ᕿᑎᕐᒥᐅᑦ ᐊᕐᓇᖏᑦ ᐊᐅᓪᓚᖅᑎᑕᐅᖃᑦᑕᓕᕐᒪᑕ ᐃᑦᒪᓐᑕᓐᒧᑦ ᐃᕐᓂᔭᖅᑐᖅᓯᒪᔪᑦ ᓄᓇᑦᓯᐊᕐᒥ ᓇᔭᖖᒍᐊᑦ ᐊᒥᒐᓕᖅᓯᒪᓂᖃᖅᑎᓪᓗᒋᑦ

‘ᐅᕙᓐᓄᑦ ᐊᔪᕐᓇᓚᐅᖅᑑᒐᓗᐊᖅ ᑭᓯᐊᓂ ᐊᓂᒎᑎᔪᓐᓇᓚᐅᖅᑕᕋ,” ᐅᖃᕐᖢᓂ ᐃᖃᓗᒃᑑᑦᑎᐊᕐᒥᐅᑕᖅ ᑮᑦ ᑯᓕᒃᑕᓇ ᐅᖃᐅᓯᕆᓪᓗᓂᐅᒃ ᑭᖑᓪᓕᕐᒥᒃ ᓄᑕᖅᑭᔭᖅᑐᓚᐅᕐᓂᓂ ᐃᑦᒪᓐᑕᓐᒥ

ᑮᑦ ᑯᓕᒃᑕᓇ, 9-ᓂᒃ ᕿᑐᕐᖓᑲᑲᐅᑎᒋᓂᐊᓕᕐᑐᖅ, ᐊᒥᓲᓂᖅᓴᓂᒃ ᕿᑐᕐᖓᕆᔭᒥᓂᒃ ᐃᕐᓂᖃᑦᑕᖅᓯᒪᓕᕐᒪᑦ ᔭᓗᓇᐃᒥ 17-ᖑᓕᖅᑐᓂ ᐅᑭᐅᓂ ᐊᒻᒪᓗ ᕿᑐᕐᖓᒃᓴᕆᔭᓂ ᐃᕐᓂᐊᖑᓯᒪᓕᖁᓪᓗᓂᐅᒃ ᓄᓇᓕᒋᔭᒥᓂ. ᑭᓯᐊᓂᓗ, ᐋᓐᓂᐊᕐᕕᓕᐊᕆᐊᖃᕈᓂ, ᐅᖃᓚᐅᕐᐳᖅ ᖃᐅᔨᒪᖖᒋᓐᓂᕐᒥᓂ ᓇᒧᑦ ᐊᐅᓪᓚᖅᑎᑕᐅᓂᐊᕐᒪᖔᕐᒦ. (Photo by Dustin Patar)

By ᒥᓪᓚᓂ ᕆᓵᑦ

For an English version of this story, see Kitikmeot women being sent to Edmonton for births amid N.W.T. nurse shortage

ᓄᓇᑦᓯᐊᕐᒥ ᐊᖏᓂᖅᐸᐅᓪᓗᓂ ᐋᓐᓂᐊᕐᕕᒋᔭᐅᔪᖅ ᐊᒥᒐᖅᓯᓗᐊᕐᒪᑕ ᐃᕐᓂᔭᖅᑐᕐᑐᓂᒃ ᐱᓕᕆᐊᖃᖃᑦᑕᕆᐊᒥᒃ ᐱᔾᔪᑕᐅᓪᓗᓂ, ᐃᓚᖏᑦ ᓇᔾᔨᔪᑦ ᓄᓇᕗᒻᒥᐅᑦ ᖃᖓᑕᓲᒃᑯᑦ ᐅᖓᓯᖕᓂᖅᓴᒻᒪᕆᐊᓗᖕᒧᑦ ᓄᓇᒋᔭᒥᓐᓂᑦ ᐃᕐᓂᔭᖅᑐᕆᐊᖃᖃᑦᑕᕐᒪᑕ.

