ᖃᓄᐃᓕᐅᕐᐸᓪᓕᐊᓂᕐᒧᑦ ᐊᔪᕆᕐᓱᐃᔨ ᑐᒃᓯᐊᕐᕕᒡᔪᐊᒥ ᐳᓛᖅᐳᖅ ᓄᓇᕗᒥ

ᐅᒃᐱᖅᑐᖅ ᐊᔪᕆᕐᓱᐃᔨ ᐃᕚᓐᔨᓕᔅᑦ ᖃᐅᔨᒪᔭᐅᓂᕐᓴᖅ ᖃᓄᐃᓕᐅᕈᑎᓅᖓᓂᓕᕆᓂᕐᒥᒃ, ᓯᓚᐅᑉ ᐊᓯᙳᖅᐸᓪᓕᐊᓂᖓᓂᒃ ᐅᒃᐱᕈᓱᙱᓐᓂᕐᒥᒃ ᐊᒻᒪᓗ ᑮᓇᐅᔭᓕᐅᕋᓱᒍᑎᒋᔭᖏᓐᓂᒃ ᓄᓇᕐᔪᐊᖅ ᐱᑕᖃᕈᓐᓃᖅᑎᑦᑎᓂᐊᕐᒪᑦ ᑯᕋᐃᔅᑑᓯᒥ ᐅᒃᐱᕈᓱᙱᑦᑐᓂᒃ ᐃᖃᓗᐃᑦ ᑐᒃᓯᐊᕐᕕᖓᓄᐊᓚᐅᕐᐳᖅ ᐋᒐᓯ   27-ᒥᑦ.

ᐅᕌᑦᓂ ᕼᐅᕚᑦ-ᐳᕋᐅᓐ, ᓴᐅᑦ ᐋᕗᕆᑲᒥᐅᑕᖅ ᔫᓇᐃᑕᑦ ᓯᑕᐃᑦᔅᓄᑦ ᓅᓐᓂᑯ, ᐅᖃᓚᐅᕐᑐᖅ ᐅᐸᒃᓯᒪᔪᓂᒃ ᐅᕙᓂ ᑖᒻᐸ ᐸᐃ ᖃᓂᒋᔭᖓᓂ ᐋᕐᕌᓂᐅᓚᐅᕐᑐᖅ ᑕᒪᒃᑯᐊ ᓄᓇᕐᔪᐊᒥᑦ ᐊᔪᖅᑳᖑᔪᑦ ᓂᕐᓱᓚᐅᕐᓯᒪᓂᕋᖅᖢᓂᒋᑦ ᓘᓯᕙᒥ ᐊᒻᒪ ᐃᒥᖅᖢᑎᒃ ᐃᓅᑉ ᐊᐅᖓᓂᒃ ᑐᓐᓂᖅᑯᑎᒋᔭᖓᓂᒃ.

ᐊᔪᕐᕆᕐᓱᐃᓚᐅᕐᑐᖅ ᐃᑲᕐᕋᐅᑉ ᐅᖓᑖᓂᒃ ᐃᖃᓗᐃᑦ ᑐᒃᓯᐊᕐᕕᖓᓂ 100 ᐅᖓᑖᓃᑦᑐᓄᑦ ᐃᓄᖕᓄᑦ.

ᑭᓯᐊᓂᓕ ᑐᓴᒐᒃᓴᖏᑦ ᑭᒃᑯᓕᒫᓅᙱᒻᒪᑕ.

ᓗᐃ ᐋᕆᐊᒃ, ᐃᖃᓗᖕᓂ ᐃᕚᓐᔭᓕᔅᑦ ᐊᒻᒪ ᐃᙱᖅᑎ, ᐃᙱᖅᐳᖅ ᐅᕌᑦᓂ ᕼᐊᐅᕘᖅ-ᐳᕋᐅᓐ ᐅᖃᓪᓚᓚᐅᙱᑎᓪᓗᒍ. (ᐊᔾᔨᙳᐊᖅ ᐅᑯᓇᙵᑦ ᕆᕙᐃᕗᓪ ᒥᓂᔅᑐᕆᔅ ᐃᓐᑐᓈᓴᓄᓪ)

“ᐅᑭᐅᕐᑕᖅᑐᓕᒫᖅ ᒫᓐᓇ ᐊᒃᑐᐊᓂᖃᖅᐳᖅ ᖃᓄᐃᓕᐅᕐᓂᐅᔪᒧᑦ ᐅᓐᓄᒃ. ᑕᐃᒪᓕ ᐱᔪᒪᒍᔅᓯᐅᒃ ᖃᐅᒪᓂᖅ (ᐊᓂᕐᓂᒥ), ᐅᕙᓂ ᓇᖏᓚᐅᕆᑦᑎ (ᑐᒃᓯᐊᖅᑎᐅᑉ ᑭᐳᖓᓂ), ᐅᕝᕙᓘᓐᓃᑦ ᐊᓂᔪᓐᓇᖅᐳᓯ. ᐃᓱᒪᕐᓱᖅᐳᓯ,” ᕼᐅᕙᑦ-ᐳᕋᐅᓐ ᐅᖃᓚᐅᕐᑐᖅ ᐃᑲᕐᕌᒃ ᒪᕐᕉᒃ ᓇᑉᐸᕐᓗ ᐱᓕᕆᑲᑖᓂᒃᑎᓪᓗᒍ. ᒫᓂ 50-ᖏᓐᓃᑦᑐᑦ ᐅᐸᒍᑎᓚᐅᕐᑐᑦ.

“ᖃᖓᑕᓚᐅᙱᓐᓇᒪ ᑕᐅᓴᑲᓪᓚᖕᓂ ᒪᐃᓕᓂ ᐱᙳᐊᕆᐊᖅᑐᕐᓗᖓ. ᑕᒪᐅᙵᓚᐅᙱᑦᑐᖓ ᐱᐅᒋᔭᐅᓂᐊᕋᒪ, ᐊᒻᒪ ᑕᒪᐅᙵᓚᐅᙱᑦᑐᖓ ᐊᖏᖅᑕᐅᔪᒪᓪᓗᖓ ᐃᓕᔅᓯᓐᓄᑦ… ᐃᖅᑲᐅᒪᒋᑦᑎ: ᔩᓱᓯ ᐆᒻᒪᕐᑎᓪᓗᒍ ᑐᖁᓚᐅᕐᖢᓂ, ᐊᓂᖁᔨᓚᐅᕐᓯᒪᔪᖅ ᐃᒡᓗᕈᓯᕐᒥ ᐃᓄᖕᓂ.”

ᐅᐸᒍᑎᔪᑦ ᐃᓄᐃᑦ ᐅᓄᕐᓂᕐᓴᐅᓚᐅᕐᑐᑦ ᓄᑕᕋᓛᓪᓗ, ᐃᓅᓱᒃᑐᓪᓗ ᐊᒻᒪ ᐃᓐᓇᑐᖃᐃ. ᐃᓗᐊᓂ ᑐᒃᓯᐊᕐᕕᐅᑉ ᑯᕆᔅᑎᐊᓐ ᕙᓗᓯᑉ ᑐᒃᓯᐊᕐᕕᒃᒥᑦ ᐃᖃᓗᐃᑦ ᕉᑦ ᑐ ᓄᕕᐅ ᖃᓂᒋᔭᖓᓂ, ᓱᕈᓰᑦ ᐅᓪᓚᔭᒃᑐᑦ ᐃᒃᓯᕙᐅᑕᑦ ᐊᑯᓐᓂᖏᑦᑎᒍᑦ. ᓯᓚᑖᓂᓪᓕ, ᑐᒃᓯᐊᕐᕕᒃ ᐊᒻᒪ ᒫᔅᒃ ᐃᖕᒥᖕᓄᑦ ᓵᙵᖃᑦᑕᐅᑎᕘᒃ ᑕᒪᕐᒥᒃ ᓄᓇᓯᐅᑎᓄᑦ ᓄᖃᖓᕝᕕᐅᑉ ᐅᖓᑎᑦᑎᐊᖓᓃᖢᑎᒃ, ᑖᒃᑯᐊᒃ ᓵᙵᓪᓗᑎᒃ ᑎᐊᑦ ᑖᒡ ᑕᓯᕐᒥ.

