ᖁᕕᐊᓱᒡᕕᖕᒥ ᐃᖅᑲᐅᒪᓇᖅᑐᑦ ᐅᑭᐅᕐᑕᖅᑐᑉ ᑲᓇᖕᓇᖅᐸᓯᐊᓂᒃ

ᐱᒻᒪᕆᐅᕗᖅ ᑲᑕᒍᑎᓂᒃ ᓴᕿᑎᑦᑎᙱᓪᓗᓂ, ᑭᓯᐊᓂᓕ ᖁᔭᓕᓂᕐᒥᑦ ᓴᕿᔮᖅᑎᑦᑎᓗᓂ

ᐃᓄᐃᑦ ᓇᑉᐸᕐᑕᕐᓂᒃ ᐃᒋᐅᖃᐃᕗᑦ ᐃᓄᖕᓄᑦ ᑯᕕᐊᓱᒡᕕᐅᑎᓪᓗᒍ 1963-ᒥ, ᐊᔾᔨᙳᐊᖅ ᓴᕿᔮᖅᑎᑦᑎᔪᖅ ᐊᔾᔨᓕᐅᖅᑕᐅᓚᐅᕐᓯᒪᔪᒥᒃ ᐊᑖᑕ ᔫᐊᔅ ᑎᐊᓐᒧᑦ. (ᐊᔾᔨᙳᖓᖅ ᐊᕙᑕᖅ ᐃᓕᖁᓯᓕᕆᔨᒃᑯᓐᓂᑦ, IND-DIO-930)

By ᔭᐃᓐ ᔪᐊᔾ

You can find an English version of this story, Christmas memories from across the eastern Arctic, here.

ᒫᓐᓇᐅᓕᕐᑐᖅ ᑯᕕᐊᓱᒡᕕᒃ ᓄᓇᕗᒥ ᐊᒻᒪ ᓄᓇᕕᒃᒥᒡᓗ ᐊᕿᒡᒋᖅᔪᐊᕐᒥᑦ ᐃᓚᖃᖃᑦᑕᓕᖅᑐᖅ, ᓵᓐᑕ ᑲᓛᓯᒥᒃ, ᖁᕕᐊᓱᒡᕕᒃᑎᓯᐅᑎᓂᒃ ᓇᐹᖅᑐᓂᒃ ᐊᒻᒪ ᐴᖃᕐᓯᒪᔪᓂᒃ ᑐᓐᓂᖁᓯᐊᓂᒃ.

ᑭᓯᐊᓂᓕ ᑕᐃᒪᐃᓚᐅᕐᓯᒪᙱᑦᑐᖅ ᐊᕐᕌᒍ 60 ᐊᓂᒍᓚᐅᕐᓯᒪᔪᓂᒃ. ᑕᐃᔅᓱᒪᓂᓕ, ᖁᕕᐊᓱᒡᕕᒃ ᑐᒃᓯᐊᕆᐊᕐᓇᓚᐅᕐᐳᖅ, ᐱᙳᐊᕐᓇᖅᖢᓂ, ᓄᑖᓂ ᐊᓐᓄᕌᖅᑕᕐᓇᖅᖢᓂ—ᐊᒻᒪ ᐳᐊᒃ (ᑰᑰᓯ) ᐲᓂᓯᒦᑦᑐᑦ.

ᑕᐃᒪᓐᓇ ᖃᐅᔨᓚᐅᕐᐳᒍᑦ ᐊᐱᕐᓱᕐᓂᒃᑯᑦ ᓄᓇᕗᑦ ᓯᕗᓕᐅᕐᑎᐅᓚᐅᕐᑐᒧᑦ ᑐᒡᓕᕆᔭᐅᓚᐅᕐᑐᖅ ᓚᕕᓂᐊ ᐳᕋᐅᓐᒥᑦ ᑲᖏᖅᖠᓂᕐᒥᐅᑕᖅ, ᐊᒻᒪᓗ ᑲᑎᕐᓱᒐᕐᓂᒃ ᐊᐱᕐᓱᕈᑎᕕᓂᕐᓂᒃ ᐆᒥᖓ ᐃᓅᔪᓐᓃᕐᓯᒪᔪᖅ ᔪᐊᔾ ᑰᓂᐊᒃ ᑰᔾᔪᐊᖅᒥᐅᑕᖅ ᐊᒻᒪᓗ ᐊᑯᓂᐊᓗᒃ ᓄᓇᕕᒃᒥᑦ ᐃᒃᓯᕋᕐᔪᐊᖑᓚᐅᕐᑐᖅ ᔪᐊᔅ ᑎᐊᓐ, ᐃᓅᔪᓐᓃᓵᓚᐅᕐᑐᖅ ᑕᒪᑐᒪᓂ ᐅᑭᐅᒥᑦ.

ᓚᕖᓂᐊ ᐳᕋᐅᓐ, ᑲᙱᖅᖠᓂᕐᒥᐅᑕᐅᓕᕐᑐᖅ, ᐃᖅᑲᐅᒪᔪᖅ ᓄᑕᕋᐅᑎᓪᓗᒍ ᖃᓄᖅ ᖁᕕᐊᓱᒡᕕᒃᓯᐅᖃᑦᑕᓚᐅᕐᓯᒪᓂᖏᓐᓂᒃ ᐃᒡᓗᓕᒑᕐᔪᒃᒥᑦ ᓲᕐᓗᒎᖅ ᐃᑉᐸᒃᓴᓵᖅᑎᑐᑦ. (ᐊᔾᔨᓕᐅᕆᔨ ᔭᐃᓐ ᔪᐊᔾ)

ᓚᕖᓂᐊ ᐳᕋᐅᓐ: “ᐃᖅᑲᐅᒪᙱᑦᑐᖓ ᖁᕕᐊᓱᒃᕕᒃᓯᐅᑎᒥ ᓇᐹᖅᑐᒥᒃ ᑕᑯᓚᐅᕐᓯᒪᓂᓐᓂ”

ᓚᕖᓂᐊ ᐳᕋᐅᓐ, 71-ᖑᓕᕐᑐᖅ, ᐃᒡᓗᓕᒑᕐᔪᒃᒥ ᐱᕈᕐᓴᓚᐅᕐᓯᒪᔪᖅ. ᒪᓕᒐᓕᐅᕐᑎᐅᓚᐅᙱᑎᓪᓗᒍ ᓄᓇᕗᒧᑦ, ᐳᕋᐅᓐ ᓯᕗᓪᓕᖅᐹᖑᓪᓗᓂ ᐊᕐᓇᐅᓪᓗᓂ ᒪᐃᔭᐅᓚᐅᕐᓯᒪᔪᖅ ᑲᖏᖅᖠᓂᕐᒧᑦ, ᐊᒻᒪᓗ ᐃᑲᔪᓚᐅᕐᓯᒪᓪᓗᓂ ᐅᑭᐅᕐᑕᖅᑑᑉ ᑲᓇᖕᓇᖓᓄ ᐃᓕᓴᐃᔨᐅᓂᕐᒧᑦ ᐃᓕᓐᓂᐊᕈᑎᒃᓴᓂᒃ (EATEP).