ᓯᑖᓐᑕᓐ ᐊᕕᒃᑐᖅᓯᒪᓂᕐᒥ ᐊᓐᓂᐊᕐᕕᓕᐊᖔᖅᑎᑕᐅᓇᑎᒃ ᔭᓗᓇᐃᒥ, ᐊᕐᓇᐃᑦ ᕿᑎᕐᒥᐅᑦ ᐊᕕᒃᑐᖅᓯᒪᓂᖓᓂᕐᒥᐅᑦ ᐃᑦᒪᓐᑕᓐᒧᐊᕆᐊᖃᖃᑦᑕᕐᓂᐊᓕᖅᑐᑦ ᐃᕐᓂᔭᖅᑐᕐᓗᑎᒃ ᑎᓯᐱᕆᒥ ᐱᒋᐊᕐᓗᒍ ᕕᑉᕈᐊᕆᐅᑉ ᓄᖖᒍᐊᓄᑦ.

ᑮᑦ ᑯᓕᒃᑕᓇ ᐃᖃᓗᒃᑑᑦᑎᐊᕐᒥ ᓄᓇᖃᖅᑑᕗᖅ ᐊᒻᒪᓗ 9-ᒋᔭᖓᓂᒃ ᓇᔾᔨᒋᔭᒥᓂᒃ ᐃᕐᓂᕝᕕᒃᓴᖃᖅᓱᓂ ᒫᔾᔨᒥ.

ᐃᕐᓂᓱᒃᓰᔨᖃᕐᓗᓂ ᐃᕐᓂᔪᒪᔫᒐᓗᐊᖅ ᐊᖏᕐᕋᒥᓂ, ᑕᐃᒫᒃ ᐃᕐᓂᓚᐅᖅᓯᒪᓕᕋᒥ, ᑭᓯᐊᓂᓗ ᐅᖃᐅᔾᔭᐅᓯᒪᕗᖅ ᐱᔭᕆᐊᖃᕐᓂᕈᓂ ᐃᑦᒪᓐᑕᓐᒧᑦ ᖃᖓᑕᓲᒃᑯᑦ ᐋᓐᓂᐊᕐᕕᖕᒧᑦ ᐊᐅᓪᓚᖅᑎᑕᐅᑐᐃᓐᓇᕆᐊᖃᕐᓂᕐᒥᓂᒃ.

“ᖃᐅᔨᒪᑦᑎᐊᖖᒋᑦᑐᖓ ᓇᒧᓪᓚᑦᑖᖅ ᐊᐅᓪᓚᖅᑎᑕᐅᓂᐊᕐᓂᓐᓂᒃ ᐃᕐᓂᔭᖅᑐᕐᓗᖓ,” ᐅᖃᖅᓱᓂ.

“ᐊᒃᓱᕈᕐᓇᖅᓯᓯᒪᕐᓚᒃᑐᖅ.”

ᑭᖑᓪᓕᖅᐹᒧᑦ ᓄᑕᕋᕐᒥᓄᑦ, 14-ᓂᒃ ᑕᖅᑭᖃᓕᖅᑐᒧᑦ, ᑯᓕᒃᑕᓇ ᐅᖃᓚᐅᕐᐳᖅ ᑐᐊᕕᐅᕐᓇᖅᑐᒃᑯᑦ ᐊᐅᓪᓚᖅᑎᑕᐅᓚᐅᖅᓯᒪᓂᕐᒥᓂᒃ ᐃᑦᒪᓐᑕᓐᒧᑦ, ᑕᖅᑮᖕᓄᓪᓗ ᒪᕐᕈᑲᓴᓐᓄᑦ ᑲᑎᑦᓱᒋᑦ ᑕᐃᑲᓃᑦᓴᕆᐊᖃᓚᐅᖅᓯᒪᓪᓗᓂ.

ᐊᓈᓇᒥᓂᑦ ᓯᕗᓪᓕᕐᒥᒃ ᐊᒃᔭᖅᓯᔨᖃᓚᐅᖅᓯᒪᔫᒐᓗᐊᖅ ᑭᓯᐊᓂᓗ ᐅᑎᕆᐊᖃᓚᐅᕐᒪᑦ ᐃᖃᓗᒃᑑᑦᑎᐊᕐᒧᑦ ᑯᓕᒃᑕᓇᐅᑉ 7-ᖑᓪᓗᑎᒃ ᕿᑐᕐᖓᖏᓂᒃ ᒥᐊᓂᖅᓯᔭᕐᑐᕆᐊᖃᕋᒥᒃ ᐊᐅᓪᓚᖅᓯᒪᑎᓪᓗᒍ, ᑕᐃᒪᓗ ᐃᓄᑑᓪᓗᓂ ᐃᕐᓂᔭᕆᐊᖃᓕᓚᐅᖅᓯᒪᒻᒪᑦ.

