒻᒪᓗ ᐊᓯᖏᓐᓂᒃ ᑯᐸᐃᒃ ᒐᕙᒪᒃᑯᑦ ᐱᔨᑦᑎᕋᐅᑎᓕᕆᓂᖏᑦᑎᒍᑦ,” ᕗᐊᑦ ᐅᖃᓚᐅᕐᑐᖅ.

ᐅᖃᕋᓗᐊᖅᖢᓂ ᐅᓂᒃᑳᓕᐊᖑᔪᑦ ᑭᐅᒍᑎᐅᓂᐊᕐᓂᖏᓐᓂᒃ, “ᒪᓕᒡᓗᑎᒃ ᓯᕗᓪᓕᖅᐹᒥᑦ ᐊᑐᖅᑕᐅᖁᔭᐅᔪᒥᒃ—ᐃᒪᓐᓇ ᑯᐸᐃᒃ ᒪᒥᐊᓱᖕᓂᕋᕐᓗᓂ ᐃᓄᖕᓄᑦ ᐊᒻᒪ ᓄᓇᖃᖅᑳᖅᑐᓄᑦ ᐊᓪᓚᓄᑦ ᐊᔾᔨᒌᙱᑎᑦᑎᓂᒃᑯᑦ ᑭᒃᑯᓕᒫᓄᑦ ᐱᔨᑦᑎᕋᐅᑎᓕᕆᓯᒪᓂᖏᓐᓂᒃ ᐃᓄᖁᑎᑦᑎᓐᓄᑦ—ᑕᐃᒪᓕ ᐃᓱᒪᓕᕐᐳᒍ ᑐᓴᖅᑕᐅᓂᑦᑎᓐᓂᒃ.”