ᕼᐅᕙᑦ-ᐳᕋᐅᓐ ᐊᔪᕆᕐᓱᐃᓂᖓ ᐃᓚᒋᔭᐅᓚᐅᕐᑐᖅ ᐋᕿᒃᑕᐅᓯᒪᔪᒥᑦ ᖃᓄᐃᓕᐅᕐᓇᒥᑦ ᐅᑯᓇᖓᑦ Bill Prankard Evangelistic Association’s Arctic Hope Project, ᐋᑐᕚᒦᑦᑐᒥᑦ. ᑖᒃᑯᐊ ᑲᑐᔾᔨᖃᑎᒌᖑᔪᑦ ᑭᐅᓚᐅᙱᒻᒪᑕ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᐋᕿᒃᓱᐃᓇᓕᖅᑎᓪᓗᒍ ᑐᓴᕋᓱᒃᖢᑎᒃ ᑕᒪᑐᒥᖓ.

ᑖᔅᓱᒪ ᐃᕚᓐᔨᓕᔅᑦ ᖃᓄᐃᓕᐅᖃᑦᑕᕐᓂᖓ, ᑖᓐᓇ 119-ᒋᔭᐅᓪᓗᓂ 300-ᓂ ᐅᐸᖃᑦᑕᕐᓂᐊᖅᑕᖏᓐᓂᒃ ᓄᓇᓕᖕᔪᐊᓂ ᖃᓄᐃᓕᐅᑲᑕᒡᓗᓂ, ᐱᒋᐊᓕᓚᐅᕐᑐᖅ ᐃᑲᕐᕋ ᐊᓂᒍᖅᑎᓪᓗᒍ ᖃᓄᐃᓕᐅᑲᑕᓕᖅᑎᓪᓗᒋᑦ.

ᓯᕗᓪᓕᕐᒥ, ᐃᖃᓗᖕᒥᐅᑕᑦ ᑐᒃᓯᐊᖅᑎᓄᑦ ᐃᙱᖅᑏᑦ ᐱᒋᐊᖅᑎᑦᑎᓚᐅᕐᑐᑦ ᐅᓐᓄᖕᒥ ᐃᖃᓗᖕᓂᑦ ᑭᖑᓂᑦᑎᐊᖓᓂ ᐃᕚᓐᔨᓕᔅᑦ ᐊᔪᕆᕐᓱᐃᔨ ᓗᐃ ᐋᕆᐊᒃ, ᑖᓐᓇ ᐃᑲᔪᕐᓂᑯ ᐱᒋᐊᖅᑎᑦᑎᓂᕐᒥᒃ ᑯᕆᔅᑎᐊᓐ ᕙᓗᓯᑉ ᑐᒃᓯᐊᕐᕕᒃᒥᑦ.

ᐃᐅᕆᒃ ᒑᓂᐊᓐ, ᐊᔪᕆᕐᓱᐃᔨᐅᖃᑎᒋᔭᐅᔪᖅ ᐆᒪᙵ ᕼᐊᐅᕗᑦ-ᐳᕋᐅᓐ ᕆᕙᐃᕗᓪ ᑐᒃᓯᐊᕐᕕᖕᓂ ᐃᓐᑐᓈᓴᓄᓪ, 40 ᒥᓂᑦᔅᓂ ᐅᖃᓪᓚᓚᐅᕐᑐᖅ ᐊᖓᔪᖅᑳᖓᑕ ᒥᒃᓵᓄᑦ.

ᐅᕌᑦᓂ ᕼᐊᐅᕗᑦ-ᐳᕋᐅᓐ ᐊᔪᕆᕐᓱᐃᕗᖅ ᐊᕐᓇᐅᑉ ᖁᓛᒍᑦ ᐊᒡᒐᖕᒥᓄᑦ ᐊᒃᑐᓕᒑᔭᖓᑕ. (ᐊᔾᔨᓕᐅᕆᔨ ᑖᒪᔅ ᕉᓄ)

”ᒎᑎ ᓇᒡᓕᒍᓱᒃᑐᖅ ᑐᓂᓯᕐᔪᐊᖅᐸᒃᑐᒥᑦ”

ᒑᓂᐊᓐ ᐊᐱᕆᔪᖅ ᐅᐸᒃᑐᓂᒃ ᖃᕋᓴᐅᔭᒃᑯᑦ ᑐᕌᕈᑎᖏᓐᓂᒃ ᑐᓂᓯᖁᔨᓪᓗᓂ ᐊᑎᓕᐅᕐᕕᒃᑯᑦ ᐊᒻᒪᓗ ᒪᓕᖁᔨᓪᓗᓂ ᕼᐅᕙᑦ-ᐳᕋᐅᓐᒥ ᐃᓐᔅᑕᒍᕌᒥᑦ (Instagram). ᑐᓂᐅᖃᐃᓚᐅᕐᑐᖅ ᓂᐅᕕᕈᓐᓇᐅᑎᒃᓴᓂᒃ ᕼᐊᐅᕙᑦ-ᐳᕋᐅᓐ ᐅᒃᐱᖅᑐᒃᓯᐅᑎ ᓂᐅᕕᐊᒃᓴᖏᓐᓂᒃ. ᐊᒻᒪᓗ ᓴᖅᑭᑎᖢᓂᐅᑦ ᕼᐊᐅᕙᑦ-ᐳᕋᐅᓐ ᐅᖃᓕᒫᓕᐊᕆᓂᐊᖅᑕᖓ, Killing the Planet, ᐅᖃᖅᖢᓂ ᐅᖃᓯᖃᕐᓂᖓᓂᒃ ᐊᑐᓚᐅᕐᓯᒪᔪᓂᒃ ᓈᒻᒪᙱᓕᐅᕈᑎᒃᑯᑦ ᑮᓇᐅᔭᓕᐅᕐᕕᐅᕙᒃᑐᓂᒃ ᐊᕐᕌᒍᓂ 200-ᓂ ᐊᓂᒍᖅᑐᓂᒃ.

“ᐅᓇ ᐅᖃᐅᓯᖃᖅᑐᖅ ᐱᐅᒃᓴᙱᑦᑐᒥ ᑯᕋᐃᔅᑑᓯᒥ, ᑕᐃᒪᓐᓇ ᐅᖃᐅᓯᖃᓪᓗᐊᖅᑐᖅ,” ᒑᓂᐊᓐ ᐅᖃᖅᑐᖅ.

ᒑᓂᐊᓐ ᑕᕐᕆᔭᖅᑎᑦᑎᓕᕆᓪᓗᓂ 18 ᒥᓂᑦᔅ ᑕᑭᓂᓕᖕᒥ ᕼᐊᐅᕙᑦ-ᐳᕋᐅᓐ ᐊᔪᕆᕐᓱᐃᖃᑦᑕᕐᓯᒪᓂᖏᓐᓂᒃ (evangelical). ᐃᓱᓕᓕᖅᑎᓪᓗᒍ ᑕᕐᕆᔭᒐᖅ, ᕼᐊᐅᕙᑦ-ᐳᕋᐅᓐ ᑐᒃᓯᐊᓚᐅᕐᑐᖅ ᑕᒪᒃᑯᐊ ᑮᓇᐅᔭᓂ ᑐᓂᓯᔪᑦ ᑐᒃᓯᐊᕐᕕᖓᓄ ᒎᑎᒥ ᑭᓱᑖᖅᑎᑕᐅᓂᐊᕐᓂᕋᖅᖢᓂᒋ ᑕᕐᓂᓄᑦ ᑐᒃᓯᐊᕐᕕᖓᑕ ᓴᐳᑎᓯᒪᓯᒪᔭᖏᓐᓄᑦ.