ᐊᕐᕌᒍ 60 ᐊᓂᒍᕐᓯᒪᓕᕐᑎᓪᓗᒋᑦ, ᐳᕋᐅᓐ ᐃᖅᑲᐅᒪᔪᓐᓇᑦᑎᐊᖅᑐᖅ ᓄᑕᕋᐅᑎᓪᓗᒍ ᖁᕕᐊᓱᒡᕕᒃᒥᑦ ᐃᒡᓗᓕᒑᕐᔪᒃᒥᑦ, ᐃᖅᑲᐃᕙᒃᖢᓂ ᓄᑖᑦ ᐊᓐᓄᕋᑖᓵᖏᑦᑕ ᑎᐱᖏᓐᓂᒃ, ᐃᓄᒃᓯᐅᑎᑦ ᐊᒻᒪ ᓂᐅᕕᖅᑕᐅᓯᒪᔪᑦ.

“ᐃᓄᐃᑦ ᑐᓂᓯᖃᑦᑕᓚᐅᕐᓯᒪᔪᑦ ᐃᓚᖏᓐᓄᑦ ᒪᑯᓂᖓ ᑲᒥᖕᓂ ᐊᓯᖏᓐᓂᒡᓗ ᓱᕋᒃᓴᕋᐃᙱᑦᑐᓂᒃ,” ᐳᕋᐅᓐ ᐅᖃᖅᑐᖅ.

ᐅᑯᐊᓕ ᖃᓪᓗᓈᑦ ᖁᕕᐊᓱᖕᕕᖕᒥ ᐱᓕᕆᔾᔪᑎᒋᓕᕐᑕᖏᓐᓄᑦ, “ᐃᖅᑲᐅᒪᙱᑦᑐᖓ ᖁᕕᐊᓱᒃᕕᒃᓯᐅᑎᒥ ᓇᐹᖅᑐᒥ ᑕᑯᓚᐅᕐᓯᒪᓂᓐᓂᑦ,”

ᐳᕋᐅᓐ ᐱᕈᓕᕐᑎᓪᓗᒍ, ᐃᒡᓗᓕᒑᕐᔪᑦ ᐊᖏᓂᖅᐹᒥ ᐃᒡᓗᕐᔪᐊᖃᕐᓂᕐᒥᒃ ᐱᒃᑯᒋᔭᖃᓚᐅᕐᓯᒪᔪᖅ ᐅᑭᐅᕐᑕᖅᑑᑉ ᑲᓇᖕᓇᖓᓂᒃ, ᐅᓇ ᐃᔾᔪᕐᓇᐃᑦᑐᖅ ᑐᕇᓴ ᐃᒃᓯᕋᕐᔪᐊᓄᑦ ᐃᒡᓗ ᐊᒻᒪ ᐋᓐᓂᐊᕕᒃ, ᐊᐅᓚᑕᐅᓪᓗᓂ ᑳᑐᓕᒃᓂᒃ ᑐᒃᓯᐊᕐᑎᓂᒃ ᐊᒻᒪ ᓇᔭᖕᓂᒃ. ᖃᓂᒋᔭᖓᓂ ᑑᑭᑎᐅᓪ ᕼᐋᓪ, ᓱᕋᒃᑎᖅᑕᐅᓯᒪᓕᕐᑐᕐᓕ, ᑐᔪᕐᒥᕕᐅᓚᐅᕐᓯᒪᔪᖅ ᐃᓄᐃᑦ ᓄᑕᕋᖏᓐᓄᑦ, ᐱᔭᐅᓯᒪᔪᓂᒃ ᐅᕙᙵᑦ ᐃᒡᓗᓕᒃ, ᐊᕐᕕᓕᒡᔪᐊᖅ ᐊᒻᒪ ᓇᐅᔮᓂ, ᑖᒃᑯᐊ ᐃᓕᓐᓂᐊᕆᐊᖅᐸᒃᖢᑎᒃ ᓲ ᔫᓴᕝ ᐴᓂᐃ ᕙᑐᕈᓪ ᐃᓕᓐᓂᐊᕐᕕᒃᒧᑦ.

ᐳᕋᐅᓐ ᑕᕝᕗᖓ ᐃᓕᓐᓂᐊᕆᐊᖃᑦᑕᓚᐅᕐᓯᒪᔪᖅ ᐅᓪᓗᒃᑯᑦ ᐃᓕᓐᓂᐊᕐᑎᐅᓪᓗᓂ. ᑖᓐᓇᓗ ᓈᒻᒪᓚᐅᙱᑦᑐᖅ, ᐅᖃᖅᑐᖅ, ᓲᖃᐃᒻᒪ ᐊᒃᓱᕈᐃᓐᓇᐃᓐᓇᓚᐅᕐᑐᖅ ᐃᓕᓐᓂᐊᕋᓱᒃᖢᓂ ᑕᐃᑲᓂ, ᑕᐃᑲᓂᓕ, ᐊᓯᖏᓐᓂᒡᓗ, ᐃᓄᒃᑎᑐᑦ ᐅᖃᓪᓚᒋᐊᖃᙱᖢᓂ.

ᑭᓯᐊᓂᓕ ᖁᕕᐊᓱᒃᕕᒃᒥᑦ, ᐃᓕᓐᓂᐊᕐᓂᖅ ᐃᓱᒪᖕᓇᕈᓐᓃᖃᑦᑕᓚᐅᕐᑐᖅ ᐳᕋᐅᓐᒧᑦ ᐃᓚᖏᓐᓄᓪᓗ ᐅᓐᓄᐊᒃᑯᑦ ᑐᒃᓯᐊᕆᐊᓕᖅᑎᓪᓗᒍ ᑐᒃᓯᐊᕐᕕᒃᒧᑦ.

