ᕼᐋ ᐲᑦᔅ (ᓴᓂᕋᔭᒃ) ᒥᓂᔅᑕᓂᒃ ᐅᑕᖅᑭᔪᖅ ᐊᑎᖓ ᓴᓂᕋᔭᒧᑦ ᐊᓯᔾᔨᖅᑕᐅᔪᒪᓂᖓᓄ

ᒪᓕᒐᓕᐅᕐᑎ ᐅᖃᓚᐅᕐᑐᖅ ᓄᓇᓖᑦ ᓂᕈᐊᓚᐅᕐᓂᖏᓐᓂᒃ ᐊᕐᕌᓂ ᐊᑎᑐᖃᖓᓂ ᐊᑎᖃᕈᒪᓂᖏᓐᓂᒃ

ᔪᐃᓕ ᖃᐃᕐᓂᖅ, ᒪᓕᒐᓕᐅᕐᑎ ᐊᒥᑦᑐᕐᒧᑦ, ᐊᐱᕆᓚᐅᕐᑐᖅ ᖁᐊᓴ ᑯᓱᒐᕐᒧᓐ, ᓄᓇᕗᒧᑦ ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᓄᑦ ᒥᓂᔅᑕ, ᕕᕝᕗᐊᕆ 20-ᒥᑦ ᒥᓂᔅᑕᐅᔪᑦ ᐊᖏᕆᐊᖃᕆᐊᒃᓴᖏᓐᓂ ᓴᓂᕋᔭᐅᑉ ᐊᑎᖓ ᕼᐋ ᐲᑦᔅ ᐊᑎᑐᖃᖓᓂ ᐃᓄᒃᑐᑦ ᐊᑎᓪᓚᕆᖃᕈᒪᓂᖓᓄᑦ. (ᐊᔾᔨᙳᐊᖁᑎᒋᔭᐅᔪᖅ)

By ᐃᐊᒪ ᑑᓄ

For an English version of this story, see Hall Beach waiting for cabinet approval to change name to Sanirajak

ᕼᐋᓪ ᐲᑦᔅ (ᓴᓂᕋᔭᐅᑉ) ᒪᓕᒐᓕᐅᕐᑎᖓ ᐅᖃᓚᐅᕐᑐᖅ ᑭᒡᒐᖅᑐᖅᑕᖏ ᓱᓕ ᐅᑕᕿᓂᖏᓐᓂᒃ ᓄᓇᓖᑦ ᐊᑎᑐᖃᖓᓂ ᐅᑎᕈᓐᓇᕐᓯᓂᐊᕐᓂᖏᓐᓂᒃ ᐆᒧᖓ ᓴᓂᕋᔭᒃ.

ᐊᕐᕌᓂ ᓄᓇᓖ ᓂᕈᐊᕐᑎᑕᐅᓚᐅᕐᓯᒪᔪᑦ ᐊᑎᖓᓂᒃ ᐅᑎᖅᑎᑦᑎᔪᒪᓪᓗᑎᒃ ᐊᑎᑐᖃᖓᓄᑦ, ᐊᒥᑦᑐᕐᒧᑦ ᒪᓕᒐᓕᐅᕐᑎ ᔪᐃᓕ ᖃᐃᕐᓂᖅ ᐅᖃᓚᐅᕐᑐᖅ ᒪᓕᒐᓕᕆᕝᕕᖕᒥᑦ ᑎᓴᒻᒥᖅ, ᕕᕗᐊᕆ 20-ᒥᑦ, ᐅᖃᕆᓪᓗᓂ 2/3 (ᓲᕐᓗ ᒪᕐᕉᒃ ᐱᖓᓱᓂᒃ) ᓂᕈᐊᓚᐅᕐᓂᕋᖅᖢᓂᒋᑦ ᐊᓯᖑᖅᑎᑦᑎᔪᒪᓂᕐᒥᓐ.

ᖃᐃᕐᓂᖅ ᐅᖃᓚᐅᕐᑐᖅ ᕼᐋᒻᒪᓚᒃᑯᑦ ᑲᑎᒪᔨᖏ ᖃᖓᑦᑎᐊᓵᖅ ᑎᑎᕋᓚᐅᕐᓂᖏᓐᓂᒃ ᖁᐊᓴ ᑯᓱᒐᕐᒧᑦ, ᓄᓇᕗᑦ ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᓄᑦ ᒥᓂᔅᑕᖓᓄᑦ, ᐊᑎᖓ ᐊᓯᖑᖅᑎᑦᑕᐅᔪᒪᓂᖓ ᐊᖏᖅᑕᐅᑎᓐᓇᓱᒃᖢᓂᔾᔪᒃ ᓄᓇᕗᑦ ᒐᕙᒪᒃᑯᓐᓄᑦ.

“ᒥᓂᔅᑕ ᐅᖃᕈᓐᓇᖅᐹ ᐊᑎᖓᓂᒃ ᐊᓯᙳᖅᑎᑕᐅᔪᒪᓂᖓ ᐱᓕᕆᐊᖑᓂᐊᕆᐊᒃᓴᖓᓂ?” ᖃᐃᕐᓂᖅ ᐊᐱᕆᔪᖅ.