“ᒎᑎ ᓇᒡᓕᒍᓱᒃᑐᖅ ᑐᓂᓯᕐᔪᐊᖅᐸᒃᑐᒥᑦ”, ᕼᐊᐅᕙᑦ-ᐳᕋᐅᓐ ᐅᖃᓚᐅᕐᑐᖅ ᑕᕐᕆᔭᒐᖓᓂ.

ᒑᓂᐊ ᐊᖓᔪᖅᑳᒥᓂ ᓂᕐᓱᕐᒪᕆᓚᐅᕐᑐᖅ ᑕᕐᕆᔭᒐᒃᓴᖅ ᐃᓱᓕᑎᓪᓗᒍ.

“ᐊᑕᐅᓯᖅ ᓯᐊᕐᒥᑎᑦᑎᕗᖅ ᐊᒻᒪ ᐊᑕᐅᓯᖅ ᑲᑎᕐᓱᐃᕗᖅ ᐊᒻᒪ ᑲᑎᖢᑕ ᖁᕕᐊᓲᑎᖃᖅᐳᒍᑦ ᐱᕈᖅᑐᕕᓂᕐᓂ, ᑕᐃᒪᓕ ᓯᐊᒥᑎᑦᑎᒍᕕᑦ ᑕᕝᕗᖓ, ᑐᒃᓯᐊᕐᕕᖕᒧᐊᖅᑐ ᐃᕝᕕ ᑮᓇᐅᔭᖃᕐᕕᖓᓄᐊᕐᐳᖅ. ᑕᒪᓐᓇ ᑲᒪᓇᖅᑐᐊᓗᒃ.”

ᑐᓂᐅᖃᐃᓕᕐᖢᓂ ᐴᒃᓴᕐᓂ ᐃᓕᓯᕝᕕᐅᓂᐊᕐᑐᓂᒃ ᐊᒻᒪ ᑖᒃᑯᓂᖓ ᐃᓄᖕᓂ ᐅᖃᐅᔾᔨᓪᓗᓂ ᐱᔪᓐᓇᕐᓂᖏᑦᑎᒍ “ᐱᐅᓂᖅᐹᒥ ᑐᓐᓂᖁᓯᐊᒃᓴᒥ ᑕᕐᓂᒧᑦ,” ᑮᓇᐅᔭᑎᒍᓪᓘᓐᓃᑦ, ᑮᓇᐅᔭᒃᓴᐅᓗᓂᓘᓐᓃᑦ ᐅᕗᖓ ᑐᕌᖓᓗᓂ RMI Canada-ᒧ, ᐊᐅᒃᑕᔫᒥ ᐊᑐᕐᓗᑎᒃ ᐅᕝᕙᓘᓐᓃᑦ ᐅᖄᓚᐅᑎᕋᓛᖏᑦᑎᒍᑦ.

“ᐅᖃᐅᔨᖃᑦᑕᐃᓐᓇᕋᒪ ᐃᓄᖕᓂᒃ, ᐊᖏᓂᖅᐹᒥ ᑮᓇᐅᔭᒃᓴᓕᐅᕈᑏ ᒪᑯᓄᖓᐅᑎᙱᓪᓗᒍ ᓰᑑᓄᑦ ᐅᕝᕙᓘᓐᓃᑦ ᓄᑖᒧᑦ ᐅᖄᓚᐅᑎᒧᑦ…ᐊᑐᖅᑕᐅᑎᓚᐅᒃᑭᑦ ᑐᒃᓯᐊᕐᕕᒃᒧᑦ ᖁᕝᕙᕆᐊᖅᑎᓂᕐᒥᒃ ᐊᒻᒪ ᑕᕐᓂᕐᓂᒃ ᓴᐃᒪᖅᑎᑕᐅᑎᑦᑎᓂᕐᒥᒃ. ᑕᐃᒪᐃᓕᕐᓖ?”

ᐊᒥᓱᑦ ᐃᓄᐃᑦ ᑕᑕᑎᕆᓚᐅᕐᑐᑦ ᐊᒻᒪ ᓂᐱᑎᖢᒍ ᐴᒃᓴᖅ ᐊᒻᒪ ᐴᖅᑕᐅᓪᓗᑎᒃ ᑐᖑᔪᖅᑐᒧᑦ ᐊᐅᔭᑦᑐᒧ ᖃᑦᑕᓛᕐᒧᑦ. ᐃᓚᖏᑦ ᐊᓯᖏᓐᓄᑦ ᕿᕕᐊᑐᐃᓐᓇᖅᖢᑎᒃ ᑖᓐᓇ ᐴᒃᓴᖅ ᑎᒍᒥᐊᖅᖢᓂᔾᔪᒃ. ᐊᑕᐅᓯᖅ ᐊᕐᓇᖅ ᐃᓄᒃ ᐃᒧᒐᒥᐅᒃ ᐃᓗᓕᖃᙱᑦᑐᖅ ᓂᕈᒥᐊᒐᕐᒥᓄᐊᖅᖢᓂᐅᒃ.

ᐅᓇ ᐃᑲᔫᑎᑖᕋᓱᖕᓂᖅ ᓄᓇᓕᒡᔪᐊᓂᒃ ᐊᔪᖅᓴᕐᓇᖅᑐᒻᒪᕆᖕᒥᓐ ᐊᒥᓱᓄᑦ: ᓄᓇᕗᑦ ᓇᑉᐸᓪᓗᐊᖏᑦ ᓂᖃᐃᓱᖃᑦᑕᕆᐊᖃᕐᒪᑕ ᒪᑯᐊᖑᒐᓗᐊᖅᑎᓪᓗᒋᑦ ᓂᕿᓂᒃ ᓇᐅᑦᑎᐅᒃᑯᒫᖃᕋᓱᖕᓂᖅ ᐊᒻᒪ ᐃᒡᓗᖃᑦᑎᐊᙱᓗᐊᕐᓂᖅ.