“ᐃᖅᑲᐅᒪᔪᖓ ᐊᖓᔪᖄᒪ ᓯᓂᒃᓵᓕᑎᑖᑎᒍᑦ ᐅᓐᓄᒃᑯ ᓯᓂᓚᐅᑲᖕᓂᐊᕋᑦᑕ ᑐᒃᓯᐊᕆᐊᓚᐅᙱᓐᓂᑦᑎᓐᓂᒃ,” ᐅᖃᖅᑐᖅ.

ᐳᕋᐅᓐ ᖃᑕᙳᑎᖏᓪᓗ ᐊᑐᖢᑎᒃ ᓄᑖᓂᒃ ᔭᐸᓂᒃ ᑲᒥᖕᓂᒡᓗ, ᐊᓈᓇᖓᑕ ᓴᓇᔭᖏᓐᓂᒃ.

ᑐᒃᓯᐊᕐᕕᒃᒥᑦ, ᐊᒥᓱᓂᒃ ᐃᓄᖕᓂ ᐅᐸᒃᑐᖃᖃᑕᐅᒋᓪᓗᓂ ᓄᓇᓖᑦ ᓯᓚᑖᓂ ᓄᓇᖃᕐᑐᓂᒃ, ᐃᒡᓗᓕᒑᕐᔪᒃᒧᑦ ᑎᑭᖢᑎᒃ ᕿᒧᒃᓯᒃᑯᑦ ᖁᕕᐊᓱᒃᕕᒃᓯᐅᕆᐊᖅᖢᑎᒃ.

“ᐃᒡᓗᕕᒐᓕᐅᖃᑦᑕᓚᐅᕐᑐᑦ ᓄᓇᓖᑦ ᓯᒡᔭᖓᓂᒃ,” ᐳᕋᐅᓐ ᐃᖅᑲᐅᒪᔪᖅ. “ᑖᓐᓇ ᖃᓄᐃᒋᓚᐅᙱᑦᑎᐊᖅᑕᖓ ᑕᐃᒪᓐᓇ ᑕᐃᔅᓱᒪᓂ.”

ᖃᐅᒃᐸᙳᕐᑎᓪᓗᒍ, ᑎᓯᐱᕆ 25, ᓂᕆᕕᒡᔪᐊᕐᓇᕐᓯᓪᓗᓂ. ᑭᒃᑯᓕᒫ ᑐᒃᓯᐊᕐᕕᐅᑉ ᐊᑖᓄᙵᐅᓪᓗᑎ ᐊᖏᔪᐊᓗᖕᒧ ᑕᕝᕙᓂᓗ ᐃᓄᐃᑦ ᐃᒃᓯᕚᖅᑑᑎᐅᓪᓗᑎᒃ.

“ᐃᖅᑲᐅᒪᔪᖓ ᐊᕐᕌᒍᑕᒫ ᓂᕆᔭᒃᓴᖃᕐᓂᖓᓂᒃ ᐳᐊᒃ ᐊᒻᒪ ᐲᓂᓯᓂᒃ, ᑖᒃᑯᓇᙵᑦ ᓇᔭᖕᓂ ᐅᓐᓄᐊᓕᒫᖅ ᓴᓇᔭᐅᔪᓂᒃ, ᐊᒻᒪᓗ ᐸᓚᐅᒑᕐᒥ ᐃᓚᖃᖅᖢᓂ, ᐊᑕᐅᓯᐊᓗᖕᒥ,” ᐳᕋᐅᓐ ᐅᖃᖅᑐᖅ. “ᐃᓱᒪᓚᐅᕐᑐᒍ ᐱᒻᒪᕆᐊᓘᓂᖓᓂᒃ.”

ᑭᖑᓂᐊᒍᓪᓕ ᐱᙳᐊᑲᑕᓕᕐᖢᑎᒃ ᐅᓪᓚᐅᔾᔪᐊᑲᑕᒃᖢᑎᒡᓗ ᓯᓚᒥ, ᒪᑯᓂᖓ ᐱᔭᐅᔭᕆᐊᓕᖕᓂᒃ ᓵᓚᒃᓴᐅᑎᖃᖅᖢᑎᒃ 10 ᐸᐅᓐ ᐸᓚᐅᒑᖅ ᐊᒻᒪ ᓯᐅᕋᐅᔭᕐᑐᕐᒥ, ᐴᖃᕐᓯᒪᓪᓗᑎ ᖃᑯᕐᑕᓂᒃ ᐊᒻᒪ ᐊᐅᐸᕐᑐᓂᒃ ᐅᕝᕙᓘᓐᓃᑦ ᐴᕆᔭᐅᕙᒃᑐᓂᒃ ᐳᑐᓛᓂᖕᓂ.

ᑖᒃᑯᐊ ᐴᕆᔭᐅᔪᑦ ᐃᓗᓕᖃᕈᓐᓃᕌᖓᖓᑕ. “ᐃᒋᑉᐸᓚᐅᙱᑕᕗᑦ ᐊᑐᓕᖅᐸᒃᖢᑎᒍᑦ ᐊᓪᓚᕈᑎᒋᓪᓗᑎᒍᑦ ᐊᒻᒪ ᐊᓯᖏᓐᓄᑦ ᐊᑐᕐᑕᐅᓪᓗᑎ.”

ᐅᓐᓄᙳᕌᖓ, ᖁᕕᐊᓱᒡᕕᒐᓚᐅᑎᓪᓗᒍ, ᓇᔭᐃᑦ ᑐᓂᐅᖃᐃᕙᓚᐅᕐᑐᑦ ᐊᓐᓄᕌᓂᒃ ᑐᓐᓂᖁᓯᐊᓂᒃ ᖃᓪᓗᓈᑦ ᓄᓇᖓᓂᒃ, ᐊᕐᓇᙳᔪᑎᖃᖅᖢᑎᒃ ᓂᕕᐊᕐᓵᓄᑦ, ᑖᒃᑯᐊᓗ ᐳᕋᐅᓐ ᐊᓯᖏᓪᓗ ᓂᕕᐊᓵᑦ ᐃᓕᓐᓂᐊᕐᕕᖕᒧᑦ ᐊᑐᓕᖅᐸᒃᖢᓂᔾᔪᒃ.

“ᑎᐱᖃᖃᑦᑕᓚᐅᕐᑐᑦ ᐊᔾᔨᐅᙱᑦᑐᒥᒃ, ᑭᓯᐊᓂᓕ ᖁᕕᐊᒋᑦᑎᐊᓚᐅᕐᑕᕗᑦ,” ᐳᕋᐅᓐ ᐅᖃᖅᑐᖅ.