“ᐅᕙᓐᓄᑦ ᑕᒪᓐᓇ ᐊᒃᓱᕈᕐᓇᖅᑐᐊᓘᓚᐅᖅᓯᒪᔪᖅ ᑭᓯᐊᓂᓗ ᐊᓂᒎᑎᓯᒪᔪᓐᓇᓚᐅᖅᑐᖓ,” ᐅᖃᖅᓱᓂ.

ᐊᖏᕐᕋᒥᓂ ᑕᖅᑭᐅᓂᐊᖅᑐᓂ ᐃᕐᓂᔪᓐᓇᖖᒋᒃᑯᓂ, ᑯᓕᒃᑕᓇ ᐅᖃᖅᓚᐅᕐᐳᖅ ᕿᑐᕐᖓᕆᔭᒃᑲᓐᓂᕐᒥᓄᑦ ᒥᐊᓂᖅᓯᔨᐅᓇᔭᖅᑐᒥᒃ ᐊᐅᓪᓚᖅᓯᒪᑎᓪᓗᒍ ᓇᓂᓯᓯᒪᔭᕆᐊᖃᕐᓂᐊᕋᒥ, ᐅᑭᐅᖃᖅᑐᓂᒃ 14-ᓂᒃ ᑕᖅᑭᓕᖕᒥᑦ 17-ᓄᑦ ᐅᑭᐅᖃᖅᑐᒧᑦ, ᒥᐊᓂᖅᓯᔨᐅᓇᔭᖅᑐᒥᒃ ᑕᖅᑭᐅᑉ ᐅᖓᑖᓄᑦ.

“ᑕᒪᓐᓇ ᐃᓱᒫᓗᒍᑎᒋᓗᐊᖅᑕᕋ.”

ᐃᑦᒪᓐᑕᓐᒧᑦ ᖃᖓᑕᓲᒃᑰᕆᐊᖅ ᐊᑯᓂᐅᓂᖅᓴᒥᒃ ᔭᓗᓇᐃᒧᐊᖅᑐᓂᒥᑦ ᖃᖓᑕᓐᓇᓲᖑᖕᒪᑦ, ᑕᒪᓐᓇᓗ ᐊᒃᓱᕈᕐᓇᓕᖅᓯᒪᑎᑦᑎᔪᓐᓇᕐᒪᑦ ᓇᔾᔨᓗᓂ ᐊᒻᒪᓗ ᐊᖏᕐᕋᖅᐸᓪᓕᐊᓇᓱᒃᓗᓂ ᐃᕐᓂᐊᖑᓵᖅᓯᒪᔪᖃᕐᓗᓂ.

ᖃᖓᑕᓲᒃᑯᑦ ᐃᖏᕐᕋᓂᕐᒥ ᐃᖃᓗᒃᑑᑦᑎᐊᕐᒥᑦ ᐃᑦᒪᓐᑕᓐᒧᑦ ᐊᑕᐅᓯᕐᒥᒃ ᓯᓂᒃᑕᕆᐊᖃᕐᓇᓲᖑᒐᔪᖕᒪᑦ, ᑎᑭᓐᓇᓱᖕᓂᐊᕐᓗᒍ ᐃᑦᒪᓐᑕᓐ ᔭᓗᓇᐃᒥᐅᒐᔪᖕᓂᖅᓴᐅᓪᓗᓂ.

ᑲᓃᑎᐊᓐ ᓄᐊᔅᑯᑦ ᖃᖓᑕᕙᓐᓂᖏᑦ ᐃᑦᒪᓐᑕᓐᒧᑦ ᐊᓯᖏᓐᓂᖖᒑᖅᑐᑦ ᕿᑎᕐᒥᐅᑦ ᓄᓇᓕᖏᓐᓂ ᐊᒥᓱᐃᓂᖅᓴᓂᒃ ᓄᓇᓕᐅᔪᓂ ᓯᓂᒃᑕᕆᐊᖃᖅᑎᑕᐅᒐᔪᒻᒪᑕ.