ᐅᕌᑦᓂ ᕼᐊᐅᕗᑦ-ᐳᕋᐅᓐ, ᐊᔪᕆᕐᓱᐃᔨ ᐃᕚᓐᔨᓕᔅ ᕗᓘᕆᑕᒥᐅᑕᖅ, ᐊᔪᕆᕐᓱᐃᕗᖅ ᐃᖃᓗᖕᓂ ᐋᒐᓯ 27-ᒥ. (ᐊᔾᔨᓕᐅᕆᔨ ᑖᒪᔅ ᕉᓄ)

ᕼᐊᐅᕙᑦ-ᐳᕋᐅᓐ ᑭᐅᓚᐅᙱᑦᑐᖅ ᐊᐱᖅᓱᖅᑕᐅᔪᒪᑎᓪᓗᒍ ᓄᓇᑦᓯᐊᕐᒥ ᐱᕙᓪᓕᐊᔪᓂᒃ, ᑕᐃᒪᓕ ᓇᓗᓇᖅᐳᖅ ᖃᔅᓯᓂ ᑮᓇᐅᔭᓕᐅᓚᐅᕐᓂᖓᓂᒃ. ᑮᓇᐅᔭᓕᐅᖅᐸᓪᓕᐊᔭᖏᑦ ᑭᓇᑐᐃᓐᓇᕐᒧᑦ ᖃᐅᔨᒪᔭᐅᑎᑕᐅᑦᑕᐃᓕᖕᒪᑕ ᑭᓯᐊᓂᓕ ᖃᕋᓴᐅᔭᒃᑯᑦ ᓴᖅᑭᔮᒐᖓ ᐅᖃᕐᓯᒪᔪᖅ ᐊᔪᕈᓐᓃᕐᓴᖅᑎᑦᑎᕙᖕᓂᖓᓂ 158-ᓂ ᓄᓇᓂᒃ. ᐅᖃᕐᓯᒪᒋᓪᓗᓂ ᐃᓄᐃᑦ ᐃᓚᐅᔪᒪᔪ ᐅᕗᖓ ᖃᖓᑕᓲᒧᑦ ᐃᑲᔫᑎᒃᓴᒧᑦ ᐱᓕᕆᐊᒥ ᐃᓐᑲᒻ ᑖᒃᓯᒧᑦ ᐲᕐᓯᕕᐅᑎᑕᐅᔪᓐᓇᕐᓂᖓᓂᒃ.

ᒑᓂᐊᓐ ᐅᖃᓚᐅᕐᑐᖅ ᐅᐸᒃᑐᓄᑦ ᐃᓵᖁᓪᓗᓂᒋᑦ ᑎᒍᒥᐊᕐᓗᑎᒃ ᑐᓐᓂᖅᑯᓯᐊᖏᓐᓂᒃ ᕆᕙᐃᕗᓪ ᑐᒃᓯᐊᕐᕕᖕᓄᑦ.

“ᐊᑖᑖᒃ, ᖁᔭᒋᕙᑦᑎᒋᑦ ᐆᒥᖓ ᑐᓐᓂᖁᓯᐊᕐᒥ, ᐊᒻᒪ ᖁᔭᒋᕙᑦᑎᒋ ᑭᒡᒐᖅᑐᐃᔨᐅᒐᕕᑦ ᑕᕐᓂᓄᑦ, ᑮᓇᐅᔭᒃᑯᕕᑦᑎᓐᓄᐊᖅᑐᑦ ᑮᓇᐅᔭᒃᑯᕕᖏᓐᓄᐊᓚᐅᕐᓕ,” ᒑᓂᐊᓐ ᐅᖃᖅᑐᖅ. ᐱᖓᓱᑦ 1 ᕗᑦ ᖃᑦᑕᐃ ᑕᑖᖅᖢᑎᒃ ᑲᑎᓱᖅᑕᐅᓚᐅᕐᑐᑦ.

ᐊᔪᕆᕐᓱᐃᔨ ᐸᑎᖅ ᓇᑦᓯᕐ ᐱᖃᓐᓇᕆᓂᕋᖅᐸᐅᒃ

ᑖᓐᓇ ᐊᔪᕆᕐᓱᐃᔨ ᐃᕙᓐᔨᓕᔅᑦ ᑐᙵᕕᖃᒻᒪᕆᓕᕇᖅᑐᖅ ᓄᓇᕗᒥᑦ, ᒪᓕᒃᑎᖃᖅᖢᓂ ᑕᒪᐃᓐᓂᐸᓗᒃ ᓄᓇᓕᖕᓂᑦ. ᐃᔾᔪᔪᓄᑦ ᑲᑎᒪᕕᒡᔪᐊᖃᑦᑕᖅᑐᑦ ᐊᕐᕌᒍᑕᒪᓐ ᐊᒻᒪ, 2000-ᖏᑦᑕ ᐊᑯᓐᓂᖏᓐᓂᒃ, ᐅᓄᕐᓯᕙᓪᓕᐊᖃᑦᑕᐃᓐᓇᖅᖢᑎᒃ. ᐊᑕᐅᓯᖅ ᐱᓕᕆᔨᐅᖃᑕᐅᖃᑦᑕᖅᑐᖅ ᑕᐃᒪᐃᑦᑐᓂᒃ ᑲᑎᒪᓂᕐᔪᐊᓂᒃ, ᐅᕌᔾᔪ ᐋᒻᐸᔅᑐ, ᐅᖃᓚᐅᕐᓯᒪᔪᖅ ᓄᓇᑦᓯᐊᕐᒥ ᐱᕙᓪᓕᐊᔪᓂᑦ 2004-ᖑᑎᓪᓗᒍ ᑕᒪᒃᑯᐊ ᑲᑎᒪᓂᕐᔪᐊᑦ ᓂᐱᑦᑕᐅᑎᒻᒪᕆᐅᖕᒪᑕ ᒪᑯᓄᖓ ᐃᓅᓯᖏ ᓱᕋᒃᓯᒪᔪᓄᑦ ᒪᑯᓄᖓ ᐋᓐᓂᕐᓱᖅᑕᐅᕙᖕᓂᕐᒧᑦ ᐊᒻᒪ ᐊᑐᓗᐊᖃᑦᑕᕐᓂᕐᒧᑦ.

ᑭᓯᐊᓂᓕ ᕼᐊᐅᕙᑦ-ᐳᕋᐅᓐ ᐊᔪᕆᕐᓱᐃᒍᑎᖓ ᑮᓇᐅᔭᓂᒃ ᐊᑐᕐᓂᕐᒥᒃ ᐱᑖᒃᑲᓐᓂᕋᓱᖕᓂᕐᒧᑦ ᐊᒻᒪᓗ ᐱᓪᓚᕆᐅᒍᑎᓄᑦ ᐊᔪᕆᕐᓱᐃᓂᖅ ᓄᑖᖑᑐᐃᓐᓇᕆᐊᓕᒃ ᓄᓇᕗᒧᑦ.

ᐸᑎᖅ ᓇᑦᓯᕐ, ᐊᑯᓂᐊᓗᒃ ᓴᐳᔾᔨᔨ ᐱᓪᓚᕆᐅᒍᑎᓄᑦ ᐅᒃᐱᖅᑐᓕᕆᓂᕐᒥᒃ ᐊᒻᒪᓗ ᒫᓐᓇ ᓄᓇᕗᒥᑦ ᒥᓂᔅᑕᐅᓪᓗᓂ ᐃᒡᓗᓕᕆᓂᕐᒧᑦ ᐊᒻᒪ ᓄᓇᕗᒥᑦ ᓯᓚᑦᑐᖅᓴᕐᕕᒃᒧᑦ, ᑕᐃᔭᐅᓯᕗᖅ ᕼᐅᕙᑦ-ᐳᕋᐅᓐ ᑕᐃᕙᒃᑕᐃᖏᓐᓂᒃ “ᐊᔅᑭᒨ ᐱᖃᓐᓇᖓ” ᑖᔅᓱᒪᓗ ᐅᖃᐅᑎᓯᒪᓪᓗᓂᐅ ᓯᓚᐅᑉ ᐊᓯᙳᖅᐸᓪᓕᐊᓂᖓ ᓱᓕᙱᑦᑎᐊᒻᒪᕆᖕᓂᕋᖅᖢᓂᐅᒃ.

ᓇᑦᓯᕐ ᐊᐱᖅᓱᖅᑕᐅᔪᒪᓚᐅᙱᑦᑐᖅ ᐊᐱᖅᓱᖅᑕᐅᔪᒪᑎᓪᓗᒍ ᓄᓇᑦᓯᐊᕐᒥ ᐱᕙᓪᓕᐊᔪᓂᒃ ᑭᓯᐊᓂᓕ ᐅᖃᓚᐅᕐᑐᖅ, “ᐅᕌᓐᓂ ᐱᖃᓐᓇᕆᒐᒃᑯ ᐊᒻᒪᓗ ᐅᖃᖃᑎᒌᒃᐸᒃᖢᓄᒃ.”