ᐳᕋᐅᓐ ᑯᕕᐊᓱᒡᕕᖕᒥᑦ ᐃᖅᑲᐅᒪᔭᖏᑦ ᐃᒡᓚᖕᓇᕈᓘᔭᕐᓇᖅᑐᑦ, ᑭᓯᐊᓂᓕ ᑕᐃᒪᐃᖏᓐᓇᐅᔭᕈᓐᓃᕐᒥᔪᖅ ᐅᓪᓗᒥ.

“ᐃᓚᖏᑦ ᐃᓄᐃᑦ ᐃᓱᒫᓗᖕᓂᕐᓴᐅᓕᕐᑐᑦ ᐊᒻᒪᓗ ᐊᔪᕐᓇᕐᓈᓘᒋᓪᓗᓂ, ᐱᒻᒪᕆᐅᕗᖅ ᑲᑕᒍᑎᓂᒃ ᓴᕿᑎᑦᑎᙱᓪᓗᓂ, ᑭᓯᐊᓂᓕ ᖁᔭᓕᓂᕐᒥᑦ ᓴᕿᔮᖅᑎᑦᑎᓗᓂ ᐊᒻᒪᓗ ᐃᓕᓴᕆᓯᒪᓗᒋ ᓄᓇᓕᖕᓂᑦ ᐸᓖᓰᑦ ᐱᓇᓱᐃᓐᓇᖃᑦᑕᕐᓂᖏᓐᓂᒃ ᐊᒻᒪᓗ ᑮᓇᐅᔭᓂᒃ ᐱᕈᖅᑎᑦᑎᒐᓱᖃᑦᑕᕐᓂᖏᓐᓂᒃ ᖁᕕᐊᓱᒃᕕᖕᒥ ᓂᕿᑖᕆᔭᐅᓇᔭᖅᑐᓄᑦ, ᐊᒻᒪᓗ ᐅᑯᐊᑦᑕᐅᖅ ᑲᑐᓕᒃ ᑐᒃᓯᐊᕐᕕᒃ ᐊᒻᒪᓗ ᓂᕿᑖᕕᐅᕙᒃᑐᑦ ᑭᓱᖃᙱᑦᑐᓄᑦ,” ᐅᖃᖅᑐᖅ.

ᖁᕕᐊᓱᒃᕕᒃ ᑐᓂᓯᓯᒪᔪᓂᒃ ᐃᓱᒪᒋᔭᕆᐊᖃᕐᓇᖅᑐᖅ, ᐅᖃᖅᑐᖅ. “ᑕᒪᕐᒥᒃ ᐃᑲᔪᖅᑐᐃᓂᕐᒧᑦ ᑲᑐᔾᔨᖃᑎᒌᖑᔪᑦ ᐃᓅᓯᕐᓂᒃ ᐊᓯᙳᖅᑎᑦᑎᕙᖕᒪᑕ ᐊᓱᕈᑲᑕᒃᑐᓂᒃ,” ᐳᕋᐅᓐ ᐅᖃᖅᑐᖅ.

ᐊᑖᑕ ᔫᐊᔅ ᑎᐊᓐ ᓇᖏᕐᑐᖅ ᑭᐳᖓᑕ ᑐᒃᓯᐊᕐᕕᐅᑉ ᓴᓂᑦᑎᐊᖓᓂ ᑲᖏᖅᓱᐊᓗᔾᔪᐊᖅᒥᑦ ᔫᓂ 2013-ᒥᑦ. ᓄᓇᓖ ᕿᒪᓚᐅᕐᓯᒪᔭᖓ ᐊᑯᓂᐊᓗᒃ ᐊᖏᕐᕋᕆᓪᓗᓂᐅᒃ ᐃᑦᑑᓗᐊᒧᑦ ᓄᖃᓚᐅᙱᓐᓂᖓᓂᒃ ᑯᐸᐃᒃ ᓂᒋᐊᓂᒃ, ᑕᐃᑲᓂᓕ ᐃᓅᔪᓐᓃᓚᐅᕐᓯᒪᔪᖅ 2018-ᒥᑦ. (ᐊᔾᔨᓕᐅᕆᔨ ᔭᐃᓐ ᔪᐊᔾ)

ᐊᑖᑕ ᔫᐅᔅ ᑎᐊᓐ: “ᐱᙳᐊᑲᑕᖕᓂᖅ ᐊᒻᒪ ᒧᒥᑲᑕᖕᓂᖅ ᐃᓱᖃᖃᑦᑕᓚᐅᕐᑐᑦ 3-ᒥᑦ 4-ᒥᓪᓘᓐᓃᑦ ᐅᓪᓛᒃᑯᑦ

ᑕᓯᐅᔭᕐᔪᐊᑉ ᖃᓂᒋᔮᓂᒃ, ᖁᕕᐊᓱᒡᕕᒃ ᑕᐃᔅᓱᒪᓂ ᑕᐃᒪᓐᓇᑦᑕᐃᓐᓇᐸᓗᒃ ᖁᕕᐅᓱᒍᑎᐅᕙᓚᐅᕐᐳᖅ ᐅᑯᑎᒎᓇᕐᓕ ᐃᒃᓯᕋᕐᔪᐊᒃᑯᑦ ᔫᐅᔅ ᑎᐊᓐ, ᑖᓐᓇᓕ ᐃᓅᔪᓐᓃᓵᓚᐅᕐᑐᑦ ᑕᒪᑐᒪᓂ ᐊᕐᕌᒍᒥ ᐅᑭᐅᖃᓕᖅᖢᓂ 89-ᓂ.

1999-ᒥᑦ, ᐊᑖᑕ ᑎᐊᓐ, ᐃᖅᑲᐅᒪᔭᐅᓂᕐᓴᖅ ᓄᓇᕕᒃᒥ ᐃᓄᒃᑎᑐᑦ ᐊᑎᖓᒍᑦ, ᐊᑖᑕ ᐲᑎᐅ, ᐃᖅᑲᐅᒪᔭᒥᓂᒃ ᐅᖃᐅᓯᖃᕐᐳᖅ ᖁᕕᐊᓱᒃᕕᖕᒥ ᓄᓇᕕᒃᒥᑦ 1940 ᐊᓂᒍᓕᖅᑎᓪᓗᒋᑦ ᐊᒻᒪ 1950-ᖏᓐᓂᒃ.