ᕕᒃᑑᕆᐊ ᑲᑉᓗᒋᓇ, ᓇᔾᓕᒻᒥᔪᖅ ᐊᓈᓇᐅᓪᓗᓂᓗ ᐃᖃᓗᒃᑑᑦᑎᐊᕐᒥᐅᑕᖅ, ᐅᖃᓚᐅᕐᐳᖅ ᐃᑦᒪᓐᑕᓐᓕᐊᕆᐊᖃᕐᓂᖅ ᐊᔪᕐᓇᓕᖅᑎᑦᑎᒃᑲᓐᓂᕈᑎᒃᓴᒥᒃ ᐱᑕᖃᓕᖅᑎᑦᑎᓯᒪᒋᕗᖅ ᐃᒻᒥᓄᑦ ᐱᔾᔪᑎᒋᓪᓗᒍ ᒥᑭᔪᒥᒃ ᐊᒫᒪᒃᑎᑕᖃᕋᒥ ᐸᓂᖕᒥᓂᒃ.

“ᐊᒃᓱᕈᓕᖅᓯᒪᔾᔪᑎᒋᔭᕋ,” ᐅᖃᖅᓱᓂ.

ᑐᒡᓕᒋᔭᖓᓂᒃ ᐃᕐᓂᕕᒃᓴᖃᕐᑐᖅ ᑎᓯᐱᕆ 20-ᒥ, ᐅᖓᓯᒃᓯᓯᒪᓗᓂᒋᑦ ᐃᑲᔪᖅᑎᒋᕙᒃᑕᓂ.

“ᐊᖏᕐᕋᓐᓂᑦ ᓄᓇᓐᓂᑦ ᐅᖓᓯᒃᑐᖅ ᐊᒻᒪᓗ ᖃᐅᔨᒪᔭᖃᕐᓇᖓ ᐃᑦᒪᓐᑕᓐᒥ.”

ᓄᓇᑦᓯᐊᕐᒥ ᐋᓐᓂᐊᖃᕐᓇᖖᒋᑦᑐᓕᕆᔨᒃᑯᑦ ᐊᒻᒪᓗ ᐃᓅᓯᓕᕆᔨᒃᑯᓐᓄᑦ ᐃᓱᒪᑕᒻᒪᕇᑦ ᑐᓴᖅᑎᑦᑎᓯᒪᓕᓚᐅᕐᒪᑕ ᓄᕕᐱᕆ 20-ᐅᑎᓪᓗᒍ ᐃᕐᓂᓱᖕᓂᓕᕆᓂᕐᒧᑦ ᐊᒻᒪᓗᓇᔾᔨᔪᓄᑦ ᐱᔨᑦᓯᕋᖅᑎᖏᑦ ᓯᑖᓐᑕᓐ ᐊᕕᒃᑐᖅᓯᒪᓂᕐᒥ ᐋᓐᓂᐊᕐᕕᖓᑦ ᒪᑐᔭᐅᓯᒪᑲᓚᐅᕐᓂᐊᕐᓂᖓᑕ ᑎᓯᐱᕆ 10 ᐊᒻᒪᓗ ᕕᑉᕈᐊᕆ 21, 2022 ᐊᑯᓐᓂᖏᓐᓂ.

“ᓯᑖᓐᑎᓐ ᓈᒻᒪᒃᑐᒥᒃ ᐃᖅᑲᓇᐃᔭᖅᑎᖃᕐᓂᐊᕐᓂᕐᒥᓐᓂᒃ ᓇᓗᓇᐃᖅᓯᓯᒪᔪᓐᓇᖖᒋᒻᒪᑕ ᐊᐅᓚᑦᓯᓂᖃᕐᓂᐊᕈᑎᒃ ᐃᓗᐃᒃᑲᐅᑎᑕᐅᓪᓗᓂ ᐃᕐᓂᕕᐅᕙᒃᑐᓄᑦ ᐱᓕᕆᔨᓂᒃ ᖃᓄᐃᓐᓇᖖᒋᑎᑦᑎᓂᐊᕐᓗᑎᒃ,” ᒪᓕᒃᓗᒋᑦ ᐅᖃᖅᑕᐅᓯᒪᓂᖏᑦ ᑐᓴᒐᒃᓴᖁᑎᓂ ᓴᖅᑭᑕᐅᓚᐅᖅᑐᓂ.