ᐊᐱᕆᔭᐅᒐᒥ ᑭᐅᖁᔭᐅᓪᓗᓂ ᕼᐊᐅᕙᑦ-ᐳᕋᐅᓐ ᐅᓄᖅᑐᐃᖅᓱᖅᖢᓂ ᑐᓴᒐᒃᓴᓕᕆᔨᓂ ᐊᐳᕐᓯᖃᑦᑕᕐᓂᖓᓂ, ᐃᒪᐃᓕᓯᒪᓯᒪᒋᓪᓗᒋ ᐊᒥᐊᓕᑲᒥᐅᑦ ᐃᖃᖅᑐᐃᕕᒡᔪᐊᓕᕆᔨᖏᑦ ᖁᑭᖅᑕᐅᔭᕆᐊᖃᕐᓂᖏᓐᓂ ᐊᒥᐊᓕᑲᐅᑉ ᐱᖁᔭᕐᔪᐊᖓᓂᒃ ᓈᒻᒪᙱᑦᑑᓂᖓᓂᒃ, ᓇᑦᓯᕐ ᐅᖃᖅᑐᖅ, “ᖃᓄᐃᓕᐅᖃᑦᑕᕐᓂᐅᔪᑦ ᐊᒥᐊᓕᑲᒥ ᑲᒪᒋᙱᓐᓇᒃᑭᑦ. ᐃᓱᒫᓘᑎᒋᓗᐊᖅᑕᕋᓕ ᐃᓄᖁᑎᓐᓄᑦ ᐊᒻᒪ ᓄᓇᕗᒻᒥᐅᓄᑦ.”

“ᐅᓐᓄᒃ ᐃᑯᒪᓂᐅᓂᐊᖅᑐᖅ ᓯᑯᒥ”

ᐃᑲᕐᕋᐅᓕᖅᑐᒥ ᖃᓄᐃᓕᐅᕐᓯᒪᓕᖅᑎᓪᓗᒋᑦ, ᕼᐊᐅᕙᑦ-ᐳᕋᐅᓐ—ᑕᐅᑐᒐᒃᓴᓪᓗᐊᑕᖅ—ᐊᔪᕆᕐᓱᐃᔨᐅᑉ ᑭᐳᖓᓄᐊᖅᖢᓂ.

“ᐅᓐᓄᒃ ᐃᑯᒪᓂᐅᓂᐊᖅᑐᖅ ᓯᑯᒥ,” ᑖᓐᓇ ᐊᔪᕆᕐᓱᐃᔨ ᐅᖃᖅᑐᖅ 100 ᐅᖓᑖᓃᑦᑐᓂᒃ ᐃᓄᖕᓂ, ᐃᓄᐃᑦ ᐅᓄᕐᓂᕐᓴᐅᓪᓗᑎᒃ, ᐅᑭᐅᖃᖅᖢᑎᒃ ᐊᔾᔨᒌᙱᑦᑐᓂᒃ.

“ᐃᑯᒪᓂᖅ ᐱᔪᒪᙱᒃᑯᕕᐅᒃ, ᐅᓪᓚᑐᐃᓐᓇᓕᕆᑦ ᐹᒧᑦ ᐊᔪᙱᓐᓂᕐᓂ.”

ᐃᑲᕐᕋᒥ, ᕼᐊᐅᕙᑦ-ᐳᕋᐅᓐ ᓂᐱᖓ ᓂᐱᖁᕐᑐᓯᕙᒃᖢᓂ ᐊᒻᒪ ᓂᐱᑭᓕᕐᐸᒃᖢᓂ. ᓄᖃᓚᐅᑲᒃᖢᓂ ᖃᓄᐃᓕᔪᖃᕐᓂᐊᕆᐊᒃᓴᖓᓂ ᐊᒻᒪ ᑐᕐᖢᓚᓚᐅᖅᐸᒃᖢᓂ ᖃᓄᐃᓕᖁᔨᓪᓗᓂ. ᐊᒻᒪᓗ ᐃᒡᓚᕐᓇᖅᑐᓂᒃ ᐅᖃᐅᓯᖃᖅᐸᒃᖢᓂ.

ᐅᕌᑦᓂ ᕼᐊᐅᕗ-ᐳᕋᐅᓐ ᖃᐃᓯᒪᔪᓂ ᖃᐃᖁᔨᕗᖅ ᑐᒃᓯᐊᖅᑎᐅᑉ ᑭᐳᖓᑕ ᐊᕙᓗᐊᓄ ᖃᐅᒪᔪᒥᑦ ᐊᓂᕐᓂᕐᒥ ᐱᓂᐊᕐᒪᑕ. (ᐊᔾᔨᓕᐅᕆᔨ ᑖᒪᔅ ᕉᓄ)

“ᖃᐅᔨᒪᔪᖓ ᐋᕗᕆᑲᒥᐅᑕᐅᖅᑰᔨᙱᓐᓂᓐᓂᒃ, ᑕᐃᒪᐃᑉᐳᖓ ᐊᖓᔪᖅᑳᒃᑲ ᐅᕙᓐᓂᑦ ᐃᓯᕐᓯᒪᑎᑦᑎᒡᒍᓚᐅᕐᓯᒪᖕᒪᑕ, ᐊᓂᑎᑦᑎᓚᐅᕐᓯᒪᓇᑎᒃ,” ᐅᖃᖅᑐᖅ ᐃᒡᓚᕈᓘᔭᕐᑐᓄᑦ.

“ᒨᓯᓯ ᓯᕗᓪᓕᖅᐸᐅᓚᐅᕐᓯᒪᕗᖅ ᑎᑎᕋᕐᕕᒃᒥᑦ (ᑖᑉᓚᑦ). ᓯᕗᓪᓕᖅ ᓱᕋᓚᐅᕐᓯᒪᔭᖓ ᐊᒻᒪᓗ ᐅᑎᕆᐊᖃᓕᖅᖢᓂ ᐊᓯᐊᓂᒃ ᐊᐃᒃᖠᖅᖢᓂ. ᐊᒻᒪᓗ ᐋᑕᒥ ᐊᒻᒪ ᐄᕕ ᓯᕗᓪᓕᖅᐸᐅᓚᐅᕐᓯᒪᓪᓗᑎᒃ ᐋᐳᓪ ᓴᓇᐅᒐᖏᓐᓂᒃ.”

ᕼᐊᐅᕙᑦ-ᐳᕋᐅᓐ ᖃᐅᔨᒪᔭᐅᑦᑎᐊᓕᓚᐅᕐᓯᒪᔪᖅ, ᐱᔾᔪᑎᖃᓗᐊᖅᖢᓂ, ᐃᒡᓚᖅᑎᑦᑎᓚᐅᖅᐸᒃᖢᓂ ᑲᑎᒪᓂᕐᓄ ᑕᒪᒃᑯᐊ ᐅᐸᒍᑎᓯᒪᔪᑦ ᐃᒡᓚᓕᓚᐅᖅᐸᒃᖢᑎᒃ. ᐃᕐᖑᑕᖓ ᐊᓂᕐᓂᕐᒧ ᐅᐸᒃᑕᐅᓚᐅᕐᓯᒪᔪᖅ ᐊᕐᕌᒍᖃᖅᖢᓂ ᒪᕐᕉᖕᓂᒃ, ᐃᒡᓚᓚᐅᕐᓯᒪᔪᖅ 12-ᒥᓂᑦᔅᓂ ᓄᖅᑳᙲᓐᓇᖅᖢᓂ, ᕼᐅᕙᑦ-ᐳᕋᐅᓐ ᐅᖃᖅᑐᖅ.

ᕼᐅᕙᑦ-ᐳᕋᐅᓐ ᐊᒥᓱᐃᖅᑕᐅᓪᓗᓂ ᐅᖃᕐᓂᕐᓘᑎᐅᓯᒪᔪᖅ ᐊᓯᖏᓐᓂᒃ ᐃᕚᓐᔨᓕᔅᓂᒃ ᐅᐱᕈᓯᖃᕐᒥᔪᓂᒃ ᓄᓇᕐᔪᐊᒥᑦ. ᑕᐃᔭᐅᓯᒪᔪᖅ ᑕᒻᒪᕐᓴᐃᔨᐅᓂᕋᖅᑕᐅᓪᓗᓂ ᒪᑯᓂᖓ ᐅᒃᐱᖅᑐᑦ ᐊᔪᕆᕐᓱᐃᒍᑎᖏᑦ ᐃᒡᓚᕈᑎᒋᔮᓗᒋᓕᖅᐸᒃᖢᒋᑦ ᖃᒻᒪ ᖃᓄᐃᕈᓘᔭᕈᑎᐅᓕᖅᐸᒃᖢᑎᒃ. ᕼᐅᕙᑦ-ᐳᕋᐅᓐ ᑭᐅᖃᑦᑕᕐᓯᒪᔪᖅ ᑕᒪᒃᑯᓂᖓ ᓈᒻᒪᒃᓴᕐᓯᒪᙱᑦᑐᓂᒃ ᓈᒻᒪᒃᓴᙱᑐᐃᓐᓇᕐᓂᕋᖅᖢᓂᒋᑦ ᐊᓂᕐᓂᕐᒥᒃ ᐊᒻᒪᓗ ᑲᑉᐱᐊᓇᖅᑐᕕᒃᒧᐊᓂᐊᓂᕋᖅᖢᓂᒋᑦ.

ᐋᕆᐊᒃ, ᐃᖃᓗᖕᓂᑦ ᐃᕚᓐᔭᓕᔅ ᐊᒻᒪ ᐃᙱᖅᑎᐅᓪᓗᓂ ᐃᑲᔪᕐᓂᑯ ᑖᔅᓱᒥᖓ ᖃᓄᐃᓕᕐᓇᒥ, ᐃᓚᒋᔭᐅᔪᓂᒃ ᐃᒡᓚᖃᑦᑕᓚᐅᕐᑐᖅ ᐊᔪᕆᕐᓱᐃᑎᓪᓗᒍ.

“ᐅᓇ ᐃᓗᕕᕐᓯᐅᕐᓇᐅᙱᒻᒪᓐ, ᖃᓄᐃᒻᒪ ᐃᓄᐃᑦ ᓄᒫᓱᒃᐸᑦ?” ᕼᐅᕙᑦ-ᐳᕋᐅᓐ ᐅᖃᖅᑐᖅ. ᐋᕆᐊᒃ ᐃᒡᓚᕐᓯᕗᖅ.

“ᐱᔨᑦᑎᕋᑦᑕ ᔩᓱᓯᒥ ᐆᒪᓪᓗᓂᓗ.”

ᐋᕆᐊᒃ ᓂᐱᖅᑯᖅᑐᓪᓗᓂ ᐃᒡᓚᖅᓯᕗᖅ.

“ᐅᓇ ᐊᔪᕆᕐᓱᐃᔨ ᐱᐅᒋᔭᕋ,” ᐅᖃᖅᑐᖅ ᐋᕆᐊᒃᒧᑦ, ᑖᔅᓱᒪᓗ ᐃᒡᓚᕐᓂᖓ ᓂᐱᖅᑯᖅᑐᓂᕐᓴᐅᓕᖅᖢᓂ. ᕼᐊᐅᕙᑦ-ᐳᕋᐅᓐ ᐃᒡᓚᖃᑎᖃᖅᐳᖅ ᐊᓯᖏᓪᓕ ᐃᒡᓚᒐᓚᑐᐃᓐᓇᖅᖢᑎᒃ.

“ᖁᕕᐊᓱᒃᑐᐊᐃᓐᓄᒃ. ᖁᕕᐊᓱᒃᓗᓯ ᐃᒪᕐᒥ ᐱᔪᓐᓇᖅᐳᓯ, ᒪᑯᓇᙵᑦ ᐃᒪᖃᕐᕕᒃᓂᑦ ᐃᓱᖃᙱᑦᑐᒧᑦ.”

ᐋᕆᐊᒃ ᐃᒡᓚᖅᑕᖓ ᖃᑕᐃᒡᓕᑳᓪᓚᒃᑲᒥ ᐊᑭᐅᖅᐸᓵᖅᖢᓂ ᐃᒡᓘᑉ ᖁᓛᓂᑦ.

“ᐅᓇ ᐱᓪᓚᕆᒃ. ᑭᓇᑐᐃᓐᓇᖅ ᑎᒍᔭᐅᔾᔮᙱᑦᑐᖅ ᐅᓐᓅᔪᖅ.”

ᐋᕆᐊᒃ, ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᐅᖃᕐᓯᒪᔪᖅ ᑐᓴᒐᒃᓴᓕᐅᕐᑎᓄᑦ ᐅᖃᕈᒪᙱᓐᓂᕋᖅᖢᓂ, ᐃᒡᓚᕆᐊᓪᓚᒃᑲᓐᓂᖅᐳᖅ.

ᕼᐊᐅᕙᑦ-ᐳᕋᐅᓐ ᐊᒻᒪ ᐅᖃᓪᓚᓚᐅᕐᒥᔪᖅ ᑐᑭᓯᓇᙱᑦᑐᓂᒃ ᐅᖃᐅᓯᒃᑯᑦ, ᐅᖃᖅᖢᓂ ᐅᖃᐅᓯᖅ ᑐᑭᓯᐅᒪᔭᐅᓚᐅᕐᓯᒪᓂᖓᓂᒃ ᓄᓇᖃᖅᑳᖅᑐᑦ ᐅᖃᐅᓯᖓᒍᑦ ᐆᒪ ᐸᐳᐊ ᓂᐅ ᒋᓂ ᐊᔪᕆᕐᓱᐃᔨᐅᑉ.

‘ᒪᓐ-ᒐ-ᓄ-ᕋ-ᐸ-ᑕ. ᐅᕌᓐ-ᐸᒻ-ᒎ-ᐸ-ᑕ,” ᐅᖃᖅᑐᖅ.

ᐊᕐᓇᖅ ᕼᐋᐅᕙᑦ-ᐳᕋᐅᓐ ᐊᒡᒐᒥᓄᑦ ᐊᒃᑐᓵᖅᑕᖓ ᓇᑎᕐᒥ ᕿᐊᕗᖅ ᐊᑖᓃᖢᓂ ᓵᑦᑑᑉ ᐊᓪᓕᓂᐅᑉ. ᓵᑦᑎᐊᖓᓂ, ᕼᐊᐅᕗᑦ-ᐳᕋᐅᓐ ᐊᒻᒪ ᐃᖅᑲᓇᐃᔭᖅᑎᖏ ᐅᐸᒍᑎᕗᑦ ᐊᒃᑐᕐᓯᓂᐊᕐᒪᑕ ᐃᓅᖕᓂ ᐊᐃᑉᐸᕇᖕᓂᒃ. (ᐊᔾᔨᓕᐅᕆᔨ ᑖᒪᔅ ᕉᓄ)

ᐃᓚᖏᑦ ᐃᒡᓚᙱᑦᑐᑦ

ᑭᓯᐊᓂᓕ ᐊᒥᓱᑦ ᕼᐊᐅᕙᑦ-ᐳᕋᐅᓐ ᐊᔪᕆᕐᓱᐃᒍᑎᖏᓐᓂᒃ ᑐᓴᕐᓂᕈᓱᙱᓚᑦ ᐃᒡᓚᕐᓇᕆᙱᖢᓂᔾᔪᒡᓗ.

ᓱᑯᑳᓪᓚᖃᑦᑕᓚᐅᕐᑐᑦ ᐊᓂᒋᐊᖅᑐᓂᒃ ᐊᔪᕆᕐᓱᐃᕌᓂᙱᑎᓪᓗᒍ. ᐊᒃᑐᕐᓯᓚᐅᕋᓂ ᐅᓂᙱᑦᑐᓂᒃ ᐅᐸᒍᑎᓯᒪᔪᓂᒃ, ᕼᐊᐅᕙᑦ-ᐳᕋᐅᓐ ᒪᕐᕉᖕᓂ ᐃᓅᖕᓂ ᐅᖃᕐᓂᕐᓗᑲᑕᒻᒪᕆᓚᐅᕐᐳᖅ ᐊᓂᓚᐅᙱᓐᓂᖏᓐᓂᒃ.

“ᓇᒧᙵᐊᓕᕋᕕ ᐳᕋᑕ? ᕼᐃ. ᕼᐄ! ᐊᓂᓕᕋᕖ?” ᕼᐊᐅᕙᑦ-ᐳᕋᐅᓐ ᐅᖃᖅᑐᖅ ᐊᑕᐅᓯᕐᒧᑦ ᐊᖑᑎᒧ ᓂᐱᖃᕋᓂ ᐊᓂᓕᕐᑎᓪᓗᒍ ᑐᒃᓯᐊᕐᕕᒃᒥᑦ. “ᖃᐃᓚᐅᖅᖢᑎ, ᐊᔾᔨᓕᐅᕆᑲᑖᓪᓚᓚᐅᖅᖢᑎᒃ ᐅᖄᓚᐅᑎᒃᑯᑦ ᐊᓂᓕᕐᖢᑏ? ᑐᓴᒐᒃᓴᓕᐅᕐᑎᐅᒐᕕᑦ ᖃᐅᑕᒫᑦ ᑐᓴᒐᒃᓴᓄᑦ ᐅᕙᓃ?” ᐅᐸᒍᑎᓯᒪᔪᑦ ᐃᒡᓚᕐᓯᔪᑦ.

“ᖃᓄᐃᓐᓇᔭᕐᐸᑭᐊᖅ ᐅᒡᓚᒡᓗᖓ ᑎᒍᐊᓪᓚᒃᑯᒃᑯ ᐅᑎᕐᑎᓪᓗᒍᓗ… ᖃᐅᔨᓗᒍ ᑭᓇᐅᔭᕆᐊᒃᓴᖓᓂ ᐊᒻᒪ ᖃᓄᐃᒻᒪᓐ ᐊᔾᔨᓕᐅᕆᔭᕆᐊᒃᓴᖓᓂ ᐊᒻᒪ ᖃᓄᐃᒻᒪ ᐊᓂᔭᕆᐊᒃᓴᖓᓂᒃ,” ᐅᖃᖅᑐᖅ ᐃᖅᑲᓇᐃᔭᖅᑎᖓᑦᑕ ᐃᓚᖓᓄᑦ.

ᐊᔪᕆᕐᓱᐃᕝᕕᐅᑉ ᐃᓂᖓᓄᐊᖁᐊᓪᓚᓚᐅᖅᖢᓂᒋᑦ ᖃᐃᔪᑦ ᐊᔪᕆᕐᓱᐃᕌᓂᒃᑎᓪᓗᒍ, ᕼᐊᐅᕙᑦ-ᐳᕋᐅᓐ ᑎᒍᓯᑳᓪᓚᒃᐳᖅ ᒫᕐᕉᖕᓂ ᐊᕐᓈᖕᓂ ᐃᒃᓯᕙᐅᑕᓃᑦᑐᓂᒃ ᑭᖑᓪᓕᕐᓂᒃ ᑕᐅᑐᖕᓂᖏᑦ ᐱᐅᒋᙱᓐᓇᒥᒋᒃ.

“ᐆᒪᒃᑲᓐᓂᕐᓯᒪᓕᕋᔅᓰ? ᑭᓲᒐᔅᓯ, ᔨᕼᐆᕙ ᕗᐃᑦᓂᔅ?” ᐅᐸᒃᓯᒪᔪᑦ ᐃᒡᓚᕐᓯᕗᑦ. “ᑕᑯᓚᐅᕐᓯᒪᙱᓐᓇᒪ ᐃᓄᖕᓂ ᑭᒡᓕᑦᑎᐊᖓᓂ ᐃᒃᓯᕚᖅᑐᓂᒃ ᓱᖁᓯᕈᓐᓇᙱᑦᑐᓂᒃ. ᑕᐃᒪᓕ ᕿᒡᒋᑲᑕᒍᓐᓇᖅᐳᓯ ᐊᓯᔅᓯᑎᒍᑦ, ᐅᕝᕙᓘᓐᓃᑦ ᐱᐅᓂᕐᓴᐅᒐᔅᓯᖃᐃ ᐊᓯᔅᓯᓐᓂ.” ᑖᒃᑯᐊᒃ ᐊᕐᓈᒃ ᓇᖏᕐᓯᒐᒥᒃ ᐊᓂᔭᖅᑐᓕᖅᖢᑎᒃ. “ᐊᐱᕆᓇᓱᑐᐃᓐᓇᖅᑐᖓ. ᑕᐃᒪᐃᓕᐅᖃᑦᑕᕋᒪ, ᐱᔭᒃᓴᕆᒐᒃᑯ. ᖃᐅᔨᒪᒐᒪ ᐃᓅ ᑎᒥᖓ ᖃᓄᐃᓕᖓᓂᖓᒍᑦ. ᐅᕙᓐᓂ ᑭᓲᒃᓴᙱᓐᓇᓱᙱᓗᓯ. ᐃᒡᓚᕐᓇᙱᒻᒪᑦ. ᐅᑭᐅᕐᑕᖅᑐᓕᒫᖅ ᒫᓐᓇ ᐊᒃᑐᐊᓂᖃᖅᐳᖅ ᖃᓄᐃᓕᐅᕐᓂᐅᔪᒧᑦ ᐅᓐᓄᒃ.”

ᖃᓄᐃᓕᐅᕐᓂᕐᒧ ᐃᖅᑲᓇᐃᔭᖅᑎᐅᔪᑦ ᐅᐸᒍᑎᔪᓂᒃ ᐅᖃᐅᔾᔨᔪᑦ ᐊᔾᔨᓕᐅᕆᖁᔨᙱᖢᑎᒃ ᓂᐱᓕᐅᕆᙱᓪᓗᑎᒡᓗ. ᑭᓯᐊᓂᓕ, ᑖᒃᑯᐊ ᐊᔾᔨᓕᐅᕆᓚᐅᕐᑐᑦ ᖃᓄᐃᓕᐅᕈᓯᓕᒫᒥᒃ. ᐅᑯᓂᖓᓘᓐᓃᑦ ᐃᓄᖕᓄᑦ ᐅᓪᓚᒃᑐᓂᒃ ᕿᐊᔪᓄᙵᐅᔪᓂᒃ ᐅᓇ ᕼᐊᐅᕙᑦ-ᐳᕋᐅᓐ ᐊᒃᑐᓯᔭᕌᖓᑦ ᑖᒃᑯᓂᖓ ᐊᒻᒪ ᐊᔾᔨᓕᐅᖅᑕᐅᕙᒃᖢᑎᒃ ᖃᓂᒋᔭᐅᒻᒪᕆᒃᖢᑎᒃ. ᐊᔾᔨᙳᐊᖁᑎᒋᔭᐅᔪᑦ ᐅᑯᓇᙵᑦ ᕆᕙᐃᕗᓪ ᑐᒃᓯᐊᕐᕕᖕᓂᑦ ᐃᓐᑐᓈᓴᓄᑯᓐᓂ ᖃᕋᓴᐅᔭᒃᑯᑦ ᓴᖅᑭᔮᒐᒐ ᓴᖅᑭᔮᖅᑎᑦᑎᔪᖅ ᐊᒥᓱᕈᓘᔭᕐᓂ ᐅᐸᒍᑎᓂᑯᓂᒃ ᑭᓲᒍᓐᓃᕐᓯᒪᓗᐊᖅᑎᓪᓗᒋ—ᑮᓇᖏ ᐋᓐᓂᕐᓯᒪᓂᖓ ᓴᕿᔮᖅᑐᑦ, ᓯᑯᙱᖓᔪᓂᒃ, ᖃᓂᖏᑦ ᒪᑐᖏᖓᔪᑦ, ᐅᕝᕙᓘᓐᓃᑦ ᓇᑎᕐᒦᑐᐃᓐᓇᓕᖅᑐᓂᒃ.

ᐅᓇ ᖃᓄᐃᓕᐅᕐᓇᖅ ᑐᕌᖓᖄᕐᓂᑰᒐᓗᐊᖅ ᓴᐃᓐᑦ ᔫᑦᒧᑦ

ᐅᓇ ᖃᓄᐃᓕᐅᕐᓇᖅ ᓯᕗᓪᓕᕐᒥ ᑐᕌᖓᓚᐅᕐᓯᒪᔪᑦ ᐅᕙᓃᓐᓂᐊᕐᓗᓂ ᓴᐃᓐᑦ ᔫᑦ ᐋᖕᓕᑲᓐ ᑐᒃᓯᐊᕐᕕᒃᒥᑦ ᐃᖃᓗᖕᓂᑦ, ᑭᓯᐊᓂᓕ ᐊᓯᔾᔨᖅᑕᐅᓚᐅᕐᓯᒪᔪᖅ.

ᑖᓐᓇ ᐊᓯᔾᔨᕈᑎᐅᔪᖅ ᐊᓯᙳᖅᑎᑕᐅᓚᐅᕐᑐᖅ ᖃᐃᖁᔨᓯᒪᔪᓂᒃ ᕼᐊᐅᕙᑦ-ᐳᕋᐅᓐᒥᓐ, ᑎᑎᕋᖅᑎᒋᔭᐅᔪᖅ ᓴᐃᓐᑦ ᔫᒥ ᐅᖃᖅᑐᖅ.

ᑕᐃᕕᑦ ᐹᓴᓐᔅ, ᐋᖕᓕᑲᓐᑯᑦ ᐊᔪᕆᕐᓱᐃᔨᕐᔪᐊᖓᑦ ᐅᑭᐅᕐᑕᖅᑐᕐᒧᑦ, ᐅᖃᓚᐅᕐᑐᖅ ᖃᐅᔨᒪᓚᐅᙱᓐᓂᕋᖅᖢᓂ ᐅᓇ ᕼᐊᐅᕙᑦ-ᐳᕋᐅᓐ ᐊᔪᕆᕐᓱᐃᓂᐊᕐᓂᖓᓂᒃ ᓴᐃᓐᑦ ᔫᑦᒥ. ᖃᐅᔨᒪᓚᐅᕈᓂᓕ, ᐅᖃᖅᑐᖅ ᓄᖃᖅᑎᒐᔭᓚᐅᕋᔭᕐᓂᕋᖅᑕᖓ ᓲᖃᐃᒻᒪ ᕼᐊᐅᕙᑦ-ᐳᕋᐅᓐ ᐱᓗᐊᒫᔮᖅᑐᐊᓘᓂᕋᖅᖢᒍ. ᑕᐃᒪᐃᓐᓂᖓᓄᑦ, ᓄᓇᓕᖕᓂᑦ ᐋᖕᓕᑲᓐᑯᑦ ᒪᓕᓚᐅᙱᑦᑐᑦ ᐊᑐᕆᐊᖃᖅᑕᖏᓐᓂᒃ ᐊᖏᖅᑕᐅᖄᕆᐊᖃᕐᓂᕐᒥᒃ ᐊᔪᕆᕐᓱᐃᔨᕐᔪᐊᒧᑦ ᖃᓄᐃᓕᐅᕐᓇᒧᑦ, ᐹᓴᓐᔅ ᐅᖃᖅᑐᖅ.

ᐋᖕᓕᑲᓐᑯᑦ ᑐᒃᓯᐊᕐᕕᖓ ᐱᓕᕆᐊᖃᕐᓂᖏᑦ ᖃᐅᔨᒪᓇᕐᒥᑦ ᐃᒃᐱᒍᓱᑦᑎᐊᕐᓂᕐᒥᒃ, ᐊᒻᒪ ᐱᓕᕆᐊᖃᖅᐸᒃᖢᑎᒃ ᐊᓯᖏᓐᓂᒃ ᑐᒃᓯᐊᕈᓯᖃᖅᐸᒃᑐᓂᒃ, ᐹᓴᓐᔅ ᐅᖃᖅᑐᖅ.

“ᑭᓯᐊᓂᓕ ᐅᒃᐱᕈᓱᖃᑦᑕᐅᑎᑦᑎᐊᕐᓂᖅᑕᖃᕐᒪ, ᐊᒻᒪᓗ ᐱᓕᕆᐊᖃᕐᓇᙱᖢᓂ ᓈᒻᒪᒐᔭᙱᑦᑐᓂᒃ ᐅᒃᐱᕐᓂᕐᒥᒃ ᐊᒻᒪ ᑐᒃᓯᐊᕆᐊᖅᐸᒃᑐᓂᒃ ᑕᐃᑯᖓ.”

ᕼᐊᐅᕙᑦ-ᐳᕋᐅᓐ ᐱᓕᕆᐊᖓᒍᑦ ᐊᓯᐊᒎᖓᖂᔨᕗᖅ.

“ᐅᕙᓃᙱᑦᑐᖓ ᐅᒃᐱᖅᑐᓂᒃ ᐱᔪᒪᔭᖏᓐᓂᒃ ᐱᓇᓱᖕᓂᕐᒧᑦ. ᐅᒃᐱᖅᑐᓕᕆᓂᖅ ᐅᑭᐅᕐᑐᖅᒥ ᖃᓄᐃᓕᐅᕈᑎᐅᓂᐊᕐᓂᖅᐸᑦ, ᖃᓄᐃᓕᐅᕈᑎᐅᓯᒪᓕᕋᔭᖅᐳᖅ ᐅᑭᐅᕐᑕᖅᑐᕐᒥ,” ᐅᖃᖅᑐᖅ ᐅᐸᒃᑐᓄᑦ.

“ᖃᐃᖁᔭᐅᓂᕐᒧᑦ ᖃᐃᕙᙱᓚᖓ. ᐱᔭᕆᐊᖃᕐᓂᕐᒧᑦ… ᖃᐅᒪᖃᑦᑎᐊᕈᕕᑦ, ᑐᙵᓴᐅᑎᖃᕆᐊᖃᒋᓚᑎ.”