ᑕᐃᔅᓱᒪᓂ, ᐃᓚᒌᖑᔪᑦ ᑎᑭᑉᐸᓚᐅᕐᓯᒪᔪᑦ ᕿᒧᒃᓯᖅᖢᑎᒃ ᐊᒻᒪ ᐊᑐᓂ ᐃᒡᓗᕕᒐᓕᐅᕐᖢᑎᒃ ᑐᒃᓯᐊᕐᕕᐅᑉ ᖃᓂᒋᔭᖓᓂᒃ ᒫᓐᓇ ᖃᐅᔨᒪᔭᐅᔪᖅ ᓄᓇᓕᖕᒥᑦ ᖁᐊᖅᑕᖅ, ᖁᕕᐊᓱᒃᕕᒃᒥ ᖁᕕᐊᓲᑎᖃᓕᕐᑎᓪᓗᒍᑎ ᑎᓯᐱᕆ 24-ᒥᑦ.

“ᑕᒪᕐᒥᑦᐊᖅ ᓄᑖᓂᒃ ᐊᓐᓄᕌᕐᓯᒪᕙᒃᖢᑎᒃ, ᓴᓇᔭᐅᔪᓂᒃ ᖁᕕᐊᓱᒡᕕᒃᒧᑦ,” ᐱᕐᑎᐅ ᐅᖃᖅᑐᖅ. “ᑭᖑᓂᐊᒍᑦ ᐱᙳᐊᑲᑕᓕᖅᖢᑕ, ᐱᒡᒍᔭᐅᑎᔪᑦ ᐊᒻᒪ ᕿᒧᒃᓯᐅᔾᔪᐊᑲᑕᒃᑐᑦ. ᐅᓇᑦᑕᐅᖅ ᐱᙳᐊᕈᑎᐅᕙᓚᐅᕐᑐᖅ ᓂᓚᖕᓂᒃ ᕿᓪᓗᕐᓯᒪᔪᓂᒃ ᑕᓯᕐᒥᙶᕈᔾᔨᓗᑎᒃ ᓱᒃᑲᓴᐅᔾᔪᐊᖅᖢᑎᒃ ᑖᒃᑯᐊᓕ ᓂᓚᐃᑦ ᐃᒪᕆᔭᐅᓂᐊᖅᖢᑎᒃ. ᓱᒃᑲᓴᐅᑎᓂᐅᒐᓗᐊᖅᑎᓪᓗᒍ ᐊᒻᒪ ᐱᔨᑦᑎᕋᕐᓂᖃᓚᐅᕆᕗᖅ.”

ᑎᓯᐱᕆ 24-ᒥ, ᐱᕐᑎᐅ ᐅᖃᓚᐅᕐᑐᖅ ᐅᓐᓄᐊᒃᑯᑦ ᑐᒃᓯᐊᖃᑦᑕᖅᖢᑎᒃ, ᐊᒻᒪ ᐱᐊᓂᒃᑳᖓᑕ ᑏᑐᖅᖢᑎᒃ, ᓯᕙᑐᕐᓗᑎᒡᓗ ᐊᒻᒪ ᐅᖁᒻᒥᐊᒐᕐᓂᒃ.

“ᐱᙳᐊᖃᑦᑕᓚᐅᕐᓯᒪᔪᑦ ᒧᒥᕐᐸᒃᖢᑎᒡᓗ 3 4ᓘᓐᓂ ᑎᑭᖢᒍ ᐅᓪᓛᒃᑯᑦ,” ᐃᖅᑲᐅᒪᔪᖅ. “ᐱᐊᓂᒃᑯᑎᒃ, ᑕᒪᕐᒥᒃ ᑕᖃᐃᕐᓯᕆᐊᓕᖅᖢᑎᒃ. ᖁᕕᐊᓱᒡᕕᙳᖅᐸᓪᓕ ᓯᓚ ᖃᐅᒪᓂᖃᓕᕈᓂ, ᖃᓄᐃᑦᑐᕈᓘᔭᕐᓂᒃ ᐱᙳᐊᓕᖅᐸᒃᖢᑎᒃ ᑭᒃᑯᓕᒫᓅᖓᔪᓂᒃ ᐊᕐᕌᒍᖏᑦᑎᒍᑦ, ᐊᖑᑎᓄᑦ, ᐊᕐᓇᓄᑦ, ᐃᓅᓱᒃᑐᓄᑦ ᐊᒻᒪ ᐃᓐᓇᕐᓄᑦ  ᐱᒋᐊᒃᑲᓐᓂᖅᐸᒃᖢᑎᒃ.”

ᑎᓯᐱᕆᒥ ᑕᖅᑭᕆᒃᓯᔭᕌᖓᑦ, ᐅᓇᑕᖅᑐᒃᓴᒃᑯᑦ ᖃᖓᑕᓲᖓ ᑲᑕᒐᐃᖃᑦᑕᓚᐅᕐᓯᒪᔪᑦ ᑎᑎᖃᓂᒃ ᐊᒻᒪ ᖁᕕᐊᓲᑎᒃᓴᓂᒃ.

“ᑭᓯᐊᓂᓕ ᐃᓛᓐᓂᒃᑯᑦ ᑲᑕᐅᑏᑦ ᒪᐃᙱᒃᑯᓂ ᑖᒃᑯᐊ ᒪᑐᐃᖃᑦᑕᓚᐅᕐᑐᑦ ᐅᔭᖃᓄᑦ ᑲᑕᒃᑳᖓᒥᒃ ᐊᒻᒪ ᓱᕋᒃᑎᕈᓘᔭᕐᓗᑎᒃ. ᑲᐃᒃᒥᑦ (fruitcake) ᐱᑖᓚᐅᕐᓯᒪᒐᑦᑕ ᑭᓯᐊᓂᓕ ᓴᕕᕋᔭᒃ ᐴᖓ ᓱᕋᓚᐅᕐᓯᒪᖕᒥᔪᖅ ᐊᒻᒪᓗ ᓄᕗᕐᓖᑦ ᐊᕐᓇᓄᑦ ᐊᓐᓄᕌᓕᐊᖏᓐᓄᑦ ᐊᑐᕋᔭᖅᑕᖏᑦ ᑲᐃᒃᒦᕈᓘᔭᓕᖅᖢᑎᒃ.

“ᑖᓐᓇᓕ ᑲᐃᒃ ᐊᕕᒃᑐᕈᓘᔭᕐᖢᑎᒍᑦ ᒥᑭᑦᑑᑎᐅᓕᕐᖢᒍ, ᑖᒃᑯᐊᓕ ᐃᓐᓇᐅᓂᕐᓴᑦ ᐸᑦᑕᒋᐊᖅᑐᕐᑎᓪᓗᒋ, ᑕᕝᕙᙵᑦ ᑕᒧᓗᑲᑕᓕᕐᖢᑕ, ᑖᒃᑯᐊᓗ ᓄᕗᖅᖠᓂᒃ ᓇᓂᓯᑲᑕᒃᖢᑕ,” ᐱᕐᑎᐅ ᐅᖃᖅᑐᖅ. “ᑖᓐᓇᓗ ᑲᐃᒃ ᒪᒪᑦᑎᐊᖅᖢᓂ!”

ᔪᐊᔾ ᑰᓂᐊᒃ ᑎᒍᒥᐊᖅᑐᖅ ᑎᒍᐊᕐᒥᓂᒃ ᑎᕆᒐᓂᐊᕐᔪᒃᒥᑦ ᕗᐊᑦ ᓴᐃᒧᒥ 1960-ᐅᑎᓪᓗᒍ ᐊᔾᔨᓕᐅᖅᑕᐅᓪᓗᓂ ᕉᔅᒥᐅᕆ ᓯ. ᐄᑕᓐ. (ᐊᔾᔨᙳᐊᖅ ᑖᕼᐊᐅᓯ ᓯᓚᑦᑐᖅᓴᕐᕕᐊᓗᖕᒥᑦ ᑲᑎᕐᓱᒐᕐᓂᒃ,
MS-2-130_16_5_002_141)

ᔪᐊᔾ ᐊᕿᕿᖅ ᑰᓂᐊᒃ: “ᐴᖃᐃᓪᓗᖓ ᓯᕗᓪᓕᖅᐹᒥ ᖁᕕᐊᓲᑎᒃᓴᓐᓂᒃ, ᐊᒃᓱᐊᓗᒃ ᐅᕙᓐᓂ ᐱᒃᑯᒋᓚᐅᕐᓯᒪᔪᖓ!”

1998-ᒥᑦ, ᔪᐊᔾ ᐊᕿᕿᖅ ᑰᓂᐊᒃ, ᐃᓅᔪᓐᓃᓚᐅᕐᓯᒪᔪᖅ ᖃᖓᑲᓪᓚᕈᓘᓕᕐᑐᖅ 80-ᖏᓐᓂ ᐅᑭᐅᖃᓕᕐᖢᓂ, ᐅᖃᓚᐅᕐᓯᒪᔪᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᓯᕗᓕᖅᐹᖅ ᖁᕕᐊᓱᒡᕕᒃᒥᑦ ᐅᐸᒍᑎᔪᓐᓇᓚᐅᕐᓯᒪᙱᓐᓂᕋᖅᖢᓂ. ᓲᖃᐃᒻᒪ ᐃᓅᓚᐅᕐᓯᒪᙱᒻᒪᑦ ᓱᓕ.

ᔭᓄᐊᕆ 3, 1931-ᒥᑦ, ᑰᓂᐊᒃ ᐊᖓᔪᖄᖏ ᓄᓇᒋᔭᒥᓄᑦ ᐅᑎᖅᐸᓪᓕᐊᓕᖅᖢᑎᒃ ᖁᕕᐊᓱᒡᕕᒃᓯᐅᓚᐅᖅᖢᑎᒃ ᖁᐊᖅᑕᒥᑦ ᓂᐅᕕᕐᕕᓕᖕᒥ ᑖᔅᓱᒪ ᐊᓈᓇᖓ ᐃᕐᓂᓱᓕᑳᓪᓚᒃᖢᓂ. ᓄᖃᖅᖢᑎᒃ ᐃᒡᓗᕕᒐᓕᐅᑲᐅᕐᑐᓕᖅᖢᑎᒃ.

“ᐃᓅᓚᐅᕐᓯᒪᔪᖓ ᐃᒡᓗᕕᒐᖅ ᐱᐊᓂᒃᑕᐅᓪᓗᓂᓗ ᐃᑲᕐᕋᐅᑉ ᓇᑉᐸᖓᓂ ᐃᓅᓕᕐᓗᖓ,” ᑰᓂᐊᒃ ᐅᖃᖅᑐᖅ.

ᓱᕈᓯᐅᑎᓪᓗᒍ, ᐃᓚᒌ ᖁᕕᐊᓱᒡᕕᐅᓕᕌᖓᑦ ᖁᐊᖅᑕᒧᙵᐊᖃᑦᑕᓚᐅᕐᓯᒪᔪᑦ ᑕᕝᕙᙵᑦ ᓄᓇᒋᔭᖓᓂᒃ ᑕᐃᐊᓇ ᐸᐃ ᖃᓂᒋᔭᖓᓂᒃ. 200 ᐅᖓᑖᓂ ᓄᓇᖃᐅᕐᑐᓂᒃ ᐊᓯᐊᓂᒃ ᑕᕝᕗᖓ ᑲᑎᖃᑦᑕᓚᐅᕐᓯᒪᔪᑦ, ᐃᒡᓗᕕᒐᓕᐅᕐᖢᑎᒃ ᐃᓂᒋᓚᐅᑲᖕᓂᐊᕐᑕᒥᖕᓂᒃ ᖁᕕᐊᓱᒡᕕᒃᓯᐅᕐᓂᖏᓐᓂᒃ. ᖁᕕᐊᓱᒃᕕᒃᓯᐅᕐᓂᖅ ᐱᒋᐊᖃᑦᑕᓚᐅᕐᓯᒪᕗᖅ ᖁᕕᐊᓱᒡᕕᙳᕐᓂᐊᓵᖅᑎᓪᓗᒍ ᖃᐅᒃᐸᖓᓂᒃ, ᑖᒃᑯᐊᓗ ᓂᐅᕕᖅᑎᒃᑯᑦ ᓂᕆᕕᒡᔪᐊᖅᑎᑦᑎᓪᓗᑎᒃ ᐊᒻᒪ ᐃᙱᕈᑎᒧᑦ ᒧᒥᑲᑕᒃᖢᑎᒃ.

“ᓂᕆᕕᒡᔪᐊᖅᑕᐅᔪᖅ, ᐃᒪᐃᑦᑑᓚᐅᕐᑐᖅ ᐳᐊᒃ (ᑰᑰᓯ) ᐊᒻᒪ ᐲᓂᓰᑦ,” ᑰᓂᐊᒃ ᐅᖃᖅᑐᖅ. “ᐊᖏᔪᕈᓗᖕᒥ ᓴᓇᖃᑦᑕᓚᐅᕐᓯᒪᖕᒪᑕ ᐳᐊᒃᒥᑦ ᐊᒻᒪ ᐲᓂᓯᓂᒃ, ᐸᓚᐅᒑᖃᐅᕐᖢᓂ ᐊᒻᒪ ᑖᒃᑯᐊ ᐸᐅᕐᖓᖃᑦᑎᐊᖅᖢᑎᒃ. ᐅᓐᓄᒃᑯᑦ ᒧᒥᕐᓇᕐᓯᔭᕌᖓᑦ, ᓂᓕᑲᑕᕈᓘᔭᖃᑦᑕᓕᕐᐸᒃᖢᑎᒃ!”

ᐅᓐᓄᐊᙳᖅᐸᑦ, ᓄᖃᖅᐸᒃᖢᑎᒃ ᖁᕕᐊᓲᑎᖃᕐᓂᖏᓐᓂᒃ ᑐᒃᓯᐊᕐᕕᓕᐊᕐᓂᐊᕐᒪᑕ. ᖁᕕᐊᓲᑎᓂᒃ ᑐᓂᓯᖃᑦᑕᕐᓂᖅ, ᐃᖅᑲᐅᒪᔪᖅ ᑰᓂᐊᒃ, ᐃᓚᒋᔭᐅᓚᐅᕐᐳᖅ ᖁᕕᐊᓱᒃᕕᖕᒥ, ᑭᓯᐊᓂᓕ ᒫᓐᓇᑎᑑᙱᖢᑎᒃ.

“ᐃᓄᐃᑦ ᑐᓂᓯᖃᑦᑕᓚᐅᕐᑐᑦ, ᑭᓯᐊᓂᓕ ᓄᑖᙳᙱᑐᓂᒃ,” ᐅᖃᖅᑐᖅ. “ᐃᓐᓇᐅᓂᕐᓴᑦ ᐊᒃᖢᓈᓕᐅᕐᖢᑎᒃ ᓇᑦᑎᐅᑉ ᕿᓯᖏᓐᓂᒃ (ᖁᒧᒃᓯᓄᑦ ᐊᑐᖅᑕᐅᓂᐊᕐᑐᓂᒃ) ᐊᒻᒪ ᓇᖕᒪᑲᑦᑕᕐᓂᒃ. ᐃᓚᖏᑦ ᑕᐅᕐᓰᕙᒃᖢᑎᒃ ᓂᐅᕕᕐᕕᖕᒥᐅᑕᓂᒃ ᔭᐸᓂᒃ ᔭᐃᑲᖕᓂᒡᓗ. ᓄᑖᖅᑕᖃᖃᑦᑕᓚᐅᙱᑦᑐᖅ, ᓂᐅᕕᕐᕕᖕᓂᙶᖅᑐᓂᒃ, ᐊᒻᒪ ᐴᖃᕐᓯᒪᙱᖢᑎᒃ ᐴᒃᓴᑦᑎᐊᕚᓘᓕᖅᑐᓂᒃ. ᐱᑕᖃᖃᑦᑕᓚᐅᙱᒻᒪᑦ ᐴᒃᓴᐅᓇᔭᖅᑐᓂᒃ.”

1957-ᒥᑦ, ᑰᓂᐊᒃ ᐃᓚᒋᔭᐅᓚᐅᕐᓯᒪᕗᑦ ᑎᓴᒪᒋᔭᐅᓪᓗᓂ ᐅᐸᒍᑎᒋᐅᖅᑐᓂᒃ ᐃᓄᓕᕆᔨᑐᖃᒃᑯᑦ ᑲᑎᒪᔨᖏᓐᓂ ᐋᑐᕚᒥ.

ᑕᐃᔅᓱᒪᓂ, ᐃᓚᒌᑦ ᓄᒃᑎᓚᐅᕐᓯᒪᑎᓪᓗᒋᑦ ᕗᐊᑦ ᓴᐃᒨᒧᑦ, ᒫᓐᓇ ᑕᐃᔭᐅᓕᕐᑐᖅ ᑰᔾᔪᐊᖅᒧᑦ, 1958-ᒥᑦ, ᑰᓂᐊᒃ ᑲᔪᓰᓐᓇᓚᐅᕐᓯᒪᔪᖅ ᐃᓄᖕᓂᒃ ᑭᒡᒐᖅᑐᐃᓂᕐᒥᒃ: ᐊᑎᓕᐅᖃᑕᐅᓚᐅᕐᓯᒪᔪᖅ 1975-ᒥᑦ ᔭᐃᒻᔅ ᐸᐃ ᐊᒻᒪ ᓄᓇᕕᒃᒧᑦ ᐊᖏᕈᑎᓂᒃ, ᐱᒋᐊᓕᖅᑐᓂᒃ ᐃᓚᒋᔭᐅᓪᓗᓂ ᓄᓇᕕᒃᒥᑦ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ ᐊᒻᒪᓗ ᑭᖑᓂᐊᒍᑦ ᒐᕙᓇᐅᓪᓗᓂ ᒪᑭᕝᕕᒃ ᑯᐊᐳᕇᓴᑯᓐᓄᑦ.

ᑰᓂᐊᒃ ᓄᒃᑎᖅᑎᓪᓗᒍ ᑰᔾᔪᐊᖅᒧᑦ, ᖃᐅᔨᑎᑕᐅᓚᐅᕐᓯᒪᔪᖅ ᐊᓯᒃᑲᓐᓂᐊᒍᑦ ᖁᕕᐊᓱᒡᕕᒃᓯᐅᕐᓂᕐᒥᒃ, ᖃᐅᒪᖃᖅᑐᓂᒃ, ᖁᕕᐊᓲᑎᒃᓴᓂ ᐱᐅᓴᐅᑎᓂᒃ, ᓇᐹᖅᑐᓂᒃ ᐊᒻᒪ ᐴᖃᕐᓯᒪᔪᓂᒃ ᑐᓐᓂᖁᓯᐊᒃᓴᓂᒃ.

“ᐴᖃᐃᓪᓗᖓ ᓯᕗᓪᓕᖅᐹᒥ ᖁᕕᐊᓲᑎᒃᓴᓐᓂᒃ, ᐊᒃᓱᐊᓗᒃ ᐅᕙᓐᓂ ᐱᒃᑯᒋᓚᐅᕐᓯᒪᔪᖓ!” ᐅᖃᖅᑐᖅ. “ᓯᓂᐊᓪᓚᓚᐅᕐᓗᑕᓗ ᑭᓯᐊᓂ, ᐊᒻᒪ ᐃᖁᒻᒪᕐᓗᑕ 1-ᒥᑦ ᐊᒻᒪ ᐴᖃᐃᓕᕐᓗᑕ ᖁᕕᐊᓲᑎᒃᓴᓂᒃ ᖃᐅᒃᐸᒧᑦ.”

ᑰᓂᐊᒃ ᐊᓕᕐᓯᖕᓂᒡᓗ ᐳᐊᓗᓂᒡᓗ ᐊᒻᒪ ᐊᓯᖏᓐᓂ ᐅᖂᓇᕐᑐᓂᒃ ᐱᑖᖃᑦᑕᓚᐅᕐᓯᒪᔪᖅ ᖁᕕᐊᓱᒃᑕᐅᓪᓗᓂ.

“ᓄᓕᐊᕋ, ᔭᐸᓕᐅᕈᓐᓇᓚᐅᕐᓯᒪᖕᒪᑦ, ᖁᓂᒍᓕᖕᓂᒃ ᔭᐸᓂᒃ,” ᐅᖃᖅᑐᖅ. “ᑕᒪᒃᑯᐊ ᐊᕝᕗᖅᐸᒃᖢᑎᒍᑦ ᐊᐅᔭᒃᑯᑦ, ᐊᒻᒪ ᐴᕐᓯᒪᑎᖢᓂᒋ ᐊᒻᒪ ᓴᓗᒻᒪᕐᓴᖅᖢᓂᒋᑦ, ᑕᒪᒃᑯᐊ ᓱᕉᓂᖏᑦ ᐃᕕᕕᓃᑦ ᓱᓗᐃᓪᓗ ᐲᔭᖅᖢᓂᒋᑦ.”

ᑕᐃᔅᓱᒪᓂ, ᐱᙳᐊᑲᑕᖕᓂᖅ ᐱᒻᒪᕆᐊᓘᓚᐅᕐᓯᒪᔪᖅ ᖁᕕᐊᓱᒡᕕᒃᒧᑦ, ᐃᒡᓘ ᐃᓗᐊᓂ ᐊᒻᒪ ᓯᓚᒥ ᐱᙳᐊᒐᒃᓴᖃᖅᖢᓂ ᐊᒻᒪᓗ ᕿᒧᒃᓯᐅᑎᕙᒃᖢᑎᒃ. ᑰᓂᐊᒃ ᐅᖃᓚᐅᕐᑐᖅ 1998-ᒥᑦ ᖁᕕᐊᓱᒡᕕᒃᒥᑦ ᖁᕕᐊᓲᑎᖃᕐᓂᖅ ᐊᒻᒪ ᖁᕕᐊᓱᒃᓯᑲᑕᖕᓂᖅ ᐊᒃᓱᕈᓗᐊᓚᐅᑲᖕᓇᕐᓂᖓᓂᒃ.

“ᖁᕕᐊᓲᑎᑦ ᒫᓐᓇ ᐱᐅᔪᐊᓗᐃᑦ. ᐃᓚᖏᑦ ᐊᑭᑐᓪᓗᑎᒃ, ᐃᒪᓐᓇᐅᔪᓐᓇᖅᖢᓂ, ᖃᒧᑕᐅᔭᓂᒃ ᐊᐅᓚᐅᑎᓄᑦ,” ᐅᖃᖅᑐᖅ. “ᒫᓐᓇᓕ ᓱᕈᓯᕗᑦ ᑭᓱᑐᐃᓐᓇᕐᓂᒃ ᐱᑎᓗᐊᓕᕋᑦᑎᒍᑦ. ᐊᒻᒪᓗ ᐃᓕᖁᓯᕆᙱᓗᑎᒍᑦ.”

ᑰᓂᐊᒃ ᐅᖃᓚᐅᕐᒥᔪᖅ ᐊᐃᑦᑖᕈᓱᖕᓂᕋᖅᖢᓂ ᐃᒥᐊᓗᒃ ᐃᓚᒋᑎᑕᐅᓕᕐᓂᖓᓂᒃ ᓄᓇᓕᖕᓂ ᖁᕕᐊᓲᑎᖃᖅᑎᓪᓗᒋᑦ.

“ᐃᓛᓐᓂᒃᑯᑦ ᐃᒥᐊᓗᒃ ᖁᕕᐊᓱᒍᓐᓃᕐᓇᕐᒪᑦ,” ᐅᖃᖅᑐᖅ. “ᐊᖓᔪᖄᒃᑯ ᖃᑯᑎᒃᑯᑦ ᐃᒥᖃᑦᑕᓚᐅᕐᓯᒪᔪᑦ.”

1998-ᒥ, ᐱᐅᓂᕐᐹᖑᓚᐅᕐᑐᕐᓕ ᑰᓂᐊᒃᒧᑦ ᐃᓚᖏᓐᓃᖢᓂ 11- ᕿᑐᕐᖓᖏᑦ, 43 ᐃᕐᖑᑕᖏᑦ ᐊᒻᒪ ᖃᔅᓯᒐᓴᒻᒪᕇᑦ ᐃᓗᓕᖏᑦ. ᑭᓯᐊᓂᓕ ᐅᓐᓅᖕᓂ ᒪᕐᕈᖕᓂ ᖁᕕᐊᓲᑎᖃᕐᓂᖅ ᓈᒻᒪᒋᔭᖓ, ᐅᖃᖅᑐᖅ, ᐊᒻᒪ ᑰᔾᔪᐊᖅᒥᑦ ᐊᐅᓪᓚᖅᖢᓂ ᐊᖑᓇᓱᒋᐊᓕᖅᖢᓂ.

“ᐊᔾᔨᒋᙱᓐᓂᖅᑕᖃᑦᑎᐊᕐᒪᑦ,” ᑰᓂᐊᒃ ᐅᖃᓚᐅᕐᓯᒪᔪᖅ ᐊᕐᕌᒍ ᐊᕙᑎ ᓯᕗᓂᐊᓂ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ. “ᐊᒃᑐᓚᐅᕐᓯᒪᒐᒃᑯ ᐱᒋᐊᕐᓂᖅ, ᐊᒻᒪ ᖃᓄᐃᓐᓂᐊᓂᖓ ᒫᓐᓇ, ᐃᒃᐱᒋᓯᒪᒐᒃᑯ ᐊᔾᔨᒌᙱᔾᔪᑎᐅᔪᑦ ᐊᒃᖢᓈᕐᓴᖅᑖᕐᓂᐅᓪᓗ ᓯᑭᑑᑖᕐᓂᐊᓪᓗ ᖁᕕᐊᓱᒡᕕᖕᒥᑦ.”

Share This Story

(0) Comments

Join the Conversation

Your email address will not be published. Required fields are marked *

*