ᑳᐱᓐ ᕇᑎᐅ ᓈᓚᐅᓯᓕᕆᔨᖏᑦ, ᓄᓇᓕᐅᔪᒥ ᓄᓇᑦᓯᐊᕐᒥ ᑐᓴᒐᒃᓴᓕᕆᔨᐅᕙᒃᑐᑦ, ᓴᖅᑮᓚᐅᕐᒪᑕ ᑕᒪᓐᓇ ᐱᕙᓪᓕᐊᔪᓕᕆᓂᐅᔪᖅ ᐃᓚᒋᔭᐅᖃᑕᐅᖖᒋᓐᓂᖓᑕ ᑲᓇᑕᒥ ᓇᔭᖖᒍᐊᓂᒃ ᐊᒥᒐᖅᓯᓯᒪᓕᕐᓂᐅᔪᒧᑦ, ᑭᓯᐊᓂᓗ ᐃᖅᑲᓇᐃᔭᖅᑏᑦ ᓄᖅᑲᖃᑦᑕᕐᓂᖏᑦ ᐱᔾᔪᑎᒋᔭᐅᒻᒪᑕ ᐱᔾᔪᖃᖅᐸᒃᓱᑎᒃ ᓈᒻᒪᖖᒋᓪᓚᕆᒃᑐᒥᒃ ᐊᐅᓚᑦᓯᓂᐅᔪᓂᑦ ᐊᒻᒪᓗ ᐱᓕᕆᔭᕆᐊᖃᖃᑦᑕᕐᑎᑕᐅᓂᕐᒥᓐᓂᑦ “ᐊᑦᑕᓇᖅᑐᒦᓕᖅᑎᑕᐅᕙᒃᓱᑎᒃ ᐊᒻᒪᓗ ᐊᒃᓱᕈᕐᓇᓗᐊᓕᖅᓯᒪᔪᒃᑰᕐᐸᒃᓱᑎᒃ.”

ᐃᕐᓂᓱᒃᓰᔨᐅᓚᐅᖅᑐᑦ ᓄᓇᕗᑦ ᑭᕙᓪᓕᐅᑉ ᐊᕕᒃᑐᖅᓯᒪᓂᖓᓂ ᐊᔾᔨᑲᓴᖏᓂᒃ ᐱᔾᔪᑎᖃᖃᑦᑕᓚᐅᕐᒪᑕ ᖃᓄᐃᒻᒪᑦ ᐃᖅᑲᓇᐃᔮᕆᔭᒥᓐᓂᒃ ᓄᖅᑲᖅᓯᒪᓕᓚᐅᕐᓂᕐᒥᓐᓄᑦ ᑲᖏᖅᖠᓂᕐᒥ ᐃᕐᓂᓱᒃᓰᕕᒃᑯᓐᓂ ᐊᐅᔭᖓᓂ 2021, ᑕᐃᒪᓗ ᐅᒃᑯᐊᖅᑕᐅᓯᒪᑦᓯᐊᒻᒪᕆᓕᓚᐅᖅᑐᒥ ᐃᕐᓂᓱᒃᓰᕕᒃ.

ᑖᓇᕇ ᓴᒧᕐᕕᐅᓪ, ᐅᖃᖅᑎᒋᔭᐅᔪᖅ ᓄᓇᕗᒻᒥ ᐋᓐᓂᐊᖃᕐᓇᖖᒋᑦᑐᓕᕆᔨᒃᑯᓐᓄᑦ, ᐅᖃᓚᐅᕐᐳᖅ ᐊᑯᓐᓂᖏᓐᓃᑦᑐᑦ 25 ᐊᒻᒪᓗ 30 ᓇᔾᔨᔪᑦ ᐊᕐᓇᐃᑦ ᑭᕙᓪᓕᐅᑉ ᐊᕕᒃᑐᖅᓯᒪᓂᖓᓂᑦ ᐃᑦᒪᓐᑕᓐᒧᑦ ᖃᖓᑕᓲᒃᑯᑦ ᐊᐅᓪᓚᖅᑎᑕᐅᖃᑦᑕᓕᕐᓂᐊᕐᒪᑕ ᑕᖅᑭᐅᓂᐊᖅᑐᓂ.

Share This Story

(0) Comments