“ᓂᕈᐊᕌᓂᒃᑎᓪᓗᒋᑦ, ᕼᐋᒻᒪᓚᒃᑯᑦ ᑎᑎᕋᖅᑎᖓ ᐅᕙᓐᓄ ᑎᑎᕋᓚᐅᕐᑐᖅ, ᐅᖃᖅᖢᓂ ᑕᒪᑐᒥᖓ ᐱᒋᐊᖁᔨᓕᕐᖢᓂ ᐊᒻᒪᓗ ᑭᐅᓪᓗᒍ ᐊᖏᕐᓂᕋᖅᖢᖓ ᕼᐋᒻᒪᓚᒃᑯ ᐊᓯᙳᖅᑎᑦᑎᔪᒪᓚᐅᕐᓂᖏᓐᓂᒃ,” ᑯᓱᒐᖅ ᐅᖃᖅᑐᖅ.

ᑭᓯᐊᓂᓕ ᓄᓇᕗᑦ ᒪᓕᒐᓕᕆᔨᕐᔪᐊᖏᑦ ᑕᒪᑐᒥᖓ ᐊᖏᕆᐊᖃᕐᒪᑕ ᐊᓯᙳᖅᑎᑦᑎᔪᒪᓂᕐᒥᒃ.

“ᒪᓕᒐᓕᕆᔨᕐᔪᐊᑎᒎᕆᐊᖃᕐᒪᓐ. ᑕᐃᒪᓐᓇ ᑎᑎᖃᖅᑖᕐᓯᒪᕗᒍᑦ ᒪᐃᔭᒥ ᕼᐋᓪ ᐲᑦᔅᒥ ᑖᔅᓱᒧᖓ,” ᑯᓱᒐᖅ ᐅᖃᖅᑐᖅ.

ᖃᐃᓂᖅ ᐊᐱᕆᓚᐅᕐᑐᖅ ᒥᓂᔅᑕ ᐱᓕᕆᕝᕕᖓᓗ ᐃᑲᔪᕈᓐᓇᕆᐊᒃᓴᖏᓐᓂᒃ ᐊᑎᖓᓂᒃ ᐊᓯᙳᖅᑎᑦᑎᓂᕐᒧᑦ ᐊᑭᓕᐅᑎᒃᓴᖓᓂᒃ.

ᑯᓱᒐᖅ ᑭᐅᓪᓗᓂ ᑕᒪᓐᓇ ᑕᑯᒋᐊᖅᑕᐅᔪᓐᓇᕐᓂᖓᓂᒃ.

“ᖃᐅᔨᒪᙱᑦᑐᖓ ᐊᑎᕐᒥᒃ ᐊᓯᙳᖅᑎᑦᑎᓂᖅ ᐊᑭᑐᓂᕐᓴᐅᓇᔭᕆᐊᒃᓴᖓᓂᒃ. ᕼᐋᒻᒪᓚᒃᑯ ᐊᐅᓚᔾᔪᑎᖏᑦᑎᒍᑦ ᐃᑲᔫᑎᒃᓴᖃᙱᑉᐸᑕ ᑕᒪᓐᓇ ᖃᐅᔨᒋᐊᕈᓐᓇᖅᑕᕗᑦ,” ᑯᓱᒐᖅ ᐅᖃᖅᑐᖅ.

ᐅᖃᐅᓯᖃᖅᖢᓂ ᑭᙵᐃᑦ ᖃᖓᑦᑎᐊᓵᖅ ᐊᑎᖃᓪᓚᕆᓕᓚᐅᕐᓂᖏᓐᓂᒃ ᐃᒪᓐᓇ ᑭᙵᐃᑦ, ᖃᐃᕐᓂᖅ ᐊᐱᕆᓚᐅᕐᒥᔪᖅ ᑯᓱᒐᕐᒧ ᖃᔅᓯᐅᓕᕐᓂᖏᓐᓂᒃ ᓄᓇᓖᑦ ᐊᑎᖏᓐᓂᒃ ᐊᓯᙳᖅᑎᑦᑎᔪᒪᔪᑦ ᐊᖏᖅᑕᐅᔭᕆᐊᖃᖅᑐᑦ.

ᑯᓱᒐᖅ ᖃᐅᔨᓚᙱᓐᓂᕋᓚᐅᕐᑐᖅ ᖃᔅᓯ ᓄᓇᓖ ᐊᑎᖏᓐᓂᒃ ᐊᓯᙳᖅᑎᑦᑎᓯᒪᔪᓂᒃ, ᑭᓯᐊᓂᓕ ᑭᙵᐃᑦ ᐊᒻᒪ ᕼᐋᓪ ᐲᑦᔅ ᐱᓕᕆᐊᙳᓚᐅᕐᓯᒪᔪᑦ ᐊᑕᐅᑦᑎᑰᐸᓗᒃᖢᑎᒃ.

“ᓇᓗᓇᐃᔭᕐᓯᒪᓕᕈᑦᑎᒍᑦ ᐅᖃᕈᓐᓇᕐᓯᓂᐊᕐᑐᒍᑦ ᖃᔅᓯᐅᔭᕆᐊᒃᓴᖏᓐᓂᒃ, ᑭᓯᐊᓂ ᖃᐅᔨᒪᙱᑦᑐᖓ ᖃᔅᓯᐅᖕᒪᖔᑦ ᓄᓇᓖᑦ ᐊᓯᙳᖅᑎᑦᑎᓯᒪᓕᖕᓂᖏᓐᓂᒃ ᐃᓄᒃᑐᑦ ᐊᑎᑐᖃᖏᓐᓄᑦ,” ᑯᓱᒐᖅ ᐅᖃᖅᑐᖅ.

Share This Story

(0